1 Kedekedeo e ahpw pwurehng ntinglahng kepinahn sahpwo, me iei Paoran, oh iet koasoi kan me e ntingihedi, ketihtihki: Kilang, I ntingihada kisin likou kiset ong Paoran, me ketiket nan kahnihmw en Saraemla, me wia sounkopwung lapalap oh kepinahn sahpwet pwon, oh pil irail koaros me aramas pwukat piladahr pwe re en apwalih oh katanga doadoahk en mahwin wet.

2 Pwe kilang, mie mehkot me I men ndaiong irail me pid kadeik; pwe kilang, kumwail wehwehkier me kumwail pilipilda pwe kumwail en kapokonepene ohl akan, oh kihong irail neirail kedlahs kan, naipokos kan, oh soangsoangen dipwisou en mahwin koaros, oh kadariraildohng Mehn Leimen ko pwe en peiong, wasa koaros me re pahn pwarada nan sapwetailet.

3 Oh met kilang, I ndaiong kumwail me pein ngehi, oh pil nei ohl akan, oh pil Ilemen oh pil nah ohl akan, lokolongkier lokolok laud kowahlap; iei, se men mwenge, se men nimpil, oh sohla angi, oh se lokolongki soangen lokolok kan koaros.

4 Ahpw kilang, ma ihte met me se wie lokolongki se sohte pahn kaulimki de akupwungki.

5 Ahpw kilang, aramas tohto kamakamala nanpwungen neitail aramas akan; ei, kid kei kamakamkihla kedlahs, ahpw mweinele met sohte pahn wiawi ma kumwail kadarodo ekei sounpei me pahn itar ong at karis en sounpei kan oh me kak sewese irail. Ei, lapalahn amwail soukautihong kiht.

6 Oh met kilang, se men ese ia kahrepen soukauti kowahlap wet; ei, se men ese ia kahrepen amwail ahneki lamalam soukauti wet.

7 Kumwail kak medemedewe mwomwohd mwahl nan deumwail kan, ni amwail imwintihti kan ar kemekemehla aramas akan? Ei, ni ar kemekemehla kid en riomwail akan—

8 Iei, irail akan me koapworopworiki me kumwail pahn sinsileirail, ei, re kihong kumwail amwail pwukoa pwe kumwail en kak sewese irail, ei, kumwail en kak kadarodohng irail soupei kan, pwe en kakehleirailda, oh doarehla kidalap en irail me mehkilahr kedlahs.

9 Ahpw kilang, kaidehn ihte met—kumwail sohla kadaralahng irail kanarail kisin mwenge, kahrehda me tohto mahmahwenier oh mehkila kakerehdien nta pwehki ar nsenohki mehlel kamwahupen aramas pwukat; ei, oh re wiahier met ni ahnsou me re pahn nektehn mehkihla ar duhpek, pwehki amwail soukauti kowahlap ong irail.

10 Oh met, riei ohl kesempwal akan—pwe kumwail uhdahn kesempwal; ei, oh e konehng kumwail en kin kamwakidada nan kapehdimwail ong ni kamwahupen aramas pwukat oh ar saledek; ahpw kilang, kumwail soukauti mehlel kahrehda amwail pahn pakadeingkihda ntahn aramas kid kei; ei, pwe Koht ketin mwahngi arail sengiseng koaros, oh arail lokolok kan koaros—

11 Kilang, kumwail medemedewe me kumwail kak mwomwohdte nan deumwail kan, oh pwehki kalahngan en Koht a kumwail pahn sohte anahne wia mehkot oh e pahn doareikumwailla? Kilang, ma kumwail ahneki soangen madamadau wet e wia madamadau mwahl.

12 Kumwail medemedewe me, pwehki uwen tohtohn riamwail kan ar kamakamalahr eh wiawi pwehki ar wiewia suwed kan? I ndaiong kumwail, ma kumwail ahneki soangen madamadau wet e wia madamdau mwahl; pwe I ndaiong kumwail, tohto me mehkihla kedlahs; oh kilang met kumwail ahpw pahn pakadeingkihda;

13 Pwe Kauno kin mweidala me mour pwung kan en kamakamala pwe sapwellime pwuhng oh kadeik en kak wiawihong me suwed kan; eri kumwail dehr medemedewe me aramas pwung kan salongala pwehki ar kamakamala; ahpw kilang, re pidelong oh kommoal rehn Kauno arail Koht.

