Cia Li Muab Nej lub Zog Los Coj, Auj Xi-oos
Peb txhua leej txhua tus yuav tsum ua tib zoo thov Vajtswv ntsuam xav seb peb siv sij hawm li cas rau sab cev nqaij daim tawv thiab sab ntsuj plig.
Tej zaj paj lug yog ib qho ntawm tus Tswv Yexus Khetos kev qhuab qhia tib neeg. Hais qhov tseeb mas, tus Cawm Seej tej zaj paj lug tsuas yog tej zaj dab neeg uas muab tej kev tseeb ntawm sab ntsuj plig piv rau tej yam hauv ntiaj teb no uas tib neeg yuav to taub. Piv xam hais tias, Phau Tshiab plaub phau Txoj Moo Zoo muaj lus qhia uas muab lub Ntuj Ceeb Tsheej piv rau ib lub me nyuam noob,1 rau ib lub hlaws uas muaj nqi,2 rau ib tug tswv tsev thiab cov neeg uas ua hauj lwm hauv nws lub vaj,3 rau kaum tus hluas nkauj,4 thiab ntau yam ntxiv. Thaum tus Tswv qhuab qhia neeg hauv Kalilais teb, cov vaj lug kub qhia tias “nws tsis qhuab qhia tsuas yog nws hais tej zaj paj lug xwb.”5
Yeej tsis qhia meej meej txog lub ntsiab lus los sis zaj xov xwm thaum yus hais ib zaj paj lug. Tiam sis, zaj dab neeg ntawd qhia ib qho tseeb rau tus neeg uas ua tib zoo mloog raws li tus neeg ntawd txoj kev ntseeg Vajtswv, raws li nws sab ntsuj plig npaj siab txais yuav, thiab seb nws kam kawm li cas xwb. Yog li ntawd, ib tug neeg yuav tsum siv nws txoj kev ywj siab xaiv seb nws puas kam “nug, nrhiav, thiab khob qhov rooj”6 kom thiaj nrhiav tau tej qhov tseeb hauv ib zaj paj lug.
Kuv rau siab thov kom tus Vaj Ntsuj Plig Dawb Huv yuav qhia peb txhua tus tas sim no thaum peb xav txog zaj paj lug txog vaj ntxwv lub rooj tshoob.
Vaj Ntxwv lub Rooj Tshoob
“Yexus … hais dua ob peb zaj lus piv txwv rau sawv daws mloog hais tias,
“Ntuj Ceeb Tsheej piv ib yam li ib tug vaj ntxwv yuav nyab rau nws tus tub thiab noj tshoob.
“Vaj Ntxwv txawm txib nws cov tub txib mus hu cov qhua uas nws twb caw lawm kom tuaj nrog nws noj tshoob, tiam sis tsis muaj leej twg tuaj li.
“Nws thiaj txib dua ib pab tub txib mus hais rau cov qhua uas nws twb caw lawm hais tias, Kuv rooj tshoob, kuv twb npaj txhij lawm. Kuv tej sam nyuj thiab kuv tej me nyuam nyuj rog rog, kuv twb tua thiab ua siav tas lawm, nej cia li tuaj noj.
“Tiam sis cov qhua ntawd tsis muaj leej twg quav ntsej li, nyias txawm mus ua nyias hauj lwm tas lawm: Tus mus ua teb los muaj, tus mus ua luam los muaj.”7
Yav thaum ub mas, ib qho zoo siab tshaj plaws twb yog cov neeg Yudais tej rooj tshoob—ib yam uas yuav kav ntev npaum li ib los sis ob lim tiam. Ib qho zoo li no yuav tsum ua tib zoo npaj rau, thiab tau caw tib neeg tuaj puag ntxov, es hnub uas pib yeej tau rov qab caw sawv daws tuaj. Tiag tiag mas, qhov uas vaj ntxwv caw nws ib tug neeg tuaj koom ib lub rooj tshoob yog lo lus txib kom tus ntawd yuav tsum tuaj. Tab sis mas, coob tug uas nws caw tuaj hauv zaj paj lug no tsis tau tuaj.8
“Qhov uas lawv tsis kam tuaj koom vaj ntxwv lub rooj tshoob twb yog lawv sawv tawm tsam … vaj ntxwv txoj cai thiab tub qaug vaj ntxwv thiab nws tus tub. … Qhov uas ib tug txiv neej txawm mus ua teb thiab lwm tus mus ua nws tej [lag luam]”9 qhia tias nkawd saib tsis tau qhov tseem ceeb rau nqi thiab tsis kam ua raws li vaj ntxwv lub siab nyiam.10
Zaj paj lug hais ntxiv hais tias:
“Vaj Ntxwv txawm hu nws cov tub txib los thiab hais rau lawv hais tias, Kuv rooj tshoob, kuv twb npaj txhij lawm, tiam sis cov neeg uas kuv caw ntawd, lawv tsis tsim nyog tuaj noj.
