Pwuhk Sarawih kan
Alma 42


Iralaud 42

Nan mour wet iei ahnsou en songosong me mweidohng aramas en kak koluhla oh papah Koht—Pwupwudio kahrehda mehlahn paliwar oh palingehn ong aramas koaros—Koluhla me kahrehiong aramas kak komourla—Koht pein tomwkihla dipen sampah—Kupwurkalahngan pahn kohieng irail akan me pahn koluhla—Koaros me pahn luhwehdi pahn mihla pahn manaman en sapwellimen Koht pwuhng—Mie kupwurkalahngan pwehki Tomwo—Ihte irail me koluhla mehlel me pahn komourla. Ele Sounpar 74 Mwohn Krais.

1 Oh met, samwa, I kasawiadahr me miehte mehkot laud me kapwunode nan ahmw madamadau, me ke sohte kak wehwehki—me pid duwen sapwellimen Koht pwung ong kalokepen me dipan; pwe ke wie medemedewe me e sohte pwung irail akan me dipan en kilelehdiong nan mour pahtou.

2 Met kilang, samwa, I pahn kawehwehionguhk duwen met. Pwe kilang, mwurin Kauno Koht eh ketin kasarehla tepin atail pahpa oh nohno sang nan mwetuwel en Ihden, pwe ira en koadoahki pwelen sampah me ira kepikipikdahsang ie—ei, e ketikihieisang ohlo, oh e ketikihong ni palimesehn mwetuwel en Ihden, serepim, oh kedlahs kisiniei pwoat me mpwul sirangarang pali koaros, pwehn sinsile tuhkehn komouro—

3 Met, kitail kilang me ohlo duwehlahr Koht, pwehki eh ese me mwahu oh me suwed; oh pwe en dehr kihla peh, oh pil ale wahntuhkehn komouro, oh tungoale oh momour kohkohlahte, Kauno Koht ketikihong serepim oh kedlahs kisinieio, pwe en dehr tungoale wahntuhkeo—

4 Oh met kitail kilang, mie ahnsou ehu me mweimweiongehr aramas pwe re en koluhla, ei, ahnsou en songosong ehu, ahnsou en koluhla oh papah Koht.

5 Pwe kilang, ma Adam mwadangete kihla peh, oh tungoalehda wahntuhkehn komouro, e pahn momour kohkohlahte, nin duwen sapwellimen Koht mahseno, oh e sohte pahn mie ahnsou en eh koluhla; ei, oh pil sapwellimen Koht mahseno pahn sohla pweida, oh koasoandi lap en komouro sohte pahn pweida.

6 Pwe kilang, e koasoanehdier me aramas pahn mehla—eri, pwehki arail kalipilipasang tuhkehn komouro irail pahn kalipilipasang pohn sampah—oh aramas salongalahr kohkohlahte, ei, irail wiahla aramas pwupwudi kei.

7 Eri met, kitail kilangehr me sang ni koasoandi wet, tepin atail pahpa oh nohno kalipilipalahr ni paliwar oh palingehn sang mwohn silangin Kauno; oh met kitail kilangehr me pein nsenara me uhd kakaunira.

8 Met kilang, e sohte konehng me aramas pahn poadoandoarasang mehlahn paliwar wet, pwe e pahn kauwehla koasoandi lap en pereno.

9 Eri, pwehki ngehno e sohte kak mehla, oh pwupwudio kahrehda aramas koaros arail mehla ni palingehn oh pil ni paliwar, met wehwehki, irail kalipiliplasangehr mwohn silangin Kauno, oh e konehng me aramas pahn poadoandoarasang mehlahn palingehn wet.

10 Eri, pwehki arail mour eh wialahr mour en sampah, mour en ar ineng kan, oh mour en tepil, pwehki sang ni ahnepen aramas, ahnsou en songosong wet wialahr ahnsou me re pahn kaunopada; e wialahr ahnsou en kaunop ehu.

11 A met tamataman, samwa, ma sohte koasoandi en poadoandoaro, (ma kitail kihsang) ni ahnsowohte me ira mehla ngenira pahn pahtoula, pwehki ara kalipilipasangehr mwohn silangin Kauno.

12 Oh met, sohte ehu wiepe me aramas akan pahn kak poadoandoarasang mour pwupwudi wet, me aramas pein kihongehr pein ih pwehki pein eh sapeik;

13 Eri, nin duwen pwuhngo, koasoandi en poadoandoaro sohte kak wiawi, ihte ma aramas akan idawehn koasoandi en koluhla nan ahnsou en songosong wet, ei, ahnsou en kaunopada wet; pwe ma sohte koasoandi pwukat, sohte kupwurkalahngan ihte e pahn kauwehla doadoahk en pwuhngo. Eri doadoahk en pwuhngo sohte kak ohla; ma iei, Koht pahn ketin uhdihsang wia Koht.