14 Oh met kilang, I ndaiong kumwail, I salohki mehlel pwehki kadeik en Koht pahn lelohng aramas pwukat, pwehki arail pohnkahke mehlel, iei, pohnkahkehn arail koapworment, oh arail sohte mwahn nsenohki riarail kan, ei, irail akan me kamakamalahr.

15 Pwehki ma sohte wiewia suwed me tepidahsang rehn atail kaun kan, kitail kak powehdi atail imwintihti kan pwe re en dehr ahneki manaman pohtail.

16 Ei, ma mahweno me tepida nanpwungatail sohte wiawi; ei, ma irail akan me kin uhpalihki nanmwarki, me kahrehda lapalahn kamaramas nanpwungatail sohte pweida; ei, ni ahnsou me pingiping wiewiawi nanpwungatail, ma kitail ehukipene atail kehl koaros duwen me kitail kin wia mwoweo; ei, ma aramas akan me kin uhpalihki nanmwariki sohte men ahneki manaman oh pwuhng en kaunkitailda; ma re mehlel ong doadoahk en mour saledek, oh iang kitail ehupene, oh uhwong atail imwintihti kan, oh sohte peliankin kitail neirail kedlahs kan, me kahrehda lapalahn kamaramas nanpwungatail; ei, ma kitail peliankinirail roson en Kauno, kitail pahn pwakihpesengehr atail imwintihti kan, pwe e pahn pweida, pwe en kapwaiada sapwellime mahseno.

17 Ahpw kilang, met Mehn Leimen ko kohkohdong kitail, kikihsang sapwatail kan, oh kemekemehkihla neitail aramas akan kedlahs, ei, neitail lih kan oh seri kan, oh pil salihraildi oh wairailsang, kahrehda ar lokolongki soangen kalokolok koaros, oh met pwehki wiewia suwed laud en irail akan me kin nannantihong re en ahneki manaman oh pwung en kaunda wasa, mehlel, aramas me kin uhpalihki nanmwariki.

18 Ahpw ia kahrepen I pahn nohn koasoia duwen met? Pwe se sohte wehwehki ma pein kumwail pil wie nannantihong en ahneki manaman. Se sohte wehwehki ma kumwail soh pil pangalahr amwail wehi.

19 De kumwail sohte nsenohkin kiht pwehki amwail mi nanwerengen atail wehi oh kumwail silasildi mwahu, kahrehda kumwail sohte kadarodo kisin mwenge reht, oh pil ohl ekei pwe re en kakehlakahda neitail sounpei kan?

20 Kumwail manokelahr kosonned akan en Kauno amwail Koht? Ei, kumwail manokehla kalidu en amwail pahpa kahlap ako? Kumwail manokehla pak tohto me kitail poadoandoarasang atail imwintihti kan?

21 De kumwail medemedewe me Kaun pahn pwurehng doareikitailla, ni atail pahn mwomwohd pohn deutail kan oh sohte doadoahngki soahng kan me Kauno ketikihong kitail?

22 Ei, kumwail pahn mwomwohd sohte wia mehkot nindokon aramas kid kei, ei, oh aramas nen kei kapilukpene me pil iang mwomwohd sohte wia mehkot, ah kidalap en irail kan me mihmi ni irepen sahpwet ar kamakamkihla kedlahs, ei, re soahn oh ntahrail kerekeredi?

23 Kumwail medemedewe me Koht pahn ketin wiahkinkumwail aramas sohte dipe ni amwail mwomwohd oh kilikilang mepwukat? Kilang I ndaiong kumwail, Soh. Met I men kumwail en tamataman me Koht ketin mahsanih me masloale pahn anahne kamwakel mahs, a mwuri masliki ahpw pahn pil kamwakel.

24 Oh met, ma kumwail sohte pahn koluhkihla soahng kan me kumwail wiadahr, oh kesihnenda oh tepida mwekid, oh kadarodohng kiht kanat kisin mwenge oh ohl ekei, oh pil kadaralahng Ilemen, pwe en kak apwalih wasa pwuko me wia kisehn atail wehi me e pwurehng kalowehdi, oh pwe kitail en kak pwurehng kapwurehdo luhwen sapwatail kan wasa pwukat, kilang e pahn konehng kitail en tokedihsang atail peiong mehn Leimen ko lao kitail kamwakelehda mahs loaletail, iei, tapwin atail koapworment.

