Muab Kev Zoo Nkauj Pauj Tshauv: Kev Kho Mob Los ntawm Kev Zam Txim
Qhov uas yus ua neej muab kev zoo nkauj pauj tej tshauv yog kev muab siab rau ntseeg raws li tus Cawm Seej tus yam ntxwv.
Neeg tsis tshua paub txog ib zaj dab neeg hauv phau 1 Xamuyees uas hais txog Daviv, tus uas yuav ua Ixayees tus vaj ntxwv, thiab ib tug poj niam hu ua Anpinkayis.
Tom qab Xamuyees tas sim neej lawm, Daviv thiab nws cov neeg tau khiav ntawm Vaj Ntxwv Xa-ules, uas xav muab Daviv tua tuag. Lawv tau saib xyuas cov yaj thiab cov tub qhe ntawm ib tug txiv neej nplua nuj hu ua Nanpas, uas tsiv ncauj tsiv lus heev. Daviv tau xa nws 10 tus tub hluas mus hais Nanpas thiab thov kom nws muab zaub mov thiab tej khoom rau lawv.
Nanpas tau hais lus thuam lawv thaum teb lawv thiab tsis pub khoom dab tsi rau Daviv cov tub hluas.
Daviv tu siab heev, nws thiaj npaj nws cov neeg mus tawm tsam Nanpas thiab nws tsev neeg hais tias, “Nws txawm muab kev phem pauj kuv txoj kev ua zoo xwb.”1 Ib tug tub qhe tau hais Anpinkayis, Nanpas tus poj niam, txog nws tus txiv txoj kev ua phem rau Daviv cov tub hluas. Anpinkayis txawm ua tsuag tsuag khaws cov zaub mov thiab cov khoom thiab mus thov Daviv.
Thaum Anpinkayis ntsib nws, nws “txhob caug ntua pe Daviv ua ntsej muag ti nkaus hauv av,
“Rau ntawm Daviv ko taw thov hais tias, Kuv tus tswv, … thov cia kuv tib leeg ris qhov kev txhaum ntawd xwb! …
“Tus Tswv twb tsis pub koj ua pauj thiab tua koj cov yeeb ncuab.
“… Tus tswv, thov koj txais tej uas kuv coj tuaj rau koj thiab muab rau koj cov neeg. …
“Tus tswv, thov koj zam txim rau tej uas kuv tau ua txhaum lawm. …
“Daviv hais rau Anpinkayis hais tias, Ua tus Tswv uas yog cov Ixayees tus Vajtswv tsaug uas hnub no nws txib koj tuaj ntsib kuv!
“Ua Vajtswv tsaug uas koj yog ib tug txawj xav, thiab tej uas koj cheem kom hnub no kuv tsis txhob ua phem pauj phem thiab tua neeg. …
“Daviv txais yuav tej uas Anpinkayis coj tuaj rau nws ntawd thiab hais rau Anpinkayis hais tias, Koj cia li rov mus tsev thiab tsis txhob txhawj, kuv yuav ua raws li koj tej lus thov.”2
Nkawd ob leeg tau rov mus tsev.
Nyob hauv zaj no, peb saib taus Anpinkayis yog ib tug uas coj yam ntxwv zoo li Yexus Khetos.3 Dhau los ntawm Nws txoj kev txi theej txhoj, Nws tso peb dim kev txhaum ntawm ib lub siab uas xav ua phem thiab muab tej yam kom txhawb nqa peb.4
Ib yam li Anpinkayis kam ris Nanpas kev txhaum, tus Cawm Seej tau ua ib yam li ntawd—los ntawm ib txoj kev uas peb tsis to taub—Nws tau ris peb tej kev txhaum thiab tej kev txhaum ntawm cov uas tau ua rau peb tu siab los yog ua rau peb raug mob.5 Nyob hauv Khexemanes thiab nyob saum ntoo khaub lig, Nws tau lees txais tej kev txhaum ntawd. Nws tau npaj ib txoj kev rau peb tso peb lub siab uas xav ua pauj tseg. “Txoj kev” ntawd yeej yog txoj kev zam txim—uas tej zaum yog qhov nyuaj tshaj plaws uas peb yuav ua thiab ib yam zoo tshaj uas peb ua tau. Thaum peb zam txim pub rau lwm tus, Yexus Khetos lub hwj chim theej txhoj yuav ntws los rau hauv peb lub neej thiab pib kho tej yam mob ntawm peb lub siab ntsws.