14 Eri met kitail kilang me aramas koaros pwupwudier, oh re mihlahr pahn manaman en pwuhngo; ei, sapwellimen Koht pwuhngo, me pahn koasoanehdi irail en kalipilipasang mwohn silangi kohkohlahte.

15 Eri met, koasoandi en kupwurkalahngano sohte kak wiawi ihte ma mie tomw ehu pahn wiawi; eri pein Koht tomwkilahr dipen sampah, pwe en ketikihdo koasoandi en kalahngano, pwe en kapwaiada kosonned en pwuhngo, pwe Koht en kak wia Koht unsek, Koht pwung, oh pil Koht kalahngan.

16 Eri, koluhla sohte kak wiawihong aramas akan ihte ma mie kalokolok, me pil poatoapoat duwehte mour en ngehno, me uhwong koasoandi en pereno, me pil poatoapoat duwehte mour en ngehno.

17 Eri, ia mwomwen aramas pahn koluhla ma sohte dipe? Ia mwomwen eh pahn dihp ma sohte kosonned? Ia mwomwen eh pahn mie kosonned ma sohte kalokolok?

18 Eri, mieier koasoandi en kalokolok, oh kosonned pwung wiawihda, me kin kahrehda nan kapehd nsensuwed ong aramas.

19 Eri, ma sohte kosonned wiawihda—ma aramas men kamaramas e pahn anahne mehla—ke medewe e pahn kak masak mehla ma e kamaramas?

20 Oh pil, ma sohte kosonned wiawihda ong dihp, aramas akan sohte pahn masak wiahda dihp.

21 Oh ma sohte kosonned wiawihda, ma aramas akan wiada dihp dahme pwuhng pahn wia, de pil kupwurkalahngan, pwe re sohte pahn apwalih aramaso?

22 Ahpw mie kosonned ehu wiawihda, oh kalokolok koasoandier, oh koluhla mweimweidahr; kalahngano kin apwalih koluhla wet; ma soh, a pwuhngo kin apwalih aramaso oh kin kapwaiada kosonnedo, oh kosonnedo kin kihong kalokepe; ma soh, a doadoahk en pwuhngo pahn ohla, oh Koht pahn ketin udihsang wia Koht.

23 Ahpw Koht sohte pahn udihsang wia Koht, oh kalahngan kin apwalih me koluhlao, oh mie kalahngano pwehki tomwo; oh tomwo me kahrehda iasadahn me mehla; oh iasadahn me mehla kin kapwurehdo aramaso mwohn silangin Koht; eri irail kin kopwurupwurdo mwohn silangi, pwe re en pakadeingki arail wiewia kan, nin duwen kosonnedo oh pwuhngo.

24 Pwe kilang, pwuhngo kin doadoahngki eh manaman koaros, oh pil kalahngano kin apwalih dahme pein ah; eri, ihte me koluhla mehlel kan me pahn komourla.

25 Dah, ke medewe me mahk kak pirapa de kauwehla pwuhngo? I ndaionguhk, Soh; sohte kisin wasa ehu. Ma iei, Koht pahn ketin uhdihsang wia Koht.

26 Eri Koht kin ketikidahr sapwellime koasoandi lap oh soutuk kan, me kaunopdahr sangete ni tepin sampah. Oh met kahredahr komour oh poadoandoaralahn aramas akan, oh pil arail kamwomwala oh pahtou.

27 Eri, samwa, mehmen me pahn kohdo, en kohdo oh tungoale pihl en komour ni saledek; oh mehmen me sohte pahn kohdo, e sohte pahn idihdiong en kohdo; ahpw ni imwin rahno e pahn kopwurupwuriong ih nin duwen eh wiewia kan.

28 Ma e pahn inangih wia me suwed, oh sohte koluhla nan eh rahn akan, kilang, me suwed pahn pil wiawihong ih, nin duwen sapwellimen Koht koasoandi en kopwurupwurdohu.

29 Oh met, samwa, I men ke en dehr mweidohng mepwukat en pwurehng kapwunodeiuk, oh mweidohngete dipomw kan en kapwunodeiuk, sang ni kapwunod wet me pahn kahrehda omw aktikitikla oh koluhla.

30 Oh samwa, I men ke en dehr kahmahmki sapwellimen Koht pwuhng. Dehr rapahki ke en pitsang ire tikitik pwukat pwehki dipomw kan, sang ni omw kahmahmkihla sapwellimen Koht pwuhng; ahpw ke en kin mweidohng sapwellimen Koht pwuhng, oh sapwellime kalahngan, oh sapwellime kanangamah en kin kamwakid mohngiongomw unsek; oh mweidohng en kaatikitikihukala.

31 Oh met, samwa, Koht ketin malipeiukehr ke en kalohkihong aramas pwukat mahseno. Oh met, samwa, kohkohwei, kalohki mahseno ni mehlel oh maledek, pwe ke en kak kahrehiong aramas tohto en koluhla, pwe koasoandi lap en kalahngano en kak apwalihirailda. Oh Kohto en ketin kupwureiukala nin duwen ei koasoi kan. Amen.