1 Eri met, samwa, I men koasoia ekis duwen kopwurupwurdo me koasoiepe wiawiher; pwe kilang, ekei wekidalahr wehwehn iren pwuhksarawi kan, oh re salongalahr pwehki soahng wet. Oh I kasawih me nan ahmw madamadau ke pil pwunodki duwen met. Ahpw kilang, I pahn kawehwehiong uhk.

2 I pahn ndahionguhk, samwa, me koasoandi en kopwurupwurdohu e konehng nan sapwellimen Koht kopwungo; pwe e konehng me soahng koaros pahn kopwurupwurlahng nin duwen koasoandiparail. Kilang, met wia koasoandi me konehng oh pwung, nin duwen sapwellimen Krais manaman oh iasadao, ngehn en aramaso pahn kopwurupwurlahng paliwereo, oh paliwereo unsek pahn pwurpenehng nan dewe.

3 Oh met konehng ong nan sapwellimen Koht kopwungo me aramas pahn pakadeingkihda arail wiewia kan; oh ma arail wiewia kan mwahu nan mour wet, oh ma ineng kan en mohngiongirail kan mwahu, eri ni imwin rahno irail pahn pil kopwurupwurlahng dahme mwahuo.

4 Oh ma arail wiewia kan suwed re pahn kopwurupwurlahng me suwed. Eri, soahng koaros pahn kopwurupwurlahng nin duwen pwungipen koasoandiparail, soahng koaros kohlahng ni pwungen dewe—mour me kin mehla iasadahng mour poatoapoat, paliwar me kak mwerpeseng pahn iasadahng me sohte kak mwerpeseng—iasadahng peren poatoapoat ong sohsohki wehin Koht, de iasadahng pahtou poatoapoat ong sohsohki wehin tepil, irair ehu mi apali, a irair teio mi apali—

5 Mehmeno me pahn iasadahng peren nin duwen eh kin inangih peren, de mwahu nin duwen eh kin inangih me mwahu; oh mehteio pahn iasadahng me suwed nin duwen eh kin inangih me suwed; pwehki eh inangih wia me suwed rahno pwon iei e pil pahn alehdi pwaisen eh wiewia suwedo ahnsou me pwohngo pahn leledo.

6 Oh iei met pil duwehte apali irairo. Ma e pahn koluhkihla dipe kan, oh inangih mour pwung lao lel imwin eh rahn akan, iei e pil pahn ale pwaisen mour pwung.

7 Irail pwukat me pahn poadoandoarla rehn Kauno; ei, irail pwukat me pahn kohsang, me pahn poadoandoarasang pwohng rotorot poatoapoato; oh irail pahn kesikesihnen de pwupwidi; pwe kilang, irail me pahn pein kadeik pein irail, ma re pahn wia me mwahu de wia me suwed.

8 Eri met, sapwellimen Koht koasoandi kan sohte kin wekidekla; eri, ahlo kaunopdahr pwe mehmen me men keid loale e pahn komourla.

9 Oh met kilang, samwa, ke dehr pwurehng wiahda dihp ong Koht nin duwen iren padahk en kosonned pwukat, me sang ahnsouo lel met ke wiahkihda dihp.

10 Pwehki eh koasoia duwen kopwurupwurdo, ke dehr lemeleme me ke pahn kopwurupwurdo sang dihp kohlahng peren. Kilang, I ndahionguhk, mour suwed sohte mwahn kin elehiong peren.

11 Oh met, samwa, aramas koaros me momouriki ahnepen aramas, de I pahn nda, mour en sampah, irail mihmier nan nsensuwed mwuledek oh senselki dihp; re kin kousoan nin sampah ahpw sohte iang ahneki Koht, oh arail mour kin uhwong ieias en Koht; eri, irail mihmi nan irair en mour me kin uhwong mour peren.

12 Eri met kilang, dah, ke wiahki me lepin mahsen kopwurupwurdo wehwehki en wekidala mwomwen ahnepen mour oh wekidiong ehu soangen mour tohrohr, de kihong nan soangen mour ehu me wekisang dahme eh ahnlahr?

13 O, samwa, kaidehn ih wehwehn met; ahpw uhdahn wehwehn lepin mahsen kopwurupwurdohu iei en pwurehng kapwurehdo me suwedo ong me suwed, de mour en sampah ong mour en sampah, de mour en tepilo ong mour en tepil—mwahu ong dahme mwahu; mour pwung ong me mour pwung; pwung ong me pwung; kalahngan ong me kalahngan.

14 Eri, samwa, ke en kin mahk ong riomw kan; ehuiong mehteikan ni pwung, tenek pwung, oh wia mwahu ahnsou koaros; oh ma ke pahn wia mepwukat koaros eri ke pahn ale ketingpomw; ei, ke pahn pwurehng alehdi mahk; kadeik pwung pahn kopwurupwurieng uhk; keting mwahu pahn pwurehng kohieng uhk.

15 Pwe dahme ke pahn kihwei pahn pwurehng wiawihong uhk, oh kopwurupwurdo; eri, lepin mahsen kopwurupwurdo kin uhdahn kadeikada me dipano, oh sohte mwahn kin doarehla.