Tsim lub Neej Kom Tiv Taus tus Yeeb Ncuab
Kuv thov kom peb yuav ua peb lub neej raws li tej kev npaj thiab teev tseg uas peb Leej Txiv tau tsim.
Nyob ntawm lub sam thiaj no nyob hauv lub Tsev rau Rooj Sab Laj, peb tau txais kev ntuas, kev tshoov siab, kev qhia, thiab kev tshwm sim. Tej lub sij hawm, cov neeg tau hais lus piv txwv raws li lawv txoj kev txawj ntse thiab lub neej kom qhia meej txog ib lub ntsiab cai ntawm Yexus Khetos txoj moo zoo.
Los ntawm txoj kev no, peb tau kawm txog cov nyab hoom uas thaum ya mus lawv hloov txoj kev mus me ntsis xwb ces ntshe yuav nyob deb ntawm qhov chaw uas peb xav mus thaum kawg.1 Peb kuj tau kawm los ntawm zaj lus piv txwv txog peb lub plawv hauv siab hais tias yuav tsum hloov peb lub siab thiaj li yuav ua raws li tus Tswv hais kom coj raws li Nws.2
Lub sij hawm no, kuv xav qhia ib zaj lus piv txwv uas los ntawm ib yam uas tau kawm kom npaj ua ib tug kws ua hauj lwm. Kuv hais txog kev tsim kev ua vaj ua tsev rau cov pej xeem. Thaum kuv pib kawm ntawv qib siab, kuv twb cia siab tos ntsoov txog hnub uas kuv yuav kawm txhua yam tas thiaj li kawm tau hoob uas yuav qhia kuv ua vaj ua tsev thiab lwm yam lub tsev uas yuav ua kom txhob muaj av qeeg.
Ces twb txog hnub uas kuv yuav kawm hoob thib ib txog qhov no. Tej lus uas kuv tus xib hwb hais thaum xub thawj yog li no: “Nyaj nej xav xav pib kawm ua tej lub tsev uas yuav ua kom txhob muaj av qeeg,” es peb feem coob nyo hau qhia tias peb xav kawm txog qhov ntawd. Ces tus xib hwb hais tias, “Thov txim uas kuv qhia nej tias yeej ua tsis taus li no, vim kuv tsis muaj peev xwm qhia nej tsim ib lub tsev uas yuav ua kom tsis txhob muaj av qeeg. Qhov no los tsis to taub,” nws hais tias, “vim tias yeej yuav muaj av qeeg txawm peb tsis nyiam los xij.”
Ces nws hais tias, “Kuv qhia nej kom paub kho tej tsev kom khov kho thaum av qeeg, tej tsev uas tiv taus lub zog los ntawm av qeeg, kom lub tsev yuav khov kho thiab tsis puas tsuaj loj heev, thiaj li yuav siv tau lub tsev raws li ib txwm tau xav.”
Tus kws tsim txoj kev ua vaj ua tsev yeej ntsuas qhov ntev, qhov dav, qhov siab, thiab seb tej khoom xws li lub hauv paus, tej ncej, tej nqaj, thiab lwm yam khoom ua lub tsev yuav zoo li cas thaum tso ua ke. Yuav tsum muab tej no los npaj thiab teev tseg, ces tus uas ua tsev yuav tsum ua raws nraim tau npaj lawm kom muaj raws li lub hom phiaj uas siv thaum tsim kev ua vaj ua tsev.
Txawm yog txij thaum kuv kawm hoob thib ib txog kev ua tsev kom khov kho los yog 40 xyoo tas los, kuv yeej nco qab ntsoov lub sij hawm thaum kuv haj yam to taub zoo dua ntxiv txog lub ntsiab cai uas kuv yuav siv thaum kuv ua hauj lwm tsim kev ua vaj ua tsev. Tsis tas li ntawd xwb, tiam sis qhov tseem ceeb tshaj—yuav siv lub ntsiab cai no hauv kuv lub neej thiab yuav siv nrog cov neeg uas kuv xav coj yam ntxwv zoo kom pab lawv.
