Lub Tuam Rooj Sab Laj
Tus Txheej Txheem Txais Kev Tshwm Sim
Kaum Hli Ntuj xyoo 2022 lub tuam rooj sab laj

Tus Txheej Txheem Txais Kev Tshwm Sim

Los ntawm Txwj Laug Dale G. Renlund

Ntawm Pawg Kaum Ob tug Thwj Tim

Peb yuav tsum to taub tus txheej txheem uas tus Vaj Ntsuj Plig Dawb Huv siv. Thaum peb siv tus txheej txheem no, tus Vaj Ntsuj Plig Dawb Huv yuav qhia laj lim tswv yim rau peb.

Ib yam li nej feem coob, Txwj Laug Dieter F. Uchtdorf tau qhia kuv ntau yam. Qhov no piav me ntsis txog tej yam uas kuv yuav hais.1 Yog li ntawd, thov txim rau nws …

Cov kws tsav nyab hoom uas muaj peev xwm heev paub lawv nyab hoom zoo thiab ua raws nraim li cov kws qhia nyab hoom ya mus los hais txog kev siv txoj kev cuab zog ya twg thiab yuav ya mus qhov twg. Hais kom yooj yim me ntsis, cov kws tsav nyab hoom siv ib tug txheej txheem. Lawv txawj ntse los sis muaj peev xwm npaum li cas, tsuas yog cov kws tsav nyab hoom siv tus txheej txheem no, lawv thiaj li yuav pab kom muaj raws li lub hom phiaj ntawm ib lub nyab hoom.

Ib yam li ntawd, peb txais kev tshwm sim raws li ib tug txheej txheem. Tom qab peb ua kev cai raus dej, Vajtswv muab ib lub txiaj ntsim zoo kawg nkaus rau peb, lub txiaj ntsim Vaj Ntsuj Plig Dawb Huv.2 Thaum peb siv zog taug txoj kev ua raws li peb tej kev khi lus,3 “tus Vaj Ntsuj Plig Dawb Huv … yuav qhia rau [peb] txhua yam uas [peb] yuav tsum ua.”4 Thaum peb tsis paub tseeb los sis tsis pom qab xav li cas, peb thov tau Vajtswv.5 Tus Cawm Seej tau cog lus meej hais tias: “Nej thov, nej thiaj yuav tau; … rau qhov txhua tus uas thov yeej yuav tau.”6 Thaum tus Vaj Ntsuj Plig Dawb Huv pab peb, ces peb txawj hloov peb tej cwj pwm thiaj txais tau peb txoj hmoov nyob mus ib txhis li.7

Qhov uas tus Tswv tau cog lus tias peb yuav txais kev tshwm sim los ntawm tus Vaj Ntsuj Plig Dawb Huv yeej tshoov peb lub siab, ib yam li thaum peb pom ib lub nyab hoom ya. Thiab zoo li cov kws tsav nyab hoom, peb yuav tsum to taub tus txheej txheem uas tus Vaj Ntsuj Plig Dawb Huv siv kom qhia kev tshwm sim rau peb. Thaum peb siv tus txheej txheem no, tus Vaj Ntsuj Plig Dawb Huv yuav qhia laj lim tswv yim, hais tej lus coj, thiab muab kev nplij siab rau peb. Yog tias peb tsis siv tus txheej txheem ntawd, ces peb txawj ntse los sis muaj txuj ci npaum li cas los, peb yuav raug ntxias, poob mus, thiab raug puas tsuaj.

Cov vaj lug kub yog qhov thib ib ntawm tus txheej txheem rau peb txoj kev txais kev tshwm sim no.8 Kev mloog ntsoov Khetos tej lus, raws li hais nyob hauv vaj lug kub, yuav tshoov peb lub siab kom txais tau kev tshwm sim. Txwj Laug Robert D. Hales hais tias: “Thaum peb xav hais lus rau Vajtswv, peb thov Nws. Thiab thaum peb xav kom Nws hais lus rau peb, peb nyeem cov vaj lug kub.”9

