1 Samwa, rong mwahu dahme I pahn nda, pwe I ndahiong uhk, duwehte dahme I ndahiong Ilemen, me nin duwen ahmw pahn kapwaiada sapwellimen Koht kosonned akan ke pahn pweida nan sahpwo; oh nin duwen ahmw sohte pahn kapwaiada sapwellimen Koht kosonned akan ke pahn lekidekla sang mwohn silangi.

2 A met, samwa, I koapwoaroapwoarki me ke pahn kahrehiong ie peren mehlel, pwehki ahmw tengeteng oh loaloapwoat ong Koht; pwehki sangete ni omw pwulopwul ke kin kilenglahng Kauno omw Koht, iei I pil koapwoaroapwoarki me ke pahn uhsehlahte kapwaiada sapwellime kosonned akan; pwe meid pahi aramas me pahn dadaurete lel imwi.

3 I ndahionguhk, samwa, ke kahrehiongieier peren mehlel, pwehki ahmw loaloapwoat oh ahmw pwerisek, oh ahmw kanengamah oh ahmw nannanti nan apwal nanpwungen aramas en Soram ko.

4 Pwe I ese me ke selidi; ei, oh I ese me ke kostakaidi pwehki mahseno; oh ke wiewia mepwukat koaros ni ahmw kanengamah pwehki Kauno ketin ieianguhk; oh met ke esehier me Kauno me ketin doareiukala.

5 Eri met samwa, Siplon, I men ke en tamataman, me nin duwen ahmw pahn koapwoaroapwoariki Koht iei ke uhdahn pahn pitila sang nan ahmw songosong kan, oh ahmw kapwunod kan, oh ahmw kahpwal akan, oh ke pahn pwekpwekdahla ni imwin rahno.

6 Eri, samwa, I sohte men ke en medewe me I pein ese mepwukat, ahpw sang Ngehn en Koht me mihmi loalei me kin kasalehiong ie mepwukat; pwe ma I sohte ipwisang rehn Koht I sohte pahn kak wehwehki mepwukat.

7 Ahpw kilang, Kauno, sang ni sapwellime kalahngan lapalap, ketin kadarodo sapwellime tohnleng pwe en kalohkihongie me I pahn anahne tokedihsang wia doadoahk en kamwomwamwla sapwellime aramas akan; ei, oh I tuhwongehr emen tohnleng, oh e mahseniong ie, oh ngile rasehng ngilen nansapwe, oh e itikada nan pwehlo pwon.

8 Kedekedeo erein rahn siluh oh pwohng siluh ngeniet weirek laud oh pwunod mehlel; oh I sohte alehdi mahkpen dipei kan lao I peki rehn Kauno Sises Krais sapwellime kalahngan. Ahpw kilang, I kapakapohng oh ngeniet ahpw diar popohl.

9 A met, samwa, I padahkihong uhk met pwe ke en esehla eripit, pwe ke en kak esehsang ie me sohte ehu ahl de wiepe me aramas kak komourkihla, ihte sang rehn Krais. Kilang, iei ih me mour oh marain en sampah. Kilang, iei ih me mahsen en mehlel oh mour pwung.

10 Eri met, ni ahmw tepida padahngki mahseno iei I men ke en usehlahte wiewia padahk; oh I men ke en pwerisek oh kanahieng ni soahng koaros.

11 Kaleke ke direki pohnmwahso; ei, kaleke ke suweiki pein ahmw eripit, de ahmw kehlail.

12 Ke pahn eimah, ahpw kaidehn koasoi limeidihd; oh pil tehk me ke en kaunda ahmw ineng kan koaros, pwe ke en kak direkihla limpoak; tehk pwe ke en dehr pohnkahke.

13 Dehr kapakap duwehte Mehn Soram ko, pwe ke kilangehr me irail kin kapakap pwe aramas en kak rong oh kapinga arail eripit.

14 Ke dehr nda: Maing Koht, I kapingki aht mwahu sang riat akan; ahpw ke pahn nda: Maing Kaun, komw ketin kupwure ei souwar, oh tamataman riei kan nan sapwellimomwi kalahngan—ei, pohnese duwen omw souwar mwohn silangin Koht ahnsou koaros.

15 Eri, Kauno en ketin kupwuramwahwih ngenomw, oh ni imwin rahno en ketin kasamwoiuhkolong nan sapwellime wehi, pwe ke en mwohndi nan dewemw ni popohl. Met kohwei, samwa, oh padahngki mahseno ong aramas pwukat. Wia aramas maledek men. Samwa, ei rahnmwahu ong uhk.