Zoo Siab thiab Tas Mus Li
Tiag tiag mas, kev zoo siab thiab nrog cov uas peb hlub nyob ua ke tas mus li yeej yog ib qho hauv Vajtswv txoj kev zoo siab.
Cov phooj ywg, cov kwv tij thiab cov muam, nej puas nco thaum nej muaj kev ntseeg, los sis kev xav kom muaj kev ntseeg, txog kev zoo siab uas nyob tas mus li?
Ces peb raug lub neej nyuaj no. Peb “loj hlob lawm.” Tej kev sib raug zoo txawm muaj teeb meem. Lub ntiaj teb no nrov heev, muaj neeg coob, ua tawv qhawv, thiab tib neeg dag li ub li no. Tab sis mas, hauv peb “nruab siab,”1 peb tseem ntseeg, los sis xav ntseeg, yeej muaj ib qho chaw twg, uas yuav muaj kev zoo siab uas nyob tas mus li.
“Kev zoo siab uas nyob tas mus li” yeej tsis yog ib yam uas tsuas muaj hauv tej zaj dab neeg xwb. Tiag tiag mas, kev zoo siab thiab nrog cov uas peb hlub nyob ua ke tas mus li yeej yog ib qho hauv Vajtswv txoj kev zoo siab. Vim Nws hlub peb nws tau npaj ib txoj kev rau peb tau txoj kev zoo siab uas nyob tas mus li.
Peb yeej muaj chaw muaj kev zoo siab thiab kev ris txiaj. Tab sis mas, tsis muaj peb ib tug twg, los sis tsev neeg twg uas zoo tag nrho. Peb tej kev sib raug zoo muaj kev hlub, kev sib xyuas thiab ib leeg nrog ib leeg sib raug zoo tiam sis tseem muaj kev tsis sib haum, kev tu siab, thiab tej thaum kev mob siab tiag.
“[Los ntawm Adas] txhua tus puav leej raug kev ploj kev tuag … [los ntawm Yexus Khetos] txhua tus yuav [muaj txoj sia].”2 Muaj txoj sia nyob los ntawm Yexus Khetos muaj qhov uas yus tsis txawj tuag—Nws qhov khoom plig uas yog kev sawv rov qab los. Thaum peb ua neej nyob muaj kev ntseeg thiab mloog lus, muaj sia los ntawm Khetos kuj muaj tau kev zoo siab txog txoj kev nyob mus ib txhis nrog Vajtswv thiab cov neeg uas peb hlub.
Tiag tiag mas, tus Tswv tus yaj saub tab tom pab peb txav los nyob ze peb tus Cawm Seej, dhau ntawm tej kab ke thiab kev khi lus dawb ceev hauv lub tuam tsev hauv ntau qhov chaw uas nyob ze peb sawv daws. Peb muaj cib fim thiab lub txiaj ntsim uas pab peb to taub sab ntsuj plig, kev hlub, kev hloov siab lees txim, thiab kev zam txim ib leeg rau ib leeg thiab rau peb tsev neeg, rau lub sij hawm no thiab tas mus ib txhis.
Kuv tau kev tso lus yuav qhia txog ob zaj dab neeg uas cov phooj ywg qhia txog qhov uas Yexus Khetos muab tej yim neeg sib sau ua ke thiab kho kev puas siab puas ntsws lawm.3 “Tsis paub kawg thiab nyob mus ib txhis,”4 “muaj zog dua tej hlua ntawm kev tuag,”5 Yexus Khetos txoj Kev Theej Txhoj pab tau peb muaj kev thaj yeeb nyab xeeb rau tej yam ntawm yav tas los lawm thiab muaj kev cia siab rau yav tom ntej.
Thaum lawv tuaj koom Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg, kuv tus phooj ywg thiab nws tus txiv muaj kev zoo siab thaum lawv kawm tias tsev neeg tsis tas yuav xaus “thaum twg nkawd tuag lawm.” Nyob hauv tus Tswv lub tsev, tsev neeg yuav raug muab sib khi ua ke tas mus ib txhis li.
Tiam sis kuv tus phooj ywg tsis xav raug muab khi ua ke nrog nws txiv. “Nws tsis tau ua ib tug txiv zoo rau kuv niam. Nws hais tias, “Nws tsis ua siab zoo rau nws cov me nyuam.” “Kuv txiv yuav tau tos. Kuv tsis muaj lub siab xav ua nws tej hauj lwm hauv lub tuam tsev thiab muab peb khi ua ke tas mus ib txhis.”