Thawj Tswj Hwm Russell M. Nelson tau qhia tias tus Cawm Seej xav pab peb muaj peev xwm zam txim.
“Los ntawm Nws txoj Kev Theej Txhoj uas nyob mus ib txhis, nej yuav zam txim rau cov uas ua rau nej raug mob thiab cov uas yeej yuav tsis lav ris qhov uas lawv tau ua phem rau nej.
“Feem ntau yog ib qho yooj yim kom zam txim rau tus uas txo hwj chim thov kom nej zam txim rau nws. Tiam sis tus Cawm Seej yuav ua rau nej txawj zam txim rau leej twg uas tau ua li cas rau nej los. Ces tej yam phem uas lawv ua rau nej yuav tsis tab kaum nej sab ntsuj plig ntxiv.”6
Qhov uas Anpinkayis nqa cov zaub mov thiab tej khoom tuaj qhia peb tias tus Cawm Seej muab kev txhawb nqa thiab kev pab rau cov uas raug mob, peb thiaj li yuav txais kev kho mob thiab yuav rov zoo.7 Nws tsis cia peb nyob peb ib leeg xwb kom raug tej yam uas lwm tus ua rau peb; peb kuj yuav rov zoo thiab tus Cawm Seej yuav cawm peb kom tsis txhob muaj ib lub siab uas xav ua pauj thiab tej xwm txheej uas yuav muaj tom qab ntawd.
Tus Tswv hais tias, “Kuv, tus Tswv, yuav zam txim rau tus uas kuv pom zoo zam txim, tiam sis nej yuav tsum zam txim rau txhua tus neeg.”8 Tus Tswv kom peb zam txim rau lwm tus kom peb thiaj tau zoo.9 Tiam sis Nws tsis hais kom peb ua li ntawd thaum tsis muaj Nws txoj kev pab, Nws txoj kev hlub, Nws txoj kev to taub. Los ntawm peb tej kev khi lus nrog tus Tswv, peb yuav txais lub hwj chim kom txhawb nqa, coj thiab pab peb kom zam txim thiab txais kev zam txim.
Thov paub tias kev zam txim pub rau ib tug tsis txhais tias nej rov qab cia lwm tus ua rau nej raug mob ntxiv. “Thaum peb xav zam txim pub rau ib tug neeg tej zaum peb tseem yuav txais tus Ntsuj Plig tej kev tshoov siab kom tsis txhob nyob ze nws.”10
Ib yam li Anpinkayis tau pab Daviv kom “tsis txhob chim siab”11 thiab txais kev pab uas nws xav tau, tus Cawm Seej yuav pab nej. Nws hlub nej, thiab Nws yuav ntsib nej nyob ntawm nej txoj kev “nrog hwj chim kho tau mob nyob hauv nws ob txhais tis.”12 Nws xav kom nej nyob kaj siab lug.
Kuv tau pom qhov txuj ci tseem ceeb thaum Yexus Khetos tau kho kuv txoj kev chim siab heev. Kuv txiv tau tso cai cia kuv qhia nej tias kuv loj hlob hauv ib lub tsev uas kuv tsis tshua kaj siab vim tias nws hais lus tsim txom kuv ua rau kuv nyuaj siab kawg. Thaum kuv yog ib tub ntxhais hluas, kuv ntxub kuv txiv thiab tu siab heev los ntawm qhov mob ntawd.
Ntau xyoo thiab thaum kuv tau nrhiav kev kaj siab lug thiab kev kho mob los ntawm kev zam txim, kuv tau kawm tias Vajtswv Leej Tub uas tau theej kuv lub txhoj, yeej yog tib tug Txhiv Dim uas yuav cawm cov uas tau ua rau kuv raug mob. Kuv tsis txawj ntseeg qhov tseeb thib ib yog tias kuv tsis ntseeg qhov thib ob.
