1 Ao e a koro bukina bwa ngke e a tia Iesu n taekin taeka aikai nakon Nibwaai, ao nakoia ake a tia ni weteaki, (ngkanne mwaitia ake a tia ni weteaki, ma ni karekea te mwaaka ke te kariaiakaki ni bwabetito, bon ^atengaun ma uoman) ao nooria, e arora baina nakoia aomata ake a uanao, ma n takarua nakoia, ni kangai: Kam na ^bkakabwaiaki ngkana kam ongo n aia taeka naaka tengaun ma uoman ake I a tia n ^crineia mai i buakomi bwa a na buokingkami, ao a na toro iroumi; ao I a tia n anganiia te mwaaka bwa a na bwabetitoingkami n te ran; ao i mwin are a tia ni bwabetitoingkami n te ran, nooria, N na bwabetitoingkami n te ai ao n te Tamnei ae Raoiroi; ngaia are kam na kakabwaiaki ngkana kam kakoauai ma ni bwabetitoaki, i mwin are kam a tia n noorai ma n ataia bwa bon iai Ngai.

2 Ao, a na kakabwaiaki riki naake a na ^akakoauai ami taeka ibukina bwa kam na kakoaua bwa kam a tia n noorai, ao kam ataia bwa iai Ngai. Eng, a na kakabwaiaki naake a na kakoauai ami taeka, ma ni kananorinanoia ^bnakon kabin te nanorinano ma ni bwabetitoaki, bwa a na kawaraki ^cn te ai ao te Tamnei ae Raoiroi, ao a na karekea kamaunaan aia bure.

3 Eng, a na kakabwaiaki ake a ^abaki tamneia ake a ^broko nakoiu, bwa aia bwai uean karawa.

4 Ao riki, a na kakabwaiaki ni kabane akana a nanokawaki, bwa a na kabebeteaki nanoia.

5 Ao a na kakabwaiaki aika a ^ananorinano, bwa aia bwai te ^baba.

6 Ao a na kakabwaiaki akana a ^abaki ma n ^btaka ibukin te ^craoiroi, bwa a na kaonaki n te Tamnei ae Raoiroi.

7 Ao a na kakabwaiaki akana a ^ananoanga bwa a na karekea te nanoangaaki.

8 Ao a na kakabwaiaki akana a ^aitiaki nanoia, bwa a na ^bnoora te Atua.

9 Ao a na kakabwaiaki ^ataan raoi, bwa a na aranaki bwa ^bnatin te Atua.

10 Ao a na kakabwaiaki ni kabane akana a ^abwainikirinaki ibukin arau, bwa aia bwai uean karawa.

11 Ao kam na kakabwaiaki ngkana a ribaingkami aomata ma ni bwainikirini ngkami, man taekin aekakin taeka aika a buakaka ibukimi ni kabuakakai ngkami, ibukiu;

12 Bwa e na reke iroumi te kimwareirei ae korakora ao e na rianako kukureimi, bwa e na korakora ^akanuangami i karawa; bwa ngaia a bwainikirinia burabeti ake imwaaimi.

13 E koaua, e koaua, ae I tuangkami, I rineingkami bwa kam na riki bwa ^ataoron te aba; ma ngkana e mauna tarin te taoro ao teraa ae e na tarinaki iai te aba? E na bon akea manenan te taoro, ma e na teweaki nako man toubekaki i aan waeia aomata.

14 E koaua, e koaua ae tuangkami, I rineingkami bwa ootaia te botanaomata aio. Te kaawa ae bubura ae kateaki iaon te tabuki e bon aki kona n raba.

15 Nooria, a aki kaura te ^ataura te bae aomata ma ni kakia i aan te bwaketi? Tiaki, ma a katoka i aon nnena, ao e anga ootana nakoia ake a mena n te bata;

16 Ngaia are kaotai ami ^ataura i mataia te botanaomata aio, bwa a na noori ami mwakuri aika a raraoi ma ni karaoiroa Tamami are i karawa iai.

17 Tai taku bwa I roko bwa N na kaakea te tua ke burabeti. I aki roko bwa N na kaakeaia ma I roko bwa N na kakoroi bukiia;

18 Bwa nooria I taku nakoimi, bon ake te tamruru ke te taurouro teuana man te ^atua ae e na bua, ma a tia ni bane ni kakoroaki bukiia irou.

19 Ao nooria, I a tia n anganingkami te tua ao ana tua Tamau, bwa kam na kakoauai, ao bwa kam na rairinanomi man ami bure, ao kam na kawarai ma te ^anano ae uruaki ao te tamnei are raraoma. Nooria, bon iai te tua imatam, ao e kakoroaki nanon te ^btua.

20 Mangaia are nakoiu ao kam na kamaiuaki; bwa e koaua ae I tuangkami, bwa ngkana kam aki kaawakin au tua, ake I a tia n anganingkami n te tai aei, kam bon aki kona n rin n uean karawa.