Rau ib xyoos nkaus, nws tau yoo mov, thov Vajtswv, nrog tus Tswv tham ntau heev txog nws txiv. Nyob nyob ces, nws thiaj tau npaj siab. Nws tau ua nws txiv tej hauj lwm hauv lub tuam tsev. Yav tom qab ntawd, nws hais tias, “Thaum kuv tsaug zog kuv ua npau suav pom kuv txiv, nws hnav ib ce khaub ncaws dawb vog. Nws tau hloov lawm. Nws hais rau kuv ‘Saib kuv lauj. Kuv dawb huv lawm. Ua koj tsaug vim koj ua kuv tej hauj lwm hauv lub tuam tsev lawm.’” Nws txiv hais ntxiv tias, “Sawv mus thiab rov qab mus hauv lub tuam tsev; koj tus nus tseem tos xav ua kev cai raus dej.”
Kuv tus phooj ywg hais tias, “Kuv cov poj koob yawm txwv thiab cov uas tuag lawm tab tom tos ntsoov peb ua lawv tej hauj lwm hauv lub tuam tsev.”
Nws hais tias, “Tam li kuv xav mas, lub tuam tsev yog ib qho chaw uas pab kho tib neeg, rau kev kawm ntawv, thiab lees paub txog Yexus Khetos txoj Kev Theej Txhoj.”
Zaj thib ob. Muaj dua lwm tus phooj ywg uas rau siab nrhiav nws tsev neeg zaj keeb kwm. Nws xav nrhiav kom tau nws tus yawg koob.
Muaj ib tag kis sawv ntxov, kuv tus phooj ywg hais tias nws hnov tau ib tug txiv neej tus ntsuj plig nyob hauv nws chav pw lawm. Tus txiv neej ntawd xav kom leej twg nrhiav tau nws thiab qhia nws tsev neeg txog nws. Tus txiv neej ntawd tu siab rau ib qho txhaum uas nws twb ua yav tas los lawm tiam sis tau hloov siab lees txim lawm. Tus txiv neej ntawd pab kuv tus phooj ywg to taub tias tus uas nws xav tias yog nws tus yawg koob yeej tsis yog nws roj ntshav. Kuv tus phooj ywg hais tias, “Los yog hais tias, kuv nrhiav tau kuv tus yawg koob thiab kawm tau hais tias nws tsis yog peb tus yawg koob uas nyob hauv peb tsev neeg cov ntaub ntawv.”
Thaum kho tau nws tsev neeg cov ntaub ntawv lawm, kuv tus phooj ywg hais tias, “Tsam no kuv nyob dawb lawm, muaj kev thaj yeeb nyab xeeb. Qhov uas kuv paub kuv tsev neeg yog ib yam tseem ceeb rau kuv.” Kuv tus phooj ywg hais tias, “Ib ceg ntoo uas nkhaus tsis yog hais tias yog ib tsob ntoo tsis zoo. Tus neeg uas peb ua thaum los nyob hauv ntiaj teb tsis tseem ceeb npaum li tus neeg uas peb ua thaum peb ncaim lub ntiaj teb mus.”
Cov vaj lug kub thiab tej yam tseem ceeb uas kho tau peb lub siab thiab ua rau peb nyob kaj siab lug, nrog cov uas tseem muaj sia nyob hauv lub ntuj ntsuj plig, yeej qhia txog tsib ntsiab lus tseem ceeb.
Qhov thib ib: Nyob nruab plawv Vajtswv txoj kev cawm dim thiab kev zoo siab yog, Yexus Khetos, uas dhau ntawm Nws txoj Kev Theej Txhoj, cog lus hais tias peb tus ntsuj plig thiab lub cev yuav rov los nyob ua ke dua, “yuav tsis sib cais ib zaug ntxiv li lawm, xwv kom lawv yuav txais tau ib txoj kev xyiv fab puv npo.”6
Qhov thib ob: Yuav muaj txoj Kev Theej Txhoj—uas txhais tias koom ua ib siab nrog Yexus Khetos—thaum peb muaj kev ntseeg thiab los hloov siab lees txim.7 Hauv lub neej txawj ploj txawj tuag no, thiab hauv lub uas nyob tas mus li. Tej kab ke hauv lub tuam tsev yeej tsis hloov peb los sis cov hauv lub ntuj ntsuj plig kiag. Tiam sis tej kab ke no ua rau peb muaj kev sib khi lus nrog tus Tswv, uas pab tau peb muaj kev sib haum xeeb nrog Nws thiab lwm leej lwm tus.
