1 Met kedekedeo nan keweneu en pahr en mwehi en sounkopwung kan ong aramas en Nihpai kan, sohte pingiping de mahwin nan sahpw en Saraemla;

2 Ahpw aramas akan ahneki lokolok, ei, lokolok laud pwehki riarail akan me mehla, oh pil neirail pelin sihpw oh kou kan me mehla, oh pil ohlahn arail mwetuwel en werentuhke kan, me Mehn Leimen kan tiakpeseng oh kawehla.

3 Oh uwen arail lokolok laud aramas koaros wie mwahmwahiei; oh irail kamehlele me iei kalokolok en Koht me kohdohng irail pwehki arail wiewia suwed oh arail mour suwed kan; eri irail piridahng tamataman arail pwukoah.

4 Oh irail tepida koasoanehdi mwomwohdiso unsek; ei, oh tohto me papidaisla nan pihl en Saidon oh iangala mwomwohdiso en Koht; ei, irail papidaisla sang ni pehn Alma, me kasarawihong en wia samworo lapalap nan mwomwohdiso, sang pehn eh pahpao, Alma.

5 Kedekedeo nan keisuh en pahr en mwehi en sounkopwung kan aramas meh silikid limepwiki iangala mwomwohdiso en Koht oh papidaisla. Oh met me kaimwsekala keisuh en pahr en mwehin sounkopwung kan en aramas en Nihpai kan; oh popohl mie nan erein ahnsouo pwon.

6 Kedekedeo nan kawaluh en pahr en mwehi en sounkopwung ko, aramas en nan mwomwohdiso tepida pohnmwahsohla, pwehki arail kepwehpwe kouwahlap, oh arail likou silik kan, oh arail likou kaselel kan, oh pwehki tohtohlahn neirail pelin sihpw oh kou kan, oh neirail kohl oh neirail silper, oh soahngen dipwisou kesempwal akan koaros, me re alehdi sang arail doadoahk loaloapwoat; oh nan mepwukat koaros irail tepida pohnmwahsohkihda nan masarail akan, pwe irail tepida likawih likou pweilaud kan.

7 Met me elehda kahpwal laud ong Alma, ei, oh ong aramas tohto me Alma kasarawihong re en wia sounpadahk kan, oh samworo kan, oh elder kan en nan mwomwohdiso; ei, tohto irail pahtoukihla mehlel pwehki wiewia suwed me irail kilang tepida mie rehn neirail aramas akan.

8 Pwe irail kilangehr oh pahtouki ni ahr kilang aramas en mwomwohdiso ahr tepidahr ahneki pohnmwahso nan masarail akan, oh katengehdi nan mohngiongarail kan dipwisou kan oh soahng mwahl akan en sampah, kahrehda irail tepida kauwe, emen emen nanpwungarail, oh re tepida kaloke irail akan me sohte kin kamehlele nin duwen pein nsenarail oh arail kansanamwahu.

9 Oh pwehki met, nan kewaluh en pahr en mwehi en sounkopwung kan, pingiping laud tepida mie rehn aramas en mwomwohdiso; ei, mie noahrok, oh akamai, oh mwekid en lemei, oh kailok, oh pohnmwahso, iei ahr pohnmwahso daulih ahn irail akan me sohte wia tohn mwomwohdiso en Koht.

10 Oh met kaimwsekala kewaluh en pahr en mwehi en sounkopwung kan; oh wiewia suwed en mwomwohdiso wia takai en dipekelekel ong irail akan me sohte wia tohn mwomwohdiso; oh met kahrehda mwomwohdiso tepida pweiek nan ah kekeirida.

11 Kedekedeo ni tepidahn keduwau en pahro, Alma kilangada wiewia suwed en mwomwohdiso, oh e pil kilangada karasaras en mwomwohdiso ah tepida kahluwalahng me sohpwoson kan sang nan ehu dihp kohlahng ehu, eri met pahn kahrehiongehr kamwomwomwlahn aramas akan.

12 Ei, e kilangada sapahrek en aramas akan, ekei kihrailda nan arail pohnmwahso, popohnsehse mehtei kan, sohsohpeisang me anahn akan oh me sohte arail likou kan oh me mehn mwonge kan, oh irail kan me men nimpil, oh irail me soumwahu oh lokolok kan.

13 Eri met lapalahn ah wiahda pahtou laud rehn aramas akan, ahnsou me ekei wie nannantihong karakarahk, sewesewese me anahne arail sawas akan, me rasohng kihong me semwehmwe oh me anahn akan arail dipwisou kan, kamwonge me men mwonge kan, oh kanekanengamah nan soahngen lokolok koaros, pwehki Krais, me pahn ketido nin duwen ngehn en kokohp;

14 Kasikasik rahno, kahrehda re nannantihong irail en mwakelekelsang diparail akan; oh irail audaudkihda peren laud pwehki iasadahn me melahr akan, nin duwen kupwur oh manaman oh komour en Sises Krais sang sahl en mehla kan.

15 Oh met kedekedeo Alma, pwehki ah kilangehr lokolok kan en irail akan me kin idawehn Koht ni karakarahk, oh mwekid en kailok me mih rehrail sang nah aramas teikan, oh pwehki ah kilangehr mwekid en sapairair, e ahpw tepida pahtoukihla; ahpw Ngehn en Kauno sohte uhdihsang sewese.

16 Oh e pilada ohl loalokong men me iang wia elder en mwomwohdiso, oh kihong manaman nin duwen pilipil en aramas akan, pwe en kak ahneki manaman en wiahda kosonned akan nin duwen poahsoan en kosonned akan me wiawidahr, oh pwe en kapwungki aramas akan nin duwen arail wiewia suwed oh diparail kan.

17 Eri eden ohl menet iei Nihpaia, oh e pilipilda en wiahla sounkopwung lapalap; oh e mih nan sehr en mwoalen kopwungo pwe en kapwung oh kaweid aramas akan.

18 Ahpw Alma sohte kihong ih manaman en ohpis en wia samworo lapalap ong nan mwomwohdiso, ahpw e kolokolete ohpis en samworo lapalap ong pein ih; ahpw e patohwanohng Nihpaia pwukoahn sounkopwungo.

19 Oh met e wia pwe en kak pein kohwei rehn nah aramas akan, de rehn aramas en Nihpai kan, pwe en kak kalohkihongirail mahsen en Koht, pwe en kamwakidada re en tamanda arail pwukoah, oh pwe en kak kalohngki mahsen en Koht me pahn kauhdi pohnmwahso koaros oh widing koaros oh pingiping koaros me mih rehn nah aramas akan, pwehki e kilang me sohte ehu ahl me e kak pwurehng kapwurehkiniraildo ihte sang ni kangong en kadehde mehlel ong irail.

20 Oh met ni tepidahn pahr keduwau en mwehi en sounkopwung kan ong aramas en Nihpai kan, Alma kihongehr Nihpaia sehr en sounkopwungo, oh loaloapwoationgete papah nan prihsduhd lapalap en koasoandi sarawi en Koht, ong kadehdehki mahseno, nin duwen kaudiahl oh ngehn en kokohp.