Lub Tuam Rooj Sab Laj
Ua Siab Loj Tshaj Tawm Qhov Tseeb
Kaum Hli Ntuj xyoo 2022 lub tuam rooj sab laj

Ua Siab Loj Tshaj Tawm Qhov Tseeb

Los ntawm Txwj Laug Denelson Silva

Ntawm Pawg Xya Caum

Thaum peb kawm tau qhov tseeb lawm, tus Tswv muab cib fim rau peb ua tej yam Nws yuav ua yog tias Nws ua neej nyob niaj hnub nim no.

Nyob rau xyoo 1982, kuv tab tom kawm ntawv qib siab txog kev kos duab pheem thib.

Thaum xyoo kawm ntawv yuav xaus, ib tug khub kawm ntawv tau caw kuv nrog nws sib tham. Kuv nco tau tias wb tso cov tub ntxhais kawm ntawv tseg thiab mus rau ib qho chaw ntaus kis las nyob ze. Thaum wb mus txog, kuv tus phooj ywg ntawd qhia kuv txog nws txoj kev ntseeg teev, thiab nws muab ib phau ntawv rau kuv saib, thiab muab pub rau kuv ua khoom plig. Tiag tiag, kuv tsis nco qab tag nrho cov lus uas nws hais, tiam sis kuv nco tau lub sij hawm ntawd tseeb tseeb thiab saib kuv xav li cas hauv nruab siab thaum nws hais tias, “Kuv xav ua tim khawv rau koj hais tias phau ntawv no muaj tseeb thiab Yexus Khetos txoj moo zoo tau txum tim rov qab los.”

Tom qab ntawd, kuv mus tsev, saib phau ntawv ntawd me me, thiab muab nws tso saum ib lub txee ntawv. Vim peb tab tom kawm ntawv yuav xaus thiab yog xyoo kawg rau kuv daim ntawv pov thawj kos duab pheem thib, kuv tsis tshua saib phau ntawv ntawd thiab kuv tsis nrog kuv tus khub kawm ntawv ntawd sib tham ntau ntxiv. Phau ntawv ntawd lub npe tej zaum nej twb paub lawm. Yog los mas, yog Phau Ntawv Maumoos.

Tsib hlis tom qab ntawd, ob tug tub txib tuaj xyuas kuv lub tsev; nkawd ntsib kuv thaum kuv tab tom los tom hauj lwm los tsev. Kuv caw nkawd los tsev. Peb zaum hauv qhov chaw nyob kuv lub tsev tom hauv ntej, thiab nkawd qhia kuv.

Kuv nrhiav qhov tseeb, ces kuv nug nkawd saib lub koom txoos thiaj muaj tseeb thiab kuv yuav ua li cas nrhiav tau. Ob tug tub txib qhia kuv hais tias kuv txais tau lus teb ntawd rau kuv tus kheej. Kuv cia siab rau qhov ntawd heev, thiab kuv txiav txim siab tias kuv yuav nyeem ob peb tshooj hauv Phau Ntawv Maumoos. Kuv rau siab thov Vajtswv kawg siab kawg ntsws (saib Maulaunais 10:4–5). Lo lus teb kuv cov lus nug meej meej li, thiab ob peb hnub tom qab ntawd—twb yog lub Tsib Hlis Ntuj hnub tim 1, 1983—kuv ua kev cai raus dej thiab txais kev pom zoo ua ib tug mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.

Niaj hnub nim no, thaum kuv xav txog tej yam uas tau muaj los thiab saib tseem ceeb npaum li cas, kuv pom meej meej hais tias kuv tus khub kawm ntawv ntawd muaj siab loj npaum li cas thaum nws ua tim khawv rau kuv txog txoj moo zoo uas txum tim rov qab los thiab muab pov thawj rau kuv pom txog qhov uas Yexus Khetos txoj moo zoo Txum Txim Rov Qab Los, twb yog Phau Ntawv Maumoos. Qhov uas kuv tus phooj ywg ua ntawd, tseem ceeb rau kuv, thiab kuv txawm paub txog ob tug tub txib txoj lus qhia thaum kuv ntsib nkawd.

Kuv tau kawm txog qhov tseeb, thiab tom qab kuv ua kev cai raus dej, kuv rais los mus ua Yexus Khetos ib tug thwj tim. Txij thaum ntawd los, thiab tau kev pab los ntawm cov neeg tshwj xeeb xws li kuv cov thawj coj, kws qhia, thiab phooj ywg, thiab dhau ntawm kuv txoj kev kawm kuv tus kheej, kuv kawm hais tias thaum kuv txiav txim siab ua Yexus Khetos ib tug thwj tim, kuv tau txais lub luag hauj lwm kom tsis yog tiv thaiv qhov tseeb xwb, tiam sis kuj tshaj tawm qhov tseeb thiab.

Thaum peb ntseeg qhov tseeb, ua raws li nws hais, thiab thaum peb rau siab ua Yexus Khetos cov thwj tim tiag tiag, peb tsis txais ib daim ntawv pov thawj hais tias peb yuav tsis yuam kev, los yog tsis muaj leej twg yuav ntuas peb, los yog tias peb yuav tsis raug ntxias kom tso qhov tseeb tseg, los yog yuav tsis muaj leej twg cem peb, los yog peb yuav tsis raug kev mob nkeeg. Tiam sis thaum peb paub qhov tseeb nws qhia peb kom nkag txoj kev ncaj thiab nqaim uas yuav coj peb rov qab mus cuag peb Leej Txiv Saum Ntuj Ceeb Tsheej, ces yeej yuav muaj kev dim tej teeb meem no (saib 1 Kauleethaus 10:13); yeej yuav muaj lub cib fim ua xyem xyav txog peb tej kev tsis ntseeg ua ntej peb ua xyem xyav txog peb txoj kev ntseeg (saib Dieter F. Uchtdorf, “Come, Join with Us,” Liahona, Kaum Ib Hlis Ntuj 2013, 21); thiab thaum kawg, peb muaj lus cog tseg hais tias peb yuav tsis nyob peb ib leeg xwb thaum peb raug txom nyem, vim Vajtswv yuav pab Nws cov neeg thaum lawv raug txom nyem (saib Mauxiyas 24:14).

Thaum peb kawm tau qhov tseeb lawm, tus Tswv muab cib fim rau peb ua tej yam Nws yuav ua yog tias Nws ua neej nyob niaj hnub nim no. Muaj tseeb tiag, Nws cov lus qhia qhia peb saib peb yuav tsum ua li cas: “Thiab nej yuav tawm mus los ntawm kuv tus Ntsuj Plig lub hwj chim, tshaj tawm kuv txoj moo zoo, ob tug ua ib khub, los ntawm kuv lub npe, tsa nej lub suab kom zoo li lub suab raj hlau nrov, tshaj tawm kuv txoj lus zoo yam li Vajtswv cov tim tswv.” (Lus Qhuab Qhia thiab Kev Khi Lus 42:6). Lub cib fim rau peb cov hluas mus ua tub txib yeej yog ib yam zoo heev!

Nej cov tub hluas, thov kom nej tsis txhob ncua nej txoj kev npaj mus pab ua hauj lwm rau tus Tswv ua tub txib qhia txoj moo zoo. Thaum nej ntsib tej yam uas ua rau qhov uas nej yuav mus ua tub txib nyuaj me ntsis—xws li tso txoj kev kawm ntawv tseg rau ib ntus, hais sib ntsib dua rau nej tus hluas nkauj es tsis paub tias nej yuav tham nws dua ntxiv, los yog tawm ib txoj hauj lwm—cia li nco ntsoov txog tus Cawm Seej tus yam ntxwv. Thaum Nws nyob hauv lub ntiaj teb, Nws kuj ntsib kev cov nyom, suav kev luag thuam, kev tsim txom, thiab thaum kawg, Nws qhov kev txi theej peb lub txhoj. Txawm yog li ntawd los tus Tswv yeej xav ua raws li Nws Leej Txiv lub siab nyiam thiab muab yeeb koob rau Nws. (Saib Yauhas 5:30; 6:38–39; 3 Nifais 11:11; Lus Qhuab Qhia thiab Kev Khi Lus 19:18–19.)

