အယ်လမာ ၃၈

အယ်လမာမှ သူ၏သား ရှိဗလုန်သို့ မိန့်မှာချက်များ။

အခန်းကြီး ၃၈ ဖွဲ့စည်းပါဝင်၏။

အခန်းကြီး ၃၈

ရှိဗလုန်သည် ဖြောင့်မတ်ခြင်းကြောင့် ညှဉ်းဆဲခံရ၏—ကယ်တင်ခြင်းသည် လောက၏အသက်နှင့် အလင်းဖြစ်သူ ခရစ်တော်၌ရှိ၏—သင်တို့၏ ကိလေသာမှန်သမျှကို ချုပ်တည်းလော့။ ဘီစီ ၇၄ ခန့်။

၁ ငါ့သား၊ ငါ၏စကားများကို နားညောင်းလော့။ အကြောင်းမူကား၊ ငါသည် ဟေလမန်ကို ဆိုခဲ့သကဲ့သို့ပင်၊ သင့်ကို ဆိုသည်မှာ၊ သင်သည် ဘုရားသခင်၏ပညတ်တော်များကို စောင့်ထိန်းသမျှ ထိုပြည်၌အောင်မြင်လိမ့်မည်။ ဘုရားသခင်၏ပညတ်တော်များကို မစောင့်ထိန်းသမျှ သူ၏မျက်မှောက်မှ ပယ်ရှင်းခံရလိမ့်မည်။

၂ ယခုမူကား၊ ငါ့သား၊ သင်၏တည်ငြိမ်မြဲမြံခြင်းနှင့် ဘုရားသခင်အပေါ် သစ္စာရှိခြင်းတို့ကြောင့်၊ ငါသည် သင့်၌ ကြီးစွာသောဝမ်းမြောက်ခြင်းရှိမည့်အကြောင်း ယုံကြည်၏။ အကြောင်းမူကား၊ သင်သည် ငယ်ရွယ်စဉ်ကပင် သင်၏ဘုရားသခင်ကိုယ်တော်ရှင်ကို မျှော်လင့်ခြင်း စတင်ခဲ့လေပြီဖြစ်၍၊ ထိုကဲ့သို့ပင်၊ သူ၏ပညတ်တော်များကို စောင့်ထိန်းရာ၌ ဆက်၍ရှိမည်ဖြစ်ကြောင်း ငါမျှော်လင့်၏။ အကြောင်းမူကား၊ အဆုံးတိုင်အောင် တည်ကြည်သူသည် ကောင်းချီးခံစားရ၏။

၃ ငါ့သား၊ သင့်ကို ငါဆိုသည်ကား၊ သင်၏သစ္စာရှိခြင်းနှင့် သင်၏လုံ့လဝီရိယရှိခြင်း၊ ဇော်ရမ်လူမျိုးတို့၌ သင်၏သည်းခံခြင်းနှင့် စိတ်ရှည်ခြင်းတို့ကြောင့် ငါသည် သင့်၌ ကြီးစွာသော ဝမ်းမြောက်ခြင်း ရှိနှင့်ပြီးလေပြီ။

၄ အကြောင်းမူကား၊ သင်သည် အချည်အနှောင်များ၌ ရှိခဲ့ကြောင်း ငါသိ၏။ ထိုမှတစ်ပါး၊ သင်သည် နှုတ်ကပတ်တော်ကြောင့်၊ ကျောက်ခဲနှင့် အပစ်ခံခဲ့ရသည်ကိုလည်း ငါသိ၏။ သင်သည် ကိုယ်တော်ရှင် သင်နှင့်အတူရှိတော်မူလေသောကြောင့်၊ ဤအရာခပ်သိမ်းတို့ကို သည်းခံခြင်းဖြင့် ခံယူခဲ့၏။ ယခုမူကား၊ သင့်ကို ကိုယ်တော်ရှင်ကယ်လွှတ်တော်မူခဲ့ကြောင်း သင်သိပေ၏။

၅ ယခုမူကား၊ ငါ့သား၊ ရှိဗလုန်၊ သင်သည် ဘုရားသခင်ကို ကိုးစားသမျှ၊ သင်၏စုံစမ်းခံရခြင်းများ၊ သင်၏ဒုက္ခများနှင့် သင်၏ဆင်းရဲဒုက္ခများမှ ထိုကဲ့သို့ပင် များစွာကယ်လွှတ်ခံရမည်၊ နောက်ဆုံးသောနေ့၌ ချီးမြှောက်တော်မူခြင်း ခံရမည်ဖြစ်ကြောင်းကိုလည်း သတိရစေရန် ငါအလိုရှိ၏။

၆ ယခုတွင်၊ ငါ့သား၊ ငါသည် ဤအရာတို့ကို ကိုယ်အလိုအလျောက် သိသည်ဟု သင် ထင်မှတ်စေရန် အလိုမရှိ။ သို့ရာတွင်၊ ငါ့ကိုယ်ထဲ၌ရှိသည့် ဘုရားသခင်၏ဝိညာဉ်တော်က ဤအရာတို့ကို ငါ့အား ဖော်ပြတော်မူ၏။ အကြောင်းမူကား၊ ငါသည် ဘုရားသခင်ဖြစ်ဖွားစေတော်မူခြင်း မရှိလေလျှင်၊ ဤအရာတို့ကို သိရမည်မဟုတ်။

၇ သို့ရာတွင်၊ ရှုလော့၊ ကိုယ်တော်ရှင်သည် သူ၏ ကြီးစွာသော ကရုဏာတော်ဖြင့် သူ၏ကောင်းကင်တမန်ကို စေလွှတ်တော်မူခဲ့သည်မှာ သူ၏လူမျိုးတို့၌ ဖျက်ဆီးခြင်းအမှုကို ငါရပ်တန့်ရမည့်အကြောင်း ငါ့ကို ဟောကြားစေခြင်းငှာဖြစ်၏။ ငါသည် ကောင်းကင်တမန်ကို မျက်နှာချင်းဆိုင်၍ မြင်ရ၏၊ သူသည်လည်း ငါနှင့် စကားမြွက်ဆို၏၊ သူ၏အသံသည်လည်း မိုးချုန်းသံကဲ့သို့ ဖြစ်၍၊ မြေကြီးတစ်ခုလုံးကို လှုပ်ခဲ့၏။

၈ ဤသို့အားဖြင့်အချိန်တန်လာသောအခါ၊ ငါသည် ငါ့စိတ်ဝိညာဉ်၏ အခါးဆုံးဖြစ်သည့် နာကျင်မှုနှင့် ပြင်းစွာသောဝေဒနာတို့ဖြင့် သုံးရက်နှင့် သုံးညတိုင်ရှိခဲ့၏။ ကိုယ်တော်ရှင်ယေရှုခရစ်တော်ထံသို့ ကရုဏာတော်ကို တောင်းလျှောက်ခြင်း မတိုင်မီ အထိ ငါ၏အပြစ်များမှ လွှတ်ခြင်းကို မရရှိခဲ့စဖူး။ သို့ရာတွင်၊ ရှုလော့၊ ငါသည် သူ့ထံသို့ တောင်းလျှောက်၍၊ ငါ၏စိတ်ဝိညာဉ် အတွက် ငြိမ်းချမ်းခြင်းကို တွေ့ရှိ၏။

၉ ယခုမူကား၊ ငါ့သား၊ သင်သည် ဥာဏ်ပညာကို သင်ယူနိုင်စေခြင်းငှာလည်းကောင်း၊ ခရစ်တော်၌နှင့် ခရစ်တော်အားဖြင့်မှတစ်ပါး၊ လူသားကယ်တင်ခြင်းသို့ ရောက်နိုင်ရာ၊ အခြားလမ်း သို့မဟုတ် နည်းလမ်းတစ်ခုမျှမရှိကြောင်းကို ငါ့ထံမှ သင်ယူနိုင်စေခြင်းငှာလည်းကောင်း ဤအရာကို ငါပြောပြလေပြီ။ ရှုလော့၊ သူသည် လောက၏ အသက်နှင့် အလင်းဖြစ်တော်မူ၏။ ရှုလော့ သူသည် သမ္မာတရားနှင့် ဖြောင့်မတ်ခြင်းနှုတ်ကပတ်တော်ဖြစ်၏။

၁၀ ယခုမူကား၊ သင်သည် နှုတ်ကပတ်တော်ကို သွန်သင်ပေးစပြုလေသည့်အတိုင်း၊ ထိုကဲ့သို့ပင်၊ ဆက်၍သွန်သင်ပေးစေရန် ငါအလိုရှိ၏။ သင်သည် အရာရာ၌ လုံ့လဝီရိယရှိစေရန်နှင့် ဣန္ဒြေစောင့်စေရန်လည်း ငါအလိုရှိ၏။

၁၁ သင်သည် မာနတရားသို့ ဘဝင်မမြင့်ခြင်းငှာ ဂရုပြုလော့။ ထိုမှတစ်ပါး၊ သင်သည် သင်၏ကိုယ်ပိုင်ဉာဏ်ပညာ၌လည်းကောင်း၊ သင်၏ကိုယ်ပိုင်ခွန်အားများစွာ အကြောင်းကိုလည်းကောင်း မဝါကြွားခြင်းငှာ ဂရုပြုလော့။

၁၂ ရဲရင့်ခြင်းကို အသုံးပြုလော့၊ သို့ရာတွင် အပေါ်စီးဖြင့် ဆက်ဆံသောစိတ်မရှိနှင့်။ သင်သည် ချစ်ခြင်းနှင့် ပြည့်စေခြင်းငှာ သင်၏ကိလေသာမှန်သမျှတို့ကို ချုပ်တည်းရမည့်အကြောင်း ဂရုပြုလော့။ သင်သည် ပျင်းရိခြင်းကို ရှောင်ကြဉ်ရမည့်အကြောင်း ဂရုပြုလော့။

၁၃ ဇော်ရမ်အမျိုးသားတို့ဆုတောင်းသကဲ့သို့ ဆုမတောင်းနှင့်။ အကြောင်းမူကား၊ သူတို့သည် လူကြားစေရန်နှင့် သူတို့၏ဉာဏ်ပညာကို ချီးမွမ်းခံရစေရန် ဆုတောင်းကြောင်း သင် သိမြင်ထားလေပြီ။

၁၄ အို ဘုရားသခင် အကျွန်ုပ်တို့သည် အကျွန်ုပ်တို့၏ ညီအစ်ကိုများထက် သာ၍ကောင်းမြတ်သောကြောင့် ကိုယ်တော်ကို အကျွန်ုပ်ကျေးဇူးတော်ချီးမွမ်းပါ၏ဟု မဆိုနှင့်။ သို့ရာတွင်၊ အို ကိုယ်တော်ရှင် အကျွန်ုပ်၏မထိုက်တန်ခြင်းကို ခွင့်လွှတ်တော်မူပါ။ အကျွန်ုပ်ညီအစ်ကိုများကိုလည်း ကရုဏာတော်ဖြင့် အောက်မေ့တော်မူပါဟုသာ ဆိုလော့—ထိုမှတစ်ပါး၊ သင်၏မထိုက်တန်ခြင်းကို ဘုရားသခင်ရှေ့၌ ခပ်သိမ်းသောကာလတို့၌ အသိအမှတ်ပြုလော့။

၁၅ ကိုယ်တော်ရှင်ကလည်း သင်၏စိတ်ဝိညာဉ်ကို ကောင်းချီးပေးတော်မူ၍၊ နောက်ဆုံးသောနေ့တွင်၊ သူ၏နိုင်ငံတော်ထဲ၌ ငြိမ်းချမ်းစွာထိုင်စေရန်၊ သင့်ကို လက်ခံတော်မူပါစေ။ ယခုတွင်၊ ငါ့သား၊ ဤလူတို့ထံ သွား၍ နှုတ်ကပတ်တော်ကို သွန်သင်လော့။ သမ္မာသတိရှိလော့။ ငါ့သား၊ မင်္ဂလာရှိပါစေ။