Cov vaj lug kub kuj qhia peb kom paub txais kev tshwm sim.10 Thiab peb thov kom txais tau tej yam ncaj thiab zoo11 thiab tsis thov kom muaj tej yam tsis raws li Vajtswv lub siab nyiam.12 Peb tsis xav “thov ua yuam kev,” xws li thov txais tau tej yam tsis tsim nyog kom txhawb peb lub hom phiaj xwb los sis kom muaj raws li peb lub siab nyiam xwb.13 Qhov tseem ceeb, peb yuav tsum thov Leej Txiv Saum Ntuj Ceeb Tsheej los ntawm Yexus Khetos lub npe,14 thiab ntseeg tias peb yuav txais.15

Qhov thib ob ntawm tus txheej txheem no yog qhov uas yus txais kev tshwm sim txog tej uas yus muaj cai txais xwb thiab tsis yog rau luag tej. Los yog hais tias, peb ya mus thiab tsaws rau ntawm txoj kev uas tau teem tseg xwb. Qhov uas yuav tsum siv txoj kev cuab zog ya uas tau teem tseg lawm yog ib qho uas tau kawm thaum Kev Muab Txoj Moo Zoo Txum Tim Rov Qab Los nyuam qhuav pib. Hiram Page, ib tug ntawm Yim tus Tim Khawv txog Phau Ntawv Maumoos, hais tias nws tau txais kev tshwm sim rau lub Koom Txoos. Ob peb tug mej zeej raug ntxias thiab ua yuam kev.

Ces tus Tswv teb hais tias “Kuv yuav tsis tsa ib tug twg los txais tej lus txib thiab tej kev tshwm sim nyob hauv lub koom txoos no tsuas yog kuv tus tub qhe Joseph Smith … xwb, … kom txog thaum kuv tsa dua ib tug los nyob nws qhov chaw.”16 Cov lus qhuab qhia, cov lus txib, thiab kev tshwm sim txog lub Koom Txoos yeej yog tej uas tus yaj saub muaj cai txais xwb, es nws txais tej ntawd los ntawm tus Tswv Yexus Khetos.17 Yog tus yaj saub txoj kev cuab zog ya.

Ntau xyoo tas los, ib tug hu tuaj rau kuv thaum nws raug ntes vim nws ua txhaum nkag hauv lwm tus lub tsev. Nws qhia kuv tias nws txais kev tshwm sim tias lub tsev uas nws sim nkag haud muaj cov vaj lug kub ntxiv uas tau muab faus. Nws hais tias tom qab nws txais tau cov vaj lug kub ntxiv, nws paub tias nws yuav txais lub txiaj ntsim kom paub txhais lus, muab cov vaj lug kub tshiab los, thiab hloov lub Koom Txoos cov lus qhuab qhia. Kuv qhia nws tias nws ua yuam kev, thiab nws thov kom kuv thov Vajtswv txog qhov no. Kuv qhia nws tias kuv yuav tsis ua li ntawd. Nws cem kuv heev thiab khwb xov tooj.18

Kuv tsis tas thov Vajtswv txog tej ntawd vim tias: tsuas yog tus yaj saub ib leeg xwb txais kev tshwm sim rau lub Koom Txoos. Yeej yuav “tawm tsam Vajtswv txoj kev cai ”19 yog lwm tus yuav txais kev tshwm sim li ntawd, uas nyob ntawm tus yaj saub txoj kev cuab zog ya.

Tib neeg yeej muaj cai txais tau kev tshwm sim txog lawv tus kheej. Piv txwv hais tias, nej muaj cai txais tau kev tshwm sim txog qhov uas nej yuav nyob qhov twg, nej yuav ua hauj lwm dab tsi, los sis nrog leej twg sib yuav.20 Cov thawj coj hauv lub Koom Txoos yuav qhia cov lus qhuab qhia thiab hais tej lus tshoov siab, tiam sis kev lav ris tej kev txiav txim no yeej nyob ntawm nej. Nej muaj cai txais kev tshwm sim ntawd; yeej yog nej txoj kev cuab zog ya.

Qhov thib peb ntawm tus txheej txheem no yog qhov uas kev tshwm sim yeej yuav sib haum nrog Vajtswv cov lus txib thiab tej kev khi lus uas peb tau nrog Nws khi. Cia li xav txog ib zaj lus thov Vajtswv zoo li no: “Leej Txiv Saum Ntuj Ceeb Tsheej, kuv dhuav kev sib ntsib hauv lub Koom Txoos. Thov kom kuv teev tiam koj nyob rau Hnub Caiv pem roob los sis nyob ntawm ntug hiav txwv? Thov kom zam txim rau kuv yog kuv tsis mus rau lub koom txoos thiab tsis txais lub cim nco txog tiam sis thov tseem muab cov koob hmoov rau kuv los ntawm kev saib Hnub Caiv ua ib hnub dawb huv?”21 Yog tias peb thov li ntawd, ces peb paub Vajtswv yuav teb li cas: “Kuv tus me nyuam, kuv twb tau qhia kuv lub siab nyiam txog Hnub Caiv lawm.”

