Pwuhk Sarawih kan
Inos 1


Pwuhk en Inos

Iralaud 1

Inos kapakap ni ngidingid oh alehdi mahkpen dipe kan—Kepitien Kauno kohdohng nan ah madamadau, inoukihong me ehu rahn mehn Leimen kan pahn komourla—Mehn Nihpai kan nantihong kapwurehdo mehn Leimen kan—Inos pereniki ah Soundoar. Ele Sounpar 420 Mwohn Krais.

1 Kilang, kedekedeo ngehi, Inos, sang ni ei ese me ei pahpa wia ohl pwung men—pwehki e padahkihong ie ni pein ah lokaia, oh pil duwen kaiahn mwahu oh kaweid en Kauno—oh meid pai mwaren ei Koht pwehki kahrepe wet—

2 Oh I pahn ndaiong kumwail duwen poadoar me I wia mwohn Koht, mwohn ei alehdi mahkpen dipei kan.

3 Kilang, I kolahng kesik mahn nanwelo; oh mahsen akan me I kin rong sang rehn ei pahpa me e kin koasoia duwen mour soutuk, oh peren en souleng kan, kihpehdi nan ei mohngiongi.

4 Oh palingeniet duhpeklahr; oh I kelipwikihdi mwohn silangin Sounwiepeio, oh I ahpw likweriong ni kapakap ngidingid oh kehlail pwehki palingeniet; oh rahno pwon I wie kapakapiki; ei, oh ni eh wasapwongidier I pil ngihl laudida lao ngiliet leldahla nanleng.

5 A ngihl ehu apw peido rehi, ketihtihki: Inos, dipwomw kan lapwadahr, oh meid pai kowe.

6 Oh ngehi, Inos, ese me Koht sohte kin likamw; eri, nan kapehd toutou me I ahniki apw sohrasangieier.

7 Oh I nda: Maing Kaun, ia mwomwen met kak wiawi?

8 Oh e ahpw mahsanihong ie: Pwehki ahmw pwoson Krais, me ke saikinte rong de kilang. Oh sounpar tohto mwohn eh pahn ketin kasalehda pein ih ni paliwar; eri, kohkohwei, pwe ahmw pwoson kaunsekeiukalahr.

9 Eri, mwurin ei rongehr mahsen pwukat I tepida kehn ei inengieng en sewese riei, mehn Nihpai kan; ngehi eri tepida kapakapkin irail ong Koht ni ngidingid sang loaleiet pwon.

10 Oh ni ahnsou me I wie nannanti ni palingehn, kilang, kepitien Kauno ahpw pwurehng peidohng ie nan ei madamadau, mahsanih: I pahn pwarek riomw kan nin duwen arail pahn loalopwoatohng kapwaiada ei kosonned akan. I kihong irailehr sahpw wet, oh sahpw sarawi ieu met; oh I pahn keriahla ma wiewia suwed pahn wiawi; eri, I pahn pwarek irail nin duwen dahme I kosoiahier; oh arail wiewia sapwung kan me I pahn kalokekinirail pahtou.

11 Oh ngehi, Inos, mwurin ei rongehr mahsen pwukat, ei pwoson Kauno tepida kehlaila; oh I ahpw nantihlahte ahnsou reirei wie kapakapkihong riei, mehn Leimen kan.

12 Kedekedeo mwurin ei kapakapehr oh wia uwen ei kak koaros, Kauno mahsanihong ie: Pwehki omw pwoson, I pahn kapwaiong uhk nin duwen me komw kin inengieng.

13 Oh met kilang, iet dahme I inengieng sang reh—Ma e peien wiawi, me nei aramas akan, Mehn Nihpai kan, pahn pwupwudiong nan diparail akan, oh ma irail pahn kamwomwomwla, ah Mehn Leimen kan en deh kamwomwomwla, pwe Kauno Koht en ketin nekidala poadoapoad en nei aramas akan, Mehn Nihpai kan; sang ni manaman en nin lime sarawi kan, pwe [poadoapoado] en kak kohieng Mehn Leimen kan ehu rahn, pwe re en kak alehdi mour soutuk—

14 Pwehki ahnsou wet aht nannantiheng kapwureiraildohng pwoson mehlelo sohte katepe. Oh ni arail lingeringer, re kahukihlahr, me re pahn song, re en kaweikitala oh kauwehla aht poadoapoad akan, oh pil tiahk koaros en aht pahpa kahlap ako.