“Nej cia li mus rau tom tej kev loj, nej ntsib leej twg los hu kom lawv cia li tuaj noj kuv rooj tshoob no.
“Ces cov tub txib txawm tawm mus rau tom tej kev, tej neeg uas lawv ntsib, tsis hais tus zoo tus phem los lawv hu kom tuaj huv tib si; sawv daws tuaj nyob puv nkaus vaj ntxwv tsev.”11
Thaum lub sij hawm ntawd txoj kev cai hais tias tus tswv rau lub rooj tshoob—hauv zaj lus piv txwv no, yog tus vaj ntxwv—tau muab ib ce khaub ncaws rau cov neeg tuaj koom lub rooj tshoob. Tej cev khaub ncaws rau rooj tshoob yog ib cev thav ntxwv dog dig uas sawv daws hnav. Yog li ntawd, sawv daws zoo ib yam, tsis muaj cov nom thiab cov pluag, sawv daws tau sib xyaw ua ke nyob sib txig xwb.12
Cov neeg uas caw tom kev tuaj yuav tsis muaj sij hawm los sis nyiaj txaus mus yuav khaub ncaws tsim nyog hnav mus koom lub rooj tshoob. Yog li ntawd, tej zaum vaj ntxwv yeej muab nws tej ris tsho rau lawv hnav xwb. Sawv daws thiaj muaj cib fim hnav vaj ntxwv tej cev khaub ncaws.13
Thaum vaj ntxwv los hauv rooj tshoob, nws ntsia tib neeg sawv daws thiab txawm pom ib tug neeg uas tsis hnav cev khaub ncaws rau lub rooj tshoob. Lawv txawm coj tus txiv neej ntawd los, ces vaj ntxwv nug hais tias, “Phooj ywg, koj twb tsis hnav cev ris tsho ua tshoob, ua li cas koj ho tuaj hauv no? Tiam sis tus ntawd hais tsis taus ib lo li.”14 Zoo li tus vaj ntxwv tab tom nug hais tias, “Ua cas koj tsis hnav lub rooj tshoob cev khaub ncaws, txawm twb muab ib ce rau koj lawm?”15
Tus txiv neej yeej tsis hnav ib ce khaub ncaws uas phim qhov tseem ceeb ntawd thiab kab lus uas hais tias, “Tiam sis tus ntawd hais tsis taus ib lo li,” qhia tias tus txiv neej tsis muaj lus teb.16
Txwj Laug James E. Talmage qhia txog tus txiv neej no li no hais tias: “Tus neeg uas tsis hnav cev thav ntxwv yeej tsis ua zoo, saib tsis tau lwm tus rau nqi, los sis tau ua ib qho txhaum loj lawm, yus yeej pom tau li ntawd. Thaum xub thawj vaj ntxwv hais lus zoo zoo, tsuas nug seb nws ua li cas thiaj nkag los tsis hnav cev khaub ncaws rau lub rooj tshoob. Yog tias tus neeg no tau piav yog vim li cas nws tsis hnav, los sis muaj dab tsi hais, ces nws yeej yuav teb; tiam sis peb pom hais tias nws tsis muaj lus teb hlo li. Vaj ntxwv twb uas siab zoo caw txhua tus tib neeg uas nws cov tub qhev nrhiav tau; tiam sis lawv sawv daws tau nkag los hauv lub qhov rooj; ces ua ntej txog chav noj mov, uas yog chav tsev uas tus vaj ntxwv yuav los hauv, ces txhua tus yuav tsum hnav cev khaub ncaws zoo; tiam sis tus uas tsis hnav, tau tuaj lwm txoj kev tuaj, nws tsis tau mus dhau plaws cov tub zov qhov rooj, ces zoo li nws ua tub sab los tsev.”17
Ib tug neeg ntseeg Yexus, John O. Reid, sau hais tias tus neeg uas tsis kam hnav lub rooj tshoob cev khaub ncaws yeej “saib tsis taus vaj ntxwv thiab nws tus tub rau nqi li.” Tsis yog hais tias nws tsis hnav lub rooj tshoob cev khaub ncaws xwb, tiam sis, nws txiav txim tsis hnav xwb. Nws ntxeev siab tsis kam ua zam zoo zoo rau qhov ntawd. Vaj ntxwv txiav txim rau nws tas sim ntawd hais tias: “Nej cia li muab tus ntawd pav tes pav taw, thiab muab nws pov rau sab nraud qhov uas tsaus ntuj nti. Nyob qhov ntawd nws yuav quaj qw tom hniav qees.”18
Vaj ntxwv txoj kev txiav txim li ntawd tsis yog vim nws tsis hnav rooj tshoob cev khaub ncaws xwb—tiam sis yog vim “tus txiv neej ntawd tsis kam hnav ib ce. Tus txiv neej … yeej xav koom lub rooj tshoob tiam sis … tsis kam ua raws li vaj ntxwv lub siab nyiam. Nws tsuas xav ua raws li nws lub siab nyiam xwb. Qhov uas nws tsis hnav zoo zoo qhia tias nws ntxeev siab rau vaj ntxwv thiab nws cov lus qhuab qhia.”19
Cov uas Tau Hu Lawm Muaj Coob, Tiam Sis Cov uas Xaiv Tau Muaj Tsawg
Zaj paj lug siv nqe lus no thaum xaus, “Cov neeg uas tau hu lawm muaj coob, tiam sis cov uas xaiv tau muaj tsawg.”20
Yog ib qho txawv heev, vim Joseph Smith tau pauv nqes lus hauv Mathais no thaum nws txhais Phau Vaj Lub Kub Npaivnpaum li no: “Cov neeg uas tau hu lawm muaj coob, tiam sis cov uas xaiv tau muaj tsawg; yog li ntawd txhua tus tsis hnav lub rooj tshoob cev khaub ncaws.”21
Txoj kev caw los koom rooj tshoob thiab kev xaiv tuaj koom lub rooj tshoob muaj ntsis sib xws tiam sis yeej sib txawv me ntsis. Txoj kev caw no yeej yog rau txhua tus txiv neej thiab poj niam tib si. Thiab ib tug neeg twg yeej kam tuaj thiab zaum ntawm lub rooj noj mov—tiam sis tsis xaiv tus ntawd los vim nws tsis tau hnav cev khaub ncaws yog rau lub rooj tshoob uas yog kev ntseeg tus Tswv Yexus thiab tau Nws txoj kev tshav ntuj. Yog li ntawd, peb muaj Vajtswv txoj kev caw los thiab peb xaiv seb peb yuav ua li cas, thiab tej zaum yuav hu coob leej tiam sis cov uas yuav xaiv los muaj tsawg tsawg.22
Qhov uas Vajtswv xaiv peb los tsis xaiv yeej tsis yog ib yam uas peb lam tau lam yuav xwb. Tab sis mas, koj thiab kuv muaj peev xwm txiav txim kom xaiv peb los thaum peb ua tib zoo siv peb txoj kev ywj siab coj ncaj ncees.
Thov kom paub tias lo lus xaiv hauv ib nqe vaj lug kub hauv Phau Lus Qhuab Qhia thiab Kev Khi Lus hais tias:
“Cov uas tus Tswv hu los muaj coob, tiam sis cov uas nws xaiv los muaj tsawg. Thiab vim li cas nws thiaj tsis xaiv lawv?
Vim lawv tso siab plhuav rau tej yam ntawm lub ntiaj teb no, thiab xav muaj koob nto npe.”23
Kuv xav tias nqe no qhia peb meej meej. Vajtswv tsis muaj ib daim ntawv qhia txog tej npe uas nws nyiam tshaj es peb cia siab hais tias yuav muaj ib hnub twg uas Vajtswv yuav sau peb lub npe rau daim ntawv no. Nws tsis tsa ciaj ciam seb yuav “xaiv” ib co tsawg tsawg xwb. Tiam sis, peb lub siab, peb tej kev xav tau, peb txoj kev ua raws li peb tej kev khi lus thiab kab ke hauv txoj moo zoo, peb txoj kev mloog lus, thiab, qhov tseem ceeb tshaj, tus Cawm Seej txoj kev tshav ntuj thiab kev siab hlub tshua yuav txiav txim seb peb puas raug suav ua cov neeg uas Vajtswv xaiv los.24
“Vim peb rau siab ntso sau ntawv, los yaum peb cov me nyuam, thiab peb cov kwv tij thiab, kom los ntseeg Khetos, thiab rov los nrog Vajtswv sib raug zoo; vim peb paub hais tias twb yog los ntawm txoj kev tshav ntuj peb thiaj tau txais kev cawm seej, tom qab peb tau ua txhua yam uas peb muaj peev xwm ua.”25
Hauv peb lub neej nyuaj no thiab hauv lub ntiaj teb uas muaj kev kub kev ntxhov no, tej zaum peb yuav tsis nco qab txog tej yam uas kav mus ib txhis vim peb sim muaj kev lom zem, ua kom huaj vam, nto moo, thiab ua neeg tseem ceeb xwb. Qhov uas peb tso siab rau “tej yam hauv ntiaj teb no” thiab “tib neeg lub yeeb koob” yuav ua rau peb xiam peb txoj cai rau sab ntsuj plig uas los saum ntuj los.26
Kev Cog Lus thiab Zaj Lus Tim Khawv
Kuv rov qab hais tus Tswv txoj lus ceeb toom rau Nws cov neeg hauv Phau Qub uas tus yaj saub Hakais hais tias: “Yog li ntawd tus Tswv hais tias: Cia li xav txog qhov uas nej taug txoj kev twg.”27
Peb txhua leej txhua tus yuav tsum ua tib zoo thov Vajtswv ntsuam xav seb peb siv sij hawm li cas rau sab cev nqaij daim tawv thiab sab ntsuj plig seb muaj tej yam dab tsi hauv peb lub neej uas tiv thaiv tej koob hmoov uas Leej Txiv Saum Ntuj Ceeb Tsheej thiab tus Cawm Seej xav muab rau peb. Thiab tus Vaj Ntsuj Plig Dawb Huv yeej yuav pab peb pom seb peb zoo li cas tiag.28
Thaum peb sim ua tib zoo siv peb qhov muag thiab pob ntseg seb peb sab ntsuj plig zoo li cas,29 kuv cog lus hais tias peb yuav tau koob hmoov uas pab peb muaj cuab kav thiab muaj zog ua raws li tus Tswv tej kev sib khi lus. Peb yuav txais Vajtswv lub hwj chim hauv peb lub neej30—thiab thaum kawg tus Tswv yuav hu thiab xaiv peb los koom Nws lub rooj noj mov.
“Cia li tsim, cia li tsim dheev, cia li muab nej lub zog los coj, auj Xi-oos es.”31
“Vim Xi-oos yuav tsum zoo nkauj thiab dawb huv zuj zus tuaj; nws tej ciaj ciam av yuav tsum dav tuaj; nws tej ceg txheem ntseeg yuav tsum muaj zog tuaj; muaj tseeb tiag, kuv hais tseeb rau nej tias, Xi-oos yuav tsum sawv thiab hnav nws tej tsoos tsho zoo nkauj.”32
Kuv zoo siab ua tim khawv txog qhov uas Leej Txiv Nyob Mus Ib Txhis thiab Nws Leej Tub uas Nws Hlub muaj txoj sia tiag tiag. Kuv ua tim khawv hais tias Yexus Khetos yog peb tus Cawm Seej thiab tus Txhiv Dim thiab tias Nws muaj sia nyob. Thiab kuv kuj ua tim khawv tias Leej Txiv thiab Leej Tub tau tshwm los rau tus tub hluas Joseph Smith pom, thiaj li muaj kev muab tus Cawm Seej txoj moo zoo txum tim rov qab los hauv lub caij nyoog kawg no. Thov kom peb sawv daws yuav nrhiav thiab tau koob hmoov uas pab peb pom thiab hnov, kuv thov li no los ntawm tus Tswv Yexus Khetos lub npe, amees.