Pwuhk Sarawih kan
Alma 5


Mahsen kan en Alma, Samworo Lapalapo nin duwen koasoandi sarawi en Koht, padahkihong aramas akan nan arail kahnihmw oh kousapw akan nan sahpwo pwon.

Tepida nan iralaud 5.

Iralaud 5

Aramas anahne koluhla oh kapwaiada kosonned akan, ipwsapahl, kamwakelehda arail karmend kan sang ni ntahn Krais, karakarahk oh kihsang irail pohnmwahso oh noahrok, oh wia doadoahk pwung kan pwe irail en kak komourla—Silepen Sihpw Mwahuo ekehker Sapwellime aramas akan—Irail akan me kin wia doadoahk en tepil iei seri en tepilo—Alma kadehdehki duwen mehlel en eh padahk oh luke aramas akan en koluhla—Eden [aramas] me kin mour pwung kan pahn ntingdi nan pwuhk en komouro. Ele Sounpar 83 Mwohn Krais.

1 Eri, kedekedeo Alma ahpw tepida padahngki mahsen en Koht ong aramas akan, tepikida nan sahpw en Saraemla, oh sang mwo kohpeseng nan sahpwo pwon.

2 Oh mahsen pwukat me e padahkihong aramas akan nan mwomwohdiso me wiahwihda nan kahnihmw en Saraemla, nin duwen dahme e pein ntingihdi, me ketihtihki:

3 Ngehi, Alma, kasarawihongehr samworo lapalap sang ei pahpa, Alma, ong nan mwomwohdiso en Koht, pwehki e alehdi manaman oh mweimwei sang rehn Koht en wia mepwukat, kilang, e tepida wiahda mwomwohdiso nan sahpw me mih ni irepen sahpw en Nihpai; ei, sahpw me kahdaniki sahpw en Mormon; ei, oh e papidaisihla rieh kan nan pihl en Mormon.

4 Oh kilang, I ndaiong kumwail, re poadoandoarasang pahn manaman en sapwellimen nanmwarki Noha aramas akan, sang ni kalahngan oh manaman en Koht.

5 Oh kilang, mwurin mwo, irail lohdi nan mouren kalidu pahn manaman en Mehn Leimen kan nan sapwtehno; ei, I ndaiong kumwail, irail wie sensel, oh Kauno ahpw pwurehng doareirailsang nan mouren kalidu sang ni manaman en sapwellime mahsen; oh se kohdo nan sahpwet, oh wasaht se pil pwurehng tepida wiahda mwomwohdiso en Koht nan sahpwet pwon.

6 Oh met kilang, I ndaiong kumwail, riei kan, kumwail me wia tohn mwomwohdiso, kumwail kin kalapw tamatamante kaliduhlahn amwail pahpahko? Ei, oh kumwail kin kalapw tamatamante sapwellime kalahngan oh kanengamah ong irail? Oh pil kapatahiong, kumwail kin kalapw tamatamante me e ketin doarehla palingenerail sang nan ehl?

7 Kilang, e ketin wekidala ar mohngiong kan; ei, e ketin panginirailda sang nan arail meir kelik, oh irail pirida rehn Koht. Kilang, irail mihmi nan werengen rotorot; ahpw, palingenerail kan marainkihda marain en mahsen poatoapoato; ei, selin mehla kapilirailpene, oh sel metehn ehl, oh kamwomwomwla poatoapoato awiawih irail.

8 Oh met I kalelapak rehmwail, riei ko, irail kamwomwala? Kilang, I ndaiong kumwail, soh, irail sohte kamwomwala.

9 Oh I pwurehng kalelapak, selin mehla ko olahr, oh sel metehn ehl me kapikapil irailo, e mweradahr? I ndaiong kumwail, Ei, e mweradahr, oh loalerail akan direkihlahr limpoak oh peren, oh irail ahpw kin koulki limpoak en komour. Oh I ndaiong kumwail me irail komourlahr.

10 Oh met I kaledapak rehmwail dahme kahrehda irail komourkihla? Ei, dahme wia poahson en arail koapworopworki komouro? Dahme kahreda irail kak saledek sang selin mehla, ei, oh pil sel metehn ehl?

11 Kilang, I kak ndaiong kumwail—ei pahpa Alma sou kamehlele mahsen kan me kalohk sang ni ewen Apinadai? Oh e sou wia soukohp sarawi men? E sou padahngki mahsen en Koht, oh ei pahpa Alma kamehlele mahsen akan?

12 Oh sang ni ah pwoson mie weliakapw mehlel wiawi nan ah mohngiong. Kilang I ndaiong kumwail me met akan koaros mehlel.

13 Oh kilang, e kalohngki mahseno ong amwail pahpa kan, oh nan mohngiongarail kan weliakapw mehlel, oh irail karakarahkala oh koapworopworiki Koht ieias mehlelo. Oh kilang, irail loaloapwoat lao lel imwi; eri irail komourlahr.

14 Oh met kilang, I kalelapak rehmwail, riei kan nan mwomwohdiso, kumwail ipwisangehr rehn Koht ni palingenamwail? Kumwail kak kilang ieiasih nan amwail mour? Kumwail kehnehr weliakapw mehlelo nan mohngiongamwail kan?

15 Kumwail kin pwoson komour en ih me ketin kapik kumwailda? Kumwail kin kasikasik sang ni amwail kilikilengwei ni pwoson, oh medewe me paliwar wet pahn iasadahng mour poatoapoat, oh paliwar wet me kin mwerpeseng pahn iasadahng paliwar me sohte kak mwerpeseng, pwe en kesihnen mwohn Koht pwe en ale kadeik nin duwen wiewia kan me wiwiawi nan mour wet?

16 I ndaiong kumwail, kumwail kak pein medewehdohng kumwail ni rahno me kumwail pahn rong kepitien Kauno, mahsanihong kumwail: Kohdo rehi, kumwail me kapaida kan, pwe kilang, amwail doadoahk kan wia doadoahk en mour pwung pohn sampah?

17 De kumwail kin medewehiong me kumwail kak pitih Kauno ni rahno, oh nda—Maing, aht doadoahk kan wia doadoahk pwung kei pohn sampah—oh me e pahn kamour kumwailla?

18 De pil, kumwail kak medewehiong amwail pahn pakahrdohng mwohn mwoahlen kopwung en Koht oh loalemwail akan direkihla pepehm en dihp oh pahtou, ni amwail pahn tamanda dipamwail kan koaros, ei, ni amwail ese ni unsek amwail wiewia suwed kan, ei, ni amwail tamanda me kumwail kasohwe sapwellimen Koht kosonned akan?

19 I ndaiong kumwail, kumwail kak kilenglahng Koht ni rahno oh ahneki mohngiong mwakelekel oh peh mwakelekel? I ndaiong kumwail, kumwail kak kilengdahng, oh kilang ieias en Koht nan amwail mour?

20 I ndaiong kumwail, kumwail kak medewe me kumwail komourla ma kumwail mweidehng pein kumwail pahn manaman en tepilo?

21 I ndaiong kumwail, kumwail pahn ese ni rahno ma kumwail pahn kak komourla; pwe sohte emen aramas kak komourla ma ah karmend sohte pahn kamwakelda oh pwetepwetla; ei, ah karmend kan pahn anahne kamwakelda lao re mwakelekelsang samin kan, sang ni ntahn ih me atail pahpah ko koasoiahier, me pahn kohdo oh kamaurala sapwellime aramas akan sang diparail akan.

22 Oh met I kalelapak rehmwail, rieiko, ia mwomwen amwail pepehm, ma kumwail pahn kesihnen mwohn mwolen kopwung en Koht, ni amwail karmend kan eh saminki nta oh soangen samin koaros? Kilang, dahme mepwukat pahn kadehdehda ong kowe?

23 Kilang re sou pahn kadehdehda me kumwail soun kam aramas, ei, oh kumwail pil dipaniki soangsoangen wiewia suwed koaros?

24 Kilang, rieikan, kumwail sou kin medemedewe me soangen aramas wet kak mwohndi nan wein Koht, iang Eipram, iang Aisek, oh iang Seikop, oh pil koaros soukohp sarawi kan, me arail karmend kan kamwakeldahr oh sohte mwahi kis, mwakelekel oh pwetepwet?

25 I ndaiong kumwail, soh; ihte ma kumwail kak wiahiong Sounkepikipiko en likamw sang ni tapio, de medewe me e likamw sang ni tapio, kumwail sohte kak nda me e pahn kak mie dowen sohngo nan wein nanleng; ahpw re pahn lekidekila liki pwe irail iei seri en wehin tepilo.

26 Oh met kilang, I ndaiong kumwail, riei kan, ma kumwail kehnehr weliakapw mehlelo nan mohngiongamwail kan, oh ma kumwail kehnehr amwail men koulki koul en limpoak en komouro, I pahn kalelapak, kumwail kak kehn ahnsou wet?

27 Kumwail kin weweid, ni amwail kin mwakmwakelekel mwohn Koht? Kumwail kak nda loalemwail kan, ma kumwail pahn malipilipiong mehla ahnsou wet, me kumwail karakarahkalahr? Me amwail karmend kan mwakelekeldahr oh pwetepwelahr sang ni ntahn Krais, me pahn ketido kamourala sapwellime aramas akan sang diparail akan?

28 Kilang, kumwail kihsangehr amwail pohnmwahso? I ndaiong kumwail, ma kumwail saikinte kumwail saik onopadahng tuhwong Koht. Kilang kumwail anahne kaunopada ahnsou karwaru; pwe wehin nanleng kerendohr, oh soangen aramaso sohte kak alehdi mour soutuk.

29 Kilang, I idek, mie emen rehmwail me saikinte kihsang reh noahrok? I ndaiong kumwail me soangen aramaso saikinte onopada; oh I men kumwail en kaunopada ahnsou karwaru, pwe awahu kerendohr, oh kumwail sohte ese ahnsouo me pahn lelledo; pwe soahngen aramaso sohte kak en sohte dipe.

30 Oh I pil kalelapak rehmwail, mie emen rehmwail me kin kauwe rie ohl, de kalapw wiahiong mwekid en kailok kan?

31 Meid suwediong soangen aramaso, pwe e saikinte onopada, oh ahnsouo kerendohr me e pahn anahne koluhla ma soh e sohte pahn komourla!

32 Iei, meid suwediong kumwail koaros me kin wiewia tiahk suwed kan; koluhla, koluhla, pwe Kauno Koht me ketin mahsaniher!

33 Kilang, e ketin kadarewei sapwellime luhk ong aramas koaros, pwe pwe kalahngan en nin lime kan e ketin kapahwei rehrail, oh mahsanih: Koluhla, oh I pahn aleikumwailda.

34 Ei, e ketin mahsanih: Kohdo rehi oh kumwail pahn tungoale wahn tuhkehn komouro; ei, kumwail pahn kang pilawa oh nim pihl en komour ni saledek;

35 Ei, kohdo rehi oh wahdo doadoahk en mour pwung kan, oh kumwail sohte pahn paldi oh lekideklong nan kisiniei—

36 Pwe kilang, ahnsouo kerendohr me mehmen me pahn wahdo wah sohte mwahu, de mehmen me sohte kin wia doahdoahk en mour pwung kan, pein ih kahrehiong eh pahn weriwer oh mwahiei.

37 Kumwail me kin wiewi doadoahk suwed kan; kumwail me aklapalapkihda soahng mwahl akan en sampah, kumwail me kin nda me kumwail ese koasondi pwungkan ahpw salongalahr, duwehte sihpw me sohte silepe, mehndahte silepen sihpwo eh lukuweriher kumwail oh pil wie lukulukuwerihte kumwail, ahpw kumwail sohte men rong kepitiehu!

38 Kilang, I ndaiong kumwail, me silepen sihpw mwahuo wie ekeeker kumwail; ei, oh sang ni mware e kin ketin ekerkin kumwail, me iei mwahren Krais; oh ma kumwail sohte pahn rong kepitien silepen sihpw mwahuo, me iei mwarehu me kumwail wie luklukwerki, kilang, kumwail sohte wia sihpw en silepen sihpw mwahuo.

39 Oh met ma kumwail kaidehn sapwellimen silepen sihpw mwahuo, a mehnia pelin sihpw kumwail iang? Kilang, I ndaiong kumwail, me tepilo iei silepamwail, oh kumwail wia nah; oh met, ihs me kak kelikamwe met? Kilang, I ndaiong kumwail, mehmen me kelikamwe met e wia aramas likamw oh seri en tepilo.

40 Pwe I ndaiong kumwail me soahng koaros me mwahu kohsang rehn Koht, oh soahng koaros me suwed kohsang rehn tepilo.

41 Eri, ma aramas emen pahn wia doadoahk mwahu kan, e rongehr kepitien silepen sihpw mwahuo, oh e idahwen ih; ahpw mehmen me pahn wia doadoahk suwed kan, e wialahr seri en tepilo, pwe e rongehr ngilehu, oh idawehn ih.

42 Oh mehmen me pahn wia met, e pahn ale isepe sang ih; eri, isepehu e pahn ale mehla, nin duwen eh sohte momourpwung, sohla kak wiada doadoahk mwahu kan koaros.

43 Oh met, riei kan, I men kumwail en rong ie, pwe I koasoi sang loaleiet unsek; pwe kilang, I ndaiong kumwail ni sansal pwe kumwail en dehr sapwungala, de koasoiahier nin duwen sapwellimen Koht kosonned akan.

44 Pwe I malipilipieng en koasoi ni mwohmw wet, nin duwen koasondi sarawi en Koht, me sang Krais Sises; ei, I alehdi kosonned ien kesihnenda oh kadehdehiong aramas pwukat soahng kan me atail pahpahko koasoiahier duwen soahng kan me pahn kohdo.

45 Oh kaidehng ih mehkoaros met. Kumwail sohte medewe me I pein esehdahr mepwukat? Kilang, I kadehdehkihong kumwail me I ese me mepwukat me I koasoiadahr e mehlel. Oh ia mwomwen amwail medewe me I ese me mepwukat mehlel?

46 Kilang, I ndaiong kumwail me mepwukat kasansal ong ie sang ni sapwellimen Koht Ngehn Sarawio. Kilang, I kaisihsolki oh kapakapki erein rahn kei pwe I en kak pein esehda mehlelpen mepwukat. Oh met pein ngehi esehier me mepwukat mehlel; pwe Kauno Koht ketin kasalehiong ie sang sapwellime Ngehn Sarawi; oh iei met ngehn en kaudiahl me mih rehi.

47 Oh pil patehng, I ndaiong kumwail me e kasansal ongie, me mahsen akan me atail pahpahko koasoiahier e mehlel, iei nin duwen ngehn en kokohp me mih rehi, me iei pil sang ni kasansaladahn Ngehn en Koht.

48 I ndaiong kumwail, me I pein esehier me dahme I pahn ndaiong kumwail, me pid dahme pahn kohdo, e mehlel; oh I ndaiong kumwail, me I ese me Sises Krais pahn ketido, ei, Sapwellimeo, Iehros en Sahmo, me diren kalahngan, oh mahk, oh mehlel. Oh kilang, iei ih me pahn ketido oh ketikihsang dipen sampah, ei, dihp akan en aramas koaros me tengediong kamehlele mwareo.

49 Oh met I ndaiong kumwail me iei ih koasoandi me I malipilipiong, ei, en kalohk ong riei ohl kesempwal akan, ei, oh aramas koaros me koukousoan nan sahpwe; ei, en kalohk ong koaros, me mah oh me pwulopwul kan, me sensel oh saledek; ei, I ndaiong kumwail akan me likeilap, me mah, oh dih me kekeirdah kan; ei, en kalohkihong irail me re anahne koluhla oh ipwsapahl.

50 Ei, Ngehno ketin mahsaniher: Koluhla, kumwail koaros pohn sampah, pwe wehin nanleng kerendohr; ei, Sapwellimen Kohto pahn ketido ni linganih, ni sapwellime kehl, wahu, manaman, oh mweimwei en kaun. Ei, riei kempoake kan, I ndaiong kumwail, me Ngehno mahsanih: Kilang lingan en Nanmwarki en sampah; oh pil Nanmwarki en nanleng pahn kereniongehr kamarainwei rehn aramas akan koaros.

51 Oh Ngehno pil mahsanihong ie, ei, eker ie ni ngihl kehlail, ketihtihki: Kohwei oh ndaiong aramas akan—Koluhla, pwe ma kumwail sohte pahn koluhla kumwail sohte pahn sohsohki wehin nanleng.

52 Oh I pil ndaiong kumwail, Ngehno mahsanih: Kilang, silehu miher ni kalewen tuhkehu; eri tuhke koaros me sohte pahn kihla wah mwahu pahn palidi oh lekidekla nan kisiniei, ei, nan kisiniei me sohte kak ohla, iei kisiniei me sohte kak kunla. Kilang, oh tamataman, Me Sarawio me ketin mahsaniher.

53 Oh met riei kempoakeko, I ndaiong kumwail, kumwail kak kasohwe mahsen pwukat; ei, kumwail kak pohnsehsemepwukat, oh tiakidi pahn patenehmwail akan Me Sarawio; ei, kumwail kak kihda pohnmwahsohn amwail mohngiong kan, ei, kumwail pahn wenwenlahte nan amwail likawih likou pweilaud kan oh katengehdi nanmohngiongamwail kan mehkot mwahl akan en sampah, oh amwail kepwe kan?

54 Ei, kumwail pahn nannantihongete medewe me kumwail mwahu sang ekei; ei, kumwail pahn nannantihongete wia mwekid en kailok ong riomwail akan, me karakarahkalahr oh ideidawehn koasoandi sarawi en Koht, me kahrehda arail iangala mwomwohdiso wet, ni arail kasarawialahr sang Ngehn Sarawio, oh irail wiahier doadoahk kan me kasalehda arail koluhla—

55 Ei, oh kumwail pahn wenlahte sohpeisang me semwehmwe kan, oh anahn kan, oh sohte kihong irail amwail dipwisou kan?

56 Oh ni mehlel, kumwail koaros me pahn wenlahte nan amwail wiewia suwed kan, I ndaiong kumwail, me irail pwukat, ma re sohte pahn koluhla ahnsou mwadang irail pahn palidi oh lekidekiong nan kisiniei.

57 Oh met I ndaiong kumwail, kumwail koaros me inangih idawehn kepitien silepen sihpw mwahuo, kumwail kohdo sang rehn me suwed kan, oh kumwail tohrohrla, oh dehr doahke arail dipwisou samin kan; oh kilang, adarail akan pahn lekidekila, pwe eden me suwed kan sohte pahn iang wadawadieng eden me mwahu kan, pwe mahsen en Koht en kak pweida, me ketin mahsani: Eden me suwed kan sohte pahn patehng eden nei aramas akan;

58 Pwe eden me mwahu kan pahn ntingdi nan pwuhk en komouro, oh ong irail I pahn kamanahiong irail arail sohso ni pali maun en pehi. Oh met, rieiko, mie mehkot kumwail kak nda me pahn kasapwunge met? I ndaiong kumwail, ma kumwail pahn uhwong met, e sohte katepe, pwe mahsen en Koht pahn udahn pweida.

59 Pwe dah, mie silepen sihpw rehmwail me nainiki sihpw tohto oh sohte kin tetehk irail, pwe kidi en wel kan dehr kohdo oh kangala nah pelin sihpwo? Oh kilang, ma kidi en wel men pahn kohdong nan pelin sihpw kan e sou pahn pwakiala? Ei, oh ni imwila, ma e kak, e pahn kemehla.

60 Oh met I ndaiong kumwail me silepen sihpw mwahuo wie lukulukweri kumwail; oh ma kumwail pahn rong kepitiehu e pahn ketin waikumwaildo nan sapwellime kehlo, oh kumwail pahn wia sapwellime sihpw; oh e pahn mahsanihong kumwail me e sohte pahn mweideng kidi en wel men pahn pidelong rehmwail, pwe kumwail en dehr kamwomwala.

61 Oh met ngehi, Alma, patohwanohng kumwail nin duwen mahsen en ih me ketin mahsenihong ie, me kumwail en tehk me kumwail kapwaiada mahsen akan me I padahkihong kumwailehr.

62 I koasoi wei nin duwen kosonned ehu ong kumwail me iang tohn mwomwohdiso; oh ong kumwail me sohte wia tohn mwomwohdiso I koasoi ong kumwail ni duwen luhk ehu, oh I nda: Kohdo oh papidaisla sang ni koluhla, pwe kumwail en pil kak tungoale wahn tuhkehn komouro.