Thaum peb thov Vajtswv kom txais kev tshwm sim txog ib yam uas Nws twb qhia meej lawm, peb yuav xav ua yuam kev thiab tsuas hnov tej uas peb xav hnov xwb. Ib tug txiv neej tau qhia kuv tias nyuaj rau nws muaj nyiaj txiag txaus pab tu nws tsev neeg. Nws tawm tswv yim kom nyiag nws lub koom haum hauj lwm cov nyiaj, es nws thov Vajtswv txog qhov ntawd, thiab xav tias nws tau txais kev tshwm sim pom zoo. Kuv paub tias nws raug ntxias lawm vim nws xav tau kev tshwm sim uas tsis yog raws li Vajtswv cov lus txib. Tus Yaj Saub Joseph Smith ceeb toom hais tias, “Tsis muaj ib yam dab tsi uas ua rau noob neej sawv daws raug mob ntau npaum txoj kev raug tej ntsuj plig cuav tej kev tshoov siab thaum yus xav tias tej ntawd yog Vajtswv tus Ntsuj Plig tshoov yus lub siab.”22

Ib txhia yuav hais tias Nifais twb ua txhaum ib txoj kev cai thaum nws muab Lanpas tua tuag. Tiam sis, qhov no yeej tsis rhuav txoj kev cai ntawd—txoj kev cai uas qhia tias kev tshwm sim yuav sib haum nrog Vajtswv cov lus txib. Yeej tsis muaj ib txoj kev yooj yim piav txog zaj no kom txaus siab, tiam sis cia kuv hais ob peb yam tseeb. Tsis yog Nifais tau thov Vajtswv seb puas yuav tso cai rau nws muab Lanpas tua. Tsis yog ib yam uas nws xav ua. Kev muab Lanpas tua tsis yog kom pab Nifais ib leeg xwb tiam sis yuav ua rau ib haiv neeg thiab cov neeg khi lus tau cov vaj lug kub. Thiab Nifais yeej paub tias yog kev tshwm sim—muaj tseeb tiag, zaum no, yog Vajtswv txoj lus txib.23

Qhov thib plaub ntawm tus txheej txheem no yog kev to taub tej uas Vajtswv tau muab tshwm sim rau nej lawm, tiam sis tseem qhib siab xav txais kev tshwm sim los ntawm Nws ntxiv. Yog tias Vajtswv tau teb nej lo lus nug thiab tej xwm txheej tsis tau hloov, ces vim li cas peb xav tias Vajtswv yuav tsis teb ib yam li qub? Joseph Smith twb raug qhov teeb meem no nyob rau xyoo 1828. Twb tau txhais thawj feem ntawm Phau Ntawv Maumoos, thaum Martin Harris, ib tug uas tau teev ntawv thiab pub nyiaj kom txhawb nqa kev txhais lus, nws thov Joseph tso cai rau nws muab tej nplooj ntawv uas tau txhais lus rau nws tus poj niam saib. Joseph tsis paub yuav tsum ua li cas nws thiaj li thov Vajtswv. Tus Tswv tau hais kom nws tsis txhob cia Martin nqa tej nplooj ntawv mus.

Martin thov Joseph kom nws thov Vajtswv ib zaug ntxiv. Joseph tau ua li ntawd, thiab Vajtswv yeej teb zoo ib yam li zaum thib ib. Tiam sis Martin thov Joseph mus thov Vajtswv zaum peb es Joseph ua li ntawd. Zaum no Vajtswv tsis tau hais kom tsis txhob ua. Tiam sis, zoo li Vajtswv hais tias, “Joseph, koj paub tias kuv xav li cas txog qhov no, tiam sis kuv cia koj siv koj txoj kev ywj siab xaiv.” Joseph zoo siab uas Vajtswv tau tso cai cia Martin nqa 116 nplooj ntawv thiab muab rau ob peb tug hauv nws tsev neeg saib. Tej nplooj ntawv txhais lus twb ploj lawm thiab tsis muaj leej twg nrhiav tau. Tus Tswv tau cem Joseph heev.24