Nej cov ntxhais hluas, peb yeej zoo siab txais nej los ua hauj lwm hauv tus Tswv lub vaj txiv hmab, yog nej xav ua li no, thiab thaum nej npaj nej tus kheej ua ntxhais txib, nej yeej yuav ntsib tej kev cov nyom li hais no thiab.

Rau tag nrho nej cov uas txiav txim siab ua hauj lwm pab Nws, kuv cog lus tias 24 los sis 18 lub hli ua hauj lwm ntawd yuav mus dhau li ib vuag dua ntais ib yam li nej nyob tsev, tiam sis tej cib fim uas yuav muaj rau cov tub hluas ntxhais hluas ntawm lub Koom Txoos no hauv qhov chaw tshaj tawm txoj moo zoo yeej txawv tshaj lwm qhov. Lub cib fim sawv cev tam tus Cawm Seej Yexus Khetos thiab Nws lub Koom Txoos yeej yog ib yam tseem ceeb heev thiab ntxim ua. Qhov uas nej yuav thov Vajtswv ntau zaus txhua hnub, ua tim khawv ntau zaus txhua hnub, kawm vaj lug kub ntau teev, thiab ntsib cov neeg uas nej yuav tsis ntsib yog tias nej tseem nyob tsev, tag nrho tej no yog tej yam zoo heev uas yuav muaj los rau nej. Thiab tej yam no yeej yuav muaj los rau cov tub hluas ntxhais hluas uas tus Tswv hu mus ua tub txib pab tib neeg (service mission). Peb yeej txais yuav nej thiab nej yeej tseem ceeb heev. Yeej yog ib qho zoo heev uas muaj cov tub txib pab tib neeg li no, vim tej kev ua hauj lwm pab no kuj yuav muaj ntau yam zoo los rau nej thiab. “Vajtswv yeej saib tib neeg muaj nuj nqis loj heev, suav nej thiab” (Lus Qhuab Qhia thiab Kev Khi Lus 18:10), tsis hais saib nej rau nqi ib yam thiab.

Thaum nej mus ua tub txib rov qab los ces, tej zaum nej tus hluas nkauj los sis hluas nraug yuav tsis tau tos nej los, tiam sis nej yuav tau kawm yam zoo heev li saib yuav ua li cas thiaj ntsib tau tib neeg. Nej yuav nkag siab tau nej tej kev kawm ntaub ntawv zoo dua vim yog tej yam uas tau muaj los rau nej thiab tej ntawd yuav pab nej npaj ua hauj lwm thiab, thiab thaum kawg no, nej yuav paub tseeb hais tias nej tau ua siab loj tshaj tawm txoj moo zoo, ua tim khawv txog tej qhov tseeb uas txum tim rov qab los.

Rau nej cov uas twb yuav poj niam yuav txiv lawm thiab pib ua nej lub nej, nej tseem ceeb rau tus Tswv txoj hauj lwm thiab. Npaj nej tus kheej. Ua neej raws li kev noj qab nyob zoo, ua tib zoo npaj kom vam khom yus tus kheej rau ntawm cev nqaij daim tawv thiab sab ntsuj plig, vim tej cib fim ua tej yam tus Tswv xav kom peb ua tsis yog rau ib co neeg hluas nkaus xwb. Kuv poj niam thiab kuv tau zoo siab heev ob peb xyoos dhau los no thaum ua hauj lwm pab ua tub txib nrog tej khub niam txiv tshwj xeeb, hauv tej qhov chaw tshwj xeeb, thiab ua hauj lwm pab cov neeg tshwj xeeb.

Qhov uas muaj los rau kuv thaum kuv kawm ntawv qib siab tiav ntawd tau qhia kuv tias peb yeej los tiv thaiv qhov tseeb thaum peb tshaj tawm qhov tseeb thiab hais tias kev tiv thaiv qhov tseeb yog ib yam uas yus txiav txim siab ua. Thaum peb tiv thaiv qhov tseeb yuav tsum tsis txhob nrog lwm tus neeg sib cav, tsis li, yuav tsum hlub, maj mam qhia, thiab caw cov neeg uas peb ua tim khawv rau txog qhov tseeb, es tsuas xav txog peb Leej Txiv Saum Ntuj Ceeb Tsheej cov me nyuam txoj kev noj qab nyob zoo ntawm lub cev nqaij daim tawv thiab sab ntsuj plig tib si (saib Mauxiyas 2:41).

Nyob hauv lub tuam rooj sab laj ntawm lub Kaum Hli Ntuj xyoo 2021, Thawj Tswj Hwm Russell M. Nelson, peb tus yaj saub uas peb hlub, tau qhia tias, txawm tib neeg ntiaj teb xav txawv los, yeej muaj qhov yog thiab qhov tsis yog tiag. Yeej muaj ib qho tseeb khov kho—ib qho tseeb nyob mus ib txhis. (Saib “Qhov Tseeb, cov Lus Qhuab Qhia, thiab Kev Tshwm Sim Dawb Huv,” Liahona, Kaum Ib Hlis Ntuj 2021, 6.)

Cov vaj lug kub dawb huv qhia peb tias, “Kev tseeb yog kev paub tej yam uas tab tom muaj, thiab tej yam uas tau muaj lawm, thiab tej yam uas tseem yuav muaj los” (Lus Qhuab Qhia thiab Kev Khi Lus 93:24).

Qhov kev paub qhov tseeb tsis ua rau peb zoo dua lwm cov neeg, tiam sis qhov kev paub ntawd qhia peb saib peb yuav tsum ua li cas rov qab mus cuag Vajtswv.

Thaum nej rau rau siab mus lawm tom hauv ntej hauv Khetos thiab muaj siab loj tshaj tawm qhov tseeb thiab ua neej raws li qhov tseeb, nej yuav nrhiav tau kev nyob kaj siab lug txawm tias muaj kev kub ntxhov ib ncig ntawm nej hauv lub caij nyoog kawg no.

Tej kev cov nyom ntawm lub neej no yeej tab kaum tau peb, tiam sis nej paub tias thaum peb muaj kev ntseeg rau ntawm Yexus Khetos, “[peb] tej kev txom nyem yuav muaj nyob ib nyuag ntus xwb” thaum muab xav txog lub caij nyob mus ib txhis li” (Lus Qhuab Qhia thiab Kev Khi Lus 121:7). Thov nej tsis txhob teem ib lub sij hawm uas tag nrho nej cov kev cov nyom thiab tej kev nyuaj siab yuav tiav tas. Tso siab rau Leej Txiv Saum Ntuj Ceeb Tsheej thiab tsis txhob tso tseg, vim yog tias peb poob siab tso tseg, peb yuav tsis paub saib yuav zoo li cas thaum kawg hauv Vajtswv lub nceeg vaj.

Tuav rawv qhov tseeb, kawm tej hauv paus ntawm qhov tseeb:

Kuv ua tim khawv txog Yexus Khetos thiab hais tias nov yog Nws lub Koom Txoos. Peb muaj ib tug yaj saub niaj hnub nim no, thiab peb yeej yuav muaj kev ywj pheej thaum peb ua siab loj tshaj tawm qhov tseeb. Los ntawm Yexus Khetos lub npe, amees.