Sib Koom Tes nrog tus Tswv
Yexus Khetos txoj moo zoo tshaj tawm tias yuav tsum ua raws li lub ntsiab cai uas qhia tias ib tug poj niam thiab tus txiv neej yuav tsum sib koom tes tag nrho, nyob hauv lub neej no thiab nyob mus ib txhis li.
Ob peb hlis tom qab wb sib yuav, kuv tus poj niam qhia kuv tias nws xav kawm ntaus nkauj. Vim kuv xav ua rau nws zoo siab, kuv txiav txim siab kuv yuav npaj ib yam kom kuv tus hlub xav tsis thoob. Kuv tau mus rau ib lub tsev muag twj paj nruas thiab yuav ib lub piano ua ib khoom plig. Kuv tau tso daim ntawv yuav khoom hauv ib lub me nyuam phij xab thiab muab hlua zoo nkauj khi rau ces kuv muab rau nws, kuv yeej xav tias nws yuav zoo siab ua kuv tsaug vim kuv yog ib tug txiv uas hlub nws thiab paub yuav khoom rau nws.
Thaum nws qhib lub phij xab ntawd thiab pom muaj dab tsi nyob haud, nws saib kuv thiab hais tias, “Auj, koj txiv, cas koj yuav zoo ua luaj! Tiam sis xav nug koj ib lo seb: Qhov no puas yog qhov khoom plig los sis ib qho nuj nqis?” Tom qab wb sib tham txog qhov khoom plig no, wb txiav txim siab tias wb tsis yuav. Wb tsis muaj nyiaj txiag ntau vim wb kawm ntawv, zoo li lwm cov neeg uas nyuam qhuav sib yuav. Lub sij hawm no tau pab kuv to taub txog lub ntsiab cai ntawm kev koom tes tag nrho thaum sib yuav thiab to taub tias kev ua raws li lub ntsiab cai no yuav pab kuv tus poj niam thiab kuv wb koom siab koom ntsws.1
Yexus Khetos txoj moo zoo tshaj tawm tias yuav tsum ua raws li lub ntsiab cai uas qhia tias ib tug poj niam thiab tus txiv neej yuav tsum sib koom tes tag nrho, nyob hauv lub neej no thiab nyob mus ib txhis li. Txawm yog nyias muaj nyias tej cwj pwm thiab tej kev lav ris uas Vajtswv muab rau txhua tus, tus poj niam thiab tus txiv neej muaj ob luag hauj lwm uas tseem ceeb ib yam nyob hauv Vajtswv txoj hau kev zoo siab rau Nws cov me nyuam.2 Twb paub li no txij thaum chiv keeb los thaum tus Tswv qhia tias “tsis zoo uas txiv neej nyob nws ib leeg; yog li ntawd, [Nws] yuav tsim ib tug pab cuam zoo rau nws.”3
Nyob hauv tus Tswv txoj hau kev, ib tug “pab cuam” yog ib tug khub uas yuav nrog Adas sib koom tes tag nrho kom sib txis.4 Muaj tseeb tiag, Evas yeej ua rau Adas tau koob hmoov. Los ntawm nws tej cwj pwm ntawm sab ntsuj plig, nws tau pab Adas xav ua hauj lwm nrog nws kom muaj raws li Vajtswv txoj hau kev rau noob neej tag nrho.5
Xav kom peb xav txog ob lub ntsiab cai tseem ceeb uas ua rau ib tug txiv neej thiab ib tug poj niam txoj kev sib koom tes muaj zog. Lub ntsiab cai thib ib yog Vajtswv saib peb txhua tus zoo ib yam nkaus.6 Raws li txoj moo zoo cov lus qhuab qhia hais, qhov uas ib tug poj niam thiab ib tug txiv neej sib txawv yeej tsis txhais hais tias yuav tsis muaj raws li Vajtswv lus cog tseg rau Nws cov tub thiab cov ntxhais. Kev vam meej loj tshaj plaws yog kev txais tau lub yeeb koob xilethi-aus nyob mus ib txhis li.7 Tus Cawm Seej caw peb txhua tus, uas yog Vajtswv cov me nyuam, kom los cuag Nws, txais Nws txoj kev zoo; thiab Nws tsis txwv leej twg ntawm cov uas los cuag Nws.8 Yog li ntawd, hais txog qhov no, Nws saib peb ib yam nkaus.
