1 Kedekedeo ni tepidahn pahr kesilihsek weneu en mwehin sounkopwung kan ong aramas en Nihpai kan, Siplon alehdier pwukoahn apwalih soahng sarawi kan me kohiong Ilemen sang rehn Alma.

2 Oh e wia ohl pwung men, oh e kin weweid mwohn Kauno ni pwung; oh e kin nantihong wia me mwahu ahnsou koaros, ni eh kapwaiada kosonned en Kauno eh Koht; oh pil iangahki rie pwutako.

3 Kedekedeo Moronai pil kepinsalehdala. Oh met kaimwisekalahr pahr kesilihsek weneu en mwehin sounkopwung kan.

4 Kedekedeo nan pahr kesilihsek isuh en mwehin sounkopwung kan, mie pwihn en ohl kei, iei me tohtohki uwen ohl limekid pahpwiki, iangahki arail pwoud kan oh neirail seri kan, mweselsang nan sahpw en Saraemla kohlahng nan sahpw me mih paliepeng.

5 Kedekedeo Eikod, pwehki eh wia aramas me kin men esehla mehkot kapw, e ahpw kohwei oh wiahda lepelepen wahr ehu, ni irepen sahpw en Rahk, limwahn sahpw en Tehnla, oh kihdi nan sehd en palikapi, limwahn sahpw tehtik me kohdahla nan sahpw en paliepeng.

6 Oh kilang, tohto Mehn Nihpai kan me pidelong nan wahro oh seiloakwei iangahki kenerail mwonge tohto, oh pil tohto lih akan oh seri kan; oh re seiloakwei paliepeng. Oh met kaimwisekalahr pahr kesilihsek isuh.

7 Oh nan pahr kesilihsek waluho, ohl menet pil wiahda wahr kei. Oh tepin wahro pil pwurodo, oh aramas tohto pil iangada; oh re wahda mwonge tohto, oh pwurehng seiloakla nan sahpw en paliepeng.

8 Kedekedeo e ahpw sohla mie rongeparail. Oh se medewe me re duhla wasa loal nan sehd. Kedekedeo ehu sohpko pil seiloakwei; oh wasa me e kohla se sohte ese.

9 Kedekedeo nan pahr wet aramas tohto kohwei nan sahpw en paliepeng. Oh met kaimwisekalahr pahr kesilihsek waluh.

10 Kedekedeo nan pahr kesilihsek duwau en mwehin sounkopwung kan, Siplon pil kepinsalehdala, oh Koriandon iangehr ehu sohpo kohkohla nan sahpw en paliepeng, pwe en wahla mwongeh kan ong aramas kan me kohwei nan sahpwo.

11 Eri e konehng Siplon en kihong emen soahng sarawi kan, mwohn eh mehla, ong nein Ilemen pwutak, me pil adaniki Ilemen, me adiki eden eh pahpa.

12 Met kilang, nting kan koaros me Ilemen wie kolokol intingdi oh pekederiong aramas akan koaros nan sahpwo pwon, ihte ireh kan me Alma ndahiong irail me re sohte pahn kihla.

13 Ahpw, mepwukat pahn wie nekinek ni keneinei, oh kasakasapwilwei nan ehu ehu dih; eri, nan pahr wet, re pahn kohieng Ilemen, mwohn Siplon eh pahn mehla.

14 Kedekedeo pil nan pahret mie ekei me pil pwupwidi kan kolahr nan sahpw en Mehn Leimen kan; oh re tepidahr kamwakidada re en uhwong Mehn Nihpai kan.

15 Oh pil nan pahrohte re kohdihdo iangahki karis en sounpei ehu pwe re en uhwong aramas en Moronaia, de uhwong nein Moronaia sounpei kan, ahpw re kamakam oh pwurehng pwepwekihla nan pein sapwarail kan, oh re lokolongki ohla laud.

16 Oh met kaimwisekalahr pahr kesilihsek duwau en mwehin sounkopwung kan ong aramas en Nihpai kan.

17 Oh met kaimwisekalahr poadepen Alma, oh Ilemen nah pwutak, oh pil Siplon, me wia nah pwutak.