Pwuhk Sarawih kan
Alma 11


Iralaud 11

Koasoandi en Mwohni en Mehn Nihpai kan kawehwehda—Amulek akamaiong Sihesrom—Krais sohte pahn kamourala aramas akan nan diparail akan—Ihte me pahn sohsohki wehin nanleng me pahn komourla—Aramas koaros pahn iasadahng mour poatopoat—Sohte mehla mwurin Iasadao. Ele Sounpar 82 Mwohn Krais.

1 Eri e mi nan kosonned en Mosaia me emen emen aramas me pahn wia sounkopwung en kosonnedo, de me pilipilda en wia sounkopwung, e pahn kin ale isepe nin duwen ahnsou me e pahn wia doadoahk en kapwung irail akan me pahn kin kohdohng kopwung.

2 Met ma aramas men pahn pweipwand ong emen, oh e sohte kapwungala eh pweipwando, e pahn kedipada rehn sounkopwungo, oh sounkopwung kin doadoahngki eh manaman, oh kadarala pilismen kan rehn aramaso pwe en pakahrdo reh ni mwoahlo; oh e pahn kadeik aramaso nin duwen kosonnedo oh kadehde kan me kedipahda ih, oh aramaso pahn idihdiong en pwainla dahme e pweipwandkio, de eh kepwe kan pahn kohsang, de e pahn kasarehsang rehn aramas akan nin duwen lipirap men de mehn kulih.

3 Oh sounkopwungo kin ale isepe nin duwen ansou me e doadoahngki—sihnain en kohl ong rahn ehu, de sihnum en silper, me pahrekiong sihnain en kohl; oh met iei nin duwen kosonnedo me wiawihda.

4 Eri iet eden ehu ehu neirail kohl kan, oh neirail silper kan, nin duwen uwen pweine. Oh Mehn Nihpai kan me wiahda ahd akan, pwe re sohte kin doadoahngki wiepen wadawad en mwohni en mehn Suhs akan nan Serusalem; de pil sosohngpen dipwisou nin duwen en mehn Suhs akan; ahpw re wekidala wiepen arail wadawad oh sosohng, nin duwen madamadau oh irair en aramas akan, nan ehu ehu dih, loa lel mwehin sounkopwung kan, re ahpw koasoansoandier sang nanmwarki Mosaia.

5 Eri wiepen wadawad en mwohni—sihnain en kohl, sihon en kohl, soam en kohl, oh limna en kohl.

6 Sihnum en silper, amnor en silper, esrom en silper, oh ondai en silper.

7 Sihnum en silper ehu pahrekiong sihnain en kohl ehu, oh koaros kak alehda sosohng ehu en parli, oh pil sosohng ehu en werentuhk koaros.

8 Met uwen sihon en kohl ehu pahrekiong sihnain en kohl riau.

9 Oh soam en kohl ehu pahrekiong sihon en kohl riau.

10 Oh limna en kohl ehu pahrekiong koaros patpene.

11 Oh amnor en silper ehu pahrekiong sihnum en silper riau.

12 Oh esrom en silper ehu pahrekiong sihnum en silper pahieu.

13 Oh ondai en silper ehu pahrekiong koaros patpene.

14 Met iei wadawad en nempe tikitik kan en arail wadawad en mwohni—

15 Siplon ehu uwehte elep en sihnum en silper; eri, siplon ehu kak alehda elep en sosohng en parli.

16 Oh siplum ehu uwehte elep en siplan.

17 Oh luh ehu wehte elep en siplum.

18 Iei met nerail nempe kan, nin duwen arail kin wadawad mwohni.

19 Eri andian en kohl ehu uwehte siplon siluh.

20 Eri, uhdahn kahrepeteieu iei pwe irail en kepwehpwehla, pwe re kin ale iseparail nin duwen arail doadoahk, eri, irail kin kamwakidada aramas akan re en moromorada, oh wia soangen pingiping oh wiewia suwed koaros, pwe re en kak ahneki diren doadoahk, pwe re en kak ale mwohni nin duwen aramas kin leleki emen ni mwoalen kopwong me kin pwarada mwohrail; eri irail kin kamwakamwakid aramas akan re en uhwong Alma oh Amulek.

21 Oh Sihesrom menet tepida peidek rehn Amulek, ndinda: Ke kak sapeng ekei kalelapak me I pahn idek rehmw? Met Sihesrom emen ohl koahiek nan wiepen doadoahk en tepilo, pwe en kak kauwehla dahme mwahu; eri, e idek rehn Amulek: Ke kak sapeng kalelapangkan me I pahn kihong uhk?

22 Oh Amulek sapengkihong: Ei, ma iei kupwur en Ngehn en Kauno, me ieiang ie; pwe I sohte pahn nda mehkot me uhwong Ngehn en Kauno. Oh Sihesrom ahpw ndaiong ih: Kilang, iet ondai en silper weneu, oh mehkan koaros I pahn kihong uhk ma ke pahn lahlahwe ieias en Enihlap.

23 Amulek ahpw nda: Kowe seri en ehl, dahme ke kasongosongehkin ie? Ke sohte ese me aramas mour pwung sohte kin dukieng soangen kasongosongen?

