1 Kedekedeo mahsen ahpw kohieng Alma oh Amulek, ira en mweselsang nan kahnimwo; ira ahpw mweselda, oh kohla nan sahpw en Saidom; oh kilang, wasao irail ahpw tuhwongdi aramas akan koaros me mweselsang nan sahpw en Amonaia, me pekouslahr oh kostakaidier, pwehki arail kamehlele padahk kan en Alma.

2 Oh ira ahpw koasoiahiong irail duwen soahng koaros me wiawihong arail pwoud ko oh neirail seri ko, oh me pil wiawihong ira, oh manaman me kapitirahla.

3 Oh pil Sihesrom wonohnkier eh soumwahu nan Saidom, iei soumwahu karakar, me kohsang ni eh lokolok laudki eh medemedewe duwen eh wiewia suwed kan, pwe e wiahki me Alma oh Amulek solahr mie; oh e wiahki me ira kamakamala pwehki eh wiewia sapwung. Oh dihp lap wet, oh dipe me tohto kan, kahrehda eh lokolok nan eh madamadau lao e wiahla medek laud kowahlap, oh sohte poadoandoarepe; eri e ahpw tepida lokolongki karakar laud.

4 Oh met, ni eh rongada me Alma oh Amulek mih nan sahpw en Saidom, e ahpw kehlailda nan eh mohngiong; ih eri madangete kadaralahng ira pekpek, pwe e men ira en patohla reh.

5 Ira eri mwadangete pwarala reh, kapwaiada pekpek me e kadaralahng irahu; oh ira pidelongala nan ihmwo rehn Sihesrom; oh e wie wonohn pohn eh peht, soumwahu, luhluwetki eh soumwahu karakar laud; oh nan moange pil medek kowahlap pwehki eh wiewia suwed kan; oh ahnsou me e kilangirahda e kapahwei peho, oh pekpeki ira en kamwahuwihala.

6 Kedekedeo Alma ahpw koledi peho oh ndaiong ih: Ke kamehlele sapwellimen Krais manaman en komourla?

7 E ahpw sapeng oh nda: Ei, I kamehlele mahsen kan koaros me ke padahngki.

8 Alma ahpw nda: Ma ke kamehlele poadoandoar en Krais ke kak mwahula.

9 Oh e nda: Ei, I kamehlele nin duwen omw mahsen kan.

10 Oh Alma ahpw kapakap ong Kauno, ndinda: Maing Kaun aht Koht, komw ketin kupwurehla ohl menet, oh kamwahuwiala eh soumwahu nin duwen eh pwoson Krais.

11 Oh ahnsou me Alma ndahier mahsen pwukat, Sihesrom ahpw kesihnenda, oh tepida alu; oh met wiawiher oh aramas kan koaros pwuriamweikihla mehlel; oh rohng en irair wet kohpeseng nan sahpw en Saidom pwon.

12 Oh Alma papidaisihla Sihesrom ong Kauno; oh e ahpw tepida iang padahkih aramas akan sang ahnsouo kohla.

13 Oh Alma wiahda mwomwohdiso nan sahpw en Saidom, oh kasarawihala samworo kan oh sounpadahk kan nan sahpwo, pwe irail en papidaisihala aramas akan me inengieng papidais ong Kauno.

14 Kedekedeo irail wie tohtohla; pwe irail kohdohsang nan arail kousapw kan koaros me kapilpene Saidom, oh papidaisla.

15 Ahpw ong aramas akan me kin mih nan sahpw en Amonaia, irail wiwiahte aramas nan kapehd kekeluwak oh aramas ketptakai; oh irail sohte koluhkihla diparail kan, koskose me en Alma oh Amulek manaman koaros kohsang rehn tepilo; pwe irail kin kamehlelehte padahk kan en Nior, oh re sohte kin kamehlele koluhlahn diparail akan.

16 Kedekedeo Alma oh Amulek, pwehki Amulek eh meirongkilahr nah kohl, oh nah silper, oh eh dipwisou kesempwal kan koaros, me mih nan sahpw en Amonaia, pwehki mahsen en Koht, kahrehiong kompoakepah kan oh pil eh pahpa, oh peneinei kan kailongkilahr;

17 Eri, mwurin Alma eh wiadahr mwomwohdiso nan Saidom, oh kilangehr me e mwahula mehlel, ei, e kilangehr aramas akan arail mwahula sohla pohnmwahso nan mohngiongarail kan, oh tepida karakarahkala mwohn Koht, oh kin tepida pokonpene wasahn arail sarawi kan oh pwongih Koht mwohn pei sarawio, kalapw mwasamwasahn oh kin wie kapkapakap, pwe irail en kak poadoandoarla sang Sehdan, oh sang mehla, oh sang kamwomwomwla—

18 Eri met ni ei ndahiero, pwehki Alma eh kilangehr mepwukat, eri e ahpw kahrehda Amulek oh kohla nan sahpw en Saraemla, oh kahrehla ni pein imweo, oh sewesehda nan eh kahpwal akan, oh kakehlaka eh pwoson Kauno.

19 Oh met kaimwisekalahr pahr keisek en mwehin sounkopwung kan ong aramas en Nihpai.