Mwakoro 17
Iesu e kairia aomata bwa a na iangoi raoi Ana taeka man tataro ibukin te kan oota iai—E katoka aorakiia aika a aoraki—E tataro ibukiia aomata, ao e kabongana te taetae ae e aki kona ni koreaki—A roko n ibuobuoki anera ao a otabwaniniaki, natia aika uarereke n te ai. Uakaan ma 34 N.K.
1 Nooria, ngkai e a koro bukina bwa ngke e a tia Iesu n taekin taeka aikai e taratara nako riki i aoia aomata ake e uanao akekei, ao te taku nakoia: Nooria, e a akaan au tai.
2 I nooria bwa kam mamaara, n te aro are kam aki kona n aoota n au taeka are I tuangaki iroun te Tama bwa N na taekin nakoimi n te tai aei.
3 Mangaia, naako okiri batami, man aiangoi taeka ake I a tia n taekin, ao bubutia te Tama n arau bwa kam na oota iai, ao bkatauraoi raoi ami iango ibukin te cingabong, ao N na manga roko riki nakoimi.
4 Ma ngkai N na anako nakon te Tama, ao N na bkaotai naba nakoia cbaronga ake Iteraera ake tebwina ake a tia ni bua, bwa a bon aki bua iroun te Tama, bwa e bon ataa te tabo are e anaia nako iai.
5 Ao e a koro bukina bwa ngke e a tia Iesu n taekin taeka aikai, e taratara nako riki i aoia aomata ake a uanao, ao nooria a bon tang, ma ni kateimatoa aia taratara iaona n te aro are kaanga a na tuangnga bwa e na tiku riki teutana irarikiia.
6 Ao e taku nakoia: Nooria, e a onrake nanou n te ananoanga ibukimi.
7 Iai i buakomi ae aoraki? Uotia mai. Iai i buakomi ae mwauku, ke e mataki, ke e ikoaki, ke e aki konabwai, ke e rebera, ke e rai, ke aika a bonotaninga, ke a karawawataki n aekaia nako? Kairiaa mai ao N na katoka aorakiia, bwa iai au nanoanga nakoimi; ao e a onrake nanou n te nanoanga.
8 Bwa I nooria bwa kam tangiria bwa N na kaota nakoimi bwa teraa ae I a tia ni karaoi nakoia tarimi ake i Ierutarem, bwa I nooria bwa e bon atau ami bonimaki bwa N na katoka aorakimi.
9 Ao e a koro bukina bwa ngke e a tia n taetae, a bane aomata ake a uanao n teuana te tai, ni mwananga ma aia aoraki ao raoia ake a karawawataki, ao raoia ake a mwauku, ao raoia ake a mataki, ao raoia ake a babanga n taetae, ma aomata ni kabane ake a karawawataki n aekaia nako; ao e boni akatoka aorakiia ni kabane ngke a uotaki nakoina.
10 Ao a boni bane ni kabane, ake a katokaki aorakiia ao ake a marurung, ni bobaraaki i waena, man taromauriia; ao mwaitiia ake a roko mai irouia aomata ake a uanao a bon akaboria ma waena, n te aro are a teboki waena n ranin mataia.
11 Ao e a koro bukina bwa e tuangiia anatiaa aika a uarereke bwa a na uotaki nakoina.
12 Mangaia are a uotia natiia ake a uarereke ma ni katikuia i aontano i rarikina, ao Iesu e tei i buakoia; ao aomata ake a uanao a kamwawa kawaina ni karokoa ae a bane n uotaki nakoina.
13 Ao e a koro bukina bwa ngke a bane n tia n uotaki nakoina, ao Iesu e tei i nukaia, ao e tuangaia aomata ake a uanao bwa a na akatorobubua iaon tano.
14 Ao e a koro bukina bwa a katorobubua iaon tano, ao Iesu e ngirangira i nanona, ma n taku: Tamau e atabetabe nanou ibukin buakakaia te botanaomata ae te bata are Iteraera.
15 Ao