Joseph tau kawm, ib yam li Phau Ntawv Maumoos tus yaj saub Yakhauj tau qhia: “Tsis txhob nrhiav kev ntuas tus Tswv, tiam sis txais lus ntuas los ntawm nws txhais tes. Vim … nws ntuas nrog tswv yim.”25 Yakhauj ceeb toom hais tias peb raug tej yam tsis zoo thaum peb thov kom txais tej yam tsis tsim nyog. Nws tau qhia tias cov neeg hauv Yeluxalees yuav nrhiav “tej yam uas lawv tsis to taub,” “ntsia dhau lub hom phiaj,” thiab saib tsis taus tus Cawm Seej ntawm lub ntiaj teb no.26 Lawv dawm taw vim tias lawv thov kom txais tej yam uas lawv yuav tsis muaj siab xav to taub thiab tej uas lawv tsis txawj to taub.

Yog tias nej tau txais kev tshwm sim txog nej tus kheej thiab tej xwm txheej tsis tau hloov hlo li, ces Vajtswv twb tau teb nej lawm.27 Piv txwv hais tias, tej lub sij hawm peb pheej thov kom nplij peb lub siab tias peb tau txais kev zam txim. Yog tias peb twb hloov siab lees txim lawm, thiab tau txais kev xyiv fab thiab kev kaj siab lug, thiab tau txais kev zam txim lawm, ces peb tsis tas rov qab thov dua ntxiv tiam sis peb yuav tsum tso siab rau tej lus teb uas Vajtswv tau hais rau peb lawm.28

Txawm yog peb tso siab rau Vajtswv tej lus teb dhau los, peb yuav tsum qhia siab xav txais kev tshwm sim ntxiv. Vim tias, tej qhov chaw uas peb mus hauv lub neej no feem tsawg yuav tsum ya ib zaug xwb. Peb yuav tsum to taub tias peb yuav txais kev tshwm sim “ib nqe lus ntxiv rau ib nqe lus thiab ib ntsiab cai ntxiv rau ib ntsiab cai,”29 thiab to taub tias kev tshwm sim yeej yog ib yam uas zuj zus tuaj.30

Tej yam no hauv tus txheej txheem txais kev tshwm sim los sib tshooj thiab ib qho txhawb nqa ib qho. Tiam sis nyob hauv tus txheej txheem no, tus Vaj Ntsuj Plig Dawb Huv yeej yuav muab txhua yam tshwm sim kom peb paub taug txoj kev ua raws peb tej kev khi lus. Yog li ntawd peb tau koob hmoov los ntawm Yexus Khetos lub hwj chim los ua neeg zoo li Leej Txiv Saum Ntuj Ceeb Tsheej xav kom peb ua. Kuv caw nej kom ua siab loj txais kev tshwm sim rau nej tus kheej, cia li to taub tej yam uas Vajtswv tau muab tshwm sim, raws nraim li cov vaj lug kub thiab cov lus txib uas Nws tau muab tshwm sim los ntawm Nws cov yaj saub lawm, thiab txais kev tshwm sim raws li nej muaj cai txais. Kuv paub tias tus Vaj Ntsuj Plig Dawb Huv yuav qhia nej txhua yam uas nej yuav tsum ua.31 Los ntawm Yexus Khetos lub npe, amees.

Lus Cim

  1. Txwj Laug Dieter F. Uchtdorf pheej siv tej zaj lus piv txwv txog cov nyab hoom kom qhia tej ntsiab cai tseem ceeb txog txoj moo zoo. Piv txwv hais tias, tsis ntev tas los nws tau muab daim ntawv seb cov kws nyab hoom yuav tsum ua li cas ua ntej yuav ya mus piv rau kev qhia zoo li tus Cawm Seej nyob hauv “A Teacher’s Checklist” ([kev tshaj tawm rau cov xib hwb, Rau Hli Ntuj 12, 2022], broadcasts.ChurchofJesusChrist.org).

