1 Oh met kedekedeo ni tepin pahr kerieisek limau en mwehin sounkopwung kan en aramas en Nihpai kan, a re koasoanehdier popohl nanpwungen aramas en Lihai oh aramas en Moriandon duwen sapwarail kan, oh kerieisek pahieu en sounpar tepier ni popohl;

2 Ahpw, re sohte ahneki popohl werei nan sahpwo, pwe aramas akan tepida akamaiki duwen sounkopwung lapalap Paoran; pwe kilang, ekei aramas oko mwahuki re en wekidala ire kei nan kosonnedo.

3 Ahpw kilang, Paoran sohte men wekidala kosonnedo de mweidohng en wekidekla; eri, e sohte rong irail akan me kapidelong arail pekipek kan duwen wekideklahn kosonnedo.

4 Eri, irail akan me mwahuki kosonnedo en wekidekla lingeringerda pah, oh re mwahuki me e solahr pahn wia sounkopwung lapalap en sahpwo; eri pwehki ire wet nanpwungsuwed ehu pwarada, ahpw re sohte kakerehdi nta.

5 Kedekedeo irail akan me mwahuki Paoran en kesepwildihsang nan pwukoahn sounkopwungo, irail kin adaniki aramas me kin uhpalihki nanmwarki, pwe irail mwahuki kosonnedo en wekidekla pwe en kauwehla koapworment saledeko oh koasoanehdi nanmwarki en kaunda sahpwo.

6 Oh irail kan me pwungki Paoran en wiwiahte sounkopwung lapalap en nan sahpwo adanikihla aramas me kin uhpalihki saledek; oh irail eri liaktohrohrpeseng nanpwungarail, pwe aramas me kin uhpalihki saledek kan kahukihla oh inoukidahr me re pahn kolokolete arail pwuhng kan oh pai kan en arail pelien lamalam sang ni koapworment saledek.

7 Kedekedeo irair en arail pingiping wet ahpw kameleileidi sang ni en aramas akan ahr usuhs. Kedekedeo palimoron en aramas akan pwungki aramas me kin uhpalihki saledek, oh Paoran mihmihte nan pwukoahn sounkopwungo, me kahrehda peren laud rehn kempoakepahn Paoran kan oh pil rehn aramas tohto me utung mour saledek, me pil katokehdi aramas akan me kin uhpalihki nanmwarki, kahrehda re sohte uhwong ahpw idihdiong re en ideidawehnte doadoahk en mour saledek.

8 Met irail akan me pwungki en mie nanmwarki kan, irail wia seri en sohpeidi kei, oh re kin nantihong pwe re en kak wiahla nanmwarki kei; oh irail kin alehdi sawas sang rehn aramas akan me kin nannantihong irail en kak ahneki manaman oh mweimwei en kaunda aramas akan.

9 Ahpw kilang, ahnsou wet e wia ansou apwal ong soangen pingiping pwukat en wiawi nanpwungen aramas en Nihpai kan; pwe kilang, Amelekaia pwurehng kamwakidada nan kapehd en Mehn Leimen ko pwehn uhwong Mehn Nihpai kan, oh e kapokonepene sounpei kan sang wasa koaros nan sapwarail kan, oh kihkihong irail dipwisou en mahwen, oh re ngoangki kaunopadahng mahwen; pwe e kahukilahr me e pahn nim ntahn Moronai.

10 Ahpw kilang, kitail pahn kasawiada me eh inouo me e wiahda sohte katepe; ahpw, e kaunopada pein ih oh nah sounpei kan pwe re en kohdo mahweniong Mehn Nihpai kan.

11 Met nah sounpei kan sohla nohn dir duwehte rahnteio, pwehki kid kei me kamakamala rehn Mehn Nihpai kan; ahpw mehndahte ahr malaulaula, Amelekaia kapokonepene lapalahn karis en sounpei ehu, kahrehda e sohte masak kohdihla nan sahpw en Saraemla.

