Kev Ua Thwj Tim uas Kav Ntev
Peb yuav ntseeg peb tus kheej thiab muaj kev kaj siab lug thaum peb coj cwj pwm dawb huv thiab ua tej yam ncaj ncees uas yuav txhawb nqa peb thiab ua rau hluav taws ntawm peb txoj kev ntseeg kub heev.
Thaum lub caij ntuj sov tas los no, muaj 200,000 tus tub hluas ntxhais hluas nyob thoob plaws lub ntiaj teb lawv txoj kev ntseeg tau loj tuaj nyob hauv ntau pua rooj sab laj Ntxiv Dag Zog rau cov Tub Hluas Ntxhais Hluas los sis FSY (For the Strength of Youth) uas ntev li ib lub lim tiam. Neeg coob nyuam qhuav ua kev sib cais vim muaj phaum mob tas lawm, yog li ntawd lawv tuaj vim lawv ntseeg tus Tswv heev. Cov tub hluas ntxhais hluas feem coob zoo li lawv txoj kev hloov siab los ntseeg nce siab yuav luag zoo ib yam. Thaum lub lim tiam tas lawm, kuv nyiam nug lawv seb, “Ces, zoo li cas?”
Tej lub sij hawm lawv hais li no tias: “Uas nim no, thaum hnub Monday kuv npau taws rau kuv niam vim nws yuam kuv tuaj ua qhov no. Thiab kuv tsis tau paub ib tug neeg hlo li. Thiab kuv tsis xav tias kuv yuav nyiam. Thiab kuv yuav tsis muaj phooj ywg. … Tiam sis txog hnub Friday no, es kuv xav nyob no xwb. Kuv xav muaj tus Ntsuj Plig hauv kuv lub neej xwb. Kuv xav ua neej zoo li no.”
Lawv nyias muaj nyias dab neeg hais txog tej lub sij hawm thaum lawv kawm meej thiab thaum tej txiaj ntsim ntawm sab ntsuj plig tau txhawb nqa lawv mus kom kawm ntxiv tuaj. Kuv kuj hloov siab lub caij uas muaj FSY no thaum kuv saib Vajtswv tus Ntsuj Plig tshoov cov tub hluas ntxhais hluas lub siab uas xav ua ncaj ncees thiab lawv txhua tus tau kawm tso siab rau Nws cia Nws saib xyuas tsom kwm lawv rau ib lub lim tiam.
Zoo li cov nkoj sab nraud uas muaj kab ntaus hlau hauv cov dej hiav txwv, peb nyob hauv ib lub ntiaj teb uas ua rau peb sab ntsuj plig lwj es peb yuav tsum ua tib zoo ua raws li peb ntseeg, vim yog peb tsis ua li ntawd, ces peb txoj kev ntseeg yuav puas zuj zus ces ploj thiab tawg mus.
Peb Yuav Tsum Ua Li Cas Kom Saib Xyuas Hluav Taws ntawm Peb txoj Kev Ntseeg Kom Kub Tas Li?
Tej yam xws li rooj sab laj FSY, kev pw hav zoov, kev sib ntsib txais lub cim nco txog, thiab kev ua tub txib yeej yuav pab txhawb nqa peb zaj lus tim khawv, pab peb loj hlob tuaj thiab nrhiav tej yam tshiab ntawm sab ntsuj plig kom peb nyob kaj siab lug. Tiam sis peb yuav tsum ua li cas kom “txiv mus lawm tom hauv ntej nrog txoj kev ntseeg Khetos” (2 Nifais 31:20) thiab tsis txhob thaub qab? Peb yuav tsum ua tej ntawd uas tau coj peb mus rau qhov chaw ntawd thaum xub thawj, xws li thov Vajtswv tsis tu tsis tseg, nyeem vaj lug kub tas li, thiab muaj siab dawb xav pab lwm tus.