  2. Tus Vaj Ntsuj Plig Dawb Huv yog tus thib peb hauv Pawg Vajtswv, thiab feem ntau neeg hu Nws ua tus Ntsuj Plig los sis Vajtswv tus Ntsuj Plig, thiab Nws ua tej hauj lwm tseem ceeb hauv txoj hau kev cawm seej. Nws ua tim khawv txog Leej Txiv thiab Leej Tub, qhia qhov tseeb txog tag nrho txhua yam, ua rau cov uas tau hloov siab lees txim thiab ua kev cai raus dej hloov ua neeg dawb huv, thiab yog tus Ntsuj Plig Dawb Huv ntawm Kev Cog Lus (saib Phau Qhia txog Vaj Lug Kub, “Vaj Ntsuj Plig Dawb Huv,” scriptures.ChurchofJesusChrist.org).

  3. Saib 2 Nifais 31:19–21; Mauxiyas 4:8. Tsis muaj lwm txoj kev uas peb yuav “dim tau nyob hauv Vajtswv lub nceeg vaj.” Peb xav li cas los yeej yuav tsis tsim lwm txoj kev.

  4. 2 Nifais 32:5; kuj saib Lus Qhuab Qhia thiab Kev Khi Lus 84:43–44.

  5. Saib 2 Nifais 32:4; Russell M. Nelson, “Kev Tshwm Sim rau lub Koom Txoos, Kev Tshwm Sim rau Peb lub Neej,” Liahona, Tsib Hlis Ntuj 2018, 93–96.

  6. Mathais 7:7–8.

  7. Saib “Tsev Neeg: Ib zaj Lus Tshaj Tawm rau lub Ntiaj Teb”; “Koom Haum Ntxhais Hluas lub Ntsiab Lus”; General Handbook: Serving in The Church of Jesus Christ of Latter-day Saints, 27.0; 27.2, ChurchofJesusChrist.org.

  8. Saib 2 Nifais 32:3.

  9. Robert D. Hales, “Holy Scriptures: The Power of God unto Our Salvation,” Liahona, Kaum Ib Hlis Ntuj 2006, 26–27.

  10. Cov vaj lug kub qhia tias tus Vaj Ntsuj Plig Dawb Huv lub suab hais lus yau yau, zoo li lus ntxhi—tsis nrov heev; nws hais lus yooj yim thiab meej; nws chob siab thiab ua rau yus lub siab kub lug; hais rau yus lub siab thiab yus lub hlwb; nws ua rau yus muaj kev kaj siab lug, kev xyiv fab, thiab kev cia siab—tsis ntshai thiab tsis txhawj; nws caw peb ua zoo—tsis ua phem; thiab nws muab tswv yim rau peb thiab ua rau peb txaus siab—tsis ua rau peb ntxhov siab. Saib 1 Vaj Ntxwv 19:11–12; Oonis 1:25; Amas 32:28; Hilamas 5:30–33; 3 Nifais 11:3; Maulaunais 7:16–17; Lus Qhuab Qhia thiab Kev Khi Lus 6:22–24; 8:2–3; 9:8–9; 11:12–14; 85:6; Boyd K. Packer, “The Candle of the Lord,” Ensign, Ib Hlis Ntuj 1983, 51–56; Russell M. Nelson, “Mloog Nws Hais,” Liahona, Tsib Hlis Ntuj 2020, 88–92; Russell M. Nelson, “Muaj Kev Ntseeg Mus rau Yav Tom Ntej,” Liahona, Kaum Ib Hlis Ntuj 2020, 73–76; Russell M. Nelson, “Kev Tshwm Sim rau lub Koom Txoos, Kev Tshwm Sim rau Peb lub Neej,” 93–96.

  11. Saib 3 Nifais 18:20; Maulaunais 7:26; Lus Qhuab Qhia thiab Kev Khi Lus 88:64–65.

  12. Saib Hilamas 10:5; Lus Qhuab Qhia thiab Kev Khi Lus 46:30.

  13. Yakaunpaus 4:3; saib Yakaunpaus 4:3, New International Version; 2 Nifais 4:35; Lus Qhuab Qhia thiab Kev Khi Lus 8:10; 46:7; 88:64–65.

  14. Saib Lus Qhuab Qhia thiab Kev Khi Lus 88:64–65; Phau Qhia txog Vaj Lug Kub, “Thov Vajtswv,” scriptures.ChurchofJesusChrist.org.

