1 Kedekedeo ni keisek ehu en sounpwong en nan keisek duwau en pahro, nan rahn keisek en sounpwungo karis en Mehn Leimen ko dierekda me re kohkohdohng sahpw en Amonaia.

2 A kilang, kahnimwo onohnsapahlda, oh Moronai kihdihong ni irepen kahnimwo karis en sounpei ehu, oh re koasoakehda pwehl kapilpene kahnihmwo pwe en pere irail sang nein Mehn Leimen arep kan oh takai kan, pwe kilang, re kin peiki takai oh arep.

3 Kilang, I nda me kahnimw en Amonaia onohnsapahlda. Ei, I ndaiong kumwail, me ekei wasa me onohnda sapahl; oh pwehki Mehn Leimen kan kauwelahr wasao mwoweo pwehki wiewia suwed en aramas oko, re medewe me wasou pahn mengei ong irail en pwurehng kauwehla.

4 Ahpw kilang, ia uwen ar nsensuwedla mehlel; pwe kilang, Mehn Nihpai kan koasoakehda uluhl en pwehl kapilpene wasa re mi ie, pwehki eh inenen ileile kahrehda Mehn Leimen kan sohte kak katehkiniraildi neirail takai kan oh neirail arep kan, oh re pil sohte kak kohdohng irail ihte ni ewen kehlo.

5 Eri ahnsou wet, kaun lapalap en sounpei en Mehn Leimen ko pwuriamwei mehlel, pwehki loalokong en Mehn Nihpai kan ni ar kaunopada arail wasahn rukula kan.

6 Eri kaun en Mehn Leimen ko medewe, pwehki arail pokon kalaimwun, ei, re medewe me re pahn kak wiahiong irail duwehte mwoweo; ei, oh re pil pein kaunopada neirail mehn sansar akan, oh iangahki perehpen mweremarerail kan; oh re pil likawih kilin mahn kan, ei, likou mosul kan pwe en perehla ar kilisou.

7 Oh pwehki arail onopadahr re medewe me e pahn mengei ong irail en kalowehdi riarail ko oh kaliduwihirailla, de kamaramas oh kemeirailla nin duwen nsenarail.

8 Ahpw kilang, re uhdahn pwuriamweikihla, ar kaunopadahng irail, ni wiepe me sohte kin wiawi rehn kadaudoken Lihai kan. Eri re onopadahr ong Mehn Leimen ko, pwe re en mahwen ni wiepe me Moronai padahkiong irail.

9 Kedekedeo Mehn Leimen ko, de Mehn Amelekaia ko, pwuriamweikihla mehlel wiepen ar kaunopadahng mahwen.

10 Eri met, ma nanmwarki Amelekaia ketdihdo sang nan sahpw en Nihpai, oh tiengla mwohn sapwellime karis en sounpei kan, mwein ele e pahn kak kahrehiong Mehn Leimen kan re en tapiada mahweniong Mehn Nihpai kan ni kahnimw en Amonaia; pwe kilang, e sohte katapaniki ma sapwellime aramas akan pahn kamakamala.

11 Ahpw kilang, Amelekaia sohte iang ketdihdo mahwen. Oh kilang, sapwellime kaun lapalap en sounpei kan sohte men tapiada mahweniong Mehn Nihpai kan nan kahnimw en Amonaia, pwe Moronai wekidala wiepen katanga koasoandi en Mehn Nihpai kan, met kahrehda Mehn Leimen ko nsensuwedkihla ar pweiekla sang wasao oh re sohte kak kohdohng irail.

12 Eri, re ahpw pwurala nan sapwtehno, oh kahrehda neirail sounpei ko oh karis kohlahng sahpw en Noha, ni ar medemedewe me wasao pahn keieu mwahu ong irail en mahweniong Mehn Nihpai kan.

13 Pwe re sohte ese me Moronai pil kakehlakahda, de kauwadahr kelen wasahn rukula kei, ong kahnimw koaros nan sahpwo pwon; eri, ni ngoang mehlel re karikaris kohla nan sahpw en Noha; ei, ar kaun lapalap en sounpei kan kohdo mwohrail oh re kahukihla me re uhdahn pahn kamwomwala aramas en kahnimwo.

14 Ahpw kilang, irail pwuriamweikihla, pwe kahnimw en Noha, me wia wasa luwet ehu mwoweo, ahpw met, sang ni wiepen koasoandien Moronai, e kehlaillahr, iei, kehlailsang kahnimw en Amonaia.

15 Oh met, kilang, doadoahk loalokong ehu me Moronai wia; pwe e medewe me re pahn masepwehkada ni kahnimw en Amonaia; oh pwehki kahnimw en Noha me keieu luwet nan sahpwo, eri irail pahn kohla pwe re en mahweniong; oh met iei duwen me e mwahuki en wiawi.