21 Kam a tia n ongo bwa e taekinaki irouia n taai ake ngkoa, ao e bon koreaki naba i imwaaimi, bwa kam na aki ^atiriaomata, ao ane e tiriaomata e na bon mena n te kaangaanga bwa e na motika taekana te Atua;

22 Ma I taku nakoimi, bwa ane e un iroun tarina e na mena naba i nanon te kaangaanga bwa e na motika taekana. Ao ane e kangai nakon tarina, Raka, e na mena n te kaangaanga bwa e na bowiaki; ao ane e kangai, Ko baba, e na mena n te kaangaanga bwa e na kabuekaki n ain moone.

23 Mangaia are, ngkana kam roko nakoiu, ke kam tangiria n roko nakoiu, ao kam uringnga bwa iai unin tarim iroum—

24 Nako moa nakon tarim, ao ^araoiakinna, ao ngkanne kawarai ma nanom ae bwanin, ao N na butimwaeko.

25 Kariaia are iroun am kairiribai n te tai ae waekoa ngkana ko mena ni kawaina, bwa mwiina ao ko reke irouna n te taina, ao ko teweaki nako i nanon te nne ni kaikain.

26 E koaua, e koaua, ae I tuangkami, bon akea te anga ae ko kona n otinako ma iai ni karokoa ae ko tia ni kabwaka te kabanea n tienin. Ao i nanon ami tai i nanon te nne ni kaikain kam kona ni kabwaka teuana naba te ^atienin? E koaua, e koaua ae I tuangkami, Kam aki.

27 Nooria, e koreaki irouia ake ngkoa, bwa kam na aki ^awenenibure;

28 Ma I taku nakoimi, bwa ane e taraa te aine ma ni ^akaibwabwaru ibukina, e a tia ni wenenibure mangaia i nanona.

29 Nooria, I anganingkami te tua, bwa kam na bon aki kariaia bwaai aikai bwa a na rin i ^ananomi;

30 Bwa e raoiroi riki bwa kam na kaakeai bwaai aikai mai iroumi, ao kam na tabeki rake ami ^akaibangaki, nakon ae kam na teweaki nako moone.

31 E a tia ni koreaki, bwa ane e katuka buuna te aine, ao e na iai ana beeba ni ^aburaure.

32 E koaua, e koaua ae I tuangkami, bwa ane e ^akatuka buuna, ngkana e aki ^bwenenibure ao e bon karekea te anga bwa e na ^cwenenibure; ao ane e mare ma ngaia ae a tia ni buraure e bon karaoa te wenenibure.

33 Ao e a manga koreaki riki, bwa kam na aki berita i bon iroumi, ma kam na karaoa nakon te Uea ami ^aberita;

34 Ma e koaua, e koaua, ae I tuangkami, kam na tai karaoa te ^aberita; tai tuea i karawa, bwa ana kaintokanuea te Atua;

35 Ao tai tuea naba n te aonaba, bwa nnen waena;

36 Ao kam na tai tuea naba n atuumi, bwa kam aki kona ni karoroa ke ni kamainaina iran atuumi.

37 Ao kam na ti taetae ni kangai Eng, eng, Tiaki, tiaki; bwa taeka ake a raka riki nakon aikai bon mai iroun ae buakaka.

38 Ao nooria, e bon koreaki, te ^amata ibukin te mata, ao te wii ibukin te wii;

39 Ma I taku nakoimi, bwa kam na aki ^akabooa te buakaka, ma ane e orea tabam ane te atai, ao ^banganna are teuana naba;

40 Ao ngkana iai te aomata ae e na kateiko n te kabowi n tua ibukin am kabaraaki, ao anganna naba niniram;

41 Ao ane e kairoroiko bwa ko na iria teuana te maire, iria uoua te maire.

42 ^aAanga nakon ane e bubutiko, ao tai tannako mai iroun are e na tangoa am bwai.

43 Ao nooria e bon koreaki naba, bwa kam na tangira raomi ao kam na riba ami kairiribai

44 Ma nooria I taku nakoimi, tangiriia ami ^akairiribai, ao kakabwaiaia ake a taetaebuakaingkami, ao karaoa ae raoiroi nakoia ake a kairiribai nakoimi, ao ^btataro ibukiia ake a kabonganaingkami n te aro ae aki riai ao a bwainikiriningkami;

45 Bwa kam aonga n riki bwa natin Tamami are i karawa; bwa e karaoa taai bwa e na oota i aoia aika a raoiroi ao ake a buakaka.

46 Mangaia are bwaai ni kabane ake ngkoa, ake a mena i aan te tua, a na koro bukiia irou.

47 A bane tain bwaai ake ^angkoa, ao a boou bwaai ni kabane.

48 Mangaia are I tangiria bwa kam na ^akororaoi n arou, ke Tamami are i karawa ngkai e kororaoi.