Բաժին 49
Հայտնություն՝ տրված Ջոզեֆ Սմիթ Մարգարեի միջոցով, Սիդնի Ռիգդոնին, Փարլի Պ. Պրատին և Լեման Քոփլիին, Կիրթլենդում, Օհայո, 1831թ. մարտին (History of the Church, 1.167–169): (Որոշ պատմական աղբյուրներ, որպես այս հայտնության ամսաթիվ նշում են 1831թ. մայիսը): Լեման Քոփլին ընդունել էր ավետարանը, սակայն դեռևս կառչած էր Շեյքերների [United Society of Believers in Christ’s Second Appearing (Քրիստոսի երկրորդ հայտնվելուն հավատացողների միացյալ ընկերություն)] որոշ ուսմունքներից, որին պատկանել էր նախկինում: Շեյքերների որոշ համոզմունքներից էր այն, որ Քրիստոսի երկրորդ գալուստն արդեն տեղի էր ունեցել, և որ նա հայտնվել էր մի կնոջ՝ Աննա Լիի տեսքով. ջրով մկրտությունն էական չէր համարվում. արգելվում էր հատկապես խոզի միս ուտելը, իսկ շատերն ընդհանրապես միս չէին ուտում. և ամուրի կյանքը համարվում էր ավելի բարձր, քան ամուսնականը: Որպես այս հայտնության նախաբան՝ Մարգարեն գրել է. «Այդ նյութի վերաբերյալ ավելի կատարյալ իմացություն ստանալու համար, ես հարցրեցի Տիրոջը և ստացա հետևյալը» (History of the Church, 1.167): Հայտնությունը հերքեց Շեյքերների խմբի որոշ հիմնական գաղափարներ: Վերոհիշյալ եղբայրները հայտնության մի օրինակը տարան Շեյքերների համայնք (Քլիվլենդի մոտակայքում, Օհայո) և այն ամբողջությամբ կարդացին նրանց համար, սակայն այն մերժվեց:
1–7՝ Քրիստոսի գալստյան օրը և ժամը կմնա անհայտ, մինչև նրա գալը. 8–14՝ Մարդիկ պետք է ապաշխարեն, հավատան ավետարանին և հնազանդվեն արարողություններին, որպեսզի ձեռք բերեն փրկություն. 15–16՝ Ամուսնությունը կարգված է Աստծու կողմից. 17–21՝ Միս ուտելը թույլատրվում է. 22–28՝ Նախքան Երկրորդ Գալուստը Սիոնը կծաղկի և Լամանացիները կփթթեն, ինչպես վարդը:
1 Ականջ դրեք իմ խոսքին, իմ ծառանե՛ր Սիդնի և Փարլի և Լեման. քանզի ահա, ճշմարիտ ասում եմ ձեզ, որ ես ձեզ տալիս եմ պատվիրան, որ դուք գնաք և Շեյքերներին քարոզեք իմ ավետարանը, որը դուք ստացել եք, ճիշտ ինչպես ստացել եք այն:
2 Ճշմարիտ ասում եմ ձեզ, որ նրանք փափագում եմ իմանալ ճշմարտությունը մասամբ, ոչ ամբողջովին, քանզի նրանք ճիշտ չեն իմ առաջ և անպայման պետք է ապաշխարեն:
3 Ուստի, իմ ծառանե՛ր Սիդնի և Փարլի, ես ուղարկում եմ ձեզ՝ ավետարանը նրանց քարոզելու:
4 Եվ իմ ծառա Լեմանը պիտի կարգվի այս գործին, որպեսզի տրամախոսի նրանց հետ, ոչ թե համաձայն նրա, ինչ նա ստացել է նրանցից, այլ համաձայն նրա, ինչ իրեն կուսուցանվի ձեր՝ իմ ծառաների կողմից. և այդպես վարվելով ես կօրհնեմ նրան, հակառակ դեպքում նա չի բարգավաճի:
5 Այսպես է ասում Տերը. Քանզի ես Աստված եմ, և ես աշխարհ եմ ուղարկել իմ Միածին Որդուն՝ աշխարհի փրկագնման համար, և հրամանագրել եմ, որ նա, ով ընդունում է նրան, պիտի փրկվի, իսկ նա, ով չի ընդունում նրան, պիտի նզովվի,–
6 Եվ նրանք վարվել են Մարդու Որդու հետ, ինչպես կամեցել են. և նա ստացել է իր զորությունը նրա փառքի աջ կողմում, և այժմ թագավորում է երկինքներում, և կթագավորի, մինչև որ իջնի երկիր՝ իր ոտքերի տակ դնելու բոլոր թշնամիներին, այն ժամին, որը մոտ է՝ առ ձեռն,–
7 Ես՝ Տեր Աստվածս եմ ասել դա. բայց ժամը և օրը ոչ մի մարդ չգիտի, ոչ էլ հրեշտակները երկնքում, ոչ էլ պետք է որ նրանք իմանան, մինչև նա չգա:
8 Ուստի, ես կամենում եմ, որ բոլոր մարդիկ ապաշխարեն, քանզի բոլորն էլ մեղքի տակ են, բացի նրանցից, ում պահպանել եմ ինձ համար, այն սուրբ մարդկանցից, որոնց մասին դուք չգիտեք:
9 Ուստի, ասում եմ ձեզ, որ ես ձեզ համար ուղարկել եմ իմ հավիտենական ուխտը, այսինքն՝ այն, որ կար ի սկզբանե:
10 Եվ այն, ինչ ես խոստացել եմ, այդպես էլ կատարել եմ, և երկրի ազգերը պիտի խոնարհվեն դրան. և եթե ոչ իրենցով, ապա պիտի իջեցվեն, քանզի նա, ով հիմա իրենով բարձրացած է, ուժով պիտի ցածրացվի:
11 Ուստի, ես տալիս եմ ձեզ պատվիրան, որ գնաք այս մարդկանց մեջ, և ասեք նրանց, ինչպես իմ հին առաքյալը, որի անունը Պետրոս էր.