Thaum ib khub niam txiv to taub thiab ua raws li lub ntsiab cai no, nkawd tsis tsa nkawd tus kheej ua tus thawj tswj hwm los sis tus lwm thawj tswj hwm ntawm nkawd tsev neeg. Tsis muaj ib tug uas siab tshaj los sis qis dua ib tug nyob hauv kev sib yuav, thiab tsis muaj ib tug uas taug kev ua ntej los sis tom qab ib tug. Nkawd taug kev ua ke, sib luag zos, li nkawd yog Vajtswv ob tug me nyuam. Nkawd xav zoo ib yam thiab muaj tib lub hom phiaj nrog peb Leej Txiv Saum Ntuj Ceeb Tsheej thiab Yexus Khetos,9 thaum nkawd coj nkawd tsev neeg ua ke.
Thaum nkawd sib koom tes sib luag zos, “kev hlub tsis yog ib yam yus muaj tiam sis yog ib yam yus ua … yog ib feem ntawm peb txoj kev ua tib neeg.”10 “Thaum koom tes ua ke tiag tiag, ib tug txiv tsev thiab niam tsev koom siab koom ntsws ‘txoj kev kav ib txhis li’ uas yuav los ‘tsis muaj dab tsi yuam’ muab lub dag zog ntawm sab ntsuj plig rau nkawd thiab nkawd cov xeeb ntxwv ‘mub ib txhiab thiab ib txhis.’”11
Lub ntsiab cai thib ob yog Kev Cai Kub, uas tus Cawm Seej qhia hauv Zaj Lus Pem Roob: “Yog nej xav kom lwm tus ua li cas rau nej, nej yuav tsum ua ib yam li ntawd rau lwm tus thiab.”12 Lub ntsiab cai no qhia tias yuav tsum sib koom siab koom ntsws thiab ib leeg pab ib leeg thiab nws muaj lub ntsiab los ntawm txoj lus txib thib ob: “Hlub koj tej kwv tij zej zog ib yam li nej lub cev.”13 Qhov no koom ua ke nrog Khetos tej cwj pwm ntxiv xws li kev ua siab ntev, kev siab mos siab muag, thiab kev ua siab zoo.
Xwv kom to taub kev siv lub ntsiab cai no, peb yuav saib qhov uas Vajtswv tau muab peb niam peb txiv thaum chiv keeb, Adas thiab Evas, sib khi ua ke mus ib txhis li. Nkawd tau los koom ib lub cev,14 tsim kev sib koom siab koom ntsws uas pab nkawd ib leeg saib taus, ris txiaj, thiab hlub ib leeg, nkawd tsis xav txog nkawd tus kheej thiab ib leeg xav kom ib leeg tau zoo thaum lawv ua neej mus txog thaum txais tau txoj sia nyob mus ib txhis.
Tej cwj pwm no yog tej yam uas peb xav muaj niaj hnub no nyob hauv kev sib yuav uas koom siab koom ntsws. Thaum nkawd ua kev cai sib khi hauv lub tuam tsev, ib tug poj niam thiab ib tug txiv neej txaus tau kev sib yuav dawb huv raws li kev khi lus tshiab thiab kav ib txhis. Los ntawm tus txheej txheem ntawm lub pov thawj hwj no, nkawd txais tau cov koob hmoov mus ib txhis li thiab Vajtswv lub hwj chim kom coj nkawd tsev neeg thaum nkawd ua raws li tej kev khi lus uas nkawd tau khi. Txij thaum ntawd los, nkawd sib pab koom tes ua hauj lwm nrog tus Tswv, qhov tseem ceeb ua tej kev lav ris uas Vajtswv muab rau nkawd kom tu thiab kav nyob hauv nkawd tsev neeg.15 Kev tu thiab kev kav yeej yog ob qho kev lav ris uas sib txuas thiab sib tshooj, uas txhais tias cov niam tsev thiab txiv tsev “yuav tsum siab pab xws li nkawd nyob sib txig”16 thiab koom ua ke coj nkawd tsev neeg kom sib luag zos.
