Pwuhk en Serom

1 Eri kilang, ngehi, Serom, ntingihdi lepin mahsen kei nin duwen kosonned en ei pahpa, Inos, pwe sen kak kolokolete kodoudoupen aht peneinei.

2 Oh pwehki pileit pwukat eh tikitik, oh pwehki soahng pwukat ahr ntingdi pwe en sewese riat akan Mehn Leimen kan, eri, e konehng me ei nting pahn mwotomwot; ahpw I sohte pahn ntingih duwen soahng kan me I kohpadahr, de pil ei kaudiahl kan. Pwe dahme I pahn kak ntingih me pahn kak laudsang dahme ei pahpa ko ntingihdier? Pwe re soh kasalehdahier duwen koasoandi en komouro? I ndahiong kumwail, Ei; oh met I itarikiher.

3 Kilang, e konehng me doadoahk laud anahne wiawi ong aramas pwukat, pwehki kekeluwak en mohngiongarail kan, salengerail kan ponlahr, oh arail madamadau kan rotala, oh irail keptakailahr; ahpw, Koht kin kupwur kalahngan kowalahpie ong irail, oh saikinte koakoairailsang nan sahpwo.

4 Oh mie aramas tohto reht me kin alehdi kaudiahl tohto, pwe kaidehn irail koaros me keptakai. Oh irail akan me sohte keptakai oh ahneki pwoson, kaminimin en Ngehn Sarawi kin ieiang irail, me kin kasalehda ni sansal ong aramas akan, nin duwen arail pwoson.

5 Oh met, kilang, sounpar riepwiki lao imwiseklahr, oh aramas en Nihpai kan kehlailla nan sahpwo. Irail nantihong kapwaiada kosonned en Moses oh rahn en sapad kasarawihong Kauno. Oh re sohte kin koasoai mwahl; de pil lahlahwe. Oh kosonned en sahpwo me kehlail mehlel.

6 Oh irail mihseli pohn sahpwo pwon, oh pil Mehn Leimen kan. Oh irail tohto sang Mehn Nihpai kan; oh irail pereniki kamaramas oh kin nim ntahn mahn akan.

7 Kedekedeo irail kin kohdohng mahwiniong kiht, Mehn Nihpai kan, pak tohto. Ahpw aht nanmwarki kan oh aht kaun akan wia aramas kehlail kei ni arail pwoson Kauno; oh irail kin padahkihong aramas akan sapwellimen Kauno koasoandi kan; eri, se kin pelianda Mehn Leimen kan oh koakoairailsang nan sapwat akan, oh tepida kakehlakahla aht kahnihmw kan, de wasahkan me se sohsohki.

8 Oh se kaparaparala mehlel, oh kohpeseng nan sahpwo, oh re kepwehpwekihla mehlel kohl, oh silper, oh soahng kesempwal kei, oh arail koahiek en doadoahngki tuhke, kauwada ihmw, oh misihn, oh pil mete oh kapa, oh pirahs oh sdihl, se kin wiahda soangsoangen dipwisou en doadoahk en deipwel, oh dipwisou en mahwin—ei, kengkeng en arep, oh doupe, oh arep en kos, oh ketieu, oh mehn kaunop en mahwin koaros.

9 Oh pwehki aht kaunopadahr pwe se en tuhwong Mehn Leimen kan, arail pelian kiht sohte pweida. Ahpw mahsen en Kauno pweidahr, me e ketin mahsanihong aht pahpa ko, me ketihtihki: Nin duwen amwail pahn kapwaiada ei kosonned akan kumwail pahn pweida nan sahpwo.

10 Kedekedeo soukohp en Kauno kapariki aramas en Nihpai kan, nin duwen mahsen en Koht, ma irail sohte pahn kolokol kosonned akan, ahpw pwupwidiong nan sapwung, irail pahn kamwomwala sang pohn sahpwo.

11 Eri, soukohp akan, oh samworo kan, oh sounpadahk kan, pwerisekiong doadoahk, panapanawih aramas akan ni kanengemah re en kin nannanti; padapadahngki kosonned en Moses, oh kahrepen eh wiawihda; kangoangehkiong irail re en kasikasik Mesaia o, oh kamehlele ih ni eh pahn ketido duwehte me e ketidohier. Oh ni mwohmw wet me re padapadahkihong irail.

12 Kedekedeo nin duwen arail wia met irail koliraildihsang kamwomwasang pohn sahpwo; pwe irail doakoahki mohngiongarail kan mahseno, katakatamankin irail en koluhla.

13 Kedekedeo sounpar riepwuki silihsek waluh daulih—mwurin mahwin kan, oh pingiping kan, oh kahngohdi kan, erein ahnsou werei.

14 Oh ngehi, Serom, sohlahr pahn nting pwe pileit pwukat me tikitik. Ahpw kilang, riei ko, kumwail kak kilang nan pileit en Nihpai teiko; pwe kilang, mie poadoapen aht mahwin kan ntingdi loale, nin duwen nting en nanmwarki kan, de soahng kan me irail mahsanih en ntingidi.

15 Oh I pahn kihong pileit pwukat nan pehn nei pwutak Omnai, pwe re en kak nekinekila nin duwen koasoandi kan me sang ei pahpah ko.