Yog Muaj Nws Peb Ua Tau tej Yam Nyuaj
Peb yuav muaj peev xwm ua tus Tswv cov thwj tim zoo dua yog peb muab siab rau ntseeg tus Tswv thaum peb raug tej yam nyuaj.
Thaum tus Cawm Seej ua hauj lwm qhuab qhia hauv lub ntiaj teb, Nws pom ib tug txiv neej uas dig muag. Yexus cov thwj tim nug hais tias, “Xib Hwb, leej twg ua txhaum thiaj ua rau tus txiv neej no dig muag thaum nruab thiab los lawm? Yog nws ua txhaum los sis nws niam nws txiv ua txhaum?”
Tus Cawm Seej teb meej qhia peb tias Nws yeej paub txog peb tej xwm txheej nyuaj: “Qhov uas nws dig muag li no tsis yog vim nws tej kev txhaum los sis vim nws niam nws txiv tej kev txhaum. Nws dig muag kom sawv daws pom Vajtswv lub hwj chim xwb.”1
Txawm yog muaj tej teeb meem vim peb txhob txwm tsis mloog lus los, peb paub tias muaj ntau yam nyuaj hauv lub neej no los ntawm lwm yam. Txawm yog vim li cas peb raug teeb meem los xij, yeej yog ib lub cib fim zoo rau peb loj hlob tuaj.
Peb tsev neeg kuj raug teeb meem ntawm lub neej no thiab. Thaum kuv loj hlob tuaj, kuv nyiam tej yim neeg loj heev. Kuv nyiam tej tsev neeg loj heev, qhov tseem ceeb yog vim kuv tau kawm txog lub Koom Txoos los ntawm kuv tus dab laug, Sarfo, thiab nws tus poj niam nyob hauv Takoradi, Ghana.
Thaum Hannah thiab kuv wb sib yuav, wb xav kom muaj raws li wb ob zaj yawg suab txoj koob hmoov uas qhia tias wb yuav muaj me nyuam coob. Tiam sis, ua ntej wb tus tub thib peb yug los, wb kawm tias Hannah muaj tsis taus me nyuam ntxiv. Txawm yog thaum Kenneth yug los nws thiab nws niam raug xwm txheej ntshe yuav xiam mus, zoo siab uas nws twb yug los thiab nws niam tau zoo rov los. Nws pib txawj koom tes ua tej yam hauv peb tsev neeg—xws li kev koom lub Koom Txoos, thov Vajtswv txhua hnub, kawm vaj lug kub, ua tsev neeg hmo ua ke, thiab tej yam ntxim saib ntxim ua.
Txawm yog yuav tsum hloov wb txoj kev xav tias yuav muaj ib tsev neeg loj heev, wb muaj kev xyiv fab vim tau ua raws li tej lus qhia los ntawm “Tsev Neeg: Ib zaj Lus Tshaj Tawm rau lub Ntiaj Teb” nrog wb peb tug tub. Kev ua raws li tej lus qhia no tau ua rau kuv txoj kev ntseeg loj tuaj.
Zoo li zaj lus tshaj tawm hais tias: “Txoj kev sib yuav ntawm ib tug txiv neej thiab ib tug poj niam tseem ceeb heev rau Nws lub tswv yim nyob mus ib txhis li. Tej me nyuam tsim nyog yug los raws li txoj kev sib khi ntawm txoj kev sib yuav, thiab tsim nyog muaj niam muaj txiv, uas ua ib siab hawm tej lus cog tseg ntawm txoj kev sib yuav, cob lawv loj hlob.”2 Thaum wb tau ua raws li tej lub ntsiab cai no, wb tau koob hmoov.
Tiam sis muaj ib hnub Saturday thaum kuv ua kuv txoj hauj lwm ua ceg txheem ntseeg tus thawj tswj hwm tas, es wb raug kev sim siab phem tshaj plaws. Peb tsev neeg nyuam qhuav rov qab los tsev tom qab tau ua si nyob ntawm lub Koom Txoos thiab peb yuav noj su. Ces wb peb tug tub tau mus ua si nyob hauv peb tshav tsev.
