Kev Tu thiab Hais Nej Zaj Lus Tim Khawv
Kuv caw nej los siv nej tej lus thiab nej tej hauj lwm qhia tawm txog nej zaj lus tim khawv.
Lus Cev
Muaj ntau lub sij hawm tseem ceeb hauv peb lub neej uas peb tsis tau npaj siab rau, yeej muaj li no thaum nej tseem hluas. Cia kuv qhia nej ib zaj dab neeg txog ib tug tub hluas, Kevin, uas tseem kawm ntawv high school uas raug xaiv mus rau lwm lub xeev rau ib qho kev qhia cov tub kawm ntawv ua thawj coj, nov yog siv nws tej lus qhia zaj no.
“Txog kuv na thib lawm, es tus neeg ua ntaub ntawv thov kuv lub npe. Nws saib nws daim ntawv thiab hais tias, ‘Koj yog tus tub hluas ua tuaj tim Utah los.’
“‘Ces muaj kuv tib leeg xwb los?’ Kuv tau nug.
“‘Aws, koj yog tib leeg xwb.’ Nws muab kuv daim qhia npe rau kuv uas sau lo lus ‘Utah’ hauv qab kuv lub npe. Thaum kuv muab khawm ntawm kuv lub tsho, zoo nkaus li kuv muaj ib lub cim hom lawm.
“Kuv nrog tsib tug tub kawm ntawv ntxiv mus hauv lub hluav taws xob nqa neeg nce mus tsev siab uas muaj tej daim ntawv qhia npe zoo li kuv daim. ‘Es, koj tuaj tim Utah puas yog. Koj puas yog neeg Maumoos?’ ib tug tub kawm ntawv nug kuv.
“Kuv tsis paub nyob nrog cov tub kawm ntawv uas yog thawj coj tuaj thoob plaws lub teb chaws no. Kuv txawm maj mam teb hais tias ‘Aws.’
“‘Nej yog cov uas ntseeg Joseph Smith, tus uas hais tias nws tau pom cov tim tswv. Koj tsis ntseeg hais tias muaj li ntawd tiag puas yog?’
“Kuv tsis paub teb nws. Txhua tus tub kawm ntawv tab tom ntsia ntsoov kuv. Kuv nyuam qhuav tuaj txog xwb, thiab sawv daws twb xav tias kuv yog ib tug neeg txawv txawv. Kuv ib nyuag ua siab tawv tiam sis txawm hais tias, ‘Kuv paub tias Joseph Smith yog Vajtswv ib tug yaj saub.’
“‘Cov lus ntawd los qhov twg los?’ kuv txawm xav. Kuv tsis tau paub hais tias kuv muaj siab loj tag npaud. Tiam sis cov lus ntawd raug kuv lub siab.
Nws txawm hais tias “‘Aws, kuv kuj hnov hais tias nej txhua tus yog neeg ntseeg ntuj txawv heev.’
“Thaum hais li ntawd, sawv daws ntsiag tos thaum lub qhov rooj qhib. Thaum peb tab tom sau peb cov thawv ua ke, nws taug kev mus luag nthe.
“Ces, txawm muaj ib lub suab ntawm kuv nrob qaum hais tias, ‘Es, cov neeg Maumoos puas muaj lwm phau Npaivnpaum?’
“Aib yaub. Yuav tsim txom kuv dua los. Kuv tig los pom lwm tus tub kawm ntawv uas tau nyob hauv lub hluav taws xob nqa neeg nce mus npe hu ua Christopher.
“Kuv hais tias ‘Nws hu ua Phau Ntawv Maumoos,’ es xav tso tseg xwb. Kuv tau nqa hlo kuv cov thawv thiab tau sawv kev yuav mus.
“‘Phau ko puas yog phau uas Joseph Smith muab txhais?’ nws txawm nug.
“Kuv teb hais tias ‘Aws, yog los mas.’ Kuv tseem taug kev mus, cia siab hais tias nws yuav tsis ua rau kuv txaj muag ntxiv.
“‘Es, yog li ntawd koj puas paub kuv yuav tau ib phau qhov twg?’
“Kuv txawm nco qab txog ib nqe vaj lug kub uas kuv tau kawm dua hais tias. ‘Kuv tsis txaj muag rau Yexus Khetos txoj moo zoo.’1 Thaum kuv xav li no, kuv yeej tu siab vim kuv txaj muag li ntawd.
“Rau tag nrho lub lim tiam ntawd kuv pheej xav ntsoov txog nqe vaj lug kub ntawd. Kuv tau teb tag nrho cov lus nug txog peb lub Koom Txoos, thiab tau muaj ib co phooj ywg tshiab.
“Kuv txawm pom hais tias kuv yeej zoo siab rau kuv txoj kev teev ntuj.
“Kuv tau muab ib Phau Ntawv Maumoos rau Christopher. Yav tom ntej nws sau ntawv rau kuv, qhia hais tias nws twb caw cov tub txib los rau nws lub tsev.
“Kuv kawm hais tias kuv yuav tsum txhob txaj muag hais kuv zaj lus tim khawv.2
Kevin txoj kev ua siab loj qhia nws zaj lus tim khawv yeej tshoov kuv lub siab. Yeej yog ib txoj kev ua siab loj uas cov ntseeg hauv lub Koom Txoos thoob plaws ntiaj teb no ua txhua txhua hnub thiab. Thaum kuv hais lus hnub no, kuv caw nej los xav txog plaub lo lus nug no:
-
Kuv puas paub thiab to taub hais tias ib zaj lus tim khawv yog dab tsi?
-
Kuv puas paub hais kuv zaj lus tim khawv?
-
Muaj tej yam dab tsi uas thaiv kuv txoj kev hais kuv zaj lus tim khawv rau luag?
-
Kuv ua li cas tu xyuas kuv zaj lus tim khawv?
Kuv Puas Paub thiab To Taub Hais tias Ib Zaj Lus Tim Khawv Yog Dab Tsi?
Nej zaj lus tim khawv yog ib yam uas muaj nuj nqi heev, feem ntau yuav coj tej kev xav ntawm sab ntsuj plig los. Tej kev xav no yog ua ntsiag tos thiab feem coob hais tias yog “ib lub suab yaus thiab me.”3 Nws yog nej txoj kev ntseeg los sis kev paub txog ib qho tseeb uas tus Vaj Ntsuj Plig Dawb Huv tau qhia rau nej tus ntsuj plig lawm. Thaum yus tau zaj lus tim khawv no yus yuav pauv seb nej hais thiab ua li cas. Tej yam tseem ceeb rau nej zaj lus tim khawv, uas tus Vaj Ntsuj Plig Dawb Huv pom zoo, los muaj li no:
-
Vajtswv yog nej Leej Txiv Saum Ntuj Ceeb Tsheej; nej yog Nws ib tug me nyuam. Nws hlub nej.
-
Yexus Khetos muaj txoj sia nyob. Nws yog Vajtswv Tib Leeg Tub thiab nej tus Cawm Seej thiab tus Txhiv Dim.
-
Joseph Smith yog Vajtswv ib tug yaj saub uas raug hu los muab Yexus Khetos lub Koom Txoos txum tim rov qab los.
-
Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog Vajtswv lub Koom Txoos uas raug muab txum tim rov qab los rau hauv ntiaj teb no.
-
Niaj hnub no muaj ib tug yaj saub uas muaj sia nyob uas coj Yexus Khetos lub Koom Txoos uas muab txum tim rov qab los no.
Kuv Puas Paub Hais Kuv Zaj Lus Tim Khawv?
Nej hais nej zaj lus tim khawv thaum nej qhia nej tej kev xav ntawm sab ntuj plig rau lwm tus neeg. Ua ib tug mej zeej hauv lub Koom Txoos, nej muaj cib fim hais nej zaj lus tim khawv hauv lub Koom Txoos tej kev sib ntsib los sis tej lub sij hawm thaum nrog lwm tus neeg tham tim ntsej tim muag, zoo li nrog nej tsev neeg, cov phooj ywg, thiab lwm tus neeg tham.
