“Bisan Tibuok Impyerno Maningkamot,” kapitulo 32 sa Mga Santos: Ang Istorya sa Simbahan ni Jesukristo sa Ulahing mga Adlaw, Volume 1, Ang Sumbanan sa Kamatuoran, 1815–1846 (2018)
Kapitulo 32: “Bisan Tibuok Impyerno Maningkamot”
Kapitulo 32
Bisan Tibuok Impyerno Maningkamot
Sa tunga-tunga sa Nobyembre 1838, ang mga Santos sa Far West nag-antus sa kagutom ug kalisud. Ang militia sa Missouri miguba sa mga panimalay ug mihurot sa kadaghanan sa mga suplay sa pagkaon sa siyudad. Ang nahabilin nga mga lagutmon sa mga umahan nikaging.1
Si Heneral John Clark, kinsa mipuli ni Heneral Lucas isip pangulo sa mga pwersa sa Missouri didto sa Far West, wala nay simpatiya sa mga Santos kay sa iyang gipulihan.2 Giakusahan niya sila nga mao ang nagpasiugda ug wala motuman sa balaod. “Kamo ra ang nagdala niining kalisdanan sa inyong kaugalingon,” iya silang gisultihan, “pinaagi sa pagrebelde ug sa dili pagpaubos sa lagda.”
Kay ang tingtugnaw hapit na man moabut kanila, miuyon si Heneral Clark nga tugutang magpabilin ang mga Santos sa Far West hangtud sa tingpamulak. Apan gitambagan niya sila nga mobiya human niana. “Ayaw na gayud kamo pag-organisar sa inyong kaugalingon uban sa mga bishop ug mga presidente,” mipasidaan siya, “aron malikayan ang kasina sa mga tawo ug mapaubos ang inyong kaugalingon sa samang mga katalagman nga miabut kaninyo karon.”3
Ang kahimtang didto sa Hawn’s Mill mas grabe pa. Sa adlaw human sa masaker, gimanduan sa manggugubot nga panon ang mga Santos nga mobiya sa estado o pagapatyon. Si Amanda Smith ug ang ubang mga naluwas gustong mobiya, apan gikawat sa manggugubot nga panon ang mga kabayo, sinina, pagkaon, ug ubang mga suplay nga ilang gikinahanglan sa paghimo sa taas nga biyahe. Daghan sa mga samdan, sama sa anak nga lalaki ni Amanda nga si Alma, wala pa sa kondisyon nga mobalhin.4
Ang kababayen-an sa pinuy-anan [settlement] mipahigayon og mga miting sa pag-ampo, nangayo sa Ginoo nga ayuhon ang ilang mga samdan. Sa dihang nahibaloan sa mga sakop sa manggugubot nga panon ang mahitungod niining mga miting, gihulga nila nga puohon ang pinuy-anan kon magpadayon pa ang kababayen-an. Human niana, hilum nga nag-ampo ang kababayen-an, nga desperadong misulay nga dili makakuha og pagtagad sa ilang kaugalingon samtang nangandam sila nga mobiya.
Wala madugay, gibalhin ni Amanda ang iyang pamilya gikan sa ilang tolda ngadto sa usa ka kabin.5 Samtang nagpadayon siya sa pagbangutan alang sa iyang bana ug anak nga lalaki nga gipatay, duna pa siyay upat ka gagmayng anak nga iyang atimanunon. Nabalaka siya mahitungod sa pagpabilin og dugay kaayo didto sa Hawn’s Mill samtang nagpaayo pa ang iyang anak nga lalaki. Apan bisan kon siya ug ang iyang mga anak makabiya, asa man sila moadto?
Usa kadto ka pangutana nga gipangutana sa mga Santos sa tibuok amihanang Missouri. Nahadlok sila nga ang militia mopatuman sa sugo sa gobernador bahin sa pagpatay kon dili sila mobiya sa tingpamulak. Apan kon walay mga lider nga mogiya kanila, wala silay ideya kon unsaon paghimo sa pagbiyahe pagawas sa Missouri—o kon asa magpundok sa higayon nga makagawas na sila.6
Samtang nangandam ang mga Santos sa pagbiya sa Far West, si Phebe Woodruff naghigda sa usa ka balay-abangan sa daplin sa dalan didto sa kasadpang bahin sa Ohio, nga nag-antus sa hilabihan nga kasakit sa ulo ug hilanat. Siya ug si Wilford nagbiyahe pakasadpan sulod sa duha ka bulan uban sa mga Santos sa Fox Islands, nga hinay nga miagi sa snow ug ulan aron makaabut sa Zion. Miataki ang sakit sa daghang bata, lakip na sa iyang anak nga babaye, nga si Sarah Emma.7 Duha ka pamilya ang wala na miapil sa pundok, kay nakumbinser nga dili sila makaabut sa Zion nianang tingtugnaw.8
Sa wala pa mohunong sa balay-abangan, nag-antus na si Phebe sa matag higayon nga ang karwahe makaagi og libaungon nga dalan.9 Human nga hapit na siya mohunong sa pagginhawa usa niana ka adlaw, gipahunong ni Wilford ang pundok aron maulian siya.
