1 Kedekedeo mwurin eh kaimwsekala eh koasoakoasoiong aramas akan tohto me kamehlele, oh tepida koluhla, oh wadek pwuhk sarawi kan.

2 Ahpw pali laud en irail men kauwehla Alma oh Amulek; pwe re lingeringer pahn Alma, pwehki eh koasoi kan me inen ong Sihesrom; oh re pil nda me Amulek pitih irail, oh kauwe arail kosonned oh pil uhwong arail sounsawas en kosonned akan oh sounkopwung kan.

3 Oh re pil lingeringer pahn Alma oh Amulek; oh pwehki ara kadehdehda ni sansal duwen arail wiewia suwed kan, re songosong en kemeirahla ni rir.

4 Ahpw kedekedeo irail sohte wia; ahpw irail koledi ira oh pirehkinirahdi sahl kehlail, oh wairahla mwohn sounkopwung lapalap en sahpwo.

5 Oh aramas ako kohla oh kedipa ira—kadkadehdehki me ira kauwe kosonnedo, oh arail sounsawas en kosonned akan oh sounkopwung kan en nan sahpwo, oh pil aramas koaros me mih nan sahpwo; oh pil kadehdehki me Koht tehmen, oh me e pahn ketin kadaredo Sapwellimeo rehn aramas akan, ahpw e sohte pahn kamaurirailla; oh pil soahng kei me aramas ako kedkedipahki Alma oh Amulek. Met wiawi mwohn sounkopwung lapalap en sahpwo.

6 Kedekedeo Sihesrom ahpw pwuriamweikihla mahsen kan me e rongadahr; oh e pil wehwehki duwen lamalam rotorot, me e kahrehiong aramas akan sang ni eh lokaia likamw kan; oh palingene tepida lokolongki eh esehdahier pein eh sapwung kan; ei, e tepier lokolongki medek en ehl.

7 Kedekedeo e ahpw tepida koasoiahiong aramas akan, ndinda: Kilang, ngehi me sapwung, oh ohl pwukat mwakelekel mwohn Koht. Oh e ahpw tepida peki rehrail sang ahnsouo kohla; ahpw re kauwe, ndinda: Ke pil iang katieni? Oh irail kandipih ih, oh kausala sang nanpwungarail, oh pil irail koaros me kamehlele mahsen kan me Alma oh Amulek mahsaniher; oh re kesehirailla liki, oh kadarala ekei ohl re en kostakai irail.

8 Oh re wahdo arail pwoud kan oh patehng neirail seri kan, oh mehmen me kamehlele de alehdi padahk en kamehlele mahsen en Koht re wiahda me re pahn keseirailong nan kisiniei; oh re pil wahdo arail poadopoad kan me audaudki pwuhk sarawi kan, oh pil kesehlong nan kisinieio, pwehn isihsla oh ohkihla kisiniei.

9 Kedekedeo irail ale Alma oh Amulek, oh wairahla wasa me aramas akan wie kamakamala pwehki arail kadehde, pwe re en kak kilang kamwomwalahn irail ko me isihsla nan kisinieio.

10 Oh ni ahnsou me Amulek kilangehr lokolok en lih akan oh seri kan me mwasikalahr nan kisiniei, e pil iang lokolongki; oh e ahpw ndaiong Alma: Ia uwen werei en ata pahn kilikilang mwekid sakanakan wet? Eri kita kapahwei pehta kan, oh doadoahngki manaman en Koht me ketiket rehta, oh doareirailla sang nan kisinieio.

11 Ahpw Alma ndaiong ih: Ngehno ketin keinapwi ie me I sohte pahn kapahwei pehi; pwe kilang Kauno ketin alehdahr irail, ni lingan; oh e ketin mweidohng re en wia soahng wet, de me aramas akan kak wiahiong irail met, nin duwen mohngiongarail keptakai, pwe kopwung me e pahn wiahiong irail sang ni sapwellime engieng e pahn pwung; oh ntahn me mwakelekel kan pahn wia mehn kadehde ong irail, ei, oh kadeikirailda ni mehlel ni imwin rahno.

12 Met Amulek ndaiong Alma: Kilang, mwein re pahn pil kamwasikakitahla.

13 Oh Alma nda: Mweidohng nin duwen kupwur en Kauno. Ahpw, kilang, ata doadoahk saikinte imwisekla; eri re sohte pahn kamwasikakitahla.

14 Met kedekedeo ni ahnsou me paliwar en irail akan me lekideklong nan kisinieio isihsla, oh pil poadoapoad akan me iang irail lekideklong, sounkopwung lapalap en sahpwo ahpw kohdo oh kesihnenda mwohn Alma oh Amulek, ni ara sensel; oh e ahpw pohrki peh ni marasa kan, oh ndaiong ira: Mwurin dahme kumwa kilangehr, kumwa pahn pwurehng kalohkohng aramas pwukat, pwe irail en lekdeklong nan lehn kisiniei oh suwepel?

15 Kilang, kumwa kilang me kumwa sohte ahneki manaman en kapitala irail akan me lekdeklong nan kisiniei; de pil Koht kapitirailla pwehki arail iang amwa pelien lamalam. Oh sounkopwungo pwurehng pohr sepera kan, oh nda: Dahme kumwa pahn nda?

16 Eri, sounkopwung menet wia kisehn pwihn en koasoandi oh pelien lamalam en Nior, me kemehla Kidion.

17 Kedekedeo Alma oh Amulek sohte sapengkihong mehkot; oh e pwurehng pohr ira, oh kihrahla rehn opiser kan pwe re en keseirahlong nan imweteng.

18 Oh mwurin ara mihmihki nan imweteng erein rahn siluh, irail me kin kamehlele padahk en Nior kan kohdo, iei, tohto sounsawas en kosonned akan, oh sounkopwung kan, oh samworo kan, oh sounpadahk kan; oh re pidelongodo nan imwetengo pwe re en kilang ira, oh pwe re en kapeidek rehra soangen mahsen tohto; ahpw ira sohte sapeng irail.

19 Kedekedeo sounkpwungo uh mwohra, oh nda: Dahme kumwa sohte sapengki en aramas pwukat peidek? Kumwa sohte ese me I ahneki manaman en keseikumwahlong nan kisiniei? E ahpw itonehkinira re en lokaia; ahpw ira sohte sapengki mehkot.

20 Kedekedeo irail ahpw mweselpeseng, oh mahnda irail pil pwurodo; oh sounkopwungo pil pwurehng pohr seperah kan. Oh tohto me pil iang kohdo, oh pohr ira, ndinda: Kumwa pahn pwurehng kesihnenda oh kadeik aramas pwukat, oh kauwe aht kosonned? Ma kumwa ahneki soangen manaman kehlail dahme kumwa sohte kak kapitkihla pein kumwa?

21 Oh soahng tohto me re ndaiong ira, tehtehrengki ngihrail kan pohra, oh kakandipi ira, oh ndinda: Ia mwomwen kiht ahnsou me se pahn lekdekla?

22 Oh ih soangen koasoi koaros me re ndaiong ira; oh re wie kapakapailoke ira erein rahn kei. Oh re sohte kihong ira mwenge pwe re en duhpekla, oh sohte kihong ira pihl pwe ira en men nimpilda; oh re pil kihsang ara likou kan pwe ira en kilisou; oh re pirapirkihdi sahl kehlail kan, oh selidi nan imweteng.

23 Kedekedeo mwurin ara lokolongki erein rahn kei, (oh iei ni keisek riau en rahn, nan keisek en sounpwung, nan pahr keisek en mwehin sounkopwung kan ong aramas en Nihpai) me sounkopwung lapalap en nan sahpw en Amonaia oh arail sounpadahk tohto, arail sounsawas en kosonned akan kohla nan imwetengo wasa me Alma oh Amulek wie senselki sahl kan.

24 Oh sounkopwung lapalapo kesihnenda mwohra, oh pwurehng pohr ira, oh ndaiong ira: Ma kumwa ahneki manaman en Koht a kumwa kapitkumwahsang nan sahl akan, oh se pahn kamehlele me Kauno pahn kamwomwala aramas pwukat nin duwen amwa koasoi kan.

25 Kedekedeo irail koaros kohla oh pohr ira, ndinda soangen lokaiakohte, lao lel me lahso; oh ahnsou me lahso koasoiong ira, manaman en Koht tihda pohn Alma oh Amulek, oh re ahpw pwourda oh kesihnenda.

26 Oh Alma werkihla, inda: Maing Kaun, ia uwen werei en aht pahn wie lokolongki kalokolok pwukat? Maing Kaun, komw ketikihong kiht roson nin duwen aht pwoson Krais, pwe sen kak pitila. Re ahpw mweidpeseng sahl akan me ira selkihdi; oh ni en aramas akan arail kilangada met, irail tepida tang, pwe irail masakadahr irail de kamwomwomwla.

27 Eri, uwen arail masepwehkada irail pwupwudiong nan pwehlo, oh sohte lella ni wenihmw en maslikin imwetengo; oh sapwo rerrada kehlail, oh dihd en imwetengo pwalpeseng, kahrehda e rengkidi nan pwehlo; oh sounkopwung lapalapo, oh sounsawas en kosonned akan, oh samworo kan, oh sounpadahk kan, me pohr Alma oh Amulek, kamakamkihla pwupwudien dihdo.

28 Oh Alma oh Amulek pidohi sang nan imwetengo, oh ire sohte medekila; pwe Kauno ketikihong ira manaman, nin duwen ara pwoson Krais. Oh ira mwadangete pidohi sang nan imwetengo; oh ira saledekla sang sahl me pireirapene; oh imwetengo mwerediong nan pwehlo, oh aramas koaros me mih loale kamakamala, ihte Alma oh Amulek me soh; oh ira mwadangete kohla ni kahnimwo.

29 Eri, aramas akan rongada ngihl laud ehu re ahpw tangpene wiahda pokon ehu pwe irail en esehda dahme wiahda ngihlo; oh ahnsou me re kilangada Alma oh Amulek kohkohieido sang nan imwetengo, oh dihd kan pwupwudier nan pwehlo, irail uhdahn masepwehkada, oh tangasang mwohn Alma oh Amulek duwehte kuht men oh wah kan ar tangasang mwohn laion riemen; oh irail tangasang mwohn Alma oh Amulek.