  15. Saib 3 Nifais 18:20; Maulaunais 7:26.

  16. Lus Qhuab Qhia thiab Kev Khi Lus 28:2, 7.

  17. Saib Lus Qhuab Qhia thiab Kev Khi Lus 21:4–5.

  18. Zoo siab uas tau npaj tej kev pab thiab tej kev kho mob rau nws.

  19. Teachings of Presidents of the Church: Joseph Smith (2007), 197.

  20. Saib Thomas S. Monson, “Whom Shall I Marry?,” New Era, Kaum Hli Ntuj 2004, 4.

  21. Saib Lus Qhuab Qhia thiab Kev Khi Lus 59:9–16.

  22. Joseph Smith, nyob hauv Times and Seasons, Plaub Hlis Ntuj 1, 1842, 744, josephsmithpapers.org.

  23. Tus Tswv yeej hloov thiab qhia ntxiv txog Nws cov lus txib uas Nws muab tshwm sim lawm, tiam sis thaum ua li ntawd ces yog los ntawm tej kev tshwm sim uas tus yaj saubtxais thiab tsis yog los ntawm kev tshwm sim uas tib neeg txais. Kev tshwm sim uas tus yaj saub txais yeej yog los ntawm tus uas Vajtswv tau tsa ua tus yaj saub raws li Vajtswv lub tswv yim. Xws li thaum tus Tswv qhia Mauxes thiab Yausuas kom muab cov neeg hauv thaj av Kana-as tua txawm yog Nws tau txib tias “Nej yuav tsum tsis txhob tua neeg” (Khiav Dim 20:13). Tus Tswv, dhau los ntawm Nws tus yaj saub, yuav hloov Nws cov lus txib kom muaj raws li Nws tej hom phiaj. Tiam sis peb tsis muaj cai los ntawm peb tus kheej tej kev tshwm sim hloov los sis tso cov lus txib tseg uas Vajtswv tau muab tshwm sim rau Nws lub Koom Txoos dhau los ntawm tus yaj saub.

    Saib 1 Nifais 4:12–18; for a fuller discussion, saib Joseph Spencer, 1st Nephi: A Brief Theological Introduction (2020) 66–80.

  24. Yog xav nyeem zaj lus txog 116 nplooj ntawv tag nrho, cia li nyeem Saints: The Story of the Church of Jesus Christ in the Latter Days, phau 1, The Standard of Truth, 1815–1846 (2018), 44–53; kuj saib Lus Qhuab Qhia thiab Kev Khi Lus 3:5–15; 10:1–5.

  25. Yakhauj 4:10.

  26. Saib Yakhauj 4:14–16.

  27. Joseph Smith qhia tias, “Peb yeej tsis thov Vajtswv kom txais kev tshwm sim tshwj xeeb tsuas yog tsis muaj kev tshwm sim txog qhov ntawd ua ntej xwb” (nyob hauv History, 1838–1856 [Manuscript History of the Church], phau A-1, 286–87, josephsmithpapers.org).

  28. Saib Mauxiyas 4:3. Thaum peb tseem muaj txim thiab nyuaj siab tom qab peb tau hloov siab lees txim tiag tiag, ces feem ntau yog vim peb tsis tshua ntseeg Yexus Khetos thiab Nws txoj kev muaj peev xwm zam txim rau peb thiab kho peb. Tej lub sij hawm peb ntseeg tias kev zam txim yog rau lwm tus tiam sis tsis yog rau peb tus kheej. Kev xav li ntawd yeej yog kev tsis tshua ntseeg tias tus Cawm Seej muaj peev xwm ua li cas los ntawm Nws txoj Kev Theej Txhoj uas tsis paub kawg.

  29. Saib Yaxayas 28:10; 2 Nifais 28:30; David A. Bednar, “Line upon Line, Precept upon Precept,” New Era, Cuaj Hlis Ntuj 2010, 3–7.

  30. Tiam sis yog Vajtswv tsis tau muab ib yam tshwm sim rau nej, cia li thov ntxiv. Xws li Txwj Laug Richard G. Scott qhia: “Tso siab rau Nws. … Thaum nej ua neej ncaj ncees thiab tso siab rau Vajtswv, Nws yuav tsis cia nej mus deb heev ua ntej Nws ceeb toom nej yog nej tau txiav txim tsis yog lawm” (“Using the Supernal Gift of Prayer,” Liahona, Tsib Hlis Ntuj 2007, 10).

  31. Saib 2 Nifais 32:5.