Sigurado si Phebe nga himatyon na siya. Gipanalanginan siya ni Wilford ug gisulayan ang tanan aron mawala ang iyang pag-antus, apan ang hilanat mas migrabe. Sa katapusan gitawag niya si Wilford ngadto sa iyang kiliran, mipamatuod bahin sa ebanghelyo ni Jesukristo, ug miawhag niya nga magbaton og hugot nga pagtuo sa panahon sa iyang mga pagsulay. Pagkasunod adlaw, ang iyang ginhawa mihunong na gayud, ug iyang gibati nga ang iyang espiritu mibiya na niya.10
Nagtan-aw siya samtang gitutokan ni Wilford ang iyang wala nay kinabuhi nga lawas. Nakita niya ang duha ka anghel nga misulod sa kwarto. Usa kanila ang misulti kaniya nga duna siyay pagpili nga himoon. Mahimo siyang mokuyog kanila aron mopahulay didto sa kalibutan sa mga espiritu o mobalik sa kinabuhi ug mag-antus sa mga pagsulay nga nagpaabut.
Nasayud si Phebe nga kon magpabilin siya, ang kinabuhi dili sayon. Ganahan ba siyang mobalik sa iyang kinabuhi nga puno sa kabalaka ug ugma nga walay kasiguroan? Nakita niya ang mga panagway nila ni Wilford ug Sarah Emma, ug ang iyang tubag daling miabut.
“Oo,” miingon siya, “Buhaton nako!”
Sa paghimo ni Phebe sa iyang desisyon, ang pagtuo ni Wilford nabag-o. Iyang gidihugan si Phebe og gipahinungod nga lana, mibutang sa iyang mga kamot diha sa iyang ulo, ug mibadlong sa gahum sa kamatayon. Sa dihang nahuman na siya, ang ginhawa ni Phebe mibalik. Gibuka niya ang iyang mga mata ug gitan-aw ang duha ka anghel nga mibiya sa kwarto.11
Balik ngadto sa Missouri, sila si Joseph, Hyrum, ug ubang mga binilanggo didto sa bilanggoan sa Liberty nagpunsisok, nga naningkamot nga mainitan. Ang gamay, umugon nga bartolina kasagaran anaa ubos sa yuta, gilibutan og mga bongbong nga bato ug kahoy nga upat ka pye ang gibag-on. Ang duha ka gagmayng mga bintana duol sa kisame nagtugot og kahayag apan gamay ra ang gikatabang aron mawagtang ang bahong angso nga bartolina. Mga nagtipun-og nga uhot diha sa salog nga bato nagsilbing mga higdaanan sa mga binilanggo, ug kon ang kalalakin-an desperado nang mokaon sa ngilngig nga mga pagkaon nga gihatag kanila, ang pagkaon usahay makapasuka nila.12
Gibisitahan ni Emma si Joseph sa sayong bahin sa Disyembre, nga mipahibalo sa balita mahitungod sa mga Santos didto sa Far West.13 Samtang naminaw si Joseph sa mga istorya bahin sa ilang pag-antus, ang iyang kasuko niadtong mibudhi kaniya misamut. Midiktar siya og usa ka sulat ngadto sa mga Santos, mipanghimaraut sa pagtraydor niining kalalakin-an ug miawhag sa mga Santos nga magpadayon.
