Tshooj 11
Kev tshwm sim uas tus Yaj Saub Joseph Smith tau txais kom qhia nws tus tij laug Hyrum Smith, nyob hauv Harmony, Pennsylvania, lub Tsib Hlis Ntuj xyoo 1829. Joseph Smith tau txais txoj kev tshwm sim no thaum siv lub Ulees thiab Thumees los teb rau qhov uas Joseph tau thov thiab nug. Joseph Smith zaj keeb kwm qhia hais tias Joseph Smith tau txais txoj kev tshwm sim no tom qab tau muab lub Pov Thawj Hwj Aloos txum tim rov qab los.
1–6, Cov neeg ua hauj lwm hauv lub vaj txiv hmab yuav tau txais kev cawm seej; 7–14, Nrhiav laj lim tswv yim, tshaj tawm kev hloov siab lees txim, tso siab rau tus Ntsuj Plig; 15–22, Ua raws li tej lus txib, thiab kawm tus Tswv txoj lus; 23–27, Tsis txhob xyeej lub txiaj ntsim txais tau kev tshwm sim thiab lub txiaj ntsim qhia tau tej yuav muaj los yav tom ntej; 28–30, Cov uas txais yuav Khetos hloov los ua Vajtswv cov tub.
1 Ib txoj hauj lwm tseem ceeb thiab zoo kawg nkaus tab tom yuav tawm los mus rau noob neej.
2 Saib seb, kuv yog Vajtswv; cia li mloog kuv txoj lus, uas muaj sia zees nyob thiab muaj hwj chim, ntse dua li rab ntaj uas muaj ob sab hniav, yuav faib hlo tej pob qij txha thiab tej hlwb txha ua ob sab; yog li ntawd cia li mloog kuv txoj lus.
3 Saib seb, thaj teb twb daj rhuv zoo sau qoob loo lawm, yog li ntawd, yog leej twg xav mus sau cia nws cev nws rab liag sib zog mus hlais, thiab sau los thaum tseem tshuav sij hawm, kom nws yuav khaws tau txoj kev cawm seej uas kav ib txhis cia rau nws tus ntsuj plig nyob hauv Vajtswv lub nceeg vaj.
4 Muaj tseeb tiag, tus uas yuav cev nws rab liag mus sau, ces Vajtswv hu tus ntawd.
5 Yog li ntawd, yog koj thov kuv ces koj yuav tau txais; yog koj khob ces yuav qhib rau koj.
6 Nim no, vim koj tau thov, saib seb, kuv hais rau koj tias, cia li ua raws li kuv tej lus txib, thiab nrhiav kev pab coj thiab tsa lub hom phiaj ntawm Xi-oos.
7 Tsis txhob nrhiav kev nplua nuj tiam sis nrhiav laj lim tswv yim; thiab saib seb, tus Tswv yuav muab tej txuj ci uas neeg tsis paub txog Vajtswv nthuav los rau koj, thiab tom qab ntawd yuav ua kom koj nplua nuj. Saib seb, tus uas tau txoj sia nyob mus ib txhis yog tus uas nplua nuj.
8 Kuv hais tseeb tseeb rau koj tias, qhov uas koj xav tau los ntawm kuv ces tus Tswv yuav ua li ntawd rau koj; thiab, yog koj xav tau, yuav ua ntau yam zoo nyob rau tiam neeg no los ntawm koj.
9 Tsis txhob hais dab tsi li tsuas yog kev hloov siab lees txim rau tiam neeg no xwb. Ua raws li kuv tej lus txib, thiab pab ua kuv txoj hauj lwm, raws li kuv tej lus txib, ces koj yuav tau koob hmoov.
10 Saib seb, koj twb tau ib lub txiaj ntsim, los yog koj yuav tau ib lub txiaj ntsim yog hais tias koj xav tau los ntawm kuv nrog txoj kev ntseeg, nrog lub siab ncaj, ntseeg Yexus Khetos lub hwj chim, los sis ntseeg kuv lub hwj chim uas tab tom hais lus rau koj;
11 Vim, saib seb, kuv twb yog tus uas hais lus; saib seb, kuv yog qhov kaj uas ci nyob hauv qhov tsaus ntuj, thiab los ntawm kuv lub hwj chim kuv muab cov lus no los rau koj.
12 Thiab nim no, kuv hais tseeb tseeb rau koj tias, koj cia li tso siab rau tus Ntsuj Plig uas coj mus ua qhov zoo—muaj tseeb tiag, ua ncaj ncees, txo hwj chim taug kev, txiav txim ncaj ncees; thiab tus no yog kuv tus Ntsuj Plig.