12 Iei, Amelekaia pein iang kohdihla, tieng mwohn Mehn Leimen ko. Oh met iei nan kerieisek limaun sounpar en mwehin sounkopwung kan; oh iei ahnsouo me re tepida kameleileidi pingiping kan me pid duwen sounkopwung lapalap, Paoran.

13 Kedekedeo ahnsou me aramas akan me kin adaniki aramas me kin uhpalihki nanmwarki rongada me Mehn Leimen ko kohkohdihdohng mahwen ong irail, re peren nan kapehdirail kan; oh re kahng alehda dipwisou en mahwen kan, pwehki ahr inenen lingeringer pahn sounkopwung lapalapo, oh pil aramas me utung mour saledek, kahrehda re sohte men alehda dipwisou en mahwen pwe re en doarehla arail wehi.

14 Kedekedeo ahnsou me Moronai kasawiada met, oh pil kilangada me Mehn Leimen ko wie kohkohdo ni irepen sahpwo, e ahpw lingeringer kowahlap pwehki keptakai en aramas akan me e kin nantihong doandoare; ei, e lingeringer kowahlap; nan kapehde nsensuwed pahrail.

15 Kedekedeo e ahpw kadarala pekipek ehu ong kepinahn sahpwo, sang ni utuht en aramas akan, e peki ma kepinao en wadek, oh kihong ih (Moronai) manaman en idingkin irail me kahngohdi kan re en iang doarehla arail wehi, ma soh, irail pahn kamakamala.

16 Pwe ih me e pahn keieu kesempwalki iei, en kauhdi pingiping oh akamai kan nanpwungen aramas akan; pwe kilang, ih met me kin kahrehda arail kamwomwomwla kan. Kedekedeo, sang ni utuht en aramas akan, e ahpw alehdi manamano.

17 Kedekedeo Moronai ahpw ruweseiong nah sounpei kan me re pahn kolahng aramas akan me kin uhpalihki nanmwarki pwe re en kalowehdi ahr pohnmwahso kan oh ahr aklapalap oh kapahrekihong irail nan pwehl, de re en alehda dipwisou en mahwen kan oh utungada doadoahk en mour saledek.

18 Kedekedeo nah sounpei ko ahpw karis kolahng irail; oh re kalowehdi ahr pohnmwahso oh aklapalap, kahrehda ni ansou me re ngapkipeseng neirail dipwisoun mahwen pwe re en peiong nein Moronai aramas akan, irail kamakamkihla kedlahs oh kapahrekiong nanpwel.

19 Kedekedeo uwen irail akan me kahngohdi tohtohki aramas pahkid me mehkihla kedlahs; oh arail kaun akan me sohte kamakamala nan mahwen ahpw kolkoldi oh lekdekiong nan imweteng, pwe sohte ahnsoun kopwung ahnsou wet.

20 Oh luhwen irail akan me kahngohdi, re sohte iang palidieng nan pwehlo, ahpw irail alehda koasoandi en mour saledek, oh idihdiong re en apiada pilaik en mour saledek pohn arail wasahn doulik kan, oh nan arail kahnihmw kan, oh alehda dipwisou en mahwen oh iang doarehla arail wehi.

21 Oh met Moronai katokihedier aramas akan me kin uhpalihki nanmwarki, kahrehda solahr me adaniki aramas me kin uhpalihki nanmwarki; oh met e kaimwisekalahr keptakai oh pohnmwahso en aramas akan me kin kose me re ntahn sohpeidi; ahpw re karakarahkala duwehte riarail ko, oh pwe re en kommwad en iang mahwenki arail mour saledek sang mour en kalidu.

22 Kilang, kedekedeo ahnsou me Moronai wie katokatokihedi mahwen kan oh pingiping kan rehn ienge tohn wehi kan, oh kahkahrehiong irail nan popohl oh onepek, oh wiewia koasondi en kaunopadahng mahwen ong Mehn Leimen ko, kilang, Mehn Leimen ko kohdo nan sahpw en Moronai, me mi ni irepen sahpwo ni oaroahro.

23 Kedekedeo ahnsouo Mehn Nihpai kan sohte nohn kehlail nan kahnihmw en Moronai; eri Amelekaia pwakihiraila, kemekemehla aramas tohto. Kedekedeo Amelekaia ahpw kalowehdi kahnihmwo, ei, kalowehdi arail kehl kan koaros.

24 Oh irail akan me tangasang kahnihmw en Moronai kohdo nan kahnihmw en Nihpaia; oh pil aramas en kahnihmw en Lihai kohpene, oh kaunopadahng mahwen oh onopohngehr mahweniong Mehn Leimen kan.

25 Ahpw kedekedeo Amelekaia sohte men mweidohng Mehn Leimen kan en kohla ni kahnihmw en Nihpaia oh mahwen, ahpw e koasoanediong irail en mihmihte ni oaroahro, kihdiong sounpei kei nan kahnihmw koaros pwe re en apwahpwalih oh sinsile.

26 Eri e ahpw uhsehlahte, kalkalowehdi kahnihmw tohto, kahnihmw en Nihpaia, oh kahnihmw en Lihai, oh kahnihmw en Moriandon, oh kahnihmw en Omner, oh kahnihmw en Kid, oh kahnihmw en Miulek, kahnihmw kan koaros mi ni oaroahr en palimese.

27 Oh met Mehn Leimen kan kalowehdier kahnihmw tohto, sang ni en Amelekaia widing, sang neirail karis en sounpei ngedehrie, a kahnihmw ko koaros inenen kelpene mwahu nin duwen ehn Moronai koasoanehdi; ahpw met koaros wiahla wasahn silepe kehlail ong Mehn Leimen ko.

28 Kedekedeo re ahpw karis kohla ni irepen sahpw en Rahk, pwakipwakih Mehn Nihpai kan oh kemekemeirailla.

29 Ahpw kedekedeo irail ahpw tuhwong Dienkom, me kemehla Moriandon oh sopukala nah aramas akan nan eh tangdoui.

30 Kedekedeo e ahpw sopukala Amelekaia, ni eh wie karkariskihwei sapwellime pokon en sounpei kan pwe en kak kalowehdi sahpw en Rahk, oh pil sahpw en paliepeng.

31 Ahpw kilang e nsensuwedla ni eh kapweiekidi pahn Dienkom oh nah sounpei kan, pwe irail wia sounpei wadawad kei; pwe emen emen nein Dienkom ohl akan kehlail oh koahiek en mahwen sang Mehn Leimen kan, kahrehda irail kehlail sang Mehn Leimen kan.

32 Kedekedeo re ahpw mahweniong irail, oh kemekemeirailla lao lel nihpwong. Kedekedeo Dienkom oh nah ohl akan kauwada imwarail impwal akan ni irepen sahpw en Rahk; oh Amelekaia kauwada sapwellime impwal kan ni keilen oaroahro, oh iei ih mwomwen arail pweiekla.

33 Kedekedeo ahnsou me e nin soutikpene, Dienkom oh nah ladu ko waila oh kohla nihpwongo, oh pidelong nan sapwellimen Amelekaia kahnihmpwalo; oh kilang re meirkelikla pwehki arail pwangada, pwehki sang ni arail doadoahk en mahwen oh karakar en ni rahno.

34 Kedekedeo Dienkom ahpw wailong nan sapwellimen nanmwarkio impwalo, oh doakoahki eh mohngiong ketieu pwoat; oh e mwadangete kemehla nanmwarkio kahrehda e sohte kapirida sapwellime ladu ko.

35 Oh e pwurala ni pein ah wasa ni rir, oh kilang, nah sounpei kan pil memeir, oh e kapirirailda oh ndahiong irail soahng koaros me e wiahier.

36 Oh e koasoanediong nah sounpei ko re en onopada, pwe Mehn Leimen ko de pirida oh kohdohng irail.

37 Oh met kaimwisekala kerieisek limaun sounpar en mwehin sounkopwung kan ong aramas en Nihpai kan; oh met kaimwisekalahr mwehin Amelekaia.