Thaum kuv txoj kev hlub tus Cawm Seej loj hlob zuj zus, kuv haj yam xav siv Nws cov tshuaj kho mob kom tshem kev npau taws thiab kev chim siab. Yeej tau siv ntau xyoo, thiab kuv yuav tsum ua siab loj, rau siab, thiab yuav tsum kawm kom tso siab rau tus Cawm Seej lub hwj chim kom cawm thiab kho neeg zoo. Kuv tseem tshuav hauj lwm ua, tiam sis kuv lub siab yeej tsis xav ua pauj. Kuv muaj “ib lub siab tshiab”13—ib lub siab uas paub txog tus Cawm Seej txoj kev hlub uas tsis tu tsis tseg, tus uas nrog nraim kuv nyob, tus uas ua siab ntev coj kuv mus rau ib qho chaw zoo dua, tus uas nrog kuv quaj, tus uas paub kuv txoj kev tu siab.
Tus Tswv tau foom koob hmoov rau kuv ib yam li Anpinkayis tau muab tej khoom rau Daviv. Nws tau xa cov neeg xib hwb hauv kuv lub neej. Thiab qhov uas zoo tshaj plaws thiab tau hloov kuv lub siab ntau tshaj yog kuv txoj kev sib raug zoo nrog kuv Leej Txiv Saum Ntuj Ceeb Tsheej. Los ntawm Nws, kuv thiaj paub ib Leej Txiv zoo tag nrho uas hlub kuv kom pov hwm thiab coj kuv kev.
Txwj Laug Richard G. Scott hais tias: “Nej tsis muaj peev xwm kom tej uas ua tas los ploj mus, tiam sis nej muaj peev xwm zam txim.14 Kev zam txim kho tau tej qhov mob loj heev, vim Vajtswv txoj kev hlub tshem kev ntxub tawm ntawm yus lub siab lub ntsws. Kev zam txim ua rau yus tsis xav ua pauj. Ua rau yus muaj chaw hauv yus lub siab txais tau tus Tswv txoj kev hlub uas dawb huv, kho mob, thiab pab kom rov qab sib raug zoo.”15
Ob peb xyoo tas los no, kuv leej txiv kuj tau hloov siab ntau heev thiab Nws tau tig mus rau tus Tswv—kuv twb tsis tau xav yuav muaj li no hauv lub neej no. Yeej yog ib yam uas ua tim khawv rau kuv txog Yexus Khetos lub hwj chim uas hloov neeg lub siab tag nrho.
Kuv paub tias Nws muaj peev xwm kho tus neeg txhaum thiab cov uas raug tej yam los ntawm kev ua txhaum. Nws yog tus Cawm Seej thiab tus Txhiv Dim ntawm lub ntiaj teb, uas txo Nws txoj sia kom peb thiaj yuav rov qab muaj sia. Nws hais tias, “Tus Tswv tus Ntsuj Plig nrog nraim kuv, rau qhov nws tsa kuv ua tus qhia txoj moo zoo rau cov neeg txom nyem. Vajtswv tau txib kuv los kho cov uas muaj kev tu siab, nws txib kuv mus qhia txoj kev cawm dim rau cov neeg uas raug kaw, thiab kho cov neeg dig muag kom rov pom kev, thiab tso cov uas raug kev tsim txom kom dim.”16
Rau tag nrho nej cov uas tu siab, raug kaw, mob, thiab dig muag vim nej ua txhaum, Nws yuav kho nej, pab kom nej rov zoo, thiab tso nej dim. Kuv ua tim khawv tias Nws txawj kho nej zoo tiag tiag. Nyias muaj nyias sij hawm thaum lawv txais kev kho kom zoo ntawd, thiab peb yuav tsum tsis txhob txiav txim rau lwm tus lub sij hawm. Yeej tseem ceeb rau peb muaj sij hawm txaus kom rov zoo thiab ua siab zoo rau peb tus kheej. Tus Cawm Seej yeej muaj lub siab hlub thiab Nws tsom ntsoov npaj kom tsom kwm saib xyuas peb.17
Thaum peb zam txim thiab txais kev kho kom zoo peb yuav tsum xaiv kom tsis txhob ua raws li tej yam phem ntawd nyob hauv peb tsev neeg los sis rau lwm tus. Rau txhua leej txhua tus, peb yuav tsum ua siab zoo pauj kev ua lim hiam, muab kev hlub pauj kev phem, ua siab mos pauj kev meem txom, muab kev nyab xeeb pauj kev ntxhov siab, thiab kev kaj siab lug pauj kev sib cav sib ceg.