24 Ke kamehlele me mie Koht? I ndaionguhk, Soh, ke ese me mie Koht, ahpw pwehki ke poakohng mwohni laudsang ih.

25 Oh met ke pitipitih ie mwohn Koht. Ke ndaiong ie—Kilang iet ondai weneu, me uwen mwohni laud, I pahn kihonguhk—ni omw koasoanehdier nan mohngiongomw me ke sohte pahn kihong ie; oh ihte me ke mwahuki me I en lahlahwe Koht mehlel oh ieiaso, pwe ke en kak kawehkiniehla. Oh met kilang, ke pahn ale isepen omw wiewia suwed lap wet.

26 Oh Sihesrom idek reh: Ke nda me mie Koht mehlel oh ieias men?

27 Oh Amulek nda: Ei, Mie Koht mehlel oh ieias men.

28 Sihesrom ahpw idek: Mie Koht tohtohsang emen?

29 Oh e sapengki, Soh.

30 Sihesrom eri pwurehng idek reh: Ia mwomwen omw ese mepwukat?

31 Oh e nda: Tohnleng men me kasalehiong ie.

32 Oh Sihesrom pwurehng nda: Ihs ih me pahn kohdo? Iei ih Sapwellimen Kohto?

33 E ahpw sapeng nda, Ei.

34 Oh Sihesrom pwurehng idek: E pahn komourala sapwellime aramas akan nan diparail akan? Oh Amulek sapeng oh nda: I pahn ndaionguhk me e sohte kak, pwe e apwal ong ih en kasapwungehla sapwellime mahsen.

35 Sihesrom eri ndaiong aramas akan: Kumwail kilang oh tamataman mepwukat; pwe e nda me mie Koht emen; ahpw e nda me Sapwellimen Kohto pahn ketido, ahpw e sohte pahn kamourala sapwellime aramas akan—duhwete me e ahneki manaman en ruwese Koht.

36 Eri met Amulek pwurehng ndaiong: Kilang ke likamw, pwe ke nda me I koasoia me I ahneki manaman en ruwese Koht pwehki I nda me e sohte pahn komourala sapwellime aramas akan nan diparail akan.

37 Oh I ndaionguhk me e sohte kak kamourirailla nan diparail akan; pwe I sohte kak kasapwungehla sapwellime mahsen, oh e ketin mahsanih me sohte mehkot samin kak sohsohki wehin nanleng; eri, ia mwomwen omw pahn kak komourla, ma ke pahn sohsohki wehin nanleng? Eri, kumwail sohte kak komourla nan dipamwail akan.

38 Met Sihesrom pwurehng nda: Sapwellimen Kohto iei ih Sahm Soutuko?

39 Oh Amulek ahpw sapengkihong: Ei, ih me iei Sahm Soutuk en nanleng oh sampah, oh audapara koaros; ih me iei tapi oh imwi, me tepin oh me imwilahn mehkoaros;

40 Oh e pahn ketidihdo pohn sampah oh doarehla sapwellime aramas akan; oh e pahn kapwukoahki ih diparail akan me kamehlele mwareo; oh irail pwukat me pahn alehdi mour soutuk, oh komourla sohte pahn kohdo likin met.

41 Eri me suwed kan pahn duduwehte ni sohte poadoandoarla wiawihong irail, ihte me re pahn iang pitsang sahl en mehla; pwe kilang, ahnsou pahn kohdo me koaros pahn iasada sang mehla oh kesihnen mwohn silangin Koht, oh pakadeingkihda arail doadoahk kan.

42 Eri, mie mehla ehu me kahdaniki mehlahn paliwar; oh mehlahn Krais pahn sapwadada selipen mehlahn paliwar, kahrehda koaros pahn iasada sang mehlahn paliwar.

43 Ngehno oh paliwaro pahn pwurpene ni mwohmw unsek; peh oh neh koaros oh kakon kan pahn kopwurupwurlahng nan dewe, iei duwehte mwomwetail ahnsou wet; oh kitail pahn kohdo uh mwohn silangin Koht, oh kitail pahn ese duwehte atail ese ahnsou wet, oh tamataman ni sansal dipatail kan koaros.

44 Eri, kopwurupwurpenehn paliwar wet pahn wiawi ong aramas koaros, ong me mah oh me pwulopwul, me sensel oh me saledek, ong ohl oh lih, ong me suwed kan oh me mwahu kan; oh iei sohte apwoat pitenmoangerail akan pahn salongala; ahpw soahng koaros pahn kopwurupwurlahng nan dewe ni unsek, duwehte ansou wet, de nan paliwar, oh pahn kohdo oh kopwung mwohn mwoalen kopwung en Krais Iehroso, oh Koht Sahmo, oh Ngehn Sarawi, me iei Koht Soutuk tehmen, pwe re en pakadeingkihda arail wiewia kan, ma wiewia mwahu de ma wiewia suwed.

45 Met, kilang, I ndaiong kumwailehr duwen mehlahn paliwar, oh pil duwen iasadahn paliwar wet. I ndaing kumwail me paliwaratail kan pahn iasadahng mour poatopoat, me iei sang mehla, iei sang tepin mehla kolahng mour, pwe re en sohla kak pwurehng mehla; ngenerail akan pwurehng patehng paliwarerail kan, sohte pahn pwurehng tohrohrpeseng; eri waro kieweklahng palingehn oh poatopoat, me sohte pahn kak pwurehng mwerpeseng.

46 Eri met, ahnsou me Amulek kanekelahr mahsen pwukat aramas akan pwurehng tepida pwuriamweiki, oh pil Sihesrom tepida rerrer. Oh met kaimwisekalahn mahsen en Amulek, de ih uwen koaros me I ntingihedi.