Peb ib txhia mas, yuav tsum muab siab rau ntseeg tus Tswv kom mus rau kev sib ntsib txais lub cim nco txog xwb. Tiam sis thaum peb nyob ntawd, ces lub hwj huam kho mob ntawm tus Tswv lub cim nco txog, kev kawm txog txoj moo zoo tej ntsiab cai, thiab cov neeg hauv lub Koom Txoos txoj kev tu peb yuav pab peb ua neeg siab dua li qub.
Lub Hwj Chim ntawm Kev Koom Ua Ke Tim Ntsej Tim Muag Los ntawm Qhov Twg Los?
Nyob hauv FSY, ob peb puas txhiab tus tub hluas ntxhais hluas tau los paub tus Cawm Seej zoo dua thaum lawv siv lub ntsiab cai no uas qhia tias yuav muaj li no thaum muaj ob los sis peb leeg tuaj nyob ua ke qhov twg tuav tus Tswv lub npe (saib Mathais 18:20), kawm txog txoj moo zoo thiab cov vaj lug kub, hu nkauj ua ke, thov Vajtswv ua ke, thiab txais kev kaj siab lug los ntawm Khetos. Qhov no yeej yog ib lub ntsiab cai rau peb sab ntsuj plig txoj kev tsim los.
Cov tub hluas ntxhais hluas twb tau rov qab mus tsev kom kawm tias “tso siab rau tus Tswv” (Paj Lug 3:5; 2022 lub ntsiab rau cov tub hluas ntxhais hluas) muaj lub ntsiab dab tsi thaum lawv nyob hauv ib lub ntiaj teb ntxhov hnyo uas suab tsiv suab nruj. Yeej yog ib yam uas yus “mloog Nws hais” (Joseph Smith—Keeb Kwm 1:17)thaum yus nyob hauv ib qho chaw ntsiag to thiab nyeem vaj lug kub. Tiam sis nyuaj rau peb ua Nws cov thwj tim nyob hauv lub ntiaj teb uas meem txom peb thaum peb yuav tsum “mloog Nws hais” txawm yog peb txhawj txog peb tus kheej thiab poob siab zuj zus. Thov kom peb tsis txhob ua xyem xyav: peb cov tub hluas ntxhais hluas ua li pha-ej thaum lawv muab siab rau kev sawv khov kho kom txhob vau thaum neeg ntiaj teb xav hloov lub ntsiab ntawm kev coj ncaj ncees hauv peb lub caij nyoog.
Peb Tsev Neeg Yuav Ua Li Cas hauv Tsev Kom Txhawb Nqa cov Tub Hluas Ntxhais Hluas Tom Qab Ua tej Yam Ntxim Saib Ntxim Ua hauv lub Koom Txoos Li No?
Muaj ib lub sij hawm thaum kuv yog tus txiv ntawm ceg txheem ntseeg Koom Haum Ntxhais Hluas tus thawj tswj hwm. Muaj ib hmo nws txib kuv kho cov khoom qab zib nyob hauv chaw nkag tsev koom txoos es kuv tus poj niam coj kev sib ntsib rau cov niam tsev txiv tsev thiab lawv cov ntxhais kom npaj mus pw hav zoov lub lim tiam tom ntej. Tom qab nws piav tias yuav tsum mus qhov twg thiab nqa dab tsi tuaj, nws hais tias, “Nim no, Tuesday sawv ntxov thaum nej thauj nej cov ntxhais hluas los xa lawv mus caij npav, cia li puag khawm lawv. Hnia lawv sab plhu thiab hais rau lawv tias mus zoo nej—vim lawv yeej yuav tsis rov qab los.”
Kuv hnov ib tug huas pa ces kuv txawm paub tias yog kuv xwb. “Yeej yuav tsis rov qab los?”
Ces nws hais ntxiv tias: “Thaum nej xa cov ntxhais hluas Tuesday tuaj no, lawv yuav tso tej yam uas tsis tseem ceeb tseg thiab siv ib lub lim tiam kawm ua ke thiab loj hlob thiab tso siab rau tus Tswv. Peb yuav thov Vajtswv ua ke thiab hu nkauj thiab ua mov thiab sib pab thiab hais lus tim khawv ua ke thiab ua txhua yam uas cia peb hnov tau Leej Txiv Saum Ntuj Ceeb Tsheej tus Ntsuj Plig, tas lub lim tiam ntawd, mus txog thaum tej ntawd nkag hauv peb lub cev tag nrho. Thiab thaum txog hnub Saturday, cov ntxhais hluas uas nej tau pom tawm lub npav ntawd los tsis yog cov ntxhais hluas uas nej tau xa mus thaum hnub Tuesday. Lawv yuav los ua neeg tshiab. Thiab yog nej yuav pab lawv mus siab dua ntxiv, ces lawv yuav ua rau nej xav tsis thoob. Lawv yuav hloov mus ntxiv thiab loj hlob tuaj. Thiab nej tsev neeg yuav hloov ib yam thiab.”
Hnub Saturday ntawd, twb muaj raws li nws twv ua ntej. Thaum kuv khaws cov tsev pheeb suab, kuv hnov kuv tus poj niam lub suab nyob hauv chaw ua yeeb yam hauv hav zoov uas cov ntxhais hluas koom ua ke ua ntej yuav mus tsev. Kuv hnov nws hais tias, “Auj, nrhiav tau nej lawm os. Peb tos ntsoov nej tas lub lim tiam no. Peb cov ntxhais Saturday.”
Xi-oos cov tub hluas ntxhais hluas uas muaj zog heev yeej nyob hauv ib lub caij nyoog nyuaj heev. Tus Tswv txib kom lawv nrhiav kev xyiv fab nyob hauv lub ntiaj teb no uas cov yaj saub qhia tias yuav ntxhov hnyo tiam sis kuj txib lawv tsis txhob xyaw nrog neeg ntiaj teb uas dig muag rau tej yam dawb huv. Yuav luag ib puas xyoo tas los, muaj ib lub sij hawm thaum G. K. Chesterton hais lus zoo li nws pom tias yuav tsum kawm hauv tsev thiab cia lub Koom Txoos txhawb nqa thaum nws hais tias, “Peb yuav tsum xav tias lub ntiaj teb yeej zoo li yog dab lub tsev uas peb tawm tsam, tiam sis kuj yog peb lub tsev me me, uas peb yuav rov qab los txog thaum tsaus ntuj” (G. K. Chesterton, Orthodoxy [1909], 130).
Zoo siab heev uas lawv tsis tas mus ua tsov ua rog lawv tus kheej xwb. Lawv ib leeg muaj ib leeg. Thiab lawv muaj nej thiab. Thiab lawv coj raws li ib tug yaj saub, Thawj Tswj Hwm Russell M. Nelson, uas cia siab saib yav tom ntej zoo li ib tug pom tau uas tshaj tawm tias txoj hauj lwm tseem ceeb ntawm lub caij nyoog no—kev muab Ixayees sau los ua ke—yeej yuav zoo kawg nkaus (saib “Hope of Israel” [kev tshaj tawm rau cov neeg hluas thoob ntiaj teb, Rau Hli Ntuj 3, 2018], HopeofIsrael.ChurchofJesusChrist.org).
Lub caij sov no, kuv tus poj niam, Kalleen, thiab kuv wb hloov nyab hoom nyob hauv Amsterdam, qhov chaw uas thaum ub kuv tau ua ib tug tub txib. Thaum ub nyuaj rau kuv kawm lus Dutch, es kuv thiab kuv tus khub wb lub nyab hoom KLM tab tom yuav tsaws, es tus thawj kws tsav nyab hoom hais lus uas wb tsis to taub hauv xov tooj cua. Wb nyob ntsiag to rau ib me pliag, ces kuv tus khub hais tias, “Kuv xav tias yog lus Dutch sub.” Wb ib leeg ntsia ib leeg, vim wb paub tias wb xav zoo ib yam: Wb tsis paub ib yam dab tsi.