Lwm txoj kev hais nej zaj lus tim khawv yog thaum nej ua neeg ncaj ncees. Nej zaj lus tim khawv tsis yog tej lus uas nej hais xwb—yeej yog nej txoj kev coj li cas thiab.
Txhua zaus nej hais nej zaj lus tim khawv los sis ua tej yam uas qhia tias nej coj raws li Yexus Khetos, nej thiaj li caw lwm tus neeg “los cuag Khetos.”4
Cov mej zeej hauv lub Koom Txoos sawv ua neeg tim khawv txog Vajtswv, txhua lub sij hawm, hauv txhua yam, thiab hauv txhua qhov chaw.5 Muaj cib fim ntau heev los ua li ntawd hauv tej kev qhauj tawm hauv hluav taws xob thaum peb tshaj tawm txog tej yam uas txhawb nqa tib neeg sab ntsuj plig. Peb ua tim khawv thaum peb hlub, faib, thiab caw neeg nyob online. Nej tej tweet, nqe lus xa ncaj qha, thiab tej zaj lus yuav muaj lub hom phiaj siab thiab dawb huv ntxiv thaum nej siv social media qhia tias Yexus Khetos txoj moo zoo pab nej lub neej li cas.
Muaj tej Yam Dab Tsi uas Thaiv Kuv txoj Kev Hais Kuv Zaj Lus Tim Khawv rau Luag?
Tej zaum qhov uas yus tsis paub hais li cas yog ib yam uas tiv thaiv tsis pub nej hais nej zaj lus tim khawv. Matthew Cowley, ib tug Thwj Tim thaum ub, tau qhia zaj no thaum nws ncaim mus ua tub txib hauv New Zealand teb yuav nyob tsib xyoos:
“Kuv yeej yuav nco qab ntsoov zaj lus thov Vajtswv uas kuv txiv hais hnub uas kuv sawv kev mus. Kuv yeej ib txwm tsis tau hnov ib zaj foom koob hmoov zoo tshaj tas kuv lub neej. Ces nws cov lus kawg rau kuv nyob ntawm tshav tos lub tsheb nqaj hlau hais tias, ‘Kuv tus me tub, koj yuav tawm mus ua tub txib; koj yuav kawm vaj lug kub; koj yuav npaj koj tej zaj lus; thiab yuav muaj tej lub sij hawm thaum koj xav tias koj twb npaj siab zoo zoo, tiam sis thaum koj sawv tsees, koj lub paj hlwb yuav cia li tsis muaj dab tsi hauv.’ Twb muaj li no rau kuv ntau zaus thiab.
“Kuv hais tias, ‘Koj ua li cas thaum koj lub paj hlwb tsis muaj dab tsi hauv lawm?’
“Nws hais tias, ‘Koj sawv ntawd thiab tag siab tag ntsws, hais koj zaj lus tim khawv tias Joseph Smith yog Vajtswv uas muaj sia nyob tus yaj saub, ces koj yuav muaj ntau yam kev xav hauv koj lub paj hlwb thiab koj yuav pib hais lus … ces cov uas mloog koj lus yuav hnov hauv lawv nruab siab.’ Ces yog li ntawd kuv lub paj hlwb, txawm tsis muaj tej kev xav hauv kuv lub paj hlwb thaum kuv … ua tub txib … , thiaj tau muaj sij hawm hais kuv zaj lus tim khawv txog qhov tseem ceeb tshaj plaws hauv tib neeg zaj keeb kwm txij li thaum muab tus Xib Hwb ntsia saum tus ntoo khaub lig. Kuv cov kwv tij thiab cov muam, kuv thov kom nej yuav sim ua li no. Yog nej tsis muaj ib yam dab tsi hais, cia li ua tim khawv tias Joseph Smith tau ua Vajtswv ib tug yaj saub, thiab tag nrho lub Koom Txoos zaj keeb kwm yuav tshwm plaws rau hauv nej lub paj hlwb.”6
Tib yam li ntawd, Thawj Tswj Hwm Dallin H. Oaks qhia tias, “Tej zaum peb yuav haj yam muaj ib zag lus tim khawv thaum peb tawm mus ua hauj lwm xwb tsis yog txhos caug thov Vajtswv xwb.”7 Tus Ntsuj Plig ua tim khawv rau tus neeg uas hais lus thiab tus uas mloog lus tib si.
Lwm yam teeb meem uas yus pom hauv Kevin zaj dab neeg no, yog kev ntshai. Xws li Povlauj sau ntawv mus rau Timautes hais tias:
“Vajtswv tsis pub lub siab ntshai rau peb tiam sis pub lub siab muaj hwj chim thiab kev hlub. …
“Yog li ntawd tsis txhob txaj muag ua tim khawv txog peb tus Tswv.”8
Tej kev ntshai tsis los ntawm tus Tswv tiam sis los ntawm tus yeeb ncuab los. Txoj kev muaj kev ntseeg. ib yam li Kevin muaj, yuav cia nej kov yeej tej kev xav li no thiab ua siab loj qhia txog tej yam uas nyob hauv nej lub siab.
Kuv Ua Li Cas Tu Xyuas Kuv Zaj Lus Tim Khawv?
Kuv ntseeg hais tias peb yeej muaj ib zaj lus tim khawv hauv peb lub siab, yog peb yuav tu tau thiab ua kom nws loj hlob tuaj, Amas qhia tias peb yuav tsum ua tib zoo tu peb zaj lus tim khawv.9 Thaum peb ua li no, “nws yuav tuaj cag, loj hlob tuaj, thiab txi txiv.”10 Yog tsis muaj li no ces “nws yuav tuag mus.”11
Txhua tus hauv Thawj Pawg Thawj Tswj Hwm tau qhia peb kom paub ua li cas ceev peb zaj lus tim khawv cia.
Thawj Tswj Hwm Henry B. Eyring qhia peb tias “Yuav tsum nyeem Vajtswv tej lus, thov Vajtswv thiab mloog tus Tswv cov lus txib txhua lub sij hawm tas mus li kom nej zaj lus tim khawv loj tuaj thiab vam meej.”12
Thawj Tswj Hwm Dallin H. Oaks hais kom peb nco qab tias yog peb xav ceev peb zaj lus tim khawv cia, ces “peb yuav tsum txais lub cim nco txog txhua lub lim tiam (saib Q&K 59:9) kom thiaj li tsim nyog muaj raws li tau cog lus rau peb tias peb yuav ‘muaj nws tus Ntsuj Plig nrog [peb] nyob tas mus li’ (Q&K 20:77).”13
Thiab Thawj Tswj Hwm Russell M. Nelson tau ntuas peb tsis ntev tas los:
“Ntxiv qhov tseeb rau [nej zaj lus tim khawv]. …
“… Siv cov yaj saub thaum ub thiab niaj hnub no cov lus los tu nej tus kheej. Thov tus Tswv los qhia nej seb yuav ua li cas thiaj hnov tau Nws zoo dua. Haj yam siv sij hawm hauv lub tuam tsev thiab ua tsev neeg zaj keeb kwm.
“… Ua rau nej zaj lus tim khawv ua qhov tseem ceeb tshaj plaws, ces saib seb yuav muaj tej txuj ci tseem ceeb hauv nej lub neej.”14”
Lus Xaus
Kuv cov kwv tij thiab cov muam, kuv cog lus tias thaum nej haj yam to taub seb ib zaj lus tim khawv yog dab tsi, thiab thaum nej qhia tawm, nej yuav kov yeej tej teeb meem zoo li tsis paub thiab ntshai, nej thiaj muaj cuab kav tu thiab ceev nej qhov tseem ceeb no, uas yog nej zaj lus tim khawv.