Peb tau koob hmoov vim peb paub txog txoj hau kev cawm seej uas peb Leej Txiv Saum Ntuj Ceeb Tsheej tau tsim, peb muaj Yexus Khetos txoj moo zoo, thiab peb tso siab rau cov yaj saub tej lus qhia! Tag nrho tej no yog Vajtswv tej “kev npaj” thiab “tej kev teev tseg” uas qhia peb meej txog kev tsim tej lub neej zoo siab—lub neej uas tiv taus kev txhaum, kev ntxias, Dab Ntxwg Nyoog tej kev tawm tsam, tus uas xav nrhiav kev cuam tshuam peb kom peb tsis txhob rov qab mus cuag peb Leej Txiv Saum Ntuj Ceeb Tsheej thiab nyob ua ke nrog peb tsev neeg uas peb hlub tas mus li.
Tus Cawm Seej thaum Nws pib ua Nws txoj hauj lwm qhuab qhia los “Dab Ntxwg Nyoog tau sim Yexus lub siab.”3 Tiam sis Yexus tau kov yeej kev sim siab loj ntawd. Qhov uas Nws tawm tsam Dab Ntxwg Nyoog thiab kev ntxias tau pab Nws li cas? Qhov uas pab Yexus kov yeej tej yam nyuaj no yog qhov uas Nws tau npaj Nws sab ntsuj plig, Nws thiaj li muaj peev xwm tiv taus tus yeeb ncuab tej kev ntxias.
Tej yam twg tau pab tus Cawm Seej npaj rau lub sij hawm tseem ceeb ntawd?
Qhov thib ib, Nws tau yoo mov tau 40 hnub thiab 40 hmo, thiab thaum Nws yoo mov nyaj Nws tau thov Vajtswv tsis tu tsis tseg. Yog li ntawd, txawm Nws sab cev nqaij daim tawv qaug zog, Nws sab ntsuj plig muaj zog heev. Zoo siab uas peb tsis tas yoo mov ntev npaum li no—tsuas yoo mov rau 24 teev thiab ib zaug txhua hli—kev yoo mov ua rau peb sab ntsuj plig muaj zog thiab npaj peb kom muaj peev xwm tiv taus tej kev sim siab ntawm lub neej no.
Qhov thib ob, nyob hauv zaj uas hais txog tej kev ntxias uas sim tus Cawm Seej lub siab, peb pom tias Nws yeej xav txog thiab hais tej nqe vaj lug kub thaum lub sij hawm yog kom teb Dab Ntxwg Nyoog.
Thaum Dab Ntxwg Nyoog sim ntxias Nws kom muab cov pob zeb hloov ua cov mov Nws thiaj li yuav tsis tshaib plab tom qab Nws yoo mov ntev lawm, tus Tswv hais rau Dab Ntxwg Nyoog tias, “Vajtswv txoj lus sau tseg hais tias, tsis yog mov xwb thiaj cawm tau neeg txoj sia, tiam sis yog Vajtswv tej lus txhua lo thiaj cawm tau.”4 Ces, thaum tus Tswv nyob puag saum lub tuam tsev, tus dab phem tau sim ntxias Nws kom siv Nws lub hwj chim, es tus Tswv teb hais tias, “Vajtswv txoj lus hais tias, koj tsis txhob sim tus Tswv uas yog koj tus Vajtswv siab.”5 Thaum Dab Ntxwg Nyoog sim ntxias Nws zaum thib peb, tus Tswv tab hais tias, “Vajtswv txoj lus hais tias, nej yuav tsum pe hawm tus Tswv uas yog nej tus Vajtswv tib leeg thiab ua nws tes hauj lwm xwb.”6
Thaum av qeeg, txawm yog tau npaj thiab ua ib lub tsev raws li qhov yog, tseem yuav ua rau lub tsev no tu pleb, muaj tej rooj uas raug puas tsuaj, thiab tej qhov rais tawg tag. Tiam sis lub tsev uas tau npaj thiab ua zoo lawm los yuav muaj raws li lub hom phiaj kom pov hwm cov neeg uas nyob haud, thiab thaum kho tas lawm, ces yeej yuav zoo li qub.
Ib yam li ntawd, thaum tus yeeb ncuab sim ntxias peb ces ntshe yuav ua rau peb puas tsuaj me ntsis nyob hauv peb lub neej, txawm yog peb sim ua neej raws li Vajtswv txoj hau kev zoo tag nrho. Tej “qhov pleb” no yog kev tu siab los sis kev nyuaj siab ntawm cov uas tau ua yuam kev thiab tsis tau ua zoo tag nrho, los sis xav tias peb tsis zoo npaum li peb xav ua.
