1 Kedekedeo mwurin rahn riau oh pwohng riau irail ahpw pahn ale paliwere oh kaunehdi nan sousou ehu, me irail wiahda ong wasahn nekinekidi en arail mehla.

2 Eri, met pwehki lih nanmwarki e rongehr duwen wiewiahn Amon, e ahpw pekihda oh kupwuriki en patohdo reh.

3 Kedekedeo Amon ahpw kapwaiada kupwure, oh patohla rehn lih nanmwarkio, oh kalelapak reh dahme e kupwurki me e pahn wia.

4 Oh e ahpw mahsanihong ih: Nein ei pwoud ladu kan padahkihong ie me komwi iei soukohp en Koht sarawi men, oh me komw tungoaleniki manaman en wia soahngen doadoahk kapwuriamwei kan ni mware;

5 Eri, ma ih mwomwehn met, I men komwi en patohlongala oh patohwan ei pwoud, pwe e wie wonohnehr pohn sapwellime pehto erein rahn riau oh pwohng riau; oh ekei nda me e sohte mehla, ahpw ekei nda me e mehla oh mie pwowe, oh me e pahn anahne nekinekidier nan sousouo; ahpw ong ie e sohte mie pwowe.

6 Eri, met iei me Amon inengieng, pwe e wehwehki me nanmwarki Lemonai mihmi pahn manaman en Koht; e wehwehki me kahdeng rotorot en soupwoson me e sapwellimaniki wie kohkohsang nan eh madamadau, oh maraino me kamarainiada sapwellime madmadau, me iei marain lingan en Koht, me wia marain kaselel en sapwellime kalahngan—ei, marain wet kihongehr soahngen peren wet ni palingene, ei, pwehki depwek rotorot sohrasangehr, oh marain en mour poatoapoat okada ni palingene, ei, e wehwehki me met powehdier uhdahn paliwere, oh pali ngene patopato pahn kupwur en Koht—

7 Eri, dahme lih nanmwarkio kupwuriki sang reh pil duwehte eh inengo. Eri, e pidelongala pwe en kilang nanmwarkio nin duwen lih nanmwarkio eh kupwuriki; oh e kilangehr nanmwarkio, oh e wehwehki me e sohte mehla.

8 E ahpw patohwan ong lih nanmwarkio: E sohte mehla, e seiseimwok pahn kupwur en Koht, oh lakapw e pahn pwurehng ketida; eri dehr sarepedi.

9 Oh Amon patohwan kalelapak reh: Komw kamehlele met? Oh e sapeng ih: Sohte ei kadehde ihte omw koasoi, oh en nait ladu kan koasoi; ahpw mendahte I kamehlele me e pahn wiawi nin duwen dahme komw mahsanih.

10 Oh Amon patohwanohng: Komw meid pai pwehki omw pwoson kowahlap; I patohwanohng komwi, Maing, sohte soangen pwoson laud wet rehn Mehn Nihpai kan koaros.

11 Kedekedeo e ahpw tepda wie mwasamwasahnte eh pwoudo mpen eh pehto, sangete ahnsouo lao mandahn rahno awiawihete e pahn ketida nin duwen me Amon patohwan.

12 Kedekedeo e ahpw ketida, nin duwen mahsen en Amon; oh ni e ketida, e kapahwei lime ong liho, oh mahsanih: Meid pai mwaren Koht, oh meid pai komwi.

13 Pwe ni ei ese me ke wie momour, kilang, I kilangehr ei Soundoar; oh e pahn ketido, oh lih emen pahn kaipwihdi, oh e pahn kamourala aramas koaros me kamehlele mware. Eri, mwurin eh mahsaniher mahsen pwukat, nan kupwure direkihla peren oh ih pwurehng pwupwidi; oh lih nanmwarkio pil iang pwupwidi, pwehki eh direkihla Ngehno.

14 Eri ni ahnsou me Amon kilangehr Ngehn en Kauno kapwilewei nin duwen eh kapakapiki rie Mehn Leimen kan, me kin kahrehda Mehn Nihpai kan arail kin wie lokolok, de sapwellimen Koht aramas akan pwehki arail wiewia suwed kan oh arail tiahk kan, e ahpw kelipwikihdi, oh tepida kapakap ni palingene unsek oh kapikapingkalahngankihong Koht dahme e ketin wiahiongehr rie kan; oh e pil iang lupungumaskihla peren; oh irail meh silimeno pwupwidier nan pwehl.

15 Eri, ni ahnsou me ladu kan en nanmwarkio kilangehr me irail pwupwidier, irail pil iang tepida kapakap ong Koht, pwe kelemw en Kauno pil kohdohng irailehr, pwe irail me kesihnen mwohn nanmwarkio oh kadehdehiong ih duwen manaman kapwuriamwei en Amon.

16 Kedekedeo irail ahpw eker mwaren Kauno, ni uwen arail kak koaros, lao irail koaros pil pwupwidi nan pwehlo, ihte lih en Leimen men me soh, me adaniki Eipis, me weliakapwalahr ong Kauno erein sounpar kei, sang ni ouraman sansal kapwuriamweio me eh pahpao kilangadao—

17 Eri, pwehki eh weliakapwalahr ong Kauno, oh kin ekiekihte, eri, ni ahnsou me e kilangada ladu kan en Lemonai pwupwidiong nan pwehlo, oh nah lih laduh kan, lih nanmwarkio, oh nanmwarkio, oh Amon, arail wulpesengehr nan pwehlo, e esehier me manaman en Koht met; oh e medewehda me ih eh ahnsou mwahu met, ni eh pahn kasalehiong aramas akan dahme wiawihong irailo, oh ma re pahn kilang dahme wiawio e pahn kak kahrehiong irail en kamehlele manaman en Koht, eri e ahpw tangala ni ehu ehu ihmw akan, pakapakairkihong aramas koaros.

18 Oh irail tepida pokonpene ni tehnpas en nanmwarkio. Oh pokon ehu ahpw kohdo, oh re ahpw pwuriamweikihla, re kilangada nanmwarkio, oh lih nanmwarkio, oh neira ladu kan wulpesengehr nan pwehlo, oh irail koaros wonohn likamwete re mehla; oh irail pil kilangada Amon, oh kilang, Mehn Nihpai men ih.

19 Ahnsou wet aramas akan tepida kaulimki nanpwungarail; ekei ndinda me lapalahn suwed ehu me kohdohng pohrail, de pohn nanmwarkio oh tehnpese, pwehki eh mweidohng Mehn Nihpai en mihmihte nan sahpwet.

20 Ahpw ekei lupwoare irail, ndinda: Nanmwarkio wahdo kahpwal suwed wet nan tehnpese, pwehki e kemehla sapwellime ladu kan me kin mweidohng neirail pelin mahn akan en kamweremwerpeseng ni pihl en Sihpus.

21 Oh irail ohl akan me mih ni pihl en Sihpus oh pwakihpeseng sapwellimen nanmwarkio pelin mahn akan lupwoare irail, pwe irail lingeringer pahn Amon pwehki uwen tohtohn riarail kan me e kemehla ni pihl en Sihpus, ni ahnsou me e doarehla sapwellimen nanmwarkio pelin mahn kan.

22 Eri met, emen irail, me rie pwutak me Amon kemehkihla nah kedlahso, pwehki e lingeringer kowahlap pahn Amon, e usada nah kedlahs oh kohlahn kemehla Amon; oh ni ahnsou me e kawada nah kedlahso pwe en pele ih, kilang e pwupwidihte mehla.

23 Eri, met kitail kilang me sohte me kak kemehla Amon, pwe Kauno mahsanihongehr Mosaia, eh pahpao: I pahn silehdi, oh e pahn wiawihong ih nin duwen omw pwoson—eri, Mosaia koapwoaroapwoariki Kauno.

