Nej Puas Tseem Txaus Siab?
Peb txoj kev kam coj raws li Yexus Khetos yuav loj tuaj npaum li peb siv sij hawm pes tsawg hauv tej qhov chaw dawb huv.
Muaj ib Hnub Caiv, thaum kuv npaj lub cim nco txog tom qab ob peb lim tiam thaum kuv ua hauj lwm mus rau lwm ceg txheem ntseeg, kuv tawm ib lub tswv yim uas muaj hwj chim heev.
Thaum tus pov thawj pib thov foom koob hmoov rau cov mov mog, tej lus uas kuv tau hnov ntau zaus lawm muaj zog nkag hauv kuv lub siab. “Thiab ua tim khawv rau koj, Au Vajtswv, Leej Txiv tus uas Nyob Mus Ib Txhis, kom lawv txaus siab txais koj Leej Tub lub npe, thiab nco ntsoov txog nws, thiab coj raws li nws tej lus txib uas nws tau muab rau lawv, kom lawv thiaj li yuav muaj nws Leej Ntsuj Plig niaj hnub nrog lawv nyob.”1 Peb tau ua tim khawv rau Vajtswv tias peb txaus siab los yog kam ua tej ntawd pes tsawg zaus?
Thaum kuv xav txog cov lus dawb ceev tseem ceeb npaum li cas, lo lus txaus siab tau tshoov kuv lub siab. Tej lub sij hawm dawb ceev puv kuv lub siab lub ntsws ua rau kuv nco txog kev hlub thiab kev ris Vajtswv txiaj vim tus Cawm Seej tau theej peb lub txhoj thiab kuv xav txog Nws lub luag hauj lwm ua kom muaj raws li Leej Txiv txoj hau kev txhiv dim rau kuv tsev neeg thiab kuv. Ces kuv hnov tej lus uas tshoov kuv lub siab los ntawm kev thov foom koob hmoov rau cov dej: “Kom lawv ua tau tim khawv rau koj … kom lawv nco ntsoov txog nws.”2 Thaum lub sij hawm ntawd kuv to taub meej tias kuv yuav tsum ua ntau tshaj qhov xav xwb kom ua raws li kuv tej kev khi lus.
Kev txais lub cim nco txog tsis yog ib txoj kab ke teev ntuj uas peb lam nyob pom zoo rau xwb. Yeej yog ib ib qho kom peb nco qab ntsoov txog qhov uas tus Cawm Seej txoj Kev Theej Txhoj tseem ceeb npaum li cas thiab qhov uas peb yuav tsum nco ntsoov txog Nws thiab coj raws li Nws cov lus txib. Kev kam tsom ntsoov rau tus Cawm Seej yog zaj lus tseem ceeb ntawm ob nqe vaj lug kub uas tib neeg hais ntau tshaj hauv lub Koom Txoos: ob zaj lus foom koob hmoov rau lub cim nco txog. Kev to taub qhov tseeb uas Leej Txiv Saum Ntuj Ceeb Tsheej txaus siab pub Nws Tib Leeg Tub rau peb yeej yuav tsum ua rau peb xav siv zog kom txaus siab pub peb tus kheej rau Vajtswv.
Peb puas ua peb lub hauv paus ntawm sab ntsuj plig nyob khov kho saum Yexus Khetos?
Yog tias peb lub hauv paus sab ntsuj plig tsis tuab los yog tsis khov, ces tej zaum peb txoj kev kam ua yuav nyob ntawm seb tib neeg xav li cas los sis seb puas yooj yim rau peb. Thiab yog peb ntseeg tej lus uas lwm tus hais tias lub Koom Txoos muaj tsab cai ntau uas qub dhau los yog tej tsab cai uas tsis yog raws li neeg coob lub siab nyiam, muaj tej kev txwv yus tus kheej uas tsis tsim nyog, thiab yuav tsum siv sij hawm ntau dhau, ces peb yuav xav tsis yog txog kev kam ua zoo. Peb yuav tsum tsis txhob xav tias lub ntsiab cai txog kev kam ua zoo yuav muaj neeg nyiam npaum li cov neeg uas muaj hwj huam hauv social media los sis TikTok. Lub ntsiab cai ntawm tib neeg tsis muaj raws li Vajtswv tej lus tseeb ntau.