13 Kuv hais tseeb tseeb rau koj tias, kuv yuav cia kuv tus Ntsuj Plig los rau koj, tus uas yuav ua kom koj lub siab to taub, tus uas yuav ua kom koj tus ntsuj plig muaj txoj kev xyiv fab puv npo;
14 Thiab thaum ntawd koj yuav paub, los sis los ntawm qhov no koj yuav paub tias, txhua tsav txhua yam uas koj xav tau los ntawm kuv, uas yog ntsig txog tej yam ntawm kev ncaj ncees, nrog txoj kev ntseeg kuv hais tias koj yeej yuav tau tej ntawd.
15 Saib seb, kuv txib koj tias koj tsis txhob rawm xav tias tus Tswv hu koj mus tshaj tawm txoj moo zoo kom txog thaum tus Tswv hu koj mus lawm tso.
16 Tos ib nyuag ntev zog tso, kom txog thaum koj tau kuv txoj lus, kuv lub pob zeb, kuv lub koom txoos, thiab kuv txoj moo zoo, xwv kom koj yuav paub tseeb txog kuv tej lus qhuab qhia.
17 Thiab tom qab ntawd, saib seb, raws li tej uas koj xav tau, muaj tseeb tiag, yuav muaj li ntawd rau koj raws li koj txoj kev ntseeg.
18 Ua raws li kuv tej lus txib; nyob twj ywm; thov kuv tus Ntsuj Plig pab;
19 Muaj tseeb tiag, muab tag nrho koj lub siab npuab kuv, kom koj tau pab coj tej uas tau hais tawm los rau neeg paub—muaj tseeb tiag, txoj kev txhais kuv phau ntawv; ua siab ntev kom txog thaum koj ua tiav tso.
20 Saib seb, qhov no yog koj txoj hauj lwm, kom ua raws li kuv tej lus txib, muaj tseeb tiag, kawg koj lub dag lub zog thiab lub siab.
21 Tsis txhob nrhiav kev mus tshaj tawm kuv txoj lus, tiam sis xub nrhiav kom tau kuv txoj lus tso, ces tom qab ntawd koj tus nplaig yuav npliag; tom qab ntawd, yog koj xav tau, ces koj yuav tau kuv tus Ntsuj Plig thiab kuv txoj lus, muaj tseeb tiag, tau Vajtswv lub hwj chim los mus yaum neeg.
22 Tiam sis nim no koj cia li nyob twj ywm; kawm kuv txoj lus uas tau mus rau noob neej lawm, thiab kawm kuv txoj lus uas tseem yuav tawm los mus rau noob neej, los yog qhov uas nim no tab tom muab txhais, muaj tseeb tiag, kom txog thaum koj tau txais tag nrho tej uas kuv yuav muab rau noob neej nyob rau tiam neeg no, ces tom qab ntawd tus Tswv yuav muab txhua yam ntxiv rau tej ntawd.
23 Saib seb koj yog Hyrum, kuv tus tub; cia li nrhiav Vajtswv lub nceeg vaj, ces tus Tswv yuav muab txhua yam ntxiv los raws li qhov uas ncaj ncees.
24 Tsa rau saum kuv lub pob zeb, uas yog kuv txoj moo zoo;
25 Tsis txhob xyeej lub txiaj ntsim txais tau kev tshwm sim, thiab lub txiaj ntsim qhia tau tej yuav muaj los yav tom ntej, vim kev txom nyem raug tus uas xyeej tej yam no;
26 Yog li ntawd, khaws cia rau hauv koj lub siab kom txog thaum kuv pom zoo rau koj mus.
27 Saib seb, kuv hais lus mus rau tag nrho cov uas muaj tej kev xav tau uas zoo, thiab tau muab lawv rab liag cev mus sau los.
28 Saib seb, kuv yog Yexus Khetos, Vajtswv Leej Tub. Kuv yog txoj sia thiab yog txoj kev kaj ntawm neeg ntiaj teb.
29 Kuv twb yog tus uas tau los rau kuv cov neeg thiab kuv cov neeg tsis txais yuav kuv.
30 Tiam sis kuv hais tseeb tseeb rau nej tias, tag nrho cov uas txais yuav kuv, kuv yuav muab hwj chim rau cov ntawd kom los ua Vajtswv cov tub, twb yog rau cov uas ntseeg kuv lub npe. Amees.