Muab Kev Txhawb Nqa Ua Qub Txeeg Qub Teg
Kuv yaum nej kom tseem siv zog ua neeg tsim nyog rov qab mus cuag Leej Txiv Saum Ntuj Ceeb Tsheej thiab Yexus Khetos.
Kuv cov kwv tij thiab cov muam, kuv zoo siab tuaj nrog nej sib koom hauv lub tuam rooj sab laj no hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Peb twb hnov nej txoj kev ntseeg thiab nej txoj kev hlub txawm nej nyob qhov twg los xij. Tej lus qhia, zaj lus tim khawv, thiab cov nkauj zoo mloog twb tau tshoov peb lub siab.
Kuv yaum nej kom tseem siv zog ua neeg tsim nyog rov qab mus cuag Leej Txiv Saum Ntuj Ceeb Tsheej thiab Yexus Khetos. Txawm nej nyob qhov twg ntawm txoj kev ua raws li nej tej kev khi lus los, nej yuav raug tej kev sim siab ntawm lub neej no los sis Dab Ntxwg Nyoog tej kev tawm tsam.
Ib yam li kuv niam qhia kuv thaum kuv yws yws txog ib yam uas nyuaj heev hais tias, “Auj, Hal, lub neej no yeej nyuaj heev. Yeej ib txwm nyuaj. Lub neej no yog ib txoj kev sim siab.”
Nws txawj luag nyav hais li ntawd, vim nws paub ob qho. Txawm yog yuav nyuaj los, qhov uas yuav muaj nqis tshaj plaws yog kev rov qab mus tsev nrog nws Leej Txiv Saum Ntuj Ceeb Tsheej nyob. Thiab nws paub tias nws ua tau li ntawd yog tias nws ntseeg nws tus Cawm Seej.
Nws xav tias nws tus Cawm Seej nyob ze nws. Hauv lub caij nyoog uas nws paub tias nws yuav tuag, nws tau nrog kuv sib tham txog tus Cawm Seej thaum nws pw hauv nws lub txaj. Muaj ib lub qhov rooj rau lwm chav nyob ze nws lub txaj. Nws luag nyav thiab saib qhov rooj thaum nws tham txog qhov uas tsis ntev nws yuav pom tus Cawm Seej. Kuv tseem nco qab saib lub qhov rooj thiab xav tias chav ntawd yuav zoo li cas.
Tam sim no nws nyob hauv lub ntuj ntsuj plig. Nws twb ntsia ntsoov qhov nqi zog uas nws xav tau heev tom qab nws dhau tej kev sim siab ntawm sab cev nqaij daim tawv.
Qhov uas nws muab kev txhawb nqa ua qub txeeg qub teg rau peb los yeej zoo ib yam li zaj lus uas nyob hauv phau Maulaunais 7, thaum Maumoos txhawb nqa nws tus tub Maulaunais thiab nws cov neeg. Yog kev muab kev txhawb nqa ua qub txeeg qub teg pub rau ib co xeeb ntxwv ib yam li kuv niam tau pub rau nws tsev neeg. Maumoos tau muab kev txhawb nqa ua qub txeeg qub teg rau tag nrho cov uas rau siab ua neeg tsim nyog txais txoj sia nyob mus ib txhis, dhau los ntawm lawv tej kev sim siab hauv lub neej no.
Maumoos pib hais lus hauv thawj nqe ntawm Maulaunais 7 hais ib zaj lus tim khawv txog Yexus Khetos, txog cov tim tswv, thiab txog Khetos tus Ntsuj Plig, uas cia peb paub qhov zoo thiab qhov phem thiaj li txawj xaiv qhov yog.
Nws hais tias Yexus Khetos yog tus thawj, ib yam li txhua tus uas hais lus txhawb nqa cov uas nyuaj rau lawv nyiaj mus nce txoj kev uas mus rau lawv lub tsev saum ntuj ceeb tsheej:
“Vim raws li Khetos tej lus, cawm tsis tau ib tug neeg dim, tsuas yog tias lawv yuav ntseeg nws lub npe xwb; yog li ntawd, yog tias tej no tau tsum lawm, ces kev ntseeg los kuj tau tsum lawm thiab; thiab tib neeg ua neej nyob phem kawg nkaus, vim lawv nyob xws li twb tsis tau muaj txoj kev txhiv dim.
Tiam sis saib seb, kuv cov kwv tij uas kuv hlub es, kuv xav tias nej yeej zoo tshaj tej no, vim kuv xav tias nej yeej muaj kev ntseeg Khetos vim yog nej lub siab mos siab muag; vim tias yog nej tsis muaj kev ntseeg nws ces twb tsis tsim nyog suav nej nrog cov neeg ntawm nws lub koom txoos.”1
Maumoos tau pom tias lub siab mos siab muag yog puav pheej txog lawv txoj kev ntseeg uas muaj zog. Nws pom tias lawv tso siab rau tus Cawm Seej. Nws hais lus txhawb nqa thaum nws hais txog txoj kev ntseeg ntawd. Maumoos tau txhawb nqa lawv ntxiv thaum nws pab lawv pom tias lawv txoj kev ntseeg thiab lub siab mos siab muag yuav ua rau lawv paub tseeb lawv yuav vam meej thiab ua siab loj thaum lawv rau kev sim siab:
“Thiab ntxiv, kuv cov kwv tij uas kuv hlub es, kuv yuav hais rau nej ntsig txog kev cia siab. Yuav ua li cas nej thiaj muaj tau kev ntseeg, tsuas yog tias nej yuav tsum muaj kev cia siab xwb?