Kuv tus poj niam tau txais kev tshoov siab ob peb zaug tias tej zaum muaj ib qho teeb meem. Nws hais kom kuv mus saib xyuas cov me nyuam thaum wb ntxuav tais. Kuv xav tias lawv nyab xeeb vim wb hnov tau lawv lub suab qw zoo siab thaum lawv ua si.
Thaum wb mus saib wb peb tug tub ua dab tsi, wb ntshai kawg vim wb pom Kenneth uas muaj 18 lub hlis xwb tsis txav li nyob hauv ib thoob dej, es nws ob tug tij laug tsis tau pom nws. Wb ceev ceev nqa nws mus rau lub tsev kho mob, tiam sis ua li cas los kho tsis tau kom rov qab muaj sia.
Wb nyuaj siab kawg vim wb yuav tsis muaj cib fim tu wb tus me nyuam tub uas muaj nqi nyob hauv lub neej no. Txawm wb paub tias Kenneth yuav nrog wb tsev neeg nyob mus ib txhis li, kuv xav paub seb vim li cas Vajtswv yuav cia kuv raug xwm txheej phem no thaum kuv tau ua txhua yam kuv muaj peev xwm ua raws li Nws hu kuv. Kuv nyuam qhuav los tsev tom qab tau txhawb pab Haiv Neeg Ntseeg. Vim li cas Vajtswv tsis tau pom kuv txoj kev ua hauj lwm pab lwm tus thiab cawm wb tus tub thiab peb tsev neeg dim kev tu siab no? Kuv yim xav txog qhov no, kuv yim muaj lub siab iab.
Kuv tus poj niam yeej tsis tau liam kuv vim kuv tsis tau mloog nws lus, tiam sis kuv tau kawm ib yam uas hloov kuv lub neej thiab kuv tau tsim ob txoj kev cai uas kuv yeej yuav tsis rhuav:
Txoj kev cai 1: Mloog thiab ua raws li yus tus poj niam tej lus.
Txoj kev cai 2: Yog yus tsis paub tseeb yuav ua li cas, ua raws li txoj kev cai thib 1.
Txawm yog xwm txheej nyuaj kawg thiab peb tseem nyuaj siab heev, twb tau muaj kev pab ris peb lub nra.3 Kuv tus poj niam thiab kuv wb tau kawm tej yam los ntawm qhov no. Wb tau koom siab thiab xav ua raws li peb tej kev khi lus hauv lub tuam tsev; wb paub tias Kenneth yog wb tug tub nyob hauv lub ntuj tom ntej vim nws tau yug los ntawm kev khi lus. Wb kuj tau kawm tej yam kom txhawb pab lwm tus thiab paub lawv lub siab mob li cas. Kuv ua tim khawv tias wb txoj kev muaj lub siab iab tau ploj mus thaum wb muab siab rau ntseeg tus Tswv. Tseem nyuaj rau wb, tiam sis wb tau kawm zoo li tus Thwj Tim Povlauj hais tias “vim Yexus Khetos txhawb [wb] lub zog, [wb] thiaj tiv taus txhua tsav yam huv tib si” yog wb tsom ntsoov rau nws.4
Thawj Tswj Hwm Russell M. Nelson qhia hais tias, “Thaum peb tsom ntsoov rau Vajtswv txoj kev cawm seej thiab Yexus Khetos … txoj moo zoo, peb yuav muaj kev xyiv fab txawm peb raug dab tsi los xij nyob hauv peb lub neej. Nws kuj hais tias, “Kev xyiv fab yeej los ntawm Nws thiab muaj kev xyiv fab vim muaj Nws.”5
Peb muaj peev xwm zoo siab thiab nyob kaj siab lug thaum peb raug tej yam nyuaj. Tus Cawm Seej txoj kev hlub thiab Nws txoj Kev Theej Txhoj yeej muaj hwj chim pab peb thaum peb raug kev sim siab. “Thiab tag nrho tej yam tsis ncaj [thiab nyuaj] hauv lub neej no yuav zoo dhau los ntawm Yexus Khetos txoj Kev Theej Txhoj.”6 Nws txib hais tias, “Neeg ntiaj teb yuav tsim txom nej: tiam sis cia li zoo siab, rau qhov kuv twb kov yeej lub ntiaj teb no lawm.”7 Nws yuav pab peb nyiaj kom dhau txhua yam kev mob kev nkees thiab kev sim siab uas peb raug hauv lub ntiaj teb no.