“Kev tu txhais tias yus txhawb nqa thiab qhia” yus tsev neeg, thaum yus pab lawv “kawm tej yam tseeb txog txoj moo zoo thiab muaj kev ntseeg Leej Txiv Saum Ntuj Ceeb Tsheej thiab Yexus Khetos” nyob hauv ib lub tsev uas muaj kev hlub. Kev kav txhais tias yus “pab coj tsev neeg rov qab mus nyob rau ntawm Vajtswv lub xub ntiag. Yus ua li no thaum yus pab thiab qhia lawv nrog lub siab mos siab muag, thiab kev hlub dawb paug.” Kuj yuav tsum “coj tsev neeg thov Vajtswv tas li, kawm txog txoj moo zoo, thiab ua lwm yam kev teev tiam Vajtswv. Cov niam tsev txiv tsev koom ua hauj lwm ua ke,” coj raws li Yexus Khetos tus yam ntxwv, “kom muaj raws li [ob qho] kev lav ris no.”17
Yeej tseem ceeb rau peb pom tias kev tswj hwm ib tsev neeg yog los ntawm tus txheej txheem raws leej txiv caj ces, uas txawv me ntsis ntawm kev ua thawj coj pov thawj hwj hauv lub Koom Txoos.18 Tus txheej txheem raws leej txiv caj ceg qhia tias cov niam tsev thiab txiv tsev lav ris Vajtswv tej hauj lwm kom ua raws li lawv tej kev lav ris dawb ceev rau nkawd tsev neeg. Yuav tsum sib koom siab koom tes ua—txaus siab ua ncaj ncees ua txhua yam ntsiab cai—thiab pab yus muaj cib fim loj hlob tuaj thaum muaj txoj kev hlub thiab kev sib pab hauv yus lub tsev.19 Tej kev lav ris tshwj xeeb no yeej tsis qhia tias ib tug siab dua ib tug thiab yeej tsis pub ib tug ua phem los sis pub nws siv nws txoj cai raws li qhov tsis yog.
Qhov uas Adas thiab Evas tawm ntawm lub Vaj Edees qhia peb txog qhov uas ib tug niam tsev thiab txiv tsev yuav tsum sib pab thaum nkawd tu thiab kav nkawd tsev neeg. Raws li qhia nyob hauv phau Mauxes, nkawd tau ua hauj lwm ua ke kom nkawd tau mov noj los ntawm nkawd hauv pliaj kev tawm hws kom nkawd thiaj li tau noj tau haus rau nkawd tsev neeg;20 nkawd tau muaj me nyuam;21 nkawd tau thov tus Tswv lub npe ua ke thiab “nkawd hnov tus Tswv lub suab tuaj tim lub Vaj Edees tuaj”;22 nkawd tau lees yuav tus Tswv cov lus txib thiab siv zog kom ua raws li cov lus txib ntawd.23 Ces “nkawd muab txhua yam qhia rau nkawd tej tub thiab tej ntxhais paub”24 thiab “nkawd hu Vajtswv tsis tu tsis tseg” nyob ua ke.25
Kuv cov kwv tij thiab cov muam, kev tu thiab kev kav yeej yog tej cib fim zoo, tsis yog tej uas cuam tshuam. Txawm yog ib tug neeg lav ris ib txoj hauj lwm los nws tsis tas ua txoj hauj lwm ntawd nws ib leeg xwb. Thaum ib khub niam txiv to taub ob qho kev lav ris tseem ceeb no, nkawd yuav siv zog ua ke kom pov hwm thiab saib xyuas nkawd cov me nyuam sab cev nqaij daim tawv thiab sab siab ntsws. Nkawd kuj yuav pab cov me nyuam kov yeej tej teeb meem ntawm sab ntsuj plig hauv peb lub caij nyoog thaum nkawd tu nkawd tsev neeg.