24 Kedekedeo ahnsou me pokono kilangehr ohlo me kihda nah kedlahs pwe en kemehla Amon, e pwupwidier mehla, irail koaros pa masepwehkada, oh re sohte men kihla pehrail oh doahke ih de emen irail akan me pwupwidi; oh irail tepida pwuriamwei nanpwungarail dahme kahrehda soahngen manaman wet, de ia wehwehn mepwukat koaros.

25 Kedekedeo aramas tohto nanpwungarail nda me Amon iei Enihlap, oh ekei nda me Enihlap me ketin kadarodo;

26 Ahpw ekei lupwoare irail koaros, ndinda me ih eni kamasepwek men, me Mehn Nihpai kan kadarodohng irail pwe en kaloke irail.

27 Oh mie ekei nda me Amon pekederdo sang Enihlap pwe en kaloke irail pwehki arail wiewia suwed kan; oh me Enihlap me kin kalapw ieiang Mehn Nihpai kan, me kin kalapw doare irail sang pahn arail manaman; oh irail nda me ih Enihlapo me kamwomwala tohtohn riarail Mehn Leimen kan.

28 Eri met, mwoaroango tepidahr kehlaila nanpwungarail. Oh ni ahnsou me re wie mwoaroamwoaroang, lih liduo me kahrehda pokono arail pokonpene, oh ahnsou me e kilangada arail wie mwoaroamwoaroang nanpwungarail e inenen pahtoukihla kowahlap, oh pilen mese keredi.

29 Kedekedeo e ahpw patohla oh ale pehn lih nanmwarkio, pwe en kak kapwourda sang nan pwehlo; oh ni ansouohte me e doahke peh e pwourda oh kesihnenda, oh nda ni ngihl laud, ketihtihki: Meid pai Sises, me doarehiesang nan ehl wasa sakanakan! Meid pai Koht, komw ketin kupwure aramas pwukat!

30 Oh ni ahnsou me e mahsanih mepwukat, e ahpw ketikipene limeh kan teng, pwehki eh direkihla peren, e ahpw mahsanih mahsen tohto me sohte emen kak wehwehki; Oh ahnsou me e kaimwisekala sapwellime mahsen, e ahpw doahke limen nahnmwarkio, oh kilang e ketin pwourda oh ninlengida.

31 Eri, e mwadangete, kilangada aramas ako arail wie mwoaroamwoaroang, e ahpw ketila oh tepida angiangih irail, oh ketin padahkihong irail mahsen akan me e rongehr sang Amon; oh koaros me men rong sapwellime mahsen akan kamehlele, oh weliakapwala ong Kauno.

32 Ahpw irail tohto me sohte men rong sapwellime mahsen akan; irail eri kokohsang wasao.

33 Kedekedeo ahnsou me Amon pwourda e pil iang padahkih irail, oh pil sapwellimen Lemonai ladu kan koaros; oh irail koaros kalohkihong aramas akan soahng ehute—oh mohngiongirail kan wekidekla; kahrehda irail sohlahr inengieng wia me suwed.

34 Oh kilang, tohto irail kalohngkihong aramas akan me irail kilang tohnleng kei oh re koasoi ong irail; oh irail padahkihong irail soahng kan duwen Koht, oh sapwellime ieias pwung kan.

35 Kedekedeo aramas tohto kamehlelehda arail mahsen akan; oh koaros me kamehlelehda papidaisla, oh irail wiahla aramas mour pwung, oh irail koasoanehdi ehu mwomwohdiso rehrail.

36 Eri sapwellimen Kauno doadoahk tepdahr rehn Mehn Leimen kan; met Kauno ketin tepier kamwerehdi sapwellime Ngehno pohrail; oh kitail kilang me e kin ketin kapahla lime kan rehn aramas akan koaros me pahn koluhla oh kamehlele mwareo.