Lub Koom Txoos yog ib qho chaw sib sau ua ke rau cov neeg uas tseem tsis zoo tag nrho tiam sis lawv hlub Vajtswv thiab kam coj raws li tus Tswv Yexus Khetos. Txoj kev kam ua li ntawd yeej los ntawm qhov uas Yexus yog tus Khetos tiag tiag, Vajtswv Leej Tub uas muaj txoj sia nyob. Tsuas yog los ntawm tus Vaj Ntsuj Plig Dawb Huv lub hwj chim peb thiaj yuav paub qhov tseeb no. Yog li ntawd, peb txoj kev kam ua zoo yuav loj tuaj npaum li peb siv sij hawm pes tsawg hauv tej qhov chaw dawb huv uas muaj tus Vaj Ntsuj Plig Dawb Huv lub hwj huam.
Peb yuav tsum ua tib zoo siv sij hawm ntxiv kom sib tham nrog peb Leej Txiv Saum Ntuj Ceeb Tsheej uas hlub peb txog peb tej kev txhawj thiab siv sij hawm tsawg dua mloog lwm tus uas tsis hlub peb. Peb kuj yuav tau xaiv kom hloov peb tej xov xwm uas txais txhua hnub kom mloog Khetos tej lus nyob hauv cov vaj lug kub thiab cov lus ntawm Nws cov yaj saub.
Kev hwm Hnub Caiv, kev them ib feem kaum, kev muaj ib daim ntawv tso cai nkag tuam tsev, kev mus rau lub tuam tsev, thiab kev ua raws li peb tej kev khi lus ntawm lub tuam tsev los qhov uas peb saib tej no rau nqi npaum li cas yeej yog ib lub cim txog peb txoj kev kam ua li peb tau cog lus thiab qhia tias peb mob siab npaum li cas. Peb puas kam ua ntxiv kom txhawb nqa peb txoj kev ntseeg Khetos, tsis ua rau neeg sab nraud pom xwb?
Leej Txiv Saum Ntuj Ceeb Tsheej hlub peb zoo tag nrho, tiam sis nrog kev hlub ntawd Nws xav kom peb ua tej yam tseem ceeb. Nws xav kom peb txaus siab tsom ntsoov rau tus Cawm Seej hauv peb lub neej. Tus Cawm Seej yog tus uas kam ua raws nraim li Leej Txiv xav kom peb ua. Nws yog “txoj kev, qhov tseeb, thiab yog txoj sia.”3 Nws kam theej peb lub txhoj. Nws kam pab ris peb tej nra, nplij peb lub siab kom txhob ntshai, ntxiv dag zog rau peb, thiab ua rau peb nyob kaj siab lug thaum muaj kev ntxhov siab thiab kev tu siab.
Tiam sis peb yuav tsum xaiv kom ntseeg Yexus Khetos. “Yog [peb] xav kom muaj kev ntseeg xwb los”4 ntseeg Nws tej lus, ces peb yuav pib los yog rov qab pib muaj kev ntseeg. Yog tias peb cog Nws tej lus hauv peb lub siab zoo li ib lub noob thiab tu zoo zoo, ces lub noob yuav tuaj hlav cag, thiab peb txoj kev ntseeg yuav loj tuaj ua rau peb paub zoo thiab hloov los ua ib lub ntsiab cai ntawm kev muaj peev xwm thiab hwj chim. Phau Ntawv Maumoos yog qhov uas muaj hwj chim tshaj kom txoj kev ntseeg loj tuaj. Kev txaus siab kam ua zoo yog qhov pib ntawm kev ntseeg.