Muaj ntau zaj hauv vaj lug kub txog cov thawj coj zoo, xws li Yelemis, Yauj, Joseph Smith, thiab Nifais, uas kuj raug tej teeb meem thiab tej kev sim siab ntawm lub neej no. Lawv yog neeg uas tau kawm mloog tus Tswv lus txawm yog lawv raug tej xwm txheej phem heev.8
Thaum nws nyob hauv lub Tsev Kaw Liberty, Joseph Smith qw hais tias: “Auj Vajtswv, koj nyob qhov twg? Thiab lub tsev ntaub uas npog koj qhov chaw nkaum nyob qhov twg?”9 Tus Tswv tau qhia Joseph kom nws “ua tib zoo nyiaj”10 ces cog lus tias yog nws ua li ntawd, ces tag nrho tej yam no yuav muab kev kawm rau nws, thiab yuav zoo rau nws.11
Thaum kuv xav txog kuv lub neej, kuv paub tias kuv tau kawm tej yam tseem ceeb tshaj los ntawm tej xwm txheej nyuaj, tej lub sij hawm thaum kuv tsis txaus siab. Tej yam uas nyuaj rau kuv thaum kuv yog ib tug tub hluas, thaum kuv kawm txog lub Koom Txoos hauv seminary, thaum kuv nyuam qhuav hloov siab los ntseeg, thiab thaum kuv tau ua ib tug tub txib thiab tej teeb meem kuv raug thaum kuv kawm ntawv, kuv ua tej yam uas Vajtswv hu kuv, thiab thaum kuv tu kuv tsev neeg txhua yam no tau npaj kuv lub siab rau yav tom ntej. Kuv yim ntseeg tus Tswv thaum kuv raug xwm txheej nyuaj, kuv yim muaj peev xwm ua Nws tus thwj tim zoo dua.
Tej yam nyuaj hauv peb lub neej tsis tas ua rau peb xav tsis thoob tom qab peb tau pib taug txoj kev ti thiab nqaim.12 Yexus Khetos tau kawm kom “mloog lus los ntawm txoj kev uas tiv kev txom nyem.”13 Thaum peb coj raws li Nws, qhov tseem ceeb yog thaum peb raug tej yam nyuaj, ces peb yuav loj hlob tuaj ua neeg zoo li Nws.
Peb khi lus rau tus Tswv nyob hauv lub tuam tsev hais tias peb yuav ua raws li kev cai ua kev txi. Kev txi yeej ib txwm yog ib feem ntawm Yexus Khetos txoj moo zoo. Yog ib qho uas pab peb nco txog Yexus Khetos txoj kev theej txhoj rau tag nrho cov neeg uas tau ua neej hauv lub ntiaj teb no.
Kuv paub tias tus Tswv yeej muab nqi zog thaum peb xav ua ncaj ncees. Nej puas nco qab txog cov me nyuam coob uas kuv txoj koob hmoov yawg suab cog lus rau kuv? Twb muaj raws li txoj koob hmoov ntawd. Kuv tus poj niam thiab kuv wb tau koom ob peb puas tub txib ntxhais txib, uas los ntawm 25 tawm lub teb chaws nyob hauv Qhov Chaw Tshaj Tawm Txoj Moo Zoo Ghana Cape Coast. Wb hlub lawv npaum li lawv yog wb cov me nyuam tiag.
Kuv ua tim khawv tias peb yuav muaj peev xwm ua tus Tswv cov thwj tim zoo dua yog peb muab siab rau ntseeg tus Tswv thaum peb raug tej yam nyuaj. Thaum peb ua li ntawd, Nws yuav txhawb peb lub zog thiab pab peb ris peb tej nra. Los ntawm Yexus Khetos lub npe, amees.