Peb thiaj muaj kev zoo siab puv npo thaum peb hnov Yexus Khetos txoj kev tshav ntuj thiab kev zam txim rau peb. Thiab thaum peb muab Nws txoj kev tshav ntuj thiab kev zam txim rau lwm tus neeg, txoj kev txim lij uas peb txais thiab txoj kev txim lij uas peb muab rau lwm tus yuav pauv tej kev tsis ncaj hauv lub neej no kho los ua tej yam ncaj.8
Qhov thib peb: Vajtswv paub peb thiab hlub peb zoo tag nrho. “Yeej thuam tsis tau Vajtswv,”9 los yog yus yeej dag tsis tau Nws. Nws muaj kev txim lij thiab kev hlub tshua zoo tag nrho, xyab Nws ob txhais caj npab rau cov neeg uas txo hwj chim thiab hloov siab lees txim.
Nyob hauv lub Tuam Tsev hauv Kirtland, tus Yaj Saub Joseph Smith ua yog toog pom Nws tus tij laug Alvin uas tau kev cawm dim hauv lub nceeg vaj xilethi-aus. Tus Yaj Saub Joseph xav tsis thoob, vim Alvin twb tuag ua ntej nws ua kev cai raus dej.10 Tus Tswv nplij nws lub siab thaum nws piav hais tias: Tus Tswv “yuav txiav txim rau [peb] raws li [peb] tej hauj lwm, nyob ntawm seb [peb] lub siab xav li cas.”11 Peb tus ntsuj plig qhia seb peb ua hauj lwm thiab lub siab xav li cas.
Zoo siab kawg nkaus, vim peb paub tias cov uas muaj siab nyob thiab “cov tuag lawm uas hloov siab lees txim yuav raug txhiv dim, dhau ntawm kev ua raws li tej kab ke hauv Vajtswv lub tsev”12 thiab Khetos txoj Kev Theej Txhoj. Nyob hauv lub ntuj ntsuj plig, cov uas tau ua txog ua txhaum yuav muaj cib fim los hloov siab lees txim.13
Qhov fab ntxeev mas, cov uas txhob txwm xaiv kev phem, cov uas laug lub sij hawm los hloov siab lees txim, thiab cov uas txhob txwm txhaum tej lus txib es npaj siab yuav hloov siab lees txim xwb yuav tau Vajtswv txoj kev txiav txim thiab yuav “nco qab ntsoov tag nrho [lawv] tej lub txim.”14 Peb tsis muaj cuab kav txhob txwm ua txhaum hnub Saturday, ces xav tias yuav tau kev zam txim thaum peb noj lub cim nco txog Hnub Caiv ntawd. Rau cov tub txib los sis lwm tus neeg uas hais tias ua raws li tus Ntsuj Plig qhia txhais tau tias tsis tas yuav ua raws li qhov chaw qhia txoj moo zoo tej kev cai los sis cov lus txib, thov kom nej yuav nco qab ntsoov tias qhov chaw qhia txoj moo zoo tej kev cai thiab cov lus txib yeej caw tus Ntsuj Plig los. Peb txhua tus yuav tsum txhob laug lub sij hawm uas peb yuav hloov siab lees txim. Tej koob hmoov ntawm kev hloov siab lees txim pib thaum twg peb pib hloov siab lees txim.
Qhov thib plaub: Tus Tswv cia peb rais los mus ua neeg zoo li Nws thaum uas peb ua neeg sawv tam ua tej kab ke hauv lub tuam tsev rau cov neeg tuag uas ua tsis tau rau lawv tus kheej lawm. Peb haj yam ua neeg zoo tag nrho15 thaum peb rais los mus ua “cov neeg cawm seej … saum lub roob Xi-oos.”16 Thaum peb ua hauj lwm pab lwm tus neeg, tus Ntsuj Plig Dawb Huv rau Kev Cog Lus yuav pom zoo rau tej kab ke thiab pab tus neeg muab thiab tus neeg txais haj yam ua neeg dawb huv. Tus uas muab thiab tus uas txais yuav ua tej kab ke dawb ceev no, nyob nyob ces yuav txais tej koob hmoov uas cog lus tseg rau Anplaham, Ixaj, thiab Yakhauj.
Qhov kawg, qhov thib tsib: Xws li txoj Kev Cai Kub17 qhia, qhov uas peb ua neeg dawb huv thaum hloov siab lees txim thiab zam txim yuav pab peb muab qhov uas peb xav tau no rau lwm leej lwm tus thiab.