“Mabuhi pa gihapon ang Zion, bisan kon mora kini og patay,” iya silang gipasaligan. “Ang Dios mismo sa kalinaw magauban kaninyo ug maghimo og paagi aron makalingkawas kamo gikan sa kaaway sa inyong mga kalag.”14
Niadtong Pebrero 1839, ang asawa ni Hyrum, nga si Mary, ug ang iyang igsoon nga si Mercy mibisita sa mga binilanggo uban sa bag-ong natawo nga anak ni Hyrum, nga si Joseph F. Smith. Wala na makita ni Mary si Hyrum sukad sa wala pa siya manganak pagka-Nobyembre. Ang pagpanganak ug ang grabe kaayo nga katugnaw hapit mopugong kaniya aron makabiyahe ngadto sa Liberty. Apan gihangyo siya ni Hyrum nga moadto, ug wala siya mahibalo kon duna pa ba siyay laing kahigayunan nga makakita niya.15
Sulod sa bilanggoan, ang tigdumala sa bilanggoan miabli sa pultahan ug nanaug ang mga babaye ngadto sa bartolina aron magpabilin nianang gabhiona uban sa mga binilanggo. Gisira dayon niya ang pultahan ibabaw nila ug misiguro niini pinaagi sa dako nga kandado.16
Walay nakatulog og maayo nianang gabhiona. Ang makita sila si Joseph, Hyrum, ug ang ubang mga binilanggo—luya ug hugaw diha sa ilang naghuot nga nahimutangan—nakapakurat sa mga babaye.17 Gikugos ni Hyrum ang iyang masuso nga anak ug hilum nga nakig-istorya ni Mary. Siya ug ang ubang mga binilanggo nabalaka. Ang tigdumala sa bilanggoan ug ang mga gwardiya kanunayng alerto, kay sigurado nga sila si Joseph ug Hyrum nagplano nga moeskapo.
Pagkasunod buntag, sila si Mary ug Mercy nanamilit sa mga binilanggo ug misaka pagawas sa bartolina. Samtang gipagawas sila sa mga gwardiya, ang mga bisagra sa pultahan miigot samtang gisira kini.18
Nianang tingtugnaw sa Far West, sila si Brigham Young ug Heber Kimball nakadawat og sulat gikan ni Joseph. “Ang pagdumala sa mga kalihokan sa simbahan gisangun na diha kaninyo, nga mao, ang Napulog Duha,” siya namahayag. Iya silang gisugo sa pagtudlo sa kinatigulangan sa orihinal nga mga apostoles nga mopuli kang Thomas Marsh isip presidente sa korum.19 Si David Patten mao ang kinatigulangan, apan namatay siya human mapusili didto sa Crooked River, nagpasabut nga si Brigham, nga karon traynta y siyete anyos na, mao ang mangulo sa mga Santos pagawas sa Missouri.
Nagpatabang na si Brigham sa high council sa Missouri aron magpabiling hapsay ang simbahan ug mohimo og mga desisyon tungod kay wala man si Joseph.20 Apan mas daghan pa ang kinahanglang buhaton.
Gihatagan ni Heneral Clark ang mga Santos hangtud sa tingpamulak aron mobiya sa estado, apan ang armado nga manggugubot nga panon nga karon magbahis-bahis sa siyudad, misaad nga patyon si bisan kinsa nga anaa pa gihapon didto sa katapusan sa Pebrero. Nangahadlok, daghang mga Santos nga dunay kwarta ang mipahawa dayon kutob sa mahimo, mibiya sa mga kabus nga moatiman sa ilang kaugalingon.21
Niadtong Enero 29, giawhag ni Brigham ang mga Santos didto sa Far West nga mopakigsaad nga motabang sa usag usa sa pagbakwit gikan sa estado. “Dili gayud kita mobiya sa mga kabus,” iya silang gisultihan, “hangtud nga luwas na sila gikan sa sugo sa pagpatay.”
Aron masiguro nga ang matag Santos naatiman, siya ug ang ubang mga lider sa Far West mitudlo og usa ka komitiba sa pito ka tawo nga modumala sa pagpabakwit.22 Ang komitiba nangolekta og mga donasyon ug mga suplay alang sa mga kabus ug mihimo og mainampingong pagtimbang-timbang sa mga panginahanglan sa mga Santos. Pipila ka kalalakin-an ang mipili og mga agianan tabok sa estado, nga kasagaran nagpabilin sa naestablisar nga kadalanan ug naglikay sa mga dapit nga dili maayo og tinagdan sa mga Santos. Ang gipili nga mga ruta tanan nag-abut sa Suba sa Mississippi, ang silangang utlanan sa estado, nga 160 ka milya ang gilay-on.