“Thiab nej yuav cia siab rau yam dab tsi? Saib seb kuv hais rau nej tias nej yuav tsum muaj kev cia siab los ntawm Khetos txoj kev theej txhoj thiab lub hwj chim ntawm nws txoj kev sawv rov los, cia siab tias yuav muab nej tsa sawv rau txoj sia nyob mus ib txhis thiab muaj li no los twb vim yog nej txoj kev ntseeg nws raws li txoj kev cog lus.
“Yog li ntawd, yog tias ib tug neeg muaj kev ntseeg nws yuav tsum muaj kev cia siab; vim tias yog tsis muaj kev ntseeg ces yeej muaj tsis tau kev cia siab.
“Thiab ntxiv, saib seb kuv hais rau nej tias nws twb muaj tsis tau kev ntseeg thiab kev cia siab, tsuas yog tias nws yuav ua siab mos siab muag thiab txo siab txo ntsws xwb.”2
Ces Maumoos txhawb nqa lawv ntxiv thaum nws ua tim khawv tias lawv tab tom yuav txais lub txiaj ntsim uas yog Khetos txoj kev hlub dawb huv yuav puv lawv lub siab. Nws hais rau lawv txog tej no ua ke xws li kev ntseeg Yexus Khetos, lub siab mos siab muag, kev txo hwj chim, tus Vaj Ntsuj Plig Dawb Huv, thiab kev cia siab tias yuav txais txoj sia nyob mus ib txhis. Nws txhawb nqa lawv li no hais tias:
“Vim twb tsis muaj ib tug uas Vajtswv pom zoo, tsuas yog cov uas muaj siab mos siab muag thiab txo siab txo ntsws xwb; thiab yog tias ib tug neeg muaj siab mos siab muag thiab txo siab txo ntsws, thiab lees los ntawm tus Vaj Ntsuj Plig Dawb Huv lub hwj chim tias Yexus yog tus Khetos, nws yuav tsum muaj kev siab hlub; vim tias yog nws tsis muaj kev siab hlub ces nws tsis muaj nuj nqis dab tsi; yog li ntawd nws yuav tsum muaj kev siab hlub.”3
Thaum xav txog yav tas los, kuv txawj pom tias lub txiaj ntsim muaj kev siab hlub—Khetos txoj kev hlub dawb paug—tau txhawb kuv niam dag zog, coj nws kev, txhawb nqa, thiab hloov kuv niam lub siab thaum nws nyiaj mus tom ntej kom txog tsev.
“Thiab kev siab hlub tiv taus ntev, thiab siab zoo, thiab tsis xav tau luag tug, thiab tsis khav txiv, tsis xav rau nws tus kheej xwb, tsis chim sai, tsis xav phem, thiab tsis nyiam kev ua phem tiam sis nyiam qhov tseeb, tiv txhua yam, ntseeg txhua yam, cia siab rau txhua yam, nyiaj txhua yam.
“Yog li ntawd, kuv cov kwv tij uas kuv hlub es, yog nej tsis muaj kev siab hlub, ces nej twb tsis muaj nuj nqis dab tsi, vim kev siab hlub yeej tsis ploj ib zaug li. Yog li ntawd, cia li muab siab npuab txoj kev siab hlub, uas yog qhov zoo tshaj plaws txhua yam, vim txhua yam yeej yuav ploj—
“Tiam sis kev siab hlub twb yog Khetos txoj kev hlub uas dawb paug, thiab yuav nyob mus ib txhis; thiab tus uas Vajtswv pom hais tias muaj txoj kev siab hlub ntawd thaum txog hnub kawg, tus ntawd yuav tau zoo.
“Yog li ntawd, kuv cov kwv tij uas kuv hlub es, cia li thov Leej Txiv kawg siab kawg ntsws, xwv kom nej yuav muaj txoj kev hlub no puv npo, uas nws tau muab rau tag nrho cov uas coj raws li nws Leej Tub, Yexus Khetos, tiag tiag; xwv kom nej yuav hloov los ua Vajtswv cov tub; xwv kom thaum nws yuav tshwm los peb yuav zoo li nws, vim peb yuav pom nws tseeb tias nws zoo li cas tiag; xwv kom peb yuav muaj txoj kev cia siab li no; xwv kom Vajtswv yuav ua rau peb hloov ua neeg huv ib yam li nws twb huv.”4
Kuv zoo siab uas muaj Maumoos tej lus txhawb nqa thiab nws tus yam ntxwv. Kuv niam qub txeeg qub teg los kuj ua rau kuv tau koob hmoov thiab. Txij Adas txog niaj hnub no, cov yaj saub tej lus qhia thiab tus yam ntxwv tau pab kuv muaj zog.
