1 Kedekedeo irail ahpw uhdi oh ekis pweieksang irail. Oh Moronai ndahiong Saraemna: Kilang, Saraemna, se sohte men kamaramas. Kumwail ese me kumwail mihmi pahn at manaman, ahpw se sohte men kemeikumwailla.

2 Kilang, se sohte kohdohng mahweniong kumwail oh kakerehdi nta pwe se en ahneki manaman pohmwail; se sohte pil inengieng kaliduwih aramas. Ahpw iei ih met kahrepen ahmw kohkidohng kiht; ei, oh kumwail lingeringer paht pwehki at pelien lamalam.

3 Ahpw met, ke kilang me Kauno ieiang kiht; oh ke kilang me e ketkihong kiht kumwail pahn aht manaman. Oh met I men ke en wehwehki me met wiawihong kiht pwehki aht pelien lamalam oh aht pwoson Krais. Oh met ke kilang me ke sohte kak kauwehla aht pwoson.

4 Eri ke kilang me iei met pwoson mehlel en Koht; ei, ke kilang me kupwuren Koht kin utung, oh kolokol, oh doarei kiht, ma se pahn kin loaloapwoat ong ih, oh aht pwoson, oh aht pelien lamalam; oh Kauno sohte mwahn pahn mweidohng kiht se en kamwomwomwla ihte ma se pahn pwupwidiong nan sapwung oh kahmahmkihla aht pwoson.

5 Eri met, Saraemna, I ndahiong uhk, ni mwaren Koht me roson kowalahpie, me ketin kakehleikitada me kahrehda at kak kaloweikumwaildi, sang ni at pwoson, sang at pelian lamalam, oh sang ni at pwuhng en kaudok, oh sang aht mwomwohdiso, oh sang ni utuht sarawi me se pweipwandkihong aht pwoud kan oh nait seri kan, sang ni mour saledek me katengeikihtpene ong nan sapwat oh aht wehi; ei, oh pil sang ni nekinekid en mahsen sarawi en Koht, me iei kahrepen aht peren koaros; oh sang mehkoaros me keieu kesempwal ong kiht—

6 Ei, oh kaidehn ihte met; I ndahionguhk sang ni omw ineng koaros koapwoaroapwoar en mourla, wahdohng kiht noumw dipwisou en mahwen kan, oh se solahr pahn kakerehdi ntahmwail, ahpw se pahn kapitkumwailla, ma kumwail pahn kohkohla oh sohte pwurehng kodohng mahweniong kiht.

7 Eri, ma ke sohte pahn wia met, kilang, kumwail lohdier paht, oh I pahn ruwese nei ohl akan re en mahweniong kumwail, oh kalokehkin kumwail mehla, pwe kumwail en kak sohrala; oh kitail ahpw pahn kilang ihs me pahn ahneki manaman pohn aramas pwukat; ei, kitail pahn kilang ihs me pahn mihla nan mouren kalidu.

8 Oh met kedekedeo ahnsou me Saraemna rongehr koasoi pwukat e ahpw wahdo nah kedlahs oh naipokos oh nah kesik ketieu oh kihong nan pehn Moronai, oh ndahiong ih: Kilang, iet nait dipwisou en mahwen kan; se pahn kihonguhk, ahpw se sohte mwahn pahn wiahda inou onguhk, me se esehier me se pahn kauwehla, oh pil nait seri kan; ahpw ale nait dipwisou en mahwen kan, oh mweidohng kiht se en kohkohla nan sapwtehno; mah soh a se pahn kolokolete nait kedlahs kan, oh se pahn kamwomwala de kaloweikumwaildi.

9 Kilang, se sohte kamehlele amwail pwoson; se sohte kamehlele me Koht me ketkihong kumwail kiht pahn amwail manaman; ahpw se kamehlele me amwail widing me doareikumwail sang nait kedlahs kan. Kilang, iei amwail perehpen mwaremware kan oh noumwail mehn sansar kan me doareikumwailla.

10 Eri met ahnsou me Saraemna kaimwiseklahr koasoi pwukat, Moronai kapwurehiong Saraemna kedlahs oh dipwisou en mahwen kan me e ale, oh nda: Kilang, kitail pahn kaimwisekehla uhpene wet.

11 Met I sohte kak wekidala dahme I ndahier, eri nin duwen Kauno e ketin ieias, kumwail sohte pahn mweselda ihte ma kumwail pahn kahukihla me kumwail sohte pahn pwurodohng mahweniong kiht. A pwehki amwail mihmi pahn at manaman se pahn kakerehdi ntahmwail nan pwehl, de kumwail pahn idawehn koasoandi me I kasaledahr.

12 Eri met ahnsou me Moronai koasoia mahsen pwukat, Saraemna ale nah kedlahso, oh e lingeringer pahn Moronai, oh e mwadangete tangalahng Moronai pwehn kemehla; ahpw ni ahnsou me e kihda nah kedlahs, kilang, emen nein Moronai sounpei ko pelehdiong kedlahso nan pwehlo, oh tupwasang mangileo; oh e pil pelehsang kilin moangen Saraemna oh e pwupwidi nan pwehlo. Oh Saraemna pweieksang irail kohlongala nanpwungen nah sounpei ko.

13 Kedekedeo sounpeio me kesihnen karani mwo, me pelehsang kilin moangen Saraemna, kolada kilin piten moangeo sang nan pwehlo, oh kihong ni imwin nah kedlahso, oh kasalehiong irail, ndindahiong irail ni ngihl laud:

14 Pwe duwen kilin moahnget me pwupwidi nan pwehl, me wia kilin moangen amwail kaun, iei duwen kumwail pahn pil pwupwidi ma kumwail sohte pahn wahdo noumwail dipwisou en mahwen kan oh kohkohla ni amwail wiahda inou en popohl.

15 Met irail me tohto, ahnsou me re rongehr koasoi pwukat oh kilang kilin moangeo ni kedlahso, re masepwehkada; oh irail me tohto kohdo oh pwilikihdi neirail dipwisou en mahwen ko mwohn Moronai, oh wiahda inou en popohl. Oh irail koaros me wiahda inouo mweimweida pwe re en kohkohla nan sapwtehno.

16 Eri kedekedeo Saraemna uhdahn lingeringerda, oh e kamwakidada luhwen sounpei ko re en lingeringerda, a sang ni ahr kehl koaros re peliankihda Mehn Nihpai kan.

17 Eri Moronai ahpw lingeringerda, pwehki en Mehn Leimen kan ahr keptakai; eri e ruwesehki nah aramas akan pwe re en mahweniong irail oh kemeirailla. Kedekedeo irail ahpw tepida kemeirailla; ei, oh Mehn Leimen ko pelianki neirail kedlahs kan oh arail kehl.

18 Ahpw kilang, sohte perehpen paliwararail oh moangerail akan sang nein Mehn Nihpai kedlahs keng kan; ei, kilang irail dokidi oh paldi, ei, oh mwadang pwupwikihdi nein Mehn Nihpai kedlahs kan; oh re tepda pwupwidi, duwen me nein Moronai sounpeio kohpadahr.

19 Eri ni ahnsou me Saraemna kilangada me irail koaros kereniongehr pahn kamakamala, e werikilahng Moronai oh inoukihong me ih oh nah aramas akan pahn wiahda inou ma re pahn mweidala irail me luhwe kan en mourla, oh me re sohte pahn pwurodohng mahweniong irail.

20 Kedekedeo Moronai ahpw pwurehng katokehdi ahr kemekemeirailla. Oh e ahpw kihsang nein Mehn Leimen dipwisou en mahwen kan; oh mwurin arail wiadahr inou en popohl ong ih re ahpw mweidohng irail en kohkohla nan sapwtehno.

21 Eri uwen tohtohn arail mehla kan, sohte me kak wadekedi pwehki uwen tohto ieu; ei, aramas ngedehrie sang rehn Mehn Nihpai ko oh pil Mehn Leimen ko mehla.

22 Kedekedeo irail ahpw kesehdiong paliwar en me mehla kan nan pihl en Saidon, oh re peila oh seridi wasa loal en nan kepin sehdo.

23 Oh sounpei en Nihpai kan, de nein Moronai sounpei kan, pwurala ni imwarail akan oh sapwarail akan.

24 A met kaimwiseklahr keisek waluhn sounpar en mwehin sounkopwung kan ong aramas en Nihpai kan. Eri met kaimwiseklahr poadoapoad en Alma, me ntingdi pohn pileit en Nihpai kan.