16 Oh kilang, Moronai idihada Lihai en wia kaun lapalap en sounpei en e kahnimwo; oh iei ih Lihai me mahweniong Mehn Leimen kan nan wahuo ni palimesen pillap Saidon.

17 Eri met kilang, ahnsou me Mehn Leimen kan diarada me Lihai me kaunda kahnimwo re pwurehng nsensuwedla, pwe re masak kowahlap Lihai; ahpw arail kaun lapalap en sounpei kan kahukilahr me re pahn mahweniong kahnihmwo; eri, re wahdo neirail karis en sounpei kan.

18 Met kilang, Mehn Leimen ko sohte kak pidelong ni arail kelen wasahn rukula kan ihte ni ewen kehlo, pwehki ilehn wasa me re koasoakehda pwehl, oh loal en warawar me re weirada kapilpene, ihte ni ewen kehlo me re kak pidelong.

19 Oh met Mehn Nihpai kan kaunopadahr en kamwomwala koaros me pahn song en douda pwe re en pidelong nan arail kehlo ni ehu wiepe, sang ni arail pahn katehkinirail takai oh kaskihkin irail neirail arep kan.

20 Eri irail onopadahr, ei, neirail pwihn en ohl kehlail kan, iangahki neirail kedlahs oh neirail pahi kan, pwe re en poakiedi koaros me pahn song en pidelong nan arail wasahn rukula kan sang ni ewen kehlo; eri met me irail kaunopadahr pwe irail en doareirailsang Mehn Leimen ko.

21 Kedekedeo nein Mehn Leimen kaun en sounpei kan ahpw wahdohng neirail karis en sounpei kan mwohn ewen kehlo, oh tepida pelian Mehn Nihpai kan, pwe re en kak pidelong nan arail wasahn rukula kan; ahpw kilang, re kin kapweiekla nan ehu ehu ansou, lao irail kamakamkihla kamakam laud ehu.

22 Met kilang re diarada me re sohte kak powehdi Mehn Nihpai kan ni ewen kehlo, re ahpw tepida song en karengehdi koasoakoasoak en pwehlo pwe re en kak wiahda ahl me neirail sounpei kan pahn pidelong, pwe re en kak pei pahrek; ahpw kilang, ni arail kin songosong en wia met re kin kamakamkihla ar kostakaidi oh arep kan me kin lel irail; oh re sohte kak audehkihda warawaro pwehlo, ahpw e audaudkihda paliweren ar mehla kan oh me ohla kan.

23 Met Mehn Nihpai kan ahneki manaman koaros pohn arail imwintihti kan; oh met Mehn Leimen kan song en kauwehla Mehn Nihpai kan lao arail kaun lapalap en sounpei kan koaros kamakamala; ei, aramas kid samwa rehn Mehn Leimen kan kamakamala; ahpw, sohte emen Mehn Nihpai ko me iang mehla.

24 Me limehk me ohla, me nein Mehn Leimen ko arep kan lel irail ni ewen kehlo, ahpw re silasilkihdi neirail mehn sansar kan, oh perehpen mwaremararail kan, oh arail lisoarop kan, kahrehda arail ohla kan mi ni nehrail kan, a palilaud en ar ohla ko me ohla laud.

25 Kedekedeo, ahnsou me Mehn Leimen kan kilangadahr me arail kaun lapalap en sounpei koaros kamakamalahr re tangdoaui pwurala nan sapwtehno. Kedekedeo irail pwurala nan sahpw en Nihpai, pwe re en kehsehkihong arail nanmwarkio, Amelekaia, me wia Mehn Nihpai men ni eh ipwidi, duwen arail sohte pweida.

26 Kedekedeo e ahpw engiengida kowahlap pahn nah aramas akan, pwehki dahme e kupwurki en wiahiong Mehn Nihpai kan sohte pweida; e sohte kaloweiraildi pahn mour en lidu.

27 Ei, e engiengda kowahlap, oh e lahlahwe Koht, oh pil Moronai, oh e kahukihla me e pahn nim ntahn Moronai; oh met pwehki Moronai kin kapwaiada sapwellimen Koht kosonned akan ni eh kin kaukaunopada silepen nah aramas akan.

28 Kedekedeo, ahpw aramas en Nihpai kan kapingkihong Kauno arail Koht, pwehki sapwellime manaman kowahlap me kin doareirailsang ar imwintihti kan.

29 Oh met kaimwiseklahr kaeisek duwaun sounpar en mwehin sounkopwung kan ong aramas en Nihpai kan.

30 Ei, oh re ahneki popohl erein ahnsowo, oh nan mwomwohdiso inenen pweida mehlel pwehki arail kin rong oh loalopwoatohng mahsen en Koht, me Ilemen, oh Siplon, oh Korianton, oh Amon oh rie ko kalohkiong irail, ei, oh irail koaros me kasarawihong nan koasoandi sarawi en Koht, papidaisla sang ni koluhla, oh re pekederala pwe re en kalohkiong aramas akan.