Vim kuv xav ua raws li cov uas kuv paub zoo thiab lawv tsev neeg lub siab nyiam, kuv thiaj li tau xaiv kom tsis txhob hais txog lawv tej teeb meem los yog qhia txog lawv tej txiaj ntsim zoo rau sawv daws. Tiam sis tej yam uas kuv tau pom yeej txhawb nqa kuv thiab hloov kuv lub siab kom xav ua zoo dua.
Ntshe kuv yuav qhia txog tej uas nws tsis xav cia lwm tus paub, tiam sis kuv xav hais lus me ntsis txog kuv tus poj niam txoj kev txhawb nqa. Kuv xyuam xim ua li no. Nws yog ib tug neeg uas tsis nrhiav neeg txoj kev qhuas thiab nws yeej tsis nyiam.
Wb tau sib yuav rau 60 xyoo. Yog vim li ntawd kuv thiaj li to taub lub ntsiab ntawm tej lus hauv vaj lug kub no: kev ntseeg, kev cia siab, lub siab mos siab muag, kev nyiaj mus tom ntej, tsis nrhiav yus tus kheej, xyiv fab txog qhov tseeb, tsis xav phem, thiab qhov tseem ceeb tshaj, kev muaj siab hlub.5 Kuv qhia tej yam no rau sawv daws, kom ua tim khawv tias tib neeg muaj peev xwm siv tej lub ntsiab cai txhua hnub thaum lawv kov yeej tej yam nyuaj hauv lawv lub neej.
Nej cov uas mloog kuv hais feem coob yeej paub txog cov neeg zoo li no. Nej feem coob yeej yog cov neeg zoo li no. Peb txhua tus xav tau cov uas coj yam ntxwv txhawb nqa peb thiab xav tau cov phooj ywg uas hlub.
Thaum nej nrog ib tug uas nej txhawb pab nyob; nej sawv cev rau tus Tswv. Cia li xav seb Nws yuav hais li cas los yog ua li cas. Nws yuav caw lawv kom los cuag Nws. Nws yuav txhawb nqa lawv. Nws yuav pom thiab qhuas lawv thaum lawv pib hloov tej yam uas lawv yuav tsum hloov. Thiab Nws yuav coj yam ntxwv zoo tag nrho rau lawv xyaum.
Tsis muaj leej twg txawj ua li ntawd tag nrho tam sim no, tiam sis thaum nej mloog lub rooj sab laj no, nej paub tias nej tab tom taug txoj kev no. Tus Cawm Seej paub zoo txog tej yam uas nyuaj rau nej. Nws paub tias nej muaj peev xwm muaj kev ntseeg, kev cia siab thiab kev muaj siab hlub ntxiv.
Cov lus txib thiab tej kev khi lus uas Nws muab rau nej tsis yog tej kev sim nej lub siab kom tswj hwm nej. Yeej yog tej txiaj ntsim kom pab nej txais tau tag nrho Vajtswv tej txiaj ntsim thiab pab nej rov qab tsev kom ntsib nej Leej Txiv Saum Ntuj Ceeb Tsheej thiab tus Tswv, uas hlub nej.
Yexus Khetos tau them tus nqi rau peb tej kev txhaum. Peb yuav txais tau txoj koob hmoov uas yog txoj sia nyob mus ib txhis yog tias peb yuav muaj kev ntseeg Nws txaus peb thiaj li hloov siab lees txim, los ua zoo li ib tug me nyuam yaus, dawb huv thiab npaj siab txais lub txiaj ntsim uas yog Vajtswv lub txiaj ntsim zoo tshaj plaws.
Kuv thov kom nej yuav ua raws li Nws caw nej thiab nej yuav caw lwm tus uas yog peb Leej Txiv Saum Ntuj Ceeb Tsheej cov me nyuam.
Kuv thov Vajtswv pab peb cov tub txib ntxhais txib nyob thoob plaws lub ntiaj teb. Thov kom lawv yuav txais kev tshoov siab kom txhawb nqa txhua tus neeg lawv thiaj li yuav ntseeg tias cov tub txib cov lus caw yog los ntawm Yexus Khetos rau nws cov tub qhe uas tau ris Nws lub npe.
Kuv ua tim khawv tias Nws muaj txoj sia nyob thiab nov yog Nws lub Koom Txoos. Kuv ua tim khawv txog Nws. Thawj Tswj Hwm Russell M. Nelson yog Vajtswv tus yaj saub rau tag nrho lub ntiaj teb. Kuv paub tias qhov no muaj tseeb. Los ntawm Yexus Khetos lub npe dawb ceev, amees.