Los Ua Neeg Zoo Tag Nrho Vim Yog Los ntawm Nws
Tsuas yog los ntawm Vajtswv txoj kev tshav ntuj peb thiaj li yuav los ua neeg zoo tag nrho.
Peb Leej Txiv Saum Ntuj Ceeb Tsheej thiab peb tus Cawm Seej, Yexus Khetos, muaj hwj chim cawm peb, thiab hloov peb lub siab. Nkawd muaj peev xwm pab peb hloov los neeg zoo li Nkawd.
Ob peb xyoo tas los, kuv ib tug tub xeeb ntxwv, Aaron, pib muaj mob. Nws nkees heev, doog ntshav ntau me ntsis, thiab saib nws zoo li nws mob heev. Tom qab tau kuaj mob, tau tshawb nrhiav tias nws muaj mob aplastic anemia, ib kab mob uas ua rau nws hlwb pob txha tsis tsim keeb ntshav liab, keeb ntshav dawb, thiab cov platelet. Yog tias tsis muab tshuaj thiab tsis kho mob, ces nws cov ntshav yuav tsis nkoog los yog tua kab mob, ntshe yog nws vau los sis raug mob ces tej zaum nws yuav tuag.
Rau ib ntus, tau muab cov ntshav thiab platelet ntxiv rau Aaron kom nws thiaj li yuav tsis raug xwm txheej. Cov kws kho mob piav tias yuav kho tau kab mob no tsuas yog muaj ib tug neeg muab hlwb pob txha rau nws, thiab yuav zoo tshaj plaws yog tias nws ib tug kwv muab rau nws. Yog tias nws ib tug kwv muab taus, ces qhov uas ntxiv hlwb pob txha rau nws yuav cawm nws txoj sia. Twb tau sim kuaj nws plaub tug kwv, thiab ib tug, Maxwell, cov hlwb pob txha yuav zoo tag nrho.
Txawm yog muaj ib tug uas yuav pub hlwb pob txha, kev muab hlwb pob txha tso hauv lwm tus yeej muaj teeb meem ntau thiab. Kom ua raws li tus txheej txheem no yuav tsum tua Aaron cov lwg ntshav nyob hauv nws hlwb pob txha los ntawm tshuaj thiab hluav taws xob tua kab mob ua ntej txais cov keeb ntshav los ntawm nws tus kwv Maxwell cov hlwb txha. Ces vim Aaron cov roj ntshav tiv thaiv kab mob tsis muaj zog hlo li, nws yuav tsum nyob hauv tsev kho mob rau ob peb lim tiam ces nyob hauv tsev rau ob peb hlis ua tej txheej txheem, txwv tsis ua tej yam, thiab noj tshuaj tshwj xeeb.
Yuav muab hlwb txha hloov vim vam hais tias Aaron lub cev yuav tsis xyeej cov ntshav uas Maxwell cov keeb ntshav yuav tsim cov ntshav liab thiab ntshav dawb thiab cov platelet nyob hauv Aaron lub cev. Thaum ib tug neeg pub cov hlwb txha li no ces yeej yuav kho lwm tus lub cev nqaij daim tawv tiag tiag. Xav tsis thoob thaum ib tug kws kho mob piav tias yog Aaron mus ua txhaum kev cai thiab nrog ntshav hauv qhov chaw ntawd, ces cov tub ceev xwm yuav ntes nws tus kwv Maxwell. Yog vim Aaron cov ntshav yog los ntawm Maxwell cov keeb ntshav uas tso rau hauv nws thiab nws yuav muaj Maxwell DNA, es yuav yog li ntawd mus txog thaum nws tas sim neej no.
