1 Oh met kedekedeo ni tepidahn pahr kerieisek duwau en mwehin sounkopwung kan, Amoron ahpw kadarala rehn Moronai ah ineng en kaweliali me selidi kan.

2 Kedekedeo Moronai men peren kowahlap pwehki pekipek wet, pwe e inangih me sawas en mwenge kan me kin kohieng Mehn Leimen me selidi kan en kohieng pein nah aramas; oh e pil inangih pein nah aramas en kakehlaka nah sounpei kan.

3 Met Mehn Leimen kan alehier lih oh seri tohto, oh sohte emente lih de seri men nan pwungen irail akan me selidi rehn Moronai, de me selidi kan me Moronai koledi; eri Moronai koasonehdi koasondi ehu pwe en kak kapwurehdo Mehn Nihpai me selidi kan sang rehn Mehn Leimen kan ni eh pahn kak.

4 Eri e ntingihda kisinlikou ehu, oh kadarala sang rehn nein Amoron laduo, laduohte me wahdo kisinlikouo rehn Moronai. Met iei mahsen kan me e ntingihla rehn Amoron, ndinda:

5 Kilang, Amoron, I ntingwei rehm ekis me pid duwen mahwin wet me kumwail wiahiongehr nei aramas akan, de me riomw ohlo wiahiong kihtehr, oh me ke pil koasonehdi me ke pahn uhsehlahte mwurin eh mehla.

6 Kilang, I pahn ekis ndaionguhk duwen kopwung en Koht, oh kedlahs en sapwellime engieng manamano, me tentenek pohmw ma ke sohte pahn koluhla oh kapweiekwei noumw sounpei kan nan pein sapwemwail kan, de nan sahpw en amwail sohso kan, me iei sahpw en Nihpai.

7 Ei, I pahn ndaionguhk mepwukat ma ke pahn kak kapwaiada; ei, I pahn ndaionguhk duwen ehl kepero me awiawih pwe en alehdi soangen soun kamaramas duwehte kowe oh riomwo me kumwa wiahier, ihte ma ke koluhla oh kapweiekwei ahmw mwekid en kamaramas suwed kan, oh pwurowei iangahki noum sounpei kan nan pein sapwemwail kan.

8 Ahpw pwehki pak ehu ahmw kasohwehier mepwukat, oh mahwiniong aramas en Kauno, iei I pil kasik me ke pahn pwurehng wia met.

9 Oh met kilang, se kaunopadahr sen alehiukidi; ei, oh ma ke sohte pahn kapweiekwei ahmw koasondi kan, kilang, ke pahn waikidi pohmw engieng en Koht me ke kasohwehu, iei pwe en kamwomwuhkala.

10 Ahpw, nin duwen Kauno eh ketin ieias, nait sounpei kan pahn kohwehnguhk ihte ma ke pahn pweiekwei, oh ahnsou keren mehla pahn pwerekuhk, pwe se pahn kapwurehdo aht kahnihmw kan oh sapwat akan; ei, oh se pahn kolokolete aht pelien lamalam oh doadoahk en aht Koht.

11 Ahpw kilang, ong ie e mwomwen me I wie koasoakoasoiwei ni sohte katepe; de ong ie e mwomwen me ke wia seri en ehl; eri I pahn ritingidi nei kisin likou wet ni ei pahn ndaionguhk me I sohte pahn kaweliali me selidi, ihte sang ni koasondi ma ke pahn mweidedo ohl emen oh ah pwoud oh nah seri kan, ong emen me selidi; ma iei ih wiepehn me ke pahn wia, a I pahn kaweliali.

12 Oh kilang, ma ke sohte pahn wia met, I pahn kohdonguhk iangahki nei sounpei kan; ei, iei I pahn pil kihong nei lih akan oh seri kan dipwisou en mahwin, oh I pahn kohwehnguhk, oh I pahn idawehnuhk lao lel nan pein sapwomw, me iei tepin sahpw en atail sohso; ei, oh e pahn nta ong nta, ei, mour ong mour; oh I pahn mahwinionguhk lao ke pahn kamwomwala sang pohn sampah.

13 Kilang, I mih nan ei lingeringer, oh pil nei aramas akan; kumwail rapahki en kemeikihtala, ah kiht se kin rapahkihte sen doareikihtla. Ahpw kilang, ma ke pahn rapahki ke en kaweikihtla laud se pahn rapahki sen kamwomwuhkala; ei, oh se pahn rapahkihwei sahpwato, sahpwatail tepin sahpw en sohsohu.

14 Met I ritingidi nei kisin likouwet. Ngehi Moronai; I wia emen kaun en aramas en Mehn Nihpai kan.

15 Met kedekedeo Amoron, ahnsou me e alehdi kisin likou wet, e lingeringerkihda; oh e ntingihda pil ehu kisin likou ong Moronai, oh iet koasoi kan me e ntingihdi, ndinda:

16 Ngehi iei Amoron, nanmwarki en Mehn Leimen kan; ngehi iei rien Amelekaia pwutak me ke kemehla. Kilang, I pahn dupukehnguhk eh mehla, ei, oh I pahn kohwehnguhk iangahki nei sounpei kan pwe I sohte masak ahmw koasoi en kamasepwehk kan.

17 Pwe kilang, ahmw pahpahko wiahda sapwung ong riarail ohl kan, lao re pirapahsang arail pwuhng en koapwoarment ni eh koasondi irail me pwukoaki.

18 Oh met kilang, ma ke pahn pwilikihdi noumwail dipwisou en mahwin kan, oh mweidehng kumwail pahn manaman ong irail me ahneki pwuhng en koapwoarment, ma met pahn wiawi I pahn wiahda nei aramas akan re en pwilikihdi neirail dipwisou en mahwin kan oh pahn uhdihsang mahwin.

19 Kilang, ke wia koasoi en kamasepwehk ong ngehi oh nei aramas akan; ahpw kilang, se sohte masak ahmw koasoi kan.

20 Ahpw, I pahn mweidada kaweliali en me selidi nin duwen ahmw peki, sang ni peren, pwehki I men kanaidi kanat mwongehka ong nei ohl en mahwin kan; oh se pahn wia mahwin me pahn poatoapoat, pwe sen kak kiheng Mehn Nihpai pahn aht manaman de ong arail sohrala poatoapoat.

21 Oh nin duwen Kohto me kumwail nda me se kasohwe, kilang, se sohte ese soahng aramas sarawien; de pil kumwail; ahpw ma mie soahngen aramas sarawien, se sohte ese ahpw mwein e kapikada kumwail oh pil kiht.

22 Oh ma e pahn mehlel me mie tepel oh ehl, kilang e sou pahn kadaruhkala ke en iang mih wasahu rehn riei pwutak me ke kemehlahu, me ke kosoia me e kohla nan soangen wasahn? Ahpw kilang mepwukat sohte katepe.

23 Ngehi Amoron, oh I wia kadaudok en Soram, me ahmwail pahpako iding oh wahsang nan Serusalem.

24 Oh kilang met, Ngehi emen mehn Leimen me loalap; kilang, mahwin wet e wiawi pwe sen dupuk sapwung kan me re lokolok ki, oh en kolokolete oh alehdi arail pwuhng en koapwoarment; oh I kaimwsekala nei kisin likou ong Moronai.