1 Kedekedeo re ahpw koasonehdi soun silasil kan re en sile Mehn Leimen me selidi kan, oh idingkin irail en kohla sarepidi arail mehlah kan, ei, oh pil ahn Mehn Nihpai mehla kan me kamakamala; oh Moronai koasonehdi ohl akan me pahn sile irail nan ahnsou me re wie doadoahk.

2 Oh Moronai kohla nan kahnihmw en Miulek iangahki Lihai, oh kaunda kahnihmwo oh kihong Lihai en apwalih. Met kilang, Lihai wia ohl men me kin ieiang Moronai ni pali laud en eh mahwin kan; oh e wia ohl men me duwehte Moronai, oh emente kin nsenohki silepen emen; ei, ira kin poakpene, oh aramas en Nihpai kan koaros pil poakehng ira.

3 Kedekedeo mwurin Mehn Leimen kan ahr kanekehla sarepidi arail mehla kan oh pil ehn Mehn Nihpai kan mehla kan, re ahpw pwurehng pwurala nan sahpw en Rahk; oh Dienkom, sang pahn kaweid en Moronai, ndahiong irail me pahn tepida doadoahk en weirada warawar kapilpene sahpwo, de kahnihmw en Rahk.

4 Oh e pil ndahiong irail me re pahn wiahda kehl tuhkeh kan ni masloalehn warawar akan; oh irail kesehda pwehl sang nan warawaro kohda ni kehl tuhke ko; oh met re wiahiong Mehn Leimen kan irail en doadoahk lao irail kapilkipene kahnihmw en Rahk kehl tuhke kehlail oh pwehl, me ileile mehlel.

5 Oh kahnihmw wet wiahla wasahn silepe kehlail kowahlap sang ahnsouo kohla; oh nan kahnihmw wet re kin sinsile Mehn Leimen me selidi kan; iei, nan kehl me re wiahiong irail en wiahda sang pein pehrail kan. Met Moronai idihdiong en wiahiong Mehn Leimen kan en doadoahk, pwehki e kin mengei re en sile irail ni ahnsou me re wie doadoahk; oh e anahne nah sounpei kan koaros ahnsou me e pahn kin mahwiniong Mehn Leimen kan.

6 Kedekedeo Moronai powehdier ehu nein Mehn Leimen kan pwihn en sounpei kehlail, oh kalowehdier kahnihmw en Miulek, me wia ehu wasa me keieu kehlail me Mehn Leimen kan kalowehdi nan sapwen Nihpai; oh me e pil wiadahr ehu wasahn silepe kehlail pwe en koledi me selidi kan.

7 Kedekedeo e ahpw uhdi sang song mahwiniong Mehn Leimen kan nan pahro, ahpw koadoadoahke nah ohl akan re en kaukaunop ong mahwin, ei, oh kaukaunopada wasahn sileparail kan pwe re en kak perehsang irail Mehn Leimen kan, ei, oh pil kapitasang neirail lih akan oh seri kan nan lehk oh kahpwal, oh sewesehki neirail sounpei kan kenerail mwonge.

8 Kedekedeo nein Mehn Leimen sounpei kan, me mih palieir ni irepen sehd en palikapi, pwehki Moronai e sohte mih mwo ekei Mehn Nihpai kan wiahda mwekid sapairair, me kahrehda uhpene nan pwungarail, me kahrehda Mehn Leimen kan kalowehdi ekei ehn Mehn Nihpai kan wasa, ei, lao irail kalowehdi ekei kahnihmw nan sahpwo.

9 Oh met pwehki wiewia suwed nan pwungarail, ei, pwehki arail kin pingiping oh sohte loaloapwoatpene nan pwungarail re kihong irail nan irair keper mehlel.

10 Oh met kilang, mie mehkot me I men koasoia duwen aramas en Amon kan, me ni tapio re wia Mehn Leimen; ahpw sang Amon oh riehkan, de sang ni manaman oh mahsen en Koht, re weliakapwala ong Kauno; oh re kohdihdo nan sahpw en Saraemla, oh sang ahnsouo kohdo Mehn Nihpai kan kin sinsile irail.

11 Oh pwehki arail inou re sohte kin alehda dipwisou en mahwin kan pwe re en pelian riarail kan; pwe re wiahda inou ehu me re sohte pahn pwurehng kakerehdi nta; oh nin duwen arail inouo re pahn mehla; ei, re udahn pahn mweidala pein irail re en pwupwidiong nan pehn riarail kan, ma sohte Amon oh riehkan ahr poakeirailla oh ahneki limpoak kowahlap ong irail.

12 Oh iei kahrepe wet me re kohkihdihdo nan sahpw en Saraemla; oh Mehn Nihpai kan kin sinsile irail.

13 Ahpw kedekedeo ahnsou me re kilangada keper, oh kahpwal tohto oh lokolok kan me Mehn Nihpai kan ahneki pwehki irail, re mwekidiki ni ahr poakehla oh inangihda alehda dipwisou en mahwin pwe re en doare arail wehi.

14 Ahpw kilang, ni ahnsou me re pahn alehda neirail dipwisou en mahwin kan, irail meleileidi sang ni kaweid en kangong en Ilemen oh riehkan, pwe kereniong re pahn kawehla inouo me re wiahda.

15 Oh Ilemen periki pwe ma re pahn wia a re pahn kakete ohkihla ni palingehn; eri irail koaros me wiahda inou wet idihdiong en kilang riarail kan ahr mih nan arail lokolok kan, nan irair keper en ahnsou wet.

16 Ahpw kilang, kedekedeo mie neirail diren pwutak kei, me sohte iang inoukihda me re sohte pahn alehda dipwisou en mahwin kan pwe re en doarehla pein irail sang ahr imwintihti kan; eri re pokonpene ahnsou wet, koaros me kak alehda dipwisou en mahwin, oh re kin ndahki irail Mehn Nihpai.

17 Oh alehda inou me re pahn peiki mour saledek en Mehn Nihpai kan, ei, en doare sahpwo sang tohnmeteikihla arail mour kan; iei, re inoukihda me re sohte pahn mweidala arail mour saledek, ahpw re pahn pei nan irair koaros pwe re en doarehla Mehn Nihpai kan oh pein irail sang nan kalidu.

18 Met kilang, irail pwutak pwulopwulko meh riekid, me wiahda inou wet oh alehda dipwisou en mahwin pwe re en doare arail wehi.

19 Oh met kilang, irail sohte wia aramas soh katepe ong Mehn Nihpai kan mwowe, pil duwehte ahnsou wet irail wia sawas laud; pwe re alehda neirail dipwisou en mahwin kan, oh re men Ilemen en wia arail kaun.

20 Oh re wia pwutak pwulopwul kei, oh re kin kasalehda arail eimah mehlel, oh pil kehlail oh pwersek; ahpw kilang, kaidehn ihte met—re wia mwahnakapw me kin mehlel ahnsou koaros nan soahng koaros me kelikilikiong irail.

21 Ei, re wia mwahnakapw me kin mehlel oh marain, pwe re kaweidkihda re en kin kapwaiada sapwellimen Koht kosonned akan oh weweidiki mour pwung mwohn sihlangi.

22 Kedekedeo Ilemen kahre nah sounpei mwahnakapw pwulopwul riekid ko oh karis kohla, pwe re en sewese aramas en ni irepen sahpw en palieir limwahn sehd en palikapi.

23 Oh met kaimwisekalahr pahr kerieisek waluh en mwehin sounkopwung kan ong aramas en Nihpai kan.