Qhov uas yus pub tej yam uas lwm tus txwv tsis pub rau nej yeej yog ib feem ntawm kev kho mob uas yuav los ntawm kev ntseeg Yexus Khetos. Qhov uas yus ua neej zoo li Yaxayas tau hais tias, muab kev zoo nkauj pauj tej tshauv hauv yus lub neej18 yog kev muab siab rau ntseeg raws li tus Cawm Seej tus yam ntxwv tus uas tau raug txhua yam Nws thiaj li yuav muaj peev xwm pab txhua tus.
Yauxej los ntawm Iyiv tau ua neej muaj tshauv. Nws cov tij laug ntxub nws, ntxeev siab rau nws, muab nws muag ua qhev, es nws raug kaw hauv tsev rau txim, thiab ib tug uas cog lus tias nws yuav pab twb tsis nco qab txog nws. Tiam sis nws tso siab rau tus Tswv. “Tus Tswv nrog nraim Yauxej”19 thiab siv nws tej kev sim siab kom nws tau koob hmoov thiab kawm ntxiv—thiab kom pab cawm nws tsev neeg thiab tag nrho cov neeg Iyiv.
Thaum Yauxej ntsib nws cov kwv tij es nws yog ib tug thawj coj hauv Iyiv, nws txoj kev zam txim thiab lub zeem muag tshiab los muaj nyob hauv tej lus uas nws tau hais:
“Nim no nej tsis txhob txhawj los sis tu siab qhov uas nej muab kuv muag los rau ntawm no. Yeej yog Vajtswv txib kuv ua nej ntej los thiaj cawm tau neeg txoj sia. …
“Tsis yog nej muag kuv los rau ntawm no, tiam sis yog Vajtswv txib kuv los.”20
Dhau los ntawm tus Cawm Seej, Yauxej lub neej muaj “kev zoo siab pauj tshauv.”21
Kevin J. Worthen, BYU tus thawj tswj hwm, tau hais tias Vajtswv “yuav tsis ua kom qhov zoo los … ntawm peb txoj kev vam meej xwb tiam sis kuj yuav ua kom qhov zoo los thaum peb ua yuam kev thiab thaum lwm tus ua yuam kev kom peb raug mob. Vajtswv yeej zoo thiab muaj hwj chim npaum li ntawd.”22
Kuv ua tim khawv tias tus uas coj yam ntxwv zoo tshaj plaws txog kev hlub thiab kev zam txim yog peb tus Cawm Seej, Yexus Khetos, tus uas raug txom nyem loj kawg thiab hais tias, “Txiv, thov koj zam txim rau lawv; rau qhov lawv tsis paub hais tias lawv ua dab tsi.”23
Kuv paub tias peb Leej Txiv Saum Ntuj Ceeb Tsheej xav kom Nws txhua tus me nyuam tau zoo thiab kev cia siab. Nyob hauv phau Yelemis, tus Tswv qhia tias “Nws paub Nws xav li cas txog peb, Nws xav txog kev kaj siab lug.”24
Yexus Khetos yog nej tus Mexiyas, nej tus Txhiv Dim thiab tus Cawm Seej, uas paub nej lub siab xav tau dab tsi. Nws xav kho nej zoo kom nej zoo siab. Nws hlub nej. Nws quaj nrog nej thaum nej tu siab thiab nws xav kom muab nej hloov ua neeg zoo tag nrho. Kuv thov kom peb yuav cia siab thiab tuav Nws tes uas yeej ncav rau peb25 thaum peb taug txoj kev kho mob ntawm kev zam txim, los ntawm Yexus Khetos lub npe, amees.