1 Kedekedeo, mwurin Amulek e kaimwisekala mahsen pwukat, irail kohkohlahsang pokono oh kohla nan sahpw en Terson.

2 Ei, riarail ko koaros, mwurin arail kalohngkier mahseno ong Mehn Soram kan, irail pil kohlahng sahpw en Terson.

3 Kedekedeo, mwurin irail akan me ndand nanpwungen Mehn Soram kan ahr wie lamalampene nanpwungarail duwen mahseno me kalohk ong irail, re ahpw lingeringerkihda mahseno, pwehki e kauwehla arail loalokong widing kan; eri irail sohte men rong mahsen kan.

4 Oh irail kadarpeseng pakair oh kapokonepene aramas koaros en nan sahpwo, oh wie lamalamkihong irail duwen mahseno me kalohk ong irailehr.

5 Eri, arail kaun kan oh arail samworo kan oh pil sounpadahk kan sohte kehsehki aramas duwen ahr ineng kan; eri irail diarada ni rir, ehn aramas koaros ahr madamadau kan.

6 Kedekedeo, mwurin arail diaradahr madamadau en aramas koaros, irail akan me pwungki mahsen kan me kalohkda sang Alma oh rie kan pekeusang nan sahpwo; oh irail me tohto; oh irail pil kohdo nan sahpw en Terson.

7 Kedekedeo Alma oh rie kan ahpw pil papah irail.

8 Eri, aramas en Soram kan lingeringerda pahn nein Amon aramas akan me mih nan Terson, oh pwehki kaun lapalapo en Mehn Soram kan eh wia ohl suwed men, e ahpw kadaralahng pakair ong nein Amon aramas akan oh ndahiong irail re en kausasang nan sapwarail kan irail koaros me kohkohla sang rehrail.

9 E ahpw kamasangkinirail soahng tohto. A met nein Amon aramas akan sohte masak arail koasoi kan; eri irail sohte kausirailla, ahpw re kasamwo Mehn Soram kan me semwehmwe koaros me kohdo rehrail; oh irail apwalih irail, oh kihong arail likou, kihong irail sapwarail; oh irail sewese irail nin duwen arail anahn akan.

10 Eri, met kamwakidada Mehn Soram kan re en lingeringerda pahn nein Amon aramas akan, oh irail tepida patehng Mehn Leimen kan oh kahrehiong re en pil iang lingeringer pahrail.

11 Mehn Soram kan oh Mehn Leimen kan ahpw tepida kaunopadahng mahwen ong nein Amon aramas akan, oh pil ong Mehn Nihpai kan.

12 A met kaimwisekalahr pahr keisek isuh en mwehin sounkopwung kan ong aramas en Nihpai kan.

13 Oh nein Amon aramas akan kohkohsang nan sahpw en Terson, oh kohla nan sahpw en Mihlek, oh kihong sahpw en Terson sounpei en Mehn Nihpai kan, pwe re en kak pelian sounpei en Mehn Leimen kan oh sounpei en Mehn Soram kan; oh met tapiadahr mahwen nanpwungen Mehn Leimen kan oh Mehn Nihpai kan, nan pahr keisek waluh en mwehin sounkopwung kan; oh soaipen arail mahwen kan pahn kohdo mwuhr.

14 Oh Alma, oh Amon, oh riarail kan, oh pil nein Alma pwutak riemeno pwurala nan sahpw en Saraemla, mwurin arail wiahier dipwisou en doadoahk nin limen Koht ong kapwurehdo Mehn Soram tohto en koluhla; oh irail koaros me koluhla pekeusang nan sapwarail; ahpw irail sahpwasapwala nan sahpw en Terson, oh irail alehda dipwisou en mahwen pwehn pein doareirailla, oh arail pwoud kan, oh neirail seri kan, oh sapwarail kan.

15 Eri pwehki Alma e pahtoukihla dipen nah aramas akan, ei pwehki mahwen kan, oh kakerehdi nta, oh uhpene kan me kin wiawi nanpwungarail; oh pwehki e kalohki mahseno, de pekederla pwe en kalohki mahseno, rehn aramas koaros nan kahnihmw koaros; oh pwehki e kilangehr mohngiong en aramas akan ahr keptakailahr, oh me irail tepida lingeringer pwehki mahseno me inen, oh e pahtoukihla mehlel nan kapehde.

16 Eri, e ahpw kihpene nah pwutak kan, pwe en kak kihong emen emen irail eh kehkehlik tohrohr, nin duwen soahng kan me pid mour pwung. Oh audepen eh kehkehlik kan mi rehtail, me e kihong irail nin duwen pein eh poadoapoad.