25 Oh ma kumwail sohte pahn kapwaiada pekipek en nei kisin likou kiset, oh kohdo oh kasalehda mehlel mwomwen aramas me uhki mour saledek, oh nantihong kakehlaka oh sewesehda neitail sounpei kan, oh kihong irail kanarail kisin mwenge pwe en utung irail, kilang I pahn pwilikihdi ekei nei ohl pwukat me kin uhki saledek re en apwalih sahpwet, oh I pahn pwilikihdiong irail sapwellimen Koht roson oh kapai, pwe sohte ehu soangen manaman en kak poweiraildi—

26 Oh met pwehki arail pwoson kehlail, oh arail kanengamahiong arail kahpwal kan—

27 Oh I pahn kohwei rehmwail, oh ma mie nanpwungamwail me inangihmour saledek, ei, ma pil miehte ekiste ineng en mour saledek, kilang I pahn tapihada moromor kei nanpwungamwail, iei lao irail akan me men ahneki manaman oh pwung en kaunda wasa re ahpw sohrala douluhl.

28 Ei, kilang I sohte masak amwail manaman de pil amwail pwung en kaunda wasa, ahpw ei Koht me I lemwiki; oh sang nin duwen sapwellime kosonned kan me I alehki nei kedlahs pwe I en doarehla pwung en ei wehi, oh pwehki amwail wiewia suwed kan me kahrehda kitail lokolongki laud.

29 Kilang e lelehr ahnsou, ei, ahnsowo leledohr, ma kumwail sohte pahn pangenkinkumwailda en doarehla amwail wehi oh noumwail seri kan, kedlahs en pwuhng pahn kohieng kumwail; ei, oh e pahn lelohng kumwail lao kumwail pahn kamwomwomwla douluhl.

30 Kilang, I awiawih sawas sang rehmwail; oh, ma kumwail sohte pahn apwalih at anahn, kilang, I pahn kohwei rehmwail, iei nan sahpw en Saraemla, oh pelehkin kumwail kedlahs, lao kumwail solahr pahn ahneki manaman en kerempwahla kekeirdahn aramas pwukat nan doadoahk en arail mour saledek.

31 Pwe kilang, Kauno sohte pahn mweidohng kumwail en momour oh kehkehlailla nan amwail wiewia suwed kan pwe en kauwehla sapwellime aramas mour pwung kan.

32 Kilang, kumwail kin medemedewe me Kauno pahn ketin mahkohng kumwail oh kadeikada Mehn Leimen ko, ni ar kailok eh pwilisang tiahk en arail pahpa kahlap ako, ei, oh irail akan me kahngohdiong kitail me kalaudehla, ahpw amwail wiewia suwed kan e kohsang ni amwail kesempwalki kaping oh soahng kan me sohte katepe en sampah?

33 Kumwail wehwehki me kumwail kauwelahr kosonned akan en Koht, oh kumwail pil wehwehki me kumwail tiakedier kosonned akan. Kilang, Kauno ketin mahsanihong ie: Ma irail akan me kumwail piladahr pwe re en wia amwail kepina kan sohte pahn koluhkihla diparail kan oh arail wiewia suwed kan, kumwail pahn mahweniong irail.

34 Oh met kilang, ngehi, Moronai, itoitehng [mwekid], nin duwen inou me I wiadahr pwe I en kapwaiada sapwellimen Koht kosonned akan; eri I men kumwail en idawehn mahsen en Koht, oh mwadangete kadarodohng ie amwail sawas en mwenge kan oh noumwail ohl akan, oh pil kadaralahng Ilemen.

35 Oh kilang, ma kumwail sohte pahn wia met I pahn mwadangete kohwei rehmwail; pwe kilang, Koht sohte pahn ketin mweidohng se en mehkihla at duhpek; eri e pahn ketikihong kiht kanamwail mwenge ko, mehnda ma ma se anahne idingkin kumwail nait kedlahs. Eri kumwail kanahieng kapwaiada mahsen en Koht.

36 Kilang, ngehi Moronai, noumwail kaun lapalap en sounpei. I sohte pein rapahki manaman, ahpw I songen waikedi. I sohte rapahki wauwi me pwilisang sampah, ahpw I rapahki kalinganpen ei Koht, oh saledek oh onepek mwahu en ei wehi. Oh met I kaimwisekalahr nei kisin likou wet.