Ang pagbiya pagawas sa Missouri, sa ilang pagtino, magsugod dayon.23
Sa sayong bahin sa Pebrero, mibiya si Emma sa Far West uban sa iyang upat ka anak—otso anyos nga si Julia, sais anyos nga si Joseph III, dos anyos nga si Frederick, ug pito ka bulan nga si Alexander.24 Hapit tanan nga gipanag-iya niya ug ni Joseph gikawat o gibiyaan didto sa Far West, mao nga mibiyahe siya uban sa mga higala nga misuplay og karwahe ug mga kabayo alang sa pagbiyahe. Gidala usab niya ang importante nga mga papeles ni Joseph.25
Mibiyahe ang pamilya tabok sa mikaging nga yuta sa Missouri sulod sa sobra sa usa ka semana. Sa pagpadulong, usa sa ilang mga kabayo ang namatay. Sa dihang miabut sila sa Mississippi, ilang nabantayan nga ang grabe ka bugnaw nga tingtugnaw nakahimo og tibuok nga ice tabok sa lapad nga suba. Walay mga barko nga nagdagan, apan igo lang gayud ang gibag-on sa ice nga makatabok ang grupo nga maglakaw.
Nagkugos nila ni Frederick ug Alexander, mitabok si Emma diha sa ice. Ang gamayng bata nga si Joseph mikupot sa usa ka bahin sa iyang sayal samtang nagkupot si Julia diha sa laing bahin. Silang tulo mainampingong mitabok sa dangug nga agianan hangtud nga nakaabut ra gayud sa layo nga daplin sa suba.26
Luwas na sa gawas sa Missouri, nabantayan ni Emma ang mga tawo sa duol nga lungsod sa Quincy, Illinois, nga mas mabination kay sa iyang gilauman. Mitabang sila sa mga Santos sa pagtabok sa dunay ice nga suba, midonar og pagkaon ug sinina, ug misuplay og kapasilungan ug katrabahuan alang niadtong labing nanginahanglan.27
“Buhi pa gihapon ko ug andam gihapon nga mag-antus pa og dugang, kon kini ang kabubut-on sa Dios nga akong himoon, alang sa imong kaayohan,” misulat siya sa iyang bana sa wala madugay human sa ilang pag-abut. Maayo ra man usab ang mga bata, gawas nga si Frederick nasakit.
“Walay usa gawas sa Dios ang nasayud sa mga pamalandong sa akong hunahuna ug sa mga pagbati sa akong kasingkasing,” namahayag siya, “sa dihang gibiyaan nako ang atong balay ug panimalay ug hapit tanan nga atong gipanag-iya, gawas sa atong gagmayng mga anak, ug mibiyahe pagawas sa estado sa Missouri, nga mibiya nimo nga natanggong nianang mingaw nga bilanggoan.”
Sa gihapon, misalig siya sa balaanong kaangayan ug naglaum alang sa mas maayong mga adlaw. “Kon ang Dios dili morekord sa atong mga pag-antus ug manimalus niadtong nakasala kanato,” miingon siya, “Nan nasayop ko.”28
Samtang miikyas ang mga Santos sa Missouri, ang samad ni Alma Smith nakapugong gihapon sa iyang pamilya nga makabiya sa Hawn’s Mill. Giatiman ni Amanda ang iyang anak, nga nagpadayon sa pagsalig nga ang Ginoo moayo sa iyang bat-ang.
““‘Sa imong hunahuna makahimo kaha ang Ginoo, Mama?” Gipangutana siya ni Alma usa ka adlaw niana.
“Oo, akong anak,” miingon siya. “Iyang gipakita kanako kanang tanan pinaagi sa panan-awon.”29
Sa wala madugay, ang manggugubot nga panon duol sa pinuy-anan mas nagkapintas ug mitakda og tagal alang sa pagbiya sa mga Santos. Sa dihang miabut kanang adlawa, wala pa gihapon maayo ang samad sa bat-ang ni Alma, ug mibalibad si Amanda nga mobiya. Nahadlok, ug nangandoy nga mag-ampo og kusog, mitago siya sa pundok sa mga uhot sa mais ug nangayo sa Ginoo og kalig-on ug panabang. Sa dihang nahuman na siya sa iyang pag-ampo, usa ka tingog ang nag-istorya niya, nga nagsubli og pamilyar nga linya gikan sa usa ka himno:
Ang kalag nga diha kang Jesus misalig,
Dili ko buot, nga sa kaaway mokabig;
Kanang kalag, bisan tibuok impyerno maningkamot sa pag-uyog,
Ako dili, dili gayud, mobiya!30
Ang mga pulong nakapalig-on kang Amanda, ug mibati siya nga morag walay makapasakit kaniya.31 Wala madugay human niana, samtang nagsag-ub siya og tubig gikan sa sapa, nakadungog siya sa iyang mga anak nga misinggit diha sa balay. Nalisang, midali siya pagdagan ngadto sa pultahan—ug nakita si Alma nga nagdagan-dagan libut sa kwarto.