12 Հավատացե՛ք Տեր Հիսուսի անվանը, նա, ով երկրի վրա էր և պիտի գա, որը սկիզբն է և վերջը.
13 Ապաշխարե՛ք և մկրտվե՛ք Հիսուս Քրիստոսի անունով, սուրբ պատվիրանի համաձայն, մեղքերի թողության համար.
14 Եվ, ով որ դա անի, կստանա Սուրբ Հոգու պարգևը՝ եկեղեցու երեցների ձեռնադրմամբ:
15 Եվ բացի այդ, ճշմարիտ ասում եմ ձեզ, որ նա, ով արգելում է ամուսնանալը, կարգված չէ Աստծու կողմից, քանզի ամուսնությունն Աստծու կողմից է կարգված մարդու համար:
16 Ուստի, օրինական է, որ նա ունենա մեկ կին, և նրանք երկուսով կլինեն մեկ մարմին, և այս բոլորը, որպեսզի երկիրը կատարի իր ստեղծման նպատակը.
17 Եվ որպեսզի այն լրացնի մարդկանց քանակը, աշխարհի արարումից առաջ նրանց ստեղծման համաձայն:
18 Եվ ով արգելում է ձեռնպահ մնալ մսից, ասելով, թե մարդ չպետք է այն ուտի, նա կարգված չէ Աստծուց.
19 Քանզի, ահա, դաշտի գազաններն ու երկնքի թռչունները, և այն, ինչ դուրս է գալիս երկրից, կարգված է մարդու օգտագործման համար՝ կերակրի և հագուստի համար, և որ նա կարողանա ունենալ առատորեն:
20 Սակայն տրված չէ, որ մի մարդ ունենա ավելին, քան մեկ ուրիշը, ուստի աշխարհն ընկած է մեղքի մեջ:
21 Եվ վա՜յ լինի մարդուն, որ արյուն է թափում, կամ, որ վատնում է միսը, բայց կարիքը չունի:
22 Եվ բացի այդ, ճշմարիտ ասում եմ ձեզ, որ Մարդու Որդին չի գալիս կնոջ տեսքով, ոչ էլ տղամարդու, որ ճամփորդում է երկրի վրա:
23 Ուստի, մի խաբվեք, այլ շարունակեք հաստատուն, սպասելով, որ երկինքները ցնցվեն, և երկիրը դողա ու երերա այս ու այն կողմ, ինչպես մի հարբած մարդ, և հարթավայրերը բարձրացվեն, և սարերը ցածրացվեն, և խորդուբորդ տեղերը հարթվեն,– և այդ բոլորը՝ երբ հրեշտակը կհնչեցնի իր փողը:
24 Սակայն, նախքան Տիրոջ մեծ օրվա գալը, Հակոբը պիտի ծաղկի անապատում, և Լամանացիները պիտի փթթեն, ինչպես վարդը:
25 Սիոնը պիտի ծաղկի բլուրների վրա և ցնծա սարերի վրա, և պիտի ժողովվի միասին այն վայրում, որը ես նշանակել եմ:
26 Ահա, ես ասում եմ ձեզ. Առաջ գնացեք, ինչպես ես պատվիրել եմ ձեզ. ապաշխարեք ձեր բոլոր մեղքերից. խնդրեք և դուք կստանաք. թակեք և ձեզ կբացվի:
27 Ահա, ես կգնամ ձեր առջևից և ձեր թիկնապահը կլինեմ. և ես կլինեմ ձեր մեջ, և դուք չեք շփոթվի:
28 Ահա, ես Հիսուս Քրիստոսն եմ, և ես շուտով գալիս եմ: Ճիշտ այդպես: Ամեն: