1 Eri ni ahnsou me Amon oh riehkan arail kohpeseng nan irepen sahpw en Mehn Leimen kan, kilang Aron pilada seiloaklahng nan sahpw me Mehn Leimen kan me kin kahdaniki, Serusalem, me kohsang ni eden sahpw me wia uhdaken arail pahpa kahlap ako; oh e mihte ni irepen sahpw en Mormon.

2 Eri Mehn Leimen kan oh Mehn Amalekai kan oh nein Amulon aramas akan kauwadahier lapalahn kahnihmw ehu, iei me kahdaniki Serusalem.

3 Eri Mehn Leimen kan, re wia aramas keptakai kei, ahpw Mehn Amalekai kan oh Mehn Amulon kan uhdahn keptakai sang irail; eri irail kin wiahng Mehn Leimen kan irail en kakeptakaila nan mohngiongarail kan, pwe re en kak kehlail nan arail wiewia suwed oh arail tiahk suwed kan.

4 Kedekedeo Aron kohla nan kahnihmw en Serusalem, oh tepida padahk ong Mehn Amalekai kan. Oh e tepida padahk ong irail nan arail sinakoke kan, pwe irail wiahda arail sinakoke ni wiepen koasondi en Nior kan; pwe tohto Mehn Amalekai kan oh Amulon kan kin idawehn koasondi en Nior kan.

5 Eri, ahnsou me Aron pidelong nan ehu arail sinakoke ko pwe en padahk ong aramas akan, oh ni eh wie koasokoasoi ong irail, kilang emen Mehn Amalekai kan kesihnenda oh tepida akamai ong ih, ndinda: Dahme ke kadkadehdehki? Ke kilangehr tohnleng men? Dahme kahrehda tohnleng kan sohte pwarohng kiht? Kilang nait aramas akat soh pil mwahu duwehte noumwail aramas akan?

6 Ke pil nda, ma se sohte pahn koluhla se pahn mwomwla. Ia mwomwen omw ese lamalam oh ineng en nan kapehdat kan? Ia mwomwen omw ese me se pahn anahne koluhla? Ia mwomwen omw ese me se sohte wia aramas pwung kei? Kilang, se kauwada ihmw sarawi kan, oh se kin kohpene pwe se en kaudokiong Koht. Se kamehlele me Koht pahn kamourala aramas koaros.

7 Aron eri kalelapak reh: Ke kamehlele me Sapwellimen Kohto pahn ketido oh doarehla aramas akan sang diparail akan?

8 A ohlo ahpw ndahiong ih: Se sohte kamehlele me ke ese soahngen. Se sohte kamehlele soahng tiahk en pweipwei kan. Se sohte kamehlele me ke ese soahng kan me pahn kohdo, oh se pil sohte kamehlele me amwail pahpahko oh pil atail pahpahko ese duwen soahng kan me irail koasoia, duwen soahng kan me pahn kohdo.

9 Met Aron tepida pahkehng irail iren pwuhk sarawi kan me pid duwen ketidohn Krais, oh pil duwen iasadahn me mehla, oh me aramas sohte kak komourla ihte sang ni sapwellimen Krais pwoula oh lokolok kan, oh tomw en ntao.

10 Kedekedeo e ahpw tepida kawehwehiong irail mepwukat, irail eri lingeringerda pah, oh tepida kauwe; oh irail sohte men rong koasoi kan me e pahn koasoia.

11 Eri, ahnsou me e kilang me irail sohte men rong eh koasoi kan, e mwesel sang nan arail sinakokeo, oh kohdo nan kousapw me kahdaniki Ani-Andai, oh wasao e tuhwongidi Mulokai kalokalohkihong irail mahseno; oh pil Amah oh rie kan. Oh irail pelipelianki aramas tohto mahseno.

12 Kedekedeo irail kilang aramas akan arail kin kakeptakaih mohngiongirail kan, eri irail kohkohla oh kohdo nan sahpw en Midonai. Oh irail padahkihong aramas tohto mahseno, oh malaulau me kamehlele mahsen kan me irail wie padpadahngki.

13 Ahpw, Aron oh ekei rierail kan kolkoldi oh lekdeklong nan imweteng, oh luhwe ko tangasang nan sahpw en Midonai kohla nan sahpw teikan me kapil wasao.

14 Oh irail akan me lekdeklong nan imweteng lokolongki soahng tohto, oh irail saledekla sang ni sawas en Lemonai oh Amon, oh kohieng kenerail mwenge oh arail likou.

15 Irail eri pwurehng doula oh kalohki mahseno, oh met keieu en arail kasaledeksang nan imweteng; eri irail lokolongki.

16 Oh irail kohla wasa koaros me Ngehn en Kauno pahn kaweidkin irail, kalkalohngki mahsen en Koht nan ehu ehu sinakoke en Mehn Amalekai kan, de nan en Mehn Leimen kan arail pokon koaros me re kak mweimweiong loale.

17 Kedekedeo Kauno ahpw tepida kapairailda, iei me irail sewesehda aramas tohto en marainkihda me mehlelo; ei, irail kasalehiong aramas tohto en wehwehkihda pein diparail akan, oh tiahk en arail pahpa kahlap ako, me sapwung.

18 Kedekedeo Amon oh Lemonai pwurala nan sahpw en Midonai ong nan sahpw en Ismael, me wia sahpw en arail sohso.

19 Oh nanmwarki Lemonai sohte men mweidohng Amon en papah ih, de wia sapwellime ladu.

20 Ahpw e kupwurehda irail en wiahda sinakoke kan nan sahpw en Ismael; oh e kupwurehda sapwellime aramas, de aramas akan me mih pahn eh manaman, re en kin kapokonepene.

21 Oh e ahpw ketin pereperen kin irail, oh e ahpw padahkihong irail soahng tohto. Oh e ahpw kalohkihda me irail wia aramas me mih pahn eh manaman, oh me re wia aramas saledek kei, me irail saledek sang mour kehnaudek pahn nanmwarkio, semeo; pwehki semeo kamanahiengehr en kaunda aramas akan me mih nan sahpw en Ismael, oh nan sahpwo pwohn me kapilpene.

22 Oh e pil kasalehda me irail ahneki saledek en pwongih Kauno arail Koht nin duwen nsenarail, ni wasa koaros me re mih ie, ma sahpwo mih pahn manaman en nanmwarki Lemonai.

23 Oh Amon ahpw kin padahkih sapwellimen nanmwarki Lemonai aramas akan; oh kedekedeo e ahpw padahkihong irail soahng kan koaros me pid duwen mour pwung. Oh e koangoange irail rahn koaros, sang ni loaloapwoat; oh irail kin rong eh padahk, oh irail kin loalenohng kapwaiada kosonned akan en Koht.