Txawm yog ib khub niam txiv ib leeg txhawb nqa ib leeg ua nkawd tej kev lav ris no, “tej zaum kev mob nkeeg, kev tuag, los yog lwm yam yuav ntxim ua txawv tej lus no.”26 Tej lub sij hawm ib tug yuav tsum lav ris ua ob lub luag hauj lwm thaum tib lub sij hawm, txawm yog nws yuav tsum ua ib ntus los sis ua ntev me ntsis.
Tsis ntev tas los kuv ntsib ib tug poj niam thiab ib tug txiv neej uas yuav tsum ua li no. Vim nkawd tsis muaj tus khub, nkawd ob leeg koom tes nrog Vajtswv, es nkawd txiav txim siab tias nkawd yuav mob siab siab xyuas nkawd cov me nyuam ntawm sab ntsuj plig thiab sab cev nqaij daim tawv. Txawm yog nkawd nyias nrauj nyias tus khub lawm los nkawd tsis tau muab nkawd tej kev khi lus uas nkawd khi nrog tus Tswv hauv lub tuam tsev tso tseg. Nkawd ob leeg tau nrhiav tus Tswv txoj kev pab ua txhua yam thaum nkawd siv zog nyiaj tej teeb meem thiab taug txoj kev ua raws li nkawd tej kev khi lus. Nkawd tso siab rau tus Tswv hais tias Nws yuav saib xyuas nkawd, tsis yog nyob hauv lub neej no xwb, tiam sis nyob mus ib txhis li. Nkawd ob leeg tau tu nkawd cov me nyuam thaum nkawd qhia lawv txog kev siab mos siab muag thiab kev hlub dawb paug txawm yog nkawd raug tej xwm txheej nyuaj hauv lub neej no los. Raws li kuv paub mas, ob tug no uas tsis muaj tus khub yeej tsis liam Vajtswv rau nkawd txoj hmoov tsis zoo no. Tiam sis, nkawd saib rau yav tom ntej muaj kev cia siab uas ci kawg nkaus thiab paub tias tus Tswv muaj cov koob hmoov Nws yuav pub rau nkawd.27
Cov kwv tij thiab cov muam, tus Cawm Seej tau coj yam ntxwv zoo tag nrho txog kev koom siab koom ntsws thaib kev sib haum xeeb muaj tib lub hom phiaj thiab cov lus qhuab qhia ntawm peb Leej Txiv Saum Ntuj Ceeb Tsheej. Nws tau thov Vajtswv pab Nws cov thwj tim, hais tias, “Kom lawv koom ib lub siab; Txiv, thov cia lawv nyob hauv wb, ib yam li koj nyob hauv kuv thiab kuv nyob hauv koj; … kom lawv ua tau ib lub siab, ntiaj teb thiaj paub hais tias koj txib kuv los.”28
Kuv ua tim khawv rau nej tias, thaum peb—cov poj niam thiab cov txiv neej—sib koom tes ua hauj lwm kom sib luag zos, ces peb yuav koom siab koom ntsws raws li tus Cawm Seej qhia thaum peb ua peb tej kev lav ris nyob hauv peb txoj kev sib yuav. Kuv cog lus rau nej, los ntawm Yexus Khetos lub npe, hais tias neeg peb “lub siab [yuav] sib khi ua ke los ntawm kev koom siab koom ntsws thiab los ntawm kev ib leeg hlub ib leeg,”29 peb yuav muaj kev xyiv fab thaum peb nrhiav txoj sia nyob mus ib txhis, thiab peb txoj kev muaj peev xwm sib pab thiab sib hlub yuav loj tuaj ntau heev.30 Kuv ua tim khawv txog tej yam tseeb no los ntawm tus Cawm Seej Yexus Khetos lub npe dawb huv, amees.