Raws li Vajtswv tau tsim, lub neej hauv ntiaj teb no yeej tsis yooj yim thiab tej lub sij hawm yuav ua rau peb txhawj dhau. Tiam sis, “Muaj [peb] xwv kom [peb] yuav muaj kev xyiv fab”!5 Qhov uas peb tsom ntsoov rau tus Cawm Seej thiab peb tej kev khi lus yeej ua rau peb muaj kev xyiv fab kav ib txhis! Lub hom phiaj ntawm lub neej no yog kom peb qhia tias peb txaus siab kam ua zoo npaum li cas. “Tej dej num tseem ceeb tshaj ntawm lub neej no, [thiab tus nqi yuav tsum them kom ua ib tug thwj tim,] yog kev kawm tus Tswv lub siab nyiam ces ua raws li ntawd.”6 Kev ua ib tug thwj tim tiag ua rau yus txais tau kev xyiv fab puv npo. Peb puas txaus siab kam them tus nqi ua ib tug thwj tim?
Txoj kev ua raws li peb tej kev khi lus tsis yog ib yam yooj yim xwb; yeej yog ib tug txheej txheem uas peb sab ntsuj plig loj hlob tuaj los ntawm kev muab siab npuab tus Tswv Yexus Khetos. Lub hom phiaj ntawm txhua txoj lus txib, lub ntsiab cai, kev khi lus, thiab txoj kab ke yog kom peb ntseeg thiab tso siab rau Khetos. Yog li ntawd peb yuav tsum mob siab kom tsom ntsoov rau Yexus Khetos tsis tu tsis tseg—tsis txhob ua tej lub sij hawm xwb los sis ua rau neeg pom sab nraud xwb. Peb yuav tsum tsis txhob phav hauj lwm los yog siv sij hawm rau peb tus kheej thaum hais txog peb txoj kev “ua tim khawv txog Vajtswv txhua lub sij hawm thiab ua tim khawv txog txhua yam thiab nyob hauv txhua qhov chaw.”7 Kev ua thwj tim yeej tsis pheej yig, vim tias qhov uas muaj tus Vaj Ntsuj Plig Dawb Huv nrog nraim yus nyob yeej muaj nqis tshaj plaws.
Muaj tseeb tiag tus Tswv tau xav txog peb lub caij nyoog thaum Nws qhia zaj lus piv txwv txog kaum tus hluas nkauj. Ntawm tsib tug uas muaj tswv yim Nws hais tias, lawv “tau cia tus Vaj Ntsuj Plig Dawb Huv ua lawv tus coj kev, thiab tsis tau raug ntxias,”8 es cov tsis muaj tswv yim lawv “cov teeb roj tas lawm.”9 Tej zaum Nifais tej lus piav zoo txog cov mej zeej uas thaum yav tas los lawv yog mej zeej ntawm lub Koom Txoos uas rau siab ntseeg: “Thiab nws yuav nplij lwm tus neeg lub siab, thiab ntxias lawv mus kom txaus siab rau sab cev nqaij daim tawv, kom lawv hais tias; Txhua yam yeej zoo nyob hauv Xi-oos.”10
Kev txaus siab rau sab cev nqaij daim tawv yeej yog kev nrhiav thiab tso siab rau tej yam ntawm lub ntiaj teb thiab tsis yog kev cia siab rau Khetos—los yog hais tias yus saib rau ntawm lub tsom iav ntawm sab cev nqaij daim tawv thiab tsis saib ntawm lub tsom iav ntawm sab ntsuj plig. Tus Vaj Ntsuj Plig Dawb Huv ua rau peb txawj pom “tej uas yeej muaj tiag, thiab … tej uas yeej yuav muaj tiag.”11 “Los ntawm tus Vaj Ntsuj Plig Dawb Huv lub hwj chim [xwb, peb] yuav paub qhov tseeb ntawm txhua yam”12 thiab yuav tsis raug ntxias. Peb tso Khetos kom nyob hauv peb plawv neej thiab cog lus tias peb yuav kam ua raws li Nws cov lus txib tsis yog vim peb dig muag tiam sis yog vim peb txawj pom kev.13
Cov hluas nkauj uas tsis muaj tswv yim nev? Vim li cas lawv tsis txaus siab nqa ib co roj ntawm sab ntsuj plig? Lawv puas tau laug sij hawm xwb? Puas yog lawv tsis nqa roj ntxiv vim tias tab kaum lawv los sis lawv xav tias lawv tsis tas ua li ntawd? Txawm yog li cas los xij, lawv raug ntxias txog Khetos lub luag hauj lwm tseem ceeb. Dab Ntxwg Nyoog twb ntxias li no txij thaum ub los thiab yog vim li no tej teeb ntawm lawv zaj lus tim khawv tuag vim lawv tsis muaj roj ntawm sab ntsuj plig ntxiv. Zaj lus piv txwv no yeej qhia txog peb lub caij nyoog niaj hnub nim no. Neeg coob ncaim tus Cawm Seej thiab lawv tej kev khi lus ntev lawm ua ntej lawv ncaim lub Koom Txoos mus.