“Maayo na ko, Ma, maayo na ko!” mihilak siya. Usa ka flexible cartilage ang naporma agig hulip sa iyang bat-ang, nga nagtugot kaniya nga makalakaw.
Kay makabiyahe na man si Alma, gipundok ni Amanda ang iyang pamilya, miadto sa panimalay sa taga-Missouri kinsa mikawat sa iyang kabayo, ug miingon nga kuhaon niya ang hayop. Iyang giingnan si Amanda nga makuha niya kini og balik kon mobayad siya og lima ka dolyar aron mabayran siya sa iyang pagpakaon niini.
Mibaliwala kaniya, miadto si Amanda sa nataran, mikuha sa iyang kabayo, ug mipadulong sa Illinois uban sa iyang mga anak.32
Kay daghan nang mga Santos ang mibiya sa Far West kada adlaw, nabalaka si Drusilla Hendricks nga siya ug ang iyang pamilya mabiyaan. Si Isaac Leany, usa ka kaubang Santos nga napusilan og kaupat ka higayon didto sa Hawn’s Mill, mipasalig kaniya nga dili sila pasagdan. Apan wala masayud si Drusilla kon unsaon pagbiyahe sa iyang bana.
Naparalisar pa gihapon si James tungod sa samad sa iyang liog didto sa Crooked River. Sa dihang nahuman na ang away, nakit-an siya ni Drusilla nga nagbuy-od kauban sa samdan nga mga kalalakin-an diha sa panimalay sa usa ka silingan. Bisan kon napuno sa kaguol, gipakalma niya ang iyang kaugalingon, gidala pauli sa panimalay si James, ug misulay og pipila ka pamaagi nga mahibalik ang pagbati sa iyang mga bukton. Morag walay nakatabang.
Sa mga semana human sa pagsurender sa Far West, iyang gibaligya ang ilang yuta ug nagtrabaho aron makakwarta alang sa pagbalhin ngadto sa silangan, nakakwarta og igo nga ikapalit og pipila ka suplay ug gamayng karwahe, apan dili pundok sa mga hayop nga makabira niini.
Kay walay paagi nga mobira sa iyang karwahe, nasayud si Drusilla nga matanggong sila sa Missouri. Nalihok na ni James ang iyang mga abaga ug mga paa human makadawat og panalangin sa priesthood, apan dili siya makalakaw og layo kaayo. Aron luwas siyang makagawas sa estado, nagkinahanglan siya og pundok sa mga hayop.
Kay ang tagal sa pagbakwit nagkaduol na, mas nahadlok si Drusilla. Nakadawat na siya og sugod sa mga hulga gikan sa manggugubot nga panon, nga nagpasidaan niya nga moabut sila aron patyon ang iyang bana.
Usa ka gabii, samtang nagpasuso sa bata si Drusilla diha sa higdaanan tupad ni James, nakadungog siya og iro nga nagpaghut sa gawas. “Mama!” mihilak si William, ang iyang kinamagulangang anak. “Nagpadulong na ang manggugubot nga panon!” Pagkataud-taud nakadungog sila og pagdukdok sa pultahan.
Nangutana si Drusilla kon si kinsa ang anaa didto. Usa ka tingog sa gawas ang miingon nga wala siyay labut ug mihulga nga gub-on ang pultahan kon dili niya kini ablihan. Giingnan ni Drusilla ang usa sa iyang mga anak nga ablihan ang pultahan, ug wala madugay napuno ang kwarto og armadong kalalakin-an nga nagsul-ob og dili tinuod nga mga bungot aron matago ang ilang mga nawong.
“Barug,” gimanduan nila si Drusilla.
Kay nahadlok nga patyon sa kalalakin-an si James kon mobiya siya sa iyang kiliran, wala molihok si Drusilla. Usa ka lalaki ang mibira og kandila gikan sa duol nga lamesa ug nagsugod sa pagpangita diha sa balay. Miingon ang manggugubot nga panon nga nangita sila og usa ka Danite diha sa dapit.
