1 Kedekedeo ni tepidahn pahr kelimau en arail mwehio, e tepida mie pingiping nanpwungen aramas akan; pwe ohl emen, me kahdaniki Amilisai, ih ohl widing emen, ei, ohl emen me loalokongki eripit en sampah, e kin idawehn mwekid en ohl me kemehkihla Kidion kedlahso, me kamakamala nin duwen kosonnedo—

2 Amilisai menet, sang ni eh widing e kahluwahsangehr aramas tohto me idawehnla ih; iei uwen arail tohto irail tepida kehlailla; oh irail tepida song koasoanehdi Amilisai en wiahla arail nanmwarki.

3 Met uhdahn kapwuriamwei ong aramas en nan mwomwohdiso, oh pil irail akan koaros me sohte iang idawehnla kamahntik en Amilisai; pwe re wehwehkier me nin duwen arail kosonnedo soahng wet pahn koasoandi sang ni pilipil en aramas akan.

4 Eri, ma aramas akan pahn kak pilada Amilisai, ni eh wia ohl suwed men, e pahn irehdihsang arail pwuhng kan oh pai kan en mwomwohdiso; pwe iei ih me e mwahuki en kauwehla mwomwohdiso en Koht.

5 Kedekedeo aramas akan pokonpene wasa kan nan sahpwo pwon, emen emen aramas nin duwen pein eh lamalam, ma e pahn utungada de uhwong Amilisai. Irail ahpw tohrohrpeseng nan arail pwihn kan, oh wie akakamai oh mwoaroamwoaroangpene me kapwuriamwei.

6 Oh met irail pokonpene pwe re en usuhski koasoandi wet; oh irair pwukat sansalehr mwohn sounkopwung kan.

7 Kedekedeo en aramas akan ahr pilipil uhwong Amilisai, kahrehda e sohte kak wia nanmwarki en aramas akan.

8 Met kahrehda peren laud nan mohngiong en irail akan me uhwong ih; ahpw Amilisai kamwakidada irail akan me utung ih en lingeringerda pahn irail akan me sohte utung ih.

9 Kedekedeo irail pein pokonpene, oh kasarawihla Amilisai en wiahla arail nanmwarki.

10 Ni ahnsou me Amilisai wiahla arail nanmwarki e ahpw ruwese irail en ale neirail dipwisou en mahwen oh mahweniong riarail akan; oh met e wia pwe re en kak mihla pahn eh manaman.

11 Met aramas en Amilisai kan tohrohrkilahr ahd en Amilisai, ni ahr kahdanikihla Mehn Amilisai kan; oh luhwe kan kahdaniki Mehn Nihpai kan, de aramas en Koht.

12 Eri Mehn Nihpai kan wehwehkier koasoandi en Mehn Amilisai kan, eri irail kaunopada pwe re en pelian irail; ei, irail kaunopada neirail kedlahs kan, oh neirail naipokos kan, oh kesik ketieu kan, oh arep kan, oh takai kan, oh pahi kan, oh soangen dipwisou en mahwen koaros.

13 Oh met irail kaunopadahr pwe re en pelian Mehn Amilisai kan ni ahnsou me re pahn kohdo. Oh mie kaun en sounpei kei me pilipilda, oh kaun en sounpei ile kan, oh kaun lapalap en sounpei akan, nin duwen wadepen irail.

14 Kedekedeo Amilisai pil kihong nah ohl akan en wa soangen dipwisou en mahwen koaros; oh e pil pilada kaun en kosonned akan oh kaun akan en nah aramas akan, me pahn kahluwa irail kohlahng mahweniong riarail akan.

15 Kedekedeo Mehn Amilisai kan ahpw kohdo pohn dohl en Amnaihu, me mih palimesen pillap Saidon, me pwilipwilwei ni keilen sahpw en Saraemla, wasao irail tepida mahweniong Mehn Nihpai kan.

16 Pwehki Alma e wia sounkopwung lapalap oh kepinahn aramas en Nihpai kan, eri e ahpw kohdahla iangahki nah aramas akan, ei, iangahki nah kaun en sounpei kan, oh kaun lapalap en sounpei kan, ei, kaunda oh tiengla mwohn nah sounpei kan, kohwehng peiong Mehn Amilisai kan.

17 Oh irail tepida kemehla Mehn Amilisai kan pohn dohlo ni palimesen Saidon. Oh Mehn Amilisai kan peiong Mehn Nihpai kan sang ni arail kehlail koaros, kahrehda tohtohn Mehn Nihpai kan kamakamala pahn Mehn Amilisai kan.

18 Ahpw Kauno kakehlakahla pehn Mehn Nihpai kan, kahrehda irail kemehkihla Mehn Amilisai lapalahn kamaramas ehu, kahrehda re tepida tangasang mworail.

19 Kedekedeo Mehn Nihpai kan ahpw pwakih Mehn Amilisai kan rahno pwon, oh kemehkinirailla mwomwla ehu me inenen laud, kahrehda Mehn Amilisai me mehla kan me iei aramas meh nen riekid limepwiki siliakan riemen; oh uwen Mehn Nihpai me kamakamala me iei aramas meh wenekid limepwiki wenehk riemen.

20 Kedekedeo ni ahnsou me Alma tokedihsang pwakipwakih Mehn Amilisai kan e kauhdi nah aramas akan re en wiahda arail impwal akan nan wahu en Kidion, eden wahuo kohsang ni eden Kidion me Nior kemehkihla kedlahs; oh iei nan wahu wet me Mehn Nihpai kan kauwada imwarail impwal akan pwe re en pweidi.

21 Oh Alma ahpw kadarala ekei lipahrok pwe en idawehnla luhwen Mehn Amilisai kan, pwe en kak ese arail pilahn oh koasoandi kan, pwe en kak silehdi ih sang irail, pwe en kak doarehla nah aramas akan sang kamwomwomwla.

22 Eri irail akan me e kadarewei re en mwasahn kahnihmpwal en Mehn Amilisai kan, adarail akan iei Seram, oh Amnor, oh Mandai, oh Limer; irail pwukat me kohwei iangahki iengarail ohl akan pwe re en mwasahn dewen Mehn Amilisai kan.

23 Kedekedeo mandahn rahno irail mwadangete pwurodohng nan kahnihmwpwal en Mehn Nihpai kan, pwehki ahr pwuriamwei, oh masepwehkada mehlel, ndinda:

24 Kilang, se idahwehnla Mehn Amilisai kan wasa re pweidi ie, oh se ahpw pwuriamweiki, pwe nan sahpw en Mainon, pohnangin sahpw en Saraemla, ni ahl me kohla nan sahpw en Nihpai, se kilangada karis en Mehn Leimen kan; oh kilang, Mehn Amilisai kan ehuiongirailehr;

25 Oh irail pwakipwakihpeseng riatail akan nan sahpwo; oh re tangatangasang mwohrail iangahki neirail pelinmen akan, oh arail pwoud kan, oh neirail seri kan, kohkohdohng atail kahnihmwo; oh ma kitail sohte pahn mwadang re pahn kalowehdi atail kahnihmwo, oh atail pahpa kan, oh atail pwoud kan, oh neitail seri kan pahn kamakamala.

26 Kedekedeo aramas en Nihpai kan ahpw wahda imwarail impwal akan, oh mweselsang nan wahu en Kidion kolahng nan arail kahnihmwo, me iei kahnihmw en Saraemla.

27 Oh kilang, ni arail wie kotkotehla pillap Saidon, Mehn Leimen kan oh Mehn Amilisai kan, kodohng irail ni uwen tohto me kereniong duwehte pihk en ni oaroahr kan, pwe re en kemeirailla.

28 Ahpw, sapwellimen Kauno manaman ketin kakehlakahda Mehn Nihpai kan, pwehki arail ngidingidki ahr kapakap ong ih en doarehsang pahn manaman en arail imwintihtih kan, eri Kauno ketin karonge arail pekipek kan, oh kakehleirailda, oh Mehn Leimen kan oh Mehn Amilisai kan ahpw pwupwidi mwohrail.

29 Kedekedeo Alma ahpw palapalehngada Amilisai ni ara uhpene; oh ira peipene kehlail nanpwungara.

30 Kedekedeo Alma, pwehki ih ohl en Koht emen, pwehki eh mwekidkihda sang ni pwoson laud, e ahpw kapakap patohwan: Maing Kaun, komw kupwure ie oh doarehla ei mour, pwe I en kak wia wiliepen nin limomwi pwehn doarehla oh kapitala aramas pwukat.

31 Eri met ni ahnsou me Alma patohwan mepwukat e ahpw pwurehng peiong Amilisai; e ahpw kehlaildahr, oh e kemehkihla Amilisai nah kedlahso.

32 Oh e pil peiong nanmwarki en Mehn Leimen kan; ahpw nanmwarki en Mehn Leimen kan sopohsang mwohn Alma oh kadarohng silepe sounpei kan en pelian Alma.

33 Ahpw Alma, iangahki silepe ko, peiong sapwellimen nanmwarki en Mehn Leimen kan sounsilasil ko lao e kemekemeirailla oh pwakihirailpeseng.

34 Oh e ahpw akerasang mehla ko me wonohn nan pwehl, de ni keilen pihlo, me mih palikapi en pillap Saidon, keskesehdiong paliwar en Mehn Leimen kan me kamakamala nan pihl en Saidon, pwe nah aramas akan en kak mie wasa re pahn keid ie oh peiong Mehn Leimen kan oh Mehn Amilisai kan me mi ni palikapi en pillap en Saidon.

35 Kedekedeo ni ahnsou me irail koaros kotehla pillap en Saidon Mehn Leimen ko oh Mehn Amilisai ko tepida tangdoui, mehndahte uwen arail tohto mehlel me sohte me kak wadekedi.

36 Oh irail tangasang Mehn Nihpai kan kohkohlahng nan sapwtehno me mih palikapi oh palieir, kohkohla palilahsang irepen sahpwo; oh Mehn Nihpai kan wia uwen arail kak koaros pwehn pwakipwakihirail, oh ahpw kemekemeirailla.

37 Ei, irail tuhwong Mehn Nihpai kan pali koaros, oh kamakamala oh pakasarala, lao irail mwerpeseng ni palikapi, oh ni palieir, lao re lelehr nan sapwtehno, me kahdaniki Ermoun; oh ih wasao nan sapwtehno me diren mahn lawalo oh mahn keper kan.

38 Kedekedeo irail tohto mehla nan sapwtehno pwehki arail ohla kan, oh mahn lawalo kan kangirailla oh pil menpihr lapalah kan; oh tihrail kan dierekdahr, oh re koasoakoasoakpene pohn pwehl.