Tej thaum qhov uas peb kam zam txim rau lwm tus neeg yuav pab lawv thiab peb ntseeg tau hais tias peb muaj cuab kav hloov siab lees txim thiab txais kev zam txim thiab. Tej thaum qhov uas peb kam hloov siab lees txim thiab qhov uas peb zam tau txim rau lwm tus neeg nyias los nyias lub sij hawm los tau. Peb tus Cawm Seej yog tus uas Sawv Nruab Nrab peb thiab Vajtswv, tiam sis Nws kuj pab coj peb los rau peb tus kheej thiab lwm tus neeg thaum peb los cuag Nws. Qhov no haj yam tseem ceeb thaum muaj kev mob siab tu siab heev, txoj kev kho peb tej kev sib raug zoo thiab kho peb lub siab uas puas lawm yog ib yam nyuaj heev, tej zaum yog ib qho uas peb ua tsis tau yog peb vam peb tus kheej xwb. Tab sis mas lub ntuj mam li ntxiv zog rau peb thiab muab tswv yim ntau tshaj peb lub peev xwm kom peb yuav paub thaum twg peb yuav tsum tuav raws thiab yuav ua li cas thiaj muab tso tseg.
Peb tsis xav tias peb nyob peb ib leeg xwb thaum peb pom hais tias peb yeej tsis nyob ib leeg xwb. Peb tus Cawm Seej yeej to taub txhua nrho.18 Nrog peb tus Cawm Seej txoj kev pab, peb muab tau peb txoj kev khav theeb, peb tej kev tu siab, peb tej kev txhaum tso tseg rau Vajtswv. Txawm peb xav li cas thaum peb pib ua, peb kho tau peb lub siab thaum peb tso siab rau Nws los pab kho peb tej kev sib raug zoo no.
Tus Tswv, uas pom thiab to taub txhua nrho, yuav zam txim rau tus uas Nws pom zoo zam; peb cov uas tsis zoo tag nrho) yuav tsum zam txim rau txhua tus neeg. Thaum peb los cuag peb tus Cawm Seej, peb tsis tshua nco qab xav txog peb tus kheej. Peb tsis tshua txiav txim es haj yam zam txim xwb. Txoj kev cia siab rau Nws tej hauj lwm, kev hlub tshua, thiab kev tshav ntuj19 pab tau peb dim kev tsis sib haum, kev chim siab, kev tsim txom, kev tso tseg, kev tsis ncaj, thiab tej teeb meem ntawm sab cev nqaij tawv thiab sab paj hlwb uas tsim txom peb lub cev hauv lub ntiaj teb uas txawj ploj txawj tuag no. Kev zoo siab uas nyob tas mus li tsis txhais tau hais tias txhua txoj kev sib raug zoo nrog lwm tus neeg yuav muaj kev zoo siab tas mus li. Tiam sis ib txhiab xyoo uas Dab Ntxwg Nyoog yuav raug kaw cia20 yuav muab sij hawm rau peb tau hlub, to taub, thiab kho txhua yam, thaum uas peb npaj rau lub neej uas nyob mus ib txhis li.
Peb nrhiav tau lub ntuj txoj kev sib raug zoo nrog lwm tus neeg.21 Vajtswv txoj hauj lwm thiab lub yeeb koob yog coj kev zoo siab uas nyob mus txhis li los rau peb.22 Txoj sia nyob mus ib txhis thiab kev tsa nto yog qhov uas peb paub Vajtswv thiab Yexus Khetos ces, dhau ntawm Vajtswv lub hwj chim, qhov chaw uas Nkawd nyob yog qhov chaw uas peb yuav nyob thiab.23
Cov kwv tij thiab cov muam es, Vajtswv peb Leej Txiv Saum Ntuj Ceeb Tsheej thiab Nws Tib Leeg Tub muaj sia nyob. Nkawd muab kev kaj siab lug, kev zoo siab, thiab kev kho rau txhua haiv neeg thiab hom neeg, rau txhua yim neeg, rau peb txhua leej txhia tus. Tus Tswv tus yaj saub tab tom coj peb kev. Tseem muaj kev tshwm sim hauv lub caij nyoog kawg no. Thov kom peb yuav txav los ze peb tus Cawm Seej hauv tus Tswv lub tsev dawb huv, thiab thov kom Nws yuav pab peb txav mus ze Vajtswv thiab ib leeg rau ib leeg, thaum peb khi peb tej siab ua ke muaj kev khuv leej, qhov tseeb, thiab kev hlub tshua uas Khetos muab rau peb txhua tiam neeg—rau lub sij hawm no thiab tas mus ib txhis, muaj kev zoo siab uas nyob tas mus li. Nyob hauv Yexus Khetos, yuav muaj tau li no; nyob hauv Yexus Khetos, qhov no muaj tseeb. Kuv ua tim khawv li no, los ntawm Nws lub npe dawb huv, Yexus Khetos, amees.