Qhov uas Aaron tus kwv cov ntshav tau cawm nws ua rau kuv xav ntau yam txog Yexus Khetos cov ntshav uas Nws txoj Kev Theej Txhoj tau pab peb li cas. Hnub no kuv xav tsom ntsoov rau txoj kev hloov uas muaj thaum peb cia tus Tswv ua tej qho txuj ci tseem ceeb nyob hauv peb lub siab.1
Aaron tsis tau muaj hwj chim kov yeej cov kab mob no. Nws lub cev tsis muaj peev xwm tsim tau cov keeb ntshav kom cawm nws txoj sia. Nws ua li cas los, nws tsis muaj peev xwm kho nws cov hlwb txha. Ib yam li Aaron kho tsis taus nws tus kheej, peb yeej cawm tsis taus peb tus kheej. Txawm yog peb muaj peev xwm npaum li cas, peb kawm txawj kawm ntse, los yog muaj zog npaum li cas los, peb tsis muaj peev xwm ntxuav peb tej kev txhaum mus, hloov peb lub cev kom tsis txawj tuag, los sis muab peb tus kheej tsa nto. Yeej muaj tau li no dhau los ntawm tus Cawm Seej Yexus Khetos thiab Nws txoj Kev Theej Txhoj uas nyob mus ib txhis li. “Yeej tsis muaj lwm txoj kev los sis lwm lub npe nyob hauv qab ntuj uas yuav cawm tau tib neeg nyob hauv Vajtswv lub nceeg vaj.”2 Yog Nws cov ntshav theej txhoj uas ntxuav peb thiab hloov peb los ua neeg huv.3
Txawm yog Aaron kho tsis taus nws tus kheej, nws yuav tsum muaj siab xav ua raws li tej yam uas cov kws kho mob hais—txawm yog lawv hais kom nws ua tej yam nyuaj heev, thiaj li kev hloov hlwb txha yuav ntxim. Txawm yog peb cawm tsis taus peb tus kheej, thaum peb ua raws li tus Tswv lub siab nyiam thiab ua raws li peb tej kev khi lus, ces Nws qhib txoj kev rau peb txais kev txhiv dim.4 Ib yam li tus txheej txheem uas cov DNA hauv Aaron cov keeb ntshav yuav hloov, yuav muab peb lub siab hloov,5 yuav muaj Nws tus yam ntxwv hauv peb lub ntsej muag,6 thiab peb yuav hloov los ua neeg tshiab los ntawm Khetos.7
Amas tau hais kom cov neeg hauv Xalahelas xav txog tiam neeg ua ntej uas tau hloov siab los ntseeg. Hais txog nws txiv, Amas piav tias “raws li nws txoj kev ntseeg ua rau nws lub siab hloov loj heev.”8 Ces nws nug hais tias, “Puas tau ua rau nej lub siab hloov loj heev zoo li no?”9 Tsis yog cov neeg uas tau hloov lawv lub siab. Tus Tswv yog tus uas muab lawv lub siab hloov. Amas qhia meej txog qhov no. Nws hais tias, “Saib seb, nws tau hloov lawv lub siab.”10 Lawv “txo lawv lub hwj chim thiab tso lawv lub siab rau Vajtswv tus uas tseeb thiab muaj txoj sia nyob … [thiab] lawv rau siab ntseeg mus txog thaum kawg … [thiab] lawv dim lawm.”11 Cov neeg kam qhib lawv lub siab thiab muab siab rau ntseeg, ces tus Tswv tau hloov lawv lub siab. Thiab yeej yog ib txoj kev hloov loj heev! Cia li xav txog ob tug Amas no lub neej ua ntej thiab tom qab nkawd lub siab tau hloov.12
Peb yog Vajtswv cov me nyuam uas muaj ib txoj hmoov zoo kawg nkaus. Peb muaj cib fim hloov los ua neeg zoo li Nws thiab “muaj kev xyiv fab puv npo.”13 Tiam sis Dab Ntxwg Nyoog xav kom peb tu siab kawg nkaus zoo ib yam li nws.14 Peb muaj peev xwm xaiv peb yuav coj raws leej twg.15 Thaum peb coj raws li Dab Ntxwg Nyoog, peb muab hwj chim rau nws.16 Thaum peb coj raws li Vajtswv, Nws muab hwj chim rau peb.
Tus Cawm Seej tau qhia tias peb “yuav tsum ua neeg zoo kawg nkaus.”17 Ntshe qhov no ua rau peb ntshai thiab ua siab me. Kuv pom tau meej txog tej yam uas kuv tsis txaus thiab kuv yeej paub tseeb tias kuv nyob deb npaum li cas kev ua neeg zoo tag nrho. Tej zaum peb xav tias peb yuav tsum ua kom peb tus kheej yuav zoo tag nrho, tiam sis peb tsis muaj peev xwm ua li ntawd. Yog peb ua raws li txhua lub tswv yim los ntawm txhua phau ntawv kom pab peb tus kheej yeej yuav tsis muaj peev xwm ua li ntawd. Tsuas muaj ib txoj kev thiab ib lub npe uas yuav ua rau peb los ua neeg zoo tag nrho. Peb “yuav hloov ua neeg zoo tag nrho los ntawm Yexus uas yog tus nruab nrab ntawm txoj kev khi lus tshiab, tus uas ua tau txoj kev theej txhoj zoo tag nrho no los ntawm txoj kev cia nws tus kheej cov ntshav nrog.”18 Tsuas yog los ntawm Vajtswv txoj kev tshav ntuj peb thiaj li yuav los ua neeg zoo tag nrho.
Nej puas txawj xav txog qhov uas yuav zoo li cas yog tias kuv tus xeeb ntxwv Aaron yuav xav li cas yog tias nws yuav tsum to taub thiab ua tag nrho tej txheej txheem kho mob ntawm kev hloov hlwb txha nws tus kheej xwb? Peb yuav tsum tsis txhob xav tias peb yuav tsum ua tej yam uas tus Cawm Seej tib leeg tau ua thaum peb sim ua neeg zoo tag nrho.
Thaum Maulaunais xaus nws cov ceev xwm txheej, nws qhia tias, “Muaj tseeb tiag, cia li los cuag Khetos, thiab cia li los ua neeg zoo tag nrho vim yog los ntawm nws, … thiab yog nej yuav xyeej txhua yam uas tsis los ntawm Vajtswv tawm ntawm nej tus kheej mus, thiab hlub Vajtswv kawg nej lub siab thiab lub dag lub zog, ces nws txoj kev tshav ntuj yeej txaus rau nej, xwv kom nws txoj kev tshav ntuj yuav cia nej los ua neeg zoo tag nrho vim yog los ntawm Khetos.”19 Qhov no yog ib yam tseeb uas nplij peb lub siab thiab muaj hwj chim! Nws txoj kev tshav ntuj yeej txaus rau kuv. Nws txoj kev tshav ntuj yeej txaus rau nej. Nws txoj kev tshav ntuj yeej txaus rau tag nrho cov uas “sab sab vim ris nra hnyav.”20
Thaum ua kev kho mob zoo li ua rau Aaron, yeej tsis paub tseeb tiag yuav zoo li cas thaum kawg. Muaj tseeb tiag, Aaron yuav tsum ua kev hloov hlwb txha zaum thib ob thaum uas zaum thib ib muaj teeb meem. Zoo siab heev uas thaum hais txog kev hloov peb lub siab, peb tsis tas xav tias yuav zoo li cas tom ntej. Thaum peb ua neej raws li Nws lub siab nyiam, “vam khom tag nrho rau tej hauj lwm zoo ntawm tus uas muaj hwj chim cawm tau”21 ces yeej paub tseeb tiag hais tias tus Cawm Seej cov ntshav yuav ntxuav peb kom huv thiab thaum kawg peb yuav hloov los ua neeg zoo tag nrho dhau los ntawm Nws. Nws yog “ib tug Vajtswv ntawm qhov tseeb, thiab yeej dag tsis tau.”22
Yeej paub tias tus txheej txheem hloov no yuav siv sij hawm ntev thiab yuav tsis kawg mus txog tom qab lub neej no, tiam sis yeej yuav muaj raws li Nws cog lus. Thaum peb xav tias tshuav ntev ua ntej yuav muaj raws li Vajtswv tau cog lus, peb tseem tsom ntsoov rau tej lus cog tseg ntawd, vim peb paub tias yeej yuav muaj raws li Nws hais.23
Qhov uas Aaron rov qab nyob zoo yog ib qho txuj ci tseem ceeb uas ua rau peb tsev neeg xyiv fab heev. Cia li xav txog qhov uas cov neeg saum ntuj yuav xyiv fab npaum li cas thaum peb hloov siab loj heev.
Peb Leej Txiv Saum Ntuj Ceeb Tsheej thiab peb tus Cawm Seej, Yexus Khetos, hlub peb thiab muaj siab dawb qhia tias Nkawd yuav hloov peb lub siab thiab hloov peb ua neeg zoo tag nrho. Nkawd xav ua li no. Yeej yog lub hom phiaj ntawm Nkawd txoj hauj lwm thiab yeeb koob.24 Kuv ua tim khawv tias Nkawd muaj hwj chim ua li no thaum peb muaj kev ntseeg los cuag Nkawd. Los ntawm Yexus Khetos lub npe, amees.