Tiam sis qhov tseem ceeb yog qhov uas peb tau ua raws li tej yam uas Vajtswv tau npaj thiab tsim, uas yog Yexus Khetos txoj moo zoo, peb thiaj li sawv khov kho. Tus yeeb ncuab thiab tej xwm txheej nyuaj heev tsis tau ua rau peb lub neej raug puas tsuaj; tsis yog li ntawd, peb npaj siab mus tom ntej.
Kev xyiv fab uas Vajtswv cog lus tias peb yuav txais hauv lub neej no7 los peb yuav tsum tsis txhob xav tias peb yuav tsis muaj kev nyuaj siab thiab kev tu siab, peb yuav tsis tu “pleb” vim peb raug ntxias los sis rau kev sim siab los ntawm lub neej hauv lub ntiaj teb no.
Kev xyiv fab no yeej zoo li thaum Nifais xav txog nws lub neej thiab hais tias, “Kuv tau pom kev txom nyem ntau nyob hauv kuv lub neej, txawm li ntawd los, … tus Tswv tau txhawb pab kuv ntau heev nyob hauv tag nrho kuv lub neej.”8 Tag nrho nws lub neej! Tej hnub uas Nifais raug txom nyem thaum nws cov tij laug xyeej nws, muab nws khi nyob hauv lub nkoj, thaum nws txiv, Lihais, tau tso lub ntiaj teb no tseg, thiab thaum Lamas thiab Lemuyees tau los ua nws cov neeg cov yeeb ncuab. Txawm yog tej hnub ntawd nyuaj heev los, Nifais tseem xav tias tus Tswv tau txhawb pab nws ntau heev.
Peb yuav txais kev nplij siab thaum peb paub tias tus Tswv yuav tsis cia peb raug ntxias tshaj qhov peb muaj peev xwm tiv taus. Amas caw peb kom peb “xyuas thiab thov Vajtswv tsis tu ncua, xwv kom [peb] tsis txhob raug ntxias ntau tshaj qhov uas [peb] tiv taus, thiab yog li ntawd xwv kom tus Ntsuj Plig Dawb Huv coj [peb], thiab ua rau [peb] los ua neeg txo hwj chim, muaj siab mos siab muag, mloog lus, ua siab ntev, muaj kev hlub puv npo thiab muaj kev ua siab ntev nyiaj huv tib si.”9
Yeej yuav zoo li no thaum peb raug kev sim siab ntawm lub neej no. Amoos tau hais tus Tswv cov lus rau peb: “Cia li mus … thiab ua siab ntev nyiaj nej tej kev txom nyem, thiab kuv yuav pub kom nej ua tau li nej siab xav.”10
Tus Tswv yeej yuav npaj ib txoj kev pab peb thaum peb raug tej yam nyuaj, raug kev ntxias, tsis to taub, raug txom nyem, thiab raug tuag. Nws tau hais tias, “Thiab nim no, kuv hais tseeb rau nej tias, yog kuv hais dab tsi rau ib tug ces kuv hais rau sawv daws, cia li zoo siab, cov me nyuam yaus; vim kuv nyob nrog nraim nej, thiab kuv tsis tau tso nej tseg.”11 Nws yeej yuav tsis tso peb tseg.
Kuv thov kom peb yuav ua peb lub neej raws li tej kev npaj thiab teev tseg uas peb Leej Txiv tau tsim thiab peb tus Cawm Seej, Yexus Khetos, tau ua lawm. Yog li ntawd, los ntawm kev tshav ntuj uas peb txais los ntawm peb tus Cawm Seej txoj Kev Theej Txhoj, peb yuav tsim ib lub neej uas tiv taus kev txhaum, tiv taus kev ntxias, thiab yuav txhawb zog peb kom nyiaj dhau tej lub sij hawm nyuaj siab. Thiab tsis tas li ntawd xwb, peb yuav tsim nyog txais tau tag nrho cov koob hmoov uas tau cog lus tias peb yuav txais los ntawm peb Leej Txiv thiab peb tus Cawm Seej txoj kev hlub. Los ntawm Yexus Khetos lub npe, amees.