Peb muaj hmoov vim muaj ntau tus yam ntxwv txog cov yaj saub thaum ub thiab niaj hnub nim no uas tau ua siab loj hais lawv zaj lus tim khawv.
Tom qab Khetos tuag, Petus tau sawv thiab hais lus tim khawv tias:
“Thov kom nej sawv daws yuav paub, … tias twb yog Yexus tus uas yog neeg Naxales ua rau tus txiv neej uas sawv tab meeg nej no zoo ntag … Yexus yog tus uas nej muab ntsia rau saum tus ntoo khaub lig, tiam sis Vajtswv twb tsa nws sawv hauv qhov tuag rov qab los lawm. …
“… Tsuas yog Yexus tib leeg xwb thiaj cawm tau; tsis muaj dua lwm tus uas Vajtswv tso los cawm peb neeg ntiaj teb kom peb dim peb lub txim.”15
Amulej, tom qab Amas qhuab qhia tib neeg txog kev ntseeg, tau ua siab loj hais tias: “Kuv hais lus tim khawv kuv tus kheej hais tias tej yam no muaj tseeb. Saib seb, kuv hais rau nej tias, kuv yeej paub tias Khetos yuav los rau hauv noob neej, … thiab hais tias nws yuav theej neeg ntiaj teb tej kev txhaum; vim tus Tswv Vajtswv tau hais li ntawd.”16
Joseph Smith thiab Sidney Rigdon, tom qab nkawd ua yog toog pom txog tus Cawm Seej uas sawv rov los, tau hais lus tim khawv hais tias:
“Thiab nim no, tom qab tej lus tim khawv ntau uas tau hais txog nws lawm, zaj no yog zaj lus tim khawv, zaj kawg nkaus, uas wb hais txog nws: Hais tias nws muaj txoj sia nyob!
“Vim wb pom nws, nyob ntawm Vajtswv sab tes xis; thiab wb hnov lub suab ua tim khawv tias nws yog Leej Txiv Tib Leeg Tub.”17
Cov kwv tij thiab cov muam, kuv caw nej los siv nej tej lus thiab nej tej hauj lwm qhia tawm txog nej zaj lus tim khawv. Tsis ntev tas los no kuv muaj sij hawm ua li ntawd, thaum xaus ib txoj kev sib ntsib nrog ib tug hau zos hauv ib lub nroog nram Amelikas Qab Teb, nyob hauv nws chav hauj lwm nrog nws ib co nom tswv. Thaum peb tab tom yuav xaus kev sib ntsib ntawd, kuv txawm xav tias kuv yuav tsum hais kuv zaj lus tim khawv. Vim xav ua raws li kev tshoov siab ntawd, kuv tau hais lus tim khawv tias Yexus Khetos yog Vajtswv Tib Leeg Tub thiab yog tus Cawm Seej rau tag nrho lub ntiaj teb. Txhua yam tsav txawm hloov tas sim ntawd. Yus yeej hnov tau tus Ntsuj Plig hauv chav tsev ntawd. Zoo nkaus li twb raug txhua tus neeg lub siab. “Tus Nplij Siab … ua tim khawv txog Leej Txiv thiab Leej Tub.”18 Kuv zoo siab vim kuv tau ua siab loj hais kuv zaj lus tim khawv.
Thaum muaj sij hawm zoo li no, cia li zoo siab hlo ua li ntawd. Nej yuav hnov tus Nplij siab nyob sov siab so hauv nej nruab siab thaum nej ua li no.
Kuv hais lus tim khawv rau nej—Vajtswv yog peb Leej Txiv Saum Ntuj Ceeb Tsheej, Yexus Khetos muaj txoj sia nyob, thiab Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog Vajtswv lub Koom Txoos hauv lub ntiaj teb hnub no, uas peb tus yaj saub, Thawj Tswj Hwm Russell M. Nelson, coj. Los ntawm Yexus Khetos lub npe, amees.