Tiam sis yeej muaj ib txoj kev. Kuv xav tsis thoob thaum kuv xav txog wb txoj kev ntseeg yav tas los thaum wb taug kev hauv tshav nyab hoom no ua ntej wb tau pom tej txuj ci tseem ceeb uas los rau cov tub txib, es ua ciav tam sim ntawd kuv pom ib tug tub txib kiag uas tab tom yuav nce nyab hoom mus tsev. Nws hais nws lub npe ces nug hais tias, “Thawj Tswj Hwm, kuv yuav ua li cas tam sim no? Kuv yuav tsum ua li cas kom muaj zog tas li?”
Yeej yog tib txoj lus uas peb cov tub hluas ntxhais hluas xav tom qab lawv ncaim rooj sab laj FSY, kev pw hav zoov, thiab kev mus rau lub tuam tsev thiab thaum twg lawv hnov lub hwj chim saum ntuj: “Yuav ua li cas kom muab kev hlub Vajtswv hloov los ua kev ua Nws cov thwj tim uas kav ntev?”
Ua rau kuv hlub tus tub txib uas khwv ua hauj lwm hauv ob peb teev kawg ntawm nws txoj ntiag tug hauj lwm, thiab thaum lub sij hawm tus Ntsuj Plig hais lus yau yau es kuv hnov kuv tus kheej hais cov lus no hais tias, “Koj tsis tas coj daim npe kom ris Nws lub npe.”
Ua rau kuv xav tso kuv txhais tes saum nws ob sab xub pwg thiab hais tias, “Koj ua li no xwb. Koj cia li mus tsev thiab koj ua neeg zoo li no. Koj zoo kawg ntshe koj ci ci hauv qhov tsaus ntuj. Koj txoj kev tswj hwm thiab kev txi thaum koj ua ib tug tub txib tau ua rau koj hloov los ua Vajtswv Leej Tub zoo kawg nkaus. Thaum mus tsev cia li ua tej yam uas ua rau koj muaj hwj chim nyob no. Koj tau kawm thov Vajtswv thiab paub koj thov leej twg thiab paub hais yam lus ntawm kev thov. Koj tau kawm Nws tej lus thiab hlub tus Cawm Seej vim koj siv zog hloov los ua neeg zoo li Nws. Koj hlub Leej Txiv Saum Ntuj Ceeb Tsheej ib yam li Nws hlub Nws Leej Txiv, koj tau pab lwm tus ib yam li Nws tau pab lawv, thiab koj coj raws li cov lus txib ib yam li Nws—thiab thaum koj tsis tau ua li ntawd, koj twb hloov siab lees txim. Koj txoj kev ua ib tug thwj tim yeej tsis yog ib kab lus rau ib lub tsho xwb—yeej yog koj lub hom phiaj ntawm koj lub neej. Yog li ntawd cia li mus tsev, thiab ua li ntawd xwb. Ua neeg zoo li ntawd. Muaj zog ntawm koj sab ntsuj plig li no kom tas koj lub neej.”
Kuv paub tias dhau los ntawm kev tso siab rau tus Tswv Yexus Khetos thiab Nws tej kev khi lus, peb yuav ntseeg peb tus kheej thiab muaj kev kaj siab lug thaum peb coj cwj pwm dawb huv thiab ua tej yam ncaj ncees uas yuav txhawb nqa peb thiab ua rau hluav taws ntawm peb txoj kev ntseeg kub heev. Thov kom peb yuav txav mus nyob ze cov hluav taws ntawd, thiab txawm peb raug dab tsi los xij, nyob nraim qhov chaw ntawd. Los ntawm Yexus Khetos lub npe, amees.