Nangita sila diha sa ilawom sa higdaanan ug sa likod sa balay. Dayon gibira nila ang habol ni James ug misulay sa pagpangutana niya, apan luya kaayo siya aron sa pagsulti og daghan. Sa dili kaayo hayag nga suga, makita siya nga luya ug luspad.
Nangayo og tubig ang manggugubot nga panon, ug gisultihan sila ni Drusilla kon asa sila makakita niini. Samtang nanginom ang kalalakin-an, ilang gibalahan ang ilang mga pusil. “Andam na ang tanan,” usa kanila miingon.
Gitan-aw ni Drusilla ang kalalakin-an nga mibutang sa ilang mga tudlo sa mga gatilyo sa ilang mga pusil. Mibarug sila, ug nangandam na si Drusilla sa iyang kaugalingon alang sa buto-buto. Nagpabilin ang kalalakin-an sulod sa usa ka minuto, dayon migawas sila ug nanglakaw.
Wala madugay human niana, usa ka doktor ang naluoy kang James ug mitambag kang Drusilla kon unsaon pagtabang kaniya. Sa hinay-hinay nakabaton si James og kusog. Ang ilang higala nga si Isaac nakakita usab og yugohan sa mga baka alang sa pamilya.
Kadto ra ang ilang gikinahanglan aron makabiya sa Missouri hangtud sa hangtud.33
Sa dihang miabut sila si Wilford ug Phebe Woodruff didto sa Illinois uban sa Fox Islands branch, nahibaloan nila ang pagpapahawa sa mga Santos gikan sa Missouri. Sa tunga-tunga sa Marso, samtang mas daghang miyembro sa simbahan ang mipuyo sa Quincy, ang mga Woodruff mibiya paingon sa alegre nga lungsod sa may suba aron mahiusa pag-usab uban sa mga Santos ug mahimamat ang mga lider sa simbahan.34
Si Edward Partridge, kinsa nag-antus sulod sa mga semana didto sa bilanggoan sa Missouri sa wala pa pagawasa, mitabang sa pagpangulo sa simbahan sa Quincy bisan pa man sa iyang huyang nga panglawas. Si Heber ug ang ubang senior nga mga lider, sa samang higayon, nagdumala gihapon sa pagpabakwit gikan sa Missouri.35
Nakit-an nila ni Wilford ug Phebe si Emma ug ang iyang mga anak nga nagpuyo sa panimalay nila ni Sarah ug John Cleveland, usa ka lokal nga huwes. Nakita usab nila nga ang mga ginikanan sa propeta ug mga igsoon nagpuyo na karon diha ug sa palibut sa Quincy, sama nila ni Brigham ug Mary Ann Young ug nila ni John ug Leonora Taylor.36
Pagkasunod adlaw, gipahibalo ni Brigham nga ang komitiba sa pagpabakwit didto sa Far West nagkinahanglan og kwarta ug mga pundok sa mga hayop aron sa pagtabang sa singkwenta ka kabus nga mga pamilya nga makabiya sa Missouri. Bisan kon ang mga Santos mismo sa Quincy mga kabus, gihangyo niya sila sa pagpadangat sa kamot sa gugmang putli niadtong kinsa mas naglisud pa. Agig tubag, midonar ang mga Santos og singkwenta ka dolyar ug pipila ka pundok sa mga hayop.37
Miadto si Wilford sa daplin sa Suba sa Mississippi pagkasunod adlaw aron bisitahan ang usa ka kampo sa bag-ong nangabut nga mga miyembro sa simbahan. Ang adlaw bugnaw ug giulan, ug ang mga refugee nagpunsisok diha sa lapok, gikapoy ug gigutom.38 Bisan kon mabination ang mga tawo sa Quincy kaniadto pa, nasayud si Wilford nga sa dili madugay magkinahanglan ang mga Santos og usa ka dapit nga ila nang kaugalingon.
Swerte lang, si Bishop Partridge ug ang uban nakig-istorya sa usa ka tawo nga ginganlan og Isaac Galland, kinsa gustong mobaligya kanila og humok ug tubigon nga dapit diha sa likuanan sa suba sa amihanang bahin sa Quincy. Dili kadto mao ang yuta sa gatas ug dugos nga ilang gipanglantawan alang sa Zion, apan andam na kadto ug makahatag og bag-ong dapit nga kapundukan alang sa mga Santos.39