15 Eri, Pwehki ei esehier me Kauno Koht pahn kak ketin nekidala aht poadoapoad akan, eri I doulahte ngidingidki ei kapakapohng ih, pwe e mahsanihongiehier: Soahng koaros me ke pahn peki ni pwoson, ni ahmw kamehlele me ke pahn alehdi ni mwaren Krais, ke ahpw pahn alehdi.

16 Oh I ahneki pwoson, oh I kapakapohng Koht pwe en kak nekidala poadoapoad akan; oh e ketin inoukihong ie me e pahn ketikiheng Mehn Leimen kan ni ahnsou me e pahn kupwurki.

17 Oh ngehi, Inos, ese me e pahn pweida nin duwen inou me e ketin wiadahr; eri loaleiet meleileidier.

18 Oh Kauno ketin mahsanihong ie: Ahmw pahpa ko pil pekiher rehi soahng wet; oh e pahn pweida nin duwen arail pwoson; pwe arail pwoson duwehte ahmw pwoson.

19 Oh met e wiawiher me ngehi, Inos, kohla rehn aramas en Nihpai kan, kohkohpada soahng kan me pahn wiawi, oh kadkadehdehki duwen soahng kan me I rongehr oh kilangehr.

20 Oh I kadehde me aramas en Nihpai kan wia uwen arail kak pwe re en kapwurehdo Mehn Leimen kan ong pwoson mehlel en Koht. Ahpw aht doadoahk kan sohte katepe; irail koasoanehdi me re pahn kailongkin kiht, oh re weweidiki arail mwekid suwed kan me kahrehda irail wiahla aramas lawalo kei, oh keper, oh mwahuki kakerehdi nta, mour en pwongih dikadik en eni oh tiahk samin; kangkang mahn lawalo kan; koukousoan nan impwal, oh kokohseli nanwel, pirehki lukoperail lepin likou me wiawikihda kilin mahn oh moangerail akan moang koikoi; oh irail semen nan doadoahngki kesik ketieu, oh naipokos kan, oh sile. Oh me tohtohn irail kin kangete uduk amas; oh re kinnannantihongeteren kemeikitala.

21 Kedekedeo aramas en Nihpai kan ahpw deipwelihada sahpwo, oh padokedi soangsoangen weren tuhke, oh wahn tuhke, oh apwaliada soangen mahn kei, oh soangsoangen pelin kou, oh kuht, oh kuht lawalo, oh pil oahs tohto.

22 Oh mie soukohp tohto reht. Oh aramas pwukat me keptakai, kin apwalki wehwehkihla.

23 Oh ihte me re wia, ngihl kehlail, padapadahk oh kokohpki duwen mahwen, oh pingiping, oh kamwomwala, oh katakatamankiongirailte duwen mehla, oh uwen werei en mour kohkohlahte, oh Sapwellimen Koht kadeik oh manaman, oh soahng pwukat koaros—kin kamwakamwakid irail ahnsou koaros pwe re en kin lemmwiki Kauno. Ihte me I kak koasoiat, oh padahk me uhdahn sansal mehlel, pwe re en dehr mwadang en kamwomwomwla. Oh ihmwomwen me I ntingihedi duwen irail.

24 Oh I kilang mahwen kan nanpwungen Mehn Nihpai kan oh Mehn Leimen kan nan ei rahn akan.

25 Kedekedeo I tepida mahlahr, oh sounpar epwiki isihsek duwau dauliher ahnsou me aht pahpa Lihai mweselsang Serusalem.

26 Oh I kilang, kereniongehr I pahn mehla, oh I alehdier pepehm sang ni manaman en Koht me I pahn anahne padahki oh kokohp ong aramas pwukat, oh kalohngki mahseno nin duwen me mehlelo me mih rehn Krais. Oh I kalohngki nan ei rahn akan, oh pereniki laudsang soahng kan en sampah.

27 Oh kereniongehr I pahn kohla wasahn ei kommoal, me iei rehn ei Soundoar; pwe I ese me I pahn kommoal reh. Oh I pahn perenda ni ahnsou me ei mour en sampah pahn uhd wekideklahng mour poatoapoat, oh I pahn uh mwowe; I ahpw pahn perenda ni ei pahn kilang silangi, oh e pahn mahsanihong ie: Kohdo rehi, kowe me meid pai, mieier wasa me kaunopdahnguhkehr nan tehnpas en Semeio. Ahmen.