အယ်လမာ ၁၃

အခန်းကြီး ၁၃

လူယောက်ျားတို့သည် သူတို့၏ကြီးစွာသောယုံကြည်ခြင်းနှင့် ကောင်းမြတ်သောအကျင့်များကြောင့်၊ ယဇ်ပုရောဟိတ်မင်းများအဖြစ် ခေါ်သွင်း ခံရကြ၏—သူတို့သည် ပညတ်တော်တို့ကို သွန်သင်ပေးရမည်—ဖြောင့်မတ်ခြင်းအားဖြင့်၊ သူတို့ကို သန့်ရှင်းစင်ကြယ်စေ၍၊ ကိုယ်တော်ရှင်၏ချမ်းသာထဲသို့ ဝင်ကြ၏—မေလခိဇေဒက်သည် သူတို့အထဲမှ တစ်ဦးဖြစ်၏—ကောင်းကင်တမန်တို့သည် ဝမ်းသာစရာသတင်းကို ထိုပြည်တစ်လျှောက်၌ ဟောပြောလျက်ရှိကြ၏—ခရစ်တော်၏အစစ်အမှန်ကြွလာတော်မူခြင်းကို သူတို့ဟောပြောလိမ့်မည်။ ဘီစီ ၈၂ ခန့်။

၁ ထိုမှတစ်ဖန်၊ ငါ၏ညီအစ်ကိုတို့၊ ကိုယ်တော်ရှင်ဘုရားသခင်က သူ၏သားသမီးတို့အား ဤပညတ်တော်များကို ပေးသည့်ကာလဆီသို့ သင်တို့၏စိတ်ကို ငါပြညွှန်လို၏။ ထို့အတူ၊ ဤအရာတို့ကို လူတို့အား သွန်သင်ပေးစေရန် ကိုယ်တော်ရှင်ဘုရားသခင်သည် မိမိသားတော်၏ အသင်းအတိုင်းဖြစ်သည့်၊ မိမိ၏သန့်ရှင်းသောအသင်းအတိုင်း၊ ယဇ်ပုရောဟိတ်များ ခန့်အပ်တော်မူခဲ့သည်ကို သင်တို့အောက်မေ့စေရန် ငါအလိုရှိ၏။

၂ နည်းလမ်းတစ်ခု၊ ထိုနည်းလမ်းအားဖြင့်၊ ရွေးနှုတ်ခြင်းအတွက် သူ၏သားတော်အား အဘယ်သို့သောနည်းလမ်းအားဖြင့် လူတို့မျှော်လင့်ရမည့်အကြောင်း သိနိုင်ကြစေခြင်းငှာ၊ သူ့သားတော်၏အသင်းအတိုင်း၊ ထိုယဇ်ပုရောဟိတ်များကို ခန့်ထားတော်မူလေ၏။

၃ ဤအရာသည်ကား၊ သူတို့ကို ခန့်အပ်ထားတော်မူခဲ့သည့် နည်းလမ်းလည်းဖြစ်၏—သူတို့၏အလွန်ကြီးစွာသောယုံကြည်ခြင်းနှင့် ကောင်းမြတ်သောအကျင့်များကြောင့်၊ ဘုရားသခင်၏ ကြိုတင်သိမြင်နိုင်သော ဉာဏ်တော်အတိုင်း၊ ကမ္ဘာတည်ကတည်းက ခေါ်သွင်းတော်မူလျက်၊ ပြင်ဆင်ထားတော်မူ၏။ ရှေးဦးစွာ၌၊ ကောင်းမှုကိုဖြစ်စေ၊ မကောင်းမှုကိုဖြစ်စေ ရွေးချယ်ရန် အခွင့်ပေးထားတော်မူ၏။ ထို့ကြောင့်၊ သူတို့သည် ကောင်းမှုကို ရွေးချယ်လျက်၊ အလွန်ကြီးစွာယုံကြည်ခြင်းကို ပြုလျက်၊ သန့်ရှင်းသော အမှုတော်ဆောင်တာဝန်နှင့်၊ အထူးသဖြင့်၊ ထိုကဲ့သို့သောသူများအတွက်၊ အသင့်ပြင်ဆင်ထားသောရွေးနှုတ်ခြင်းအတိုင်း၊ အတူပြင်ဆင်ထားတော်မူသည့် ထိုသန့်ရှင်းသောအမှုတော်ဆောင်တာဝန်နှင့် ခေါ်သွင်းတော်မူခြင်းကို ခံရ၏။

၄ ထိုကဲ့သို့အားဖြင့်၊ ဤသန့်ရှင်းသောအမှုတော်ဆောင်တာဝန်သို့ ခေါ်သွင်းတော်မူခြင်းကို ခံရ၍၊ အခြားသောသူတို့သည် စိတ်နှလုံး၏မာကျောခြင်းနှင့်၊ အသိစိတ်ကွယ်ခြင်းကြောင့်၊ ဘုရားသခင်၏ဝိညာဉ်တော်ကို ငြင်းပယ်လျက်ရှိစဉ်တွင်၊ ဤအရာကြောင့်မဟုတ်လေလျှင်၊ သူတို့၏ညီအစ်ကိုတို့ကဲ့သို့ပင် ကြီးစွာသောအထူးအခွင့်အရေးများ ရရှိနိုင်ကြလေမည်။

၅ သို့မဟုတ်၊ အချုပ်အားဖြင့်၊ ရှေးဦးစွာ၌ သူတို့ညီအစ်ကိုများကဲ့သို့ပင်၊ တူညီသောအခြေအနေ၌ ရှိ၍၊ ထိုကဲ့သို့အားဖြင့်၊ မိမိတို့စိတ်နှလုံးကို မာကျောစေခြင်းမရှိလိုသူများအတွက်၊ ဤသန့်ရှင်းသောအမှုတော်ဆောင်တာဝန်ကို ကမ္ဘာတည်ကတည်းက ပြင်ဆင်ထားတော်မူခဲ့ပြီး၊ ပြင်ဆင်ထားတော်မူခဲ့သူ၊ တစ်ပါးတည်းသောသားတော်၏ အပြစ်ဖြေခြင်းမင်္ဂလာ၌နှင့် အပြစ်ဖြေခြင်းမင်္ဂလာအားဖြင့်ဖြစ်လျက်—

၆ ထိုကဲ့သို့အားဖြင့်၊ ဤသန့်ရှင်းသောအမှုတော်ဆောင်တာဝန်ဖြင့် ခေါ်သွင်းတော်မူခြင်းကို ခံရလျက်၊ သူတို့ကိုလည်း၊ သူ၏ချမ်းသာထဲသို့ ဝင်နိုင်ကြစေခြင်းငှာ၊ သူ၏ပညတ်တော်တို့ကို လူသားတို့အား သွန်သင်ပေးစေရန်၊ ဘုရားသခင်၏သန့်ရှင်းသောအသင်း၏ ယဇ်ပုရောဟိတ်မင်းအခွင့်အာဏာသို့ ခန့်ထားတော်မူ၏—

၇ ဤယဇ်ပုရောဟိတ်မင်းအခွင့်အာဏာသည်ကား၊ ကမ္ဘာတည်ကတည်းကအသင်း ဖြစ်လေသည့် သားတော်၏အသင်းအတိုင်းဖြစ်လျက်၊ သို့မဟုတ် တစ်နည်းအားဖြင့်၊ အချိန်ကာလအစ အဆုံးမရှိဘဲဖြစ်လျက်၊ အရာခပ်သိမ်းတို့အကြောင်းကို သိသည့် သူ၏ကြိုတင်သိမြင်နိုင်သော ဉာဏ်တော်အတိုင်း၊ ထာဝရကာလမှ ထာဝရကာလတစ်ခုလုံးသို့တိုင်အောင် ပြင်ဆင်ထားတော်မူလျက်—

၈ ယခုတွင်၊ သူတို့သည် ဤကဲ့သို့အားဖြင့် ခန့်ထားတော်မူခြင်းကို ခံရ၏—အစအဆုံးမရှိသည့် အမှုတော်ဆောင်တာဝန်၊ ဘိသိက်မင်္ဂလာနှင့် ယဇ်ပုရောဟိတ်မင်းအခွင့်အာဏာတို့ဖြင့်၊ သန့်ရှင်းသောအမှုတော်ဆောင်တာဝန်နှင့် ခေါ်သွင်းတော်မူခြင်းကို ခံရလျက်၊ သန့်ရှင်းသောဘိသိက်မင်္ဂလာအားဖြင့် ခန့်ထားတော်မူခြင်းကို ခံရ၍၊ သန့်ရှင်းသောအသင်း၏ ယဇ်ပုရောဟိတ်မင်းအခွင့်အာဏာကို သူတို့အပေါ်၌ ခံယူကြ၏—

၉ ကျေးဇူးတော်၊ ဖြောင့်မှန်ခြင်း၊ သစ္စာတရားတို့နှင့်ပြည့်သူ၊ အချိန်ကာလအစအဆုံးမရှိသောသူ၊ ခမည်းတော်၏တစ်ပါးတည်းသောသားတော်၏အသင်းအတိုင်း၊ ထိုကဲ့သို့အားဖြင့်၊ သူတို့သည် ကာလအစဉ်အဆက် ယဇ်ပုရောဟိတ်မင်းများဖြစ်လာကြ၏။ ဤမျှအထိပေတည်း။ အာမင်။

၁၀ ယခုတွင်၊ သန့်ရှင်းသောအသင်း သို့မဟုတ်၊ ဤယဇ်ပုရောဟိတ်မင်းအခွင့်အာဏာအကြောင်း ငါဟောပြောသဖြင့်၊ ခန့်ထားတော်မူခြင်း ခံရလျက်၊ ဘုရားသခင်၏ယဇ်ပုရောဟိတ်မင်းများ ဖြစ်လာသောသူများစွာရှိလေ၏။ ထိုသို့ဖြစ်ရသည်ကား၊ သူတို့၏ကြီးစွာသောယုံကြည်ခြင်း၊ နောင်တရခြင်း၊ ဘုရားသခင်ရှေ့၌ သူတို့၏ ဖြောင့်မတ်ခြင်းတို့ကြောင့်ဖြစ်၍၊ သူတို့သည် ပျက်စီးကြမည့်အစား၊ နောင်တရရန် ရွေးချယ်လျက်၊ ဖြောင့်မတ်ခြင်းကို ကျင့်ကြ၏။

၁၁ ထို့ကြောင့်၊ သူတို့သည် ဤသန့်ရှင်းသောအသင်းအတိုင်း ခေါ်သွင်းတော်မူခြင်းကို ခံရပြီး၊ သန့်ရှင်းစင်ကြယ်စေ၍၊ သူတို့၏အဝတ်တန်ဆာများကို သိုးသငယ်၏အသွေးတော်အားဖြင့် ဖြူစင်အောင်လျှော်ဖွပ်၏။

၁၂ ယခုတွင်၊ သူတို့သည် သန့်ရှင်းသောဝိညာဉ်တော်အားဖြင့် သန့်ရှင်းစင်ကြယ်စေတော်မူပြီးနောက်၊ သူတို့၏အဝတ်တန်ဆာများကို ဖြူစင်စေလျက်၊ ဘုရားသခင်ရှေ့၌၊ စင်ကြယ်၍ အပြစ်ကင်းစင်လျက်၊ စက်ဆုပ်ရွံရှာခြင်းဖြင့်မှတစ်ပါး၊ အပြစ်ကို မစဉ်းစားနိုင်ကြ။ စင်ကြယ်စေ၍၊ သူတို့၏ဘုရားသခင်ကိုယ်တော်ရှင်၏ချမ်းသာထဲသို့ ဝင်သူတို့သည်ကား၊ များစွာ၊ အလွန်များစွာရှိ၏။

၁၃ ယခုမူကား၊ ငါ၏ညီအစ်ကိုတို့၊ သင်တို့သည်လည်း ထိုချမ်းသာခြင်းထဲသို့ ဝင်နိုင်စေခြင်းငှာ၊ ဘုရားသခင်ရှေ့၌ သင်တို့ကိုယ်သင်တို့ နှိမ့်ချ၍၊ နောင်တရခြင်းနှင့်ထိုက်တန်သည့်အကျိုးကို ဖြစ်စေရန် ငါအလိုရှိ၏။

၁၄ ထိုမှတစ်ပါး၊ သူ့အပေါ်၌ ယဇ်ပုရောဟိတ်မင်းအခွင့်အာဏာကို ကာလအစဉ်အဆက်ခံယူသူ၊ ငါပြောလေသည့် ဤတစ်ခုတည်းသောအသင်းအတိုင်း ယဇ်ပုရောဟိတ်မင်းတစ်ပါးလည်းဖြစ်သူ မေလခိဇေဒက်၏လက်ထက်ကလူများကဲ့သို့ပင်၊ သင်တို့ကိုယ်သင်တို့ နှိမ့်ချကြလော့။

၁၅ ဤမေလခိဇေဒက်သည်ကား၊ အာဗြဟံက ဆယ်ဖို့တစ်ဖို့ကို ပေးသူ၊ အထူးသဖြင့်၊ ငါတို့၏အဘ အာဗြဟံကပင် သူပိုင်ဆိုင်သမျှ၏ဆယ်ပုံတစ်ပုံဖြစ်သည့် ဆယ်ဖို့တစ်ဖို့ကို ပေးရသူဖြစ်လေ၏။

၁၆ ယခုတွင်၊ ဤဘိသိက်မင်္ဂလာများကို ဤသို့အားဖြင့် ပေးထားတော်မူခဲ့သည်မှာ၊ သူ့အသင်း၏သင်္ကေတတစ်ခုဖြစ်၍ သို့မဟုတ်၊ သူ့အသင်းဖြစ်၍၊ ထိုကဲ့သို့အားဖြင့်၊ လူတို့သည် ဘုရားသခင်၏သားတော်အား မျှော်လင့်နိုင်ကြစေကြောင်း၊ ထို့အတူ၊ ဤအမှုသည်ကား၊ သူတို့၏အပြစ်များမှလွှတ်ခြင်းအတွက်၊ သူ့ကို မျှော်လင့်နိုင်ကြစေကြောင်း၊ သူတို့ကို ကိုယ်တော်ရှင်၏ချမ်းသာထဲသို့ ဝင်နိုင်ကြစေကြောင်းတို့ပင်တည်း။

၁၇ ယခုတွင်၊ ဤမေလခိဇေဒက်သည်ကား၊ ရှာလင်ပြည်အပေါ်၌ ရှင်ဘုရင်တစ်ပါးဖြစ်၏။ သူ၏လူတို့သည် ဒုစရိုက်နှင့် စက်ဆုပ်ရွံရှာဖွယ်အမှုတို့၌ အားကြီး၍လာလေ၏။ ထိုမှတစ်ပါး၊ သူတို့အားလုံးသည် လမ်းလွဲလေ၏။ သူတို့သည် အမျိုးမျိုးသော ဆိုးညစ်ခြင်းများဖြင့် ပြည့်လေ၏။

၁၈ သို့ရာတွင်၊ မေလခိဇေဒက်သည် ကြီးစွာသောယုံကြည်မှုပြုလျက်၊ ဘုရားသခင်၏သန့်ရှင်းသောအသင်းအတိုင်း၊ ယဇ်ပုရောဟိတ်မင်းအမှုအရာကို လက်ခံရရှိပြီး၊ သူ၏လူတို့အား နောင်တရခြင်းကို ဟောပြော၏။ ရှုဦးလော့၊ သူတို့သည်လည်း နောင်တရကြ၏။ မေလခိဇေဒက်သည်လည်း မိမိလက်ထက်တွင် ထိုပြည်၌ ငြိမ်းချမ်းခြင်းကို တည်ဆောက်၏။ ထို့ကြောင့်၊ သူ့ကို ငြိမ်းချမ်းခြင်း၏အရှင်ဟု ခေါ်ကြ၏။ အကြောင်းမူကား၊ သူသည် ရှာလင်ပြည်၏ရှင်ဘုရင်ဖြစ်၍၊ သူ့အဘ၏လွှမ်မိုးမှုအောက်၌ နန်းစံ၏။

၁၉ ယခုတွင်၊ သူ့ရှေ့၌ များစွာသောသူတို့ရှိ၏၊ သူ့နောက်၌လည်း များစွာသောသူတို့ရှိ၏။ သို့ရာတွင်၊ အဘယ်သူမျှ သာ၍မကြီးမြတ်။ ထို့ကြောင့်၊ သူ့အကြောင်းကို သူတို့အထူးသဖြင့် ပို၍ ဖော်ပြလေ၏။

၂၀ ယခုတွင်၊ ငါသည် ထိုအမှုကို ပြောပြစရာမလို။ ငါပြောလေပြီးသည်ကား၊ လုံလောက်ပေပြီ။ ရှုလော့၊ သင်တို့ရှေ့၌ ကျမ်းစာများရှိ၏။ သင်တို့သည် ထိုကျမ်းစာများကို မှောက်လှန်လျှင်၊ ထိုအမှုသည်၊ သင်တို့ကိုယ်တိုင်၏ပျက်စီးခြင်းအတွက် ဖြစ်လိမ့်မည်။

၂၁ ယခုမူကား၊ အချိန်တန်လာသောအခါ၊ အယ်လမာသည် ဤစကားများကို သူတို့အား ပြောပြီးလေလျှင်၊ သူတို့ထံသို့ လက်ကို ဆန့်၍၊ ကြီးစွာသောအသံဖြင့် ဆို၍ အော်ဟစ်လေသည်ကား၊ ယခုအချိန်သည် နောင်တရဖို့အချိန်ဖြစ်၏။ အကြောင်းမူကား၊ ကယ်တင်ခြင်းကာလ ရောက်လုနီးပေပြီ။

၂၂ ထိုမှတစ်ပါး၊ ကိုယ်တော်ရှင်၏အသံက ကောင်းကင်တမန်တို့၏နှုတ်အားဖြင့်၊ ထိုအရာကို ခပ်သိမ်းသောတိုင်းနိုင်ငံများသို့ ဟောကြား၏။ ထိုမှတစ်ပါး၊ ကြီးစွာသောဝမ်းမြောက်ခြင်း၏ ဝမ်းသာစရာသတင်းကို သူတို့ရရှိစေခြင်းငှာ၊ ထိုအမှုကို ဟောကြား၏။ ထိုမှတစ်ပါး၊ ဤဝမ်းသာစရာသတင်းများကို သူ၏လူမျိုးတို့၌၊ အထူးသဖြင့်၊ မြေကြီးမျက်နှာပြင်ပေါ်၌ အရပ်ရပ်သို့ ကွဲပြားပြန့်ကျဲရသည့်သူများထံသို့ပင်၊ ဟစ်ကြော်၏။ သို့ဖြစ်၍၊ ငါတို့ထံ ထိုသတင်းများရောက်လာ၏။

၂၃ ထို့အတူ၊ ငါတို့နားလည်နိုင်ကြစေခြင်းငှာ၊ ရှင်းလင်းသောဝေါဟာရဖြင့်၊ ထိုသတင်းများကိုဖော်ပြ၍၊ ငါတို့မတိမ်းမှားကြ။ ဤအမှုသည်ကား၊ ထိုအကျွမ်းမဝင်သောပြည်၌ ငါတို့သည် အရပ်ရပ်သို့လည်သောသူများ ဖြစ်နေခြင်းကြောင့်ပေတည်း။ ထို့ကြောင့်၊ ငါတို့သည် ထိုမျှလောက်၊ အလွန်နှစ်သက်တော်မူခြင်းကိုခံရ၏။ အကြောင်းမူကား၊ ဟောကြားထားသော ဤဝမ်းသာစရာသတင်းများသည် ငါတို့ဥယျာဉ်၏အရပ်ရပ်၌ ရှိလေပြီ။

၂၄ အကြောင်းမူကား၊ ရှုလော့၊ ဤအချိန်၌ ငါတို့၏ပြည်တွင် ကောင်းကင်တမန်တို့သည် ထိုသတင်းကို များစွာသောသူတို့အား ဟောကြားလျက်ရှိ၏။ ဤအမှုသည်ကား၊ သူ၏ဘုန်းတော်ကိုဆောင်၍ ကြွလာတော်မူသည့်အချိန်၌ လူသားတို့၏စိတ်နှလုံးကို သူ၏နှုတ်ကပတ်တော်အား လက်ခံကြစေရန် ပြင်ဆင်ခြင်းတည်းဟူသော ကြံရွယ်ချက်အတွက်ဖြစ်၏။

၂၅ ယခုမူကား၊ ငါတို့သည် သူ၏ကြွရောက်တော်မူလာခြင်းနှင့် စပ်လျဉ်း၍၊ ကောင်းကင်တမန်တို့၏နှုတ်အားဖြင့် ဟောကြားထားတော်မူသည့် ရွှင်လန်းအားရစရာသတင်းတို့ကို ကြားနာရန် စောင့်မျှော်၍သာနေကြ၏။ အကြောင်းမူကား၊ အချိန်ကာလကျရောက်လာမည်၊ အဘယ်မျှလျှင်မြန်မည်ကို ငါတို့မသိကြ။ ထိုအမှုသည် ငါ၏လက်ထက်၌ ဖြစ်နိုင်စေကြောင်း၊ ဘုရားသခင်ထံ ဆုတောင်း၏။ သို့ရာတွင်၊ ထိုအမှုအဘယ်ကာလ၌ပင်ဖြစ်ပါစေ၊ ငါသည် ထိုအမှု၌ ရွှင်လန်းဝမ်းမြောက်မည်။

၂၆ သူတို့၌ရှိသည့် ပရောဖက်ပြုဟောသောဝိညာဉ်အတိုင်းဖြစ်သည့်၊ သူနှင့်စပ်လျဉ်း၍ သူတို့ပြောထားလေသည့်အတိုင်း၊ ငါတို့ဘိုးဘေးတို့၏စကားများကို ပြီးပြည့်စုံစေခြင်းငှာ၊ ထိုအမှုကိုလည်း၊ သူကြွလာတော်မူသည့်အချိန်တွင်၊ ကောင်းကင်တမန်တို့၏နှုတ်အားဖြင့်၊ ဖြောင့်မတ်သန့်ရှင်းသူများသို့ ဖော်ပြတော်မူလိမ့်မည်။

၂၇ ယခုမူကား၊ ငါ၏ညီအစ်ကိုတို့၊ ငါ့စိတ်နှလုံး၏ အနက်ရှိုင်းဆုံးနေရာမှ၊ အမှန်စင်စစ်၊ ကြီးစွာသော စိုးရိမ်ပူပန်မှုနှင့် နာကျင်သည့်တိုင်အောင်ပင်တောင့်တသည်မှာ၊ သင်တို့သည် ငါ့စကားများကို စေ့စေ့နားထောင်၍၊ သင်တို့၏အပြစ်များကို စွန့်ခွာ၍၊ သင်တို့၏နောင်တရခြင်းကာလကို မဖင့်နွှဲရမည့်အကြောင်း၊

၂၈ သို့ရာတွင်၊ သင်တို့သည် ကိုယ်တော်ရှင်ရှေ့၌ သင်တို့ကိုယ်သင်တို့နှိမ့်ချ၍၊ သူ၏သန့်ရှင်းသောနာမတော်ကို ပဌနာပြု၍၊ ခံနိုင်သည်ထက်ပို၍ စုံစမ်းမခံရနိုင်စေခြင်းငှာ၊ အစဉ်မပြတ်စောင့်ပြီး ဆုတောင်း၍၊ ထိုကဲ့သို့အားဖြင့်၊ သန့်ရှင်းသောဝိညာဉ်တော်အားဖြင့် ပို့ဆောင် ခံရ၍၊ နှိမ့်ချသော၊ သိမ်မွေ့အောက်ကျို့သော၊ ကျိုးနွံသော၊ သည်းခံတတ်သော၊ ချစ်ခြင်းမေတ္တာနှင့် အလုံးစုံသောစိတ်ရှည်ခြင်းတိုဖြင့်ပြည့်ဝသောသူများ ဖြစ်လာရစေမည့်အကြောင်း၊

၂၉ ကိုယ်တော်ရှင်ကို ယုံကြည်ခြင်းရှိလျက်၊ ထာဝရအသက်ကို ရရှိလိမ့်မည်ဟူသော မျှော်လင့်ခြင်းရှိလျက်၊ ဘုရားသခင်၏ချစ်ခြင်းမေတ္တာတော်သည် သင်တို့စိတ်နှလုံး၌ အစဉ်အမြဲရှိလျက်၊ နောက်ဆုံးသောနေ့၌ သင်တို့သည် ချီးမြှောက်တော်မူခြင်းခံရပြီး၊ သူ၏ချမ်းသာထဲသို့ ဝင်နိုင်ကြစေမည့်အကြောင်းတို့ပေတည်း။

၃၀ ထို့အတူ၊ အမျက်တော်ကို သင်တို့အပေါ် မရောက်စေခြင်းငှာလည်းကောင်း၊ ငရဲ၏သံကြိုးများဖြင့် ချည်နှောင်၍ချခြင်းကို သင်တို့မခံရစေခြင်းငှာလည်းကောင်း၊ ဒုတိယသေခြင်းကို သင်တို့မခံစားရစေခြင်းငှာလည်းကောင်း၊ ကိုယ်တော်ရှင်သည် သင်တို့အား နောင်တရခြင်းအခွင့်ကို ပေးတော်မူပါစေ။

၃၁ အယ်လမာသည် ဤကျမ်း၌ ရေးမထားသည့် ပို၍များစွာသော စကားများကိုလည်း လူတို့ကို ဟောပြော၏။