အယ်လမာ ၂၉

အခန်းကြီး ၂၉

အယ်လမာသည် ကောင်းကင်တမန်၏ စိတ်အားကြီးခြင်းမျိုးနှင့် နောင်တရခြင်းကို ဟစ်ကြော်ရန် အလိုရှိ၏—ကိုယ်တော်ရှင်သည် ခပ်သိမ်းသောနိုင်ငံမှန်တို့အတွက် ဆရာများကို ပေးတော်မူ၏—အယ်လမာသည် ကိုယ်တော်ရှင်၏ အမှုတော်၌လည်းကောင်း၊ အမ္မုန်နှင့် သူ့ညီအစ်ကိုတို့၏ အောင်မြင်မှု၌လည်းကောင်း ဂုဏ်ယူဝမ်းမြောက်၏။ ဘီစီ ၇၆ ခန့်။

၁ အို ငါ့ကို ကောင်းကင်တမန်ဖြစ်စေ၍၊ ငါ့စိတ်နှလုံးအလိုရှိသည်ကို ရပါစေသော။ ငါသည် ဘုရားသခင်၏ တံပိုးတော်နှင့်၊ မြေကြီးကိုလှုပ်စေသောအသံနှင့် လူမျိုးမှန်သမျှတို့အား နောင်တရခြင်းကို ဟစ်ကြော်လျက်၊ သွား၍ ပြောနိုင်ပါစေသော်။

၂ ထိုမှတစ်ပါး၊ ငါသည် စိတ်ဝိညာဉ်မှန်သမျှအား နောင်တရခြင်းနှင့် ရွေးနှုတ်ခြင်းအစီအစဉ်ကို မိုးချုန်းသံနှင့်ကဲ့သို့ပင် ဟောကြားလိုသည်မှာ၊ သူတို့နောင်တရ၍၊ ငါတို့၏ဘုရားသခင်ထံသို့ လာကြစေခြင်းငှာ၊ မြေကြီးမျက်နှာပြင်တစ်ခုလုံးပေါ်၌ နောက်ထပ်ဝမ်းနည်းခြင်း မရှိနိုင်တော့စေခြင်းငှာပေတည်း။

၃ သို့ရာတွင်၊ ရှုလော့၊ ငါသည် လူသားဖြစ်၍၊ ငါ၏အလိုအတိုင်း အပြစ်ကို ပြု၏။ အကြောင်းမူကား၊ ငါ့အဖို့ ကိုယ်တော်ရှင်ခန့်ခွဲတော်မူလေသည့် အရာများနှင့် ကျေနပ်သင့်၏။

၄ ငါသည် တရားမျှတတော်မူသည့် ဘုရားသခင်၏ ခိုင်မာသောစီရင်ချက်များကို ငါ၏အလိုဆန္ဒများဖြင့် မမွှေနှောက်သင့်။ အကြောင်းမူကား၊ သေခြင်းသို့ဖြစ်စေ၊ အသက်ရှင်ရာသို့ဖြစ်စေ လူသားတို့အား သူတို့အလိုဆန္ဒအတိုင်း ဘုရားသခင်အခွင့်ပေးတော်မူကြောင်း ငါသိ၏။ ထိုမှတစ်ပါး၊ ကယ်တင်ခြင်းသို့ဖြစ်စေ၊ သို့မဟုတ် ဖျက်ဆီးခြင်းသို့ဖြစ်စေ၊ သူတို့ဆန္ဒများအတိုင်း၊ လူသားတို့ကို သူခန့်ခွဲတော်မူပြီး၊ အမှန်စင်စစ်၊ ပြောင်းလဲ၍မရနိုင်သော စီရင်ချက်များ စီရင်တော်မူကြောင်း ငါသိ၏။

၅ ထိုမှတစ်ပါး၊ အကောင်းနှင့် အဆိုးသည် ခပ်သိမ်းသော လူသားတို့အတွက် ရှိလေသည်ကိုလည်း ငါသိ၏။ အကောင်းနှင့် အဆိုးကို ခွဲခြား၍ သိခြင်းမရှိသောသူသည် အပြစ်တင်ခွင့်နှင့် ကင်းလွတ်၏။ သို့ရာတွင်၊ အကောင်းနှင့် အဆိုးကို သိသောသူအား၊ ထိုသူသည် အကောင်း သို့မဟုတ် အဆိုးကို အလိုရှိသည်ဖြစ်စေ၊ အသက်ရှင်ခြင်း သို့မဟုတ် သေခြင်းကို အလိုရှိသည်ဖြစ်စေ၊ ဝမ်းမြောက်ခြင်း သို့မဟုတ် သံဝေဂရသည့်အသိစိတ်ကို အလိုရှိသည်ဖြစ်စေ ထိုသူအား သူ၏အလိုဆန္ဒအတိုင်း ပေးထားတော်မူ၏။

၆ ယခုတွင်၊ ဤအမှုများကို ငါသိသဖြင့်၊ ငါသည် ထမ်းဆောင်ရန် ခေါ်သွင်းခံထားရလေသည့် အမှုထက် အဘယ့်ကြောင့်သာ၍ အလိုရှိအပ်သနည်း။

၇ ငါသည် မြေကြီးစွန်းသား ခပ်သိမ်းတို့အား ဟောပြောနိုင်ခြင်းငှာ၊ အဘယ့်ကြောင့်၊ ကောင်းကင်တမန်တစ်ပါး ဖြစ်လိုရမည်နည်း။

၈ အကြောင်းမူကား၊ ရှုလော့၊ ကိုယ်တော်ရှင်သည် ခပ်သိမ်းသော နိုင်ငံတို့အား၊ သူ၏နှုတ်ကပတ်တော်ကို ဉာဏ်ပညာဖြင့် သွန်သင်ခြင်းငှာ၊ ထိုမှတစ်ပါး၊ သူတို့၌ ရှိရန်သင့်လျော်မည်ဟု ဆင်ခြင်တော်မူသမျှအား၊ သူတို့နိုင်ငံသားအချို့နှင့် ဘာသာစကားကို အခွင့်ပေးတော်မူ၏။ ထို့ကြောင့်၊ ကိုယ်တော်ရှင်သည် ဖြောင့်မတ်မှန်ကန်သည့်အရာအတိုင်း ဉာဏ်ပညာဖြင့် အကြံပေးတော်မူသည်ကို ငါတို့သိမြင်ကြ၏။

၉ ငါ့ကို ကိုယ်တော်ရှင်မိန့်တော်မူလေသည့်အရာကို ငါသိ၏။ ငါသည် ထိုအရာ၌ ဝါကြွား၏။ ငါကိုယ်တိုင်နှင့်စပ်လျဉ်း၍ ငါမဝါကြွား၊ သို့ရာတွင် ငါ့ကို ကိုယ်တော်ရှင်မိန့်တော်မူလေသည့်အရာ၌ ငါဝါကြွား၏။ ထိုမှတစ်ပါး၊ ဤအမှုသည်ကား၊ တစ်စုံတစ်ခုသောစိတ်ဝိညာဉ်ကို နောင်တရခြင်းသို့ဆောင်ယူခြင်းငှာ၊ ငါသည် ဘုရားသခင်၏ လက်တော်၌ တန်ဆာတစ်ခုဖြစ်ကောင်းဖြစ်နိုင်စေကြောင်း၊ ငါ၏ဂုဏ်ယူဝမ်းမြောက်ခြင်းပေတည်း။ ဤအမှုသည် ငါ၏ ဝမ်းမြောက်ခြင်းလည်း ဖြစ်၏။

၁၀ ရှုဦးလော့၊ ငါ၏များစွာသောညီအစ်ကိုတို့ အမှန်ပင်နောင်တရ၍၊ သူတို့၏ဘုရားသခင်ကိုယ်တော်ရှင်ထံသို့ လာသည်ကို ငါမြင်ရပြီးနောက်၌၊ ငါ၏ဝိညာဉ်သည် ဝမ်းမြောက်ခြင်းနှင့် ပြည့်စုံ၏။ ထို့နောက်တွင်ကား၊ ငါ့အတွက် ကိုယ်တော်ရှင် ပြုထားတော်မူလေသည့်အရာ၊ အမှန်စင်စစ်၊ ငါ၏ဆုတောင်းခြင်းကို သူကြားတော်မူလေသည်ကိုပင် ငါအောက်မေ့၏။ ထိုမှတစ်ပါး၊ ယင်းနောက်တွင်ကား၊ ငါ့ဆီသို့ ဆန့်တော်မူသည့် သူ၏ ကရုဏာကြီးသော လက်ရုံးတော်ကို ငါအောက်မေ့၏။

၁၁ ထိုမှတစ်ပါး၊ ငါတို့ဘိုးဘေးတို့ဖမ်းဆီးချုပ်နှောင်ခံရခြင်းကိုလည်း ငါအောက်မေ့၏။ အကြောင်းမူကား၊ သူတို့ကို ကျွန်ခံရာမှ ကိုယ်တော်ရှင်ကယ်လွှတ်တော်မူခဲ့သည်ကို ငါဧကန်အမှန်သိ၏၊ ဤသို့အားဖြင့် သူ၏အသင်းတော်ကို တည်ထောင်၏။ ထိုမှတစ်ပါး၊ ကိုယ်တော်ရှင်ဘုရားသခင်၊ အာဗြဟံ၏ဘုရားသခင်၊ ဣဇာက်၏ဘုရားသခင်၊ ယာကုပ်၏ဘုရားသခင်သည် သူတို့ကို ကျွန်ခံရာမှ ကယ်လွှတ်တော်မူ၏။

၁၂ ထိုမှတစ်ပါး၊ ငါတို့ဘိုးဘေးတို့ဖမ်းဆီးချုပ်နှောင်ခံရခြင်းကို ငါအစဉ်အမြဲ အောက်မေ့လေပြီ။ သူတို့ကို အဲဂုတ္တုလူတို့လက်မှ ကယ်လွှတ်တော်မူခဲ့သည့် ထိုမပြောင်းမလဲသော ဘုရားသခင်သည် သူတို့ကို ကျွန်ခံရာမှလည်း ကယ်လွှတ်တော်မူ၏။

၁၃ ထိုမှတစ်ပါး၊ ထိုမပြောင်းမလဲသောဘုရားသခင်သည် မိမိအသင်းတော်ကို သူတို့၌ တည်ထောင်တော်မူ၏။ ထိုမှတစ်ပါး၊ ဤလူမျိုးတို့ထံသို့ နှုတ်ကပတ်တော်ကို ဟောပြောစေခြင်းငှာ၊ ထိုမပြောင်းမလဲသောဘုရားသခင်သည် ငါ့ကို သန့်ရှင်းသောအမှုတော်ဆောင်တာဝန်ဖြင့် ခေါ်သွင်းတော်မူ၍၊ ငါ့အား များစွာသော အောင်မြင်မှုကို ပေးတော်မူလေပြီ။ ထိုအမှု၌ ငါ၏ဝမ်းမြောက်ခြင်းသည် ပြည့်စုံ၏။

၁၄ သို့ရာတွင်၊ ငါကိုယ်တိုင်၏အောင်မြင်မှုတစ်ခုတည်း၌ ဝမ်းမြောက်သည်မဟုတ်ဘဲ၊ နီဖိုင်းပြည်သို့ ရောက်သောငါ့ညီအစ်ကိုများ၏အောင်မြင်မှုကြောင့် ငါ၏ဝမ်းမြောက်ခြင်းသည် ပို၍ ပြည့်စုံ၏။

၁၅ ရှုလော့၊ သူတို့သည် လွန်စွာအလုပ်လုပ်သဖြင့်၊ များစွာသောအသီးကို သီးကြလေပြီ။ သူတို့၏ အကျိုးကျေးဇူးမှာ ကြီးမားလှပေစွတကား။

၁၆ ယခုတွင်၊ ငါ့ဤညီအစ်ကိုတို့၏ အောင်မြင်မှုအကြောင်းကို ငါတွေးမိသောအခါ၊ ငါ၏ဝိညာဉ်သည် ကိုယ်ခန္ဓာမှ ကွဲကွာခြင်းသို့တိုင်အောင်ပင် အသွင်ပြောင်း၍သွား၏။ ထိုကဲ့သို့ပင် ငါ၏ဝမ်းမြောက်ခြင်းသည်လည်း ကြီးမားလှ၏။

၁၇ ယခုမူကား၊ ဘုရားသခင်သည် ငါ၏ဤညီအစ်ကိုတို့ကို၊ ဘုရားသခင်၏နိုင်ငံတော်၌ ထိုင်နိုင်ကြစေမည့်အကြောင်း၊ ထိုမှတစ်ပါး၊ သူတို့အလုပ်၏ အသီးအပွင့် ဖြစ်လေသောသူ ခပ်သိမ်းတို့ အပြင်သို့ ထွက်မသွားကြတော့စေကြောင်း၊ သူ့ကို ကာလအစဉ်အဆက် ချီးမွမ်းနိုင်ကြစေမည့်အကြောင်းသာ အခွင့်ပေးတော်မူပါစေ။ ဘုရားသခင်သည် ငါပြောထားလေသော စကားများအတိုင်းပင် ထိုအမှုပြီးမြောက်စေမည့်အကြောင်းကိုလည်း အခွင့်ပေးတော်မူပါစေ။ အာမင်။