Peb ua neej nyob hauv ib lub caij uas cov yaj saub puag thaum ub tau pom, ib hnub thaum Dab Ntxwg Nyoog “tshum noob neej lub siab, thiab txhib kom lawv npau taws tawm tsam tej uas zoo.”14 Peb feem coob nyob hauv ib lub ntiaj teb nyob online uas muaj tej yeeb yam thiab tej zaj lus uas tawm tsam peb keeb kwm saum ntuj ceeb tsheej thiab peb txoj kev ntseeg Khetos.
Lub hwj huam ntawm sab ntsuj plig uas muaj zog tshaj hauv ib tug me nyuam lub neej yog nws niam nws txiv, nws pog yawg, niam tais yawm txiv txoj kev coj yam ntxwv ncaj ncees thaum lawv coj raws nraim li lawv tej kev khi lus. Cov niam tsev txiv tsev txhob txwm qhia lawv cov me nyuam kom ntseeg tus Tswv Yexus Khetos lawv thiaj li “yuav paub cia siab rau lub hauv paus twg kom txais kev zam txim rau lawv tej kev txhaum.”15 Kev lam ua raws li peb tej kev khi lus tej lub sij hawm xwb ua rau peb sab ntsuj plig qaug zog tas. Sab ntsuj plig qhov puas tsuaj loj tshaj feem ntau nyob ntawm peb cov me nyuam thiab cov xeeb ntxwv. Cov niam tsev txiv tsev thiab cov pog yawg thiab niam tais yawm txiv, peb puas tseem kam ua tej no?
Thawj Tswj Hwm Russell M. Nelson tau ceeb toom hais tias, “Hauv tej hnub uas tseem yuav los, peb sab ntsuj plig yuav tsis txawj ciaj yog tias peb tsis muaj kev cob qhia, kev qhuab qhia, thiab kev tshoov siab zoo los ntawm tus Vaj Ntsuj Plig Dawb Huv.”16 Yeej yog ib cov lus ceeb toom meej kom peb yim peb tej teeb thiab yuav cov roj teeb ntxiv. Peb puas tseem kam coj raws li cov yaj saub hais? Nej lub teeb ntawm sab ntsuj plig muaj roj npaum li cas? Nej yuav hloov dab tsi hauv nej lub neej kom muaj tus Vaj Ntsuj Plig Dawb Huv lub hwj huam tsis tu tsis tseg?
Niaj hnub no, ib yam li hauv Yexus lub caij nyoog, yuav muaj cov neeg uas tig rov qab mus, vim lawv tsis kam lees tus nqi ntawm kev ua ib tug thwj tim. Thaum tib neeg txoj kev ntxub thiab kev cem tus Cawm Seej lub Koom Txoos thiab cov uas coj raws li Nws loj zuj zus, yog peb xav ua Nws cov thwj tim peb yuav tsum txaus siab kam ua rau peb hauv paus sab ntsuj plig khov thiab muaj zog thiab tsis txhob mloog cov neeg uas ntxub peb lus.17
Yog peb ua peb lub hauv paus sab ntsuj plig nyob kho kho saum Yexus Khetos, ces peb yuav tsis poob thiab peb tsis tas ntshai.
“Saib seb, tus Tswv kom neeg yuav tsum muaj lub siab thiab kev txaus siab ua; thiab cov uas txaus siab ua thiab mloog lus yuav noj tej uas zoo ntawm thaj av Xi-oos thaum hnub nyoog kawg no.”18
Thov kom peb yeej yuav txaus siab kam ua zoo. Los ntawm tus Tswv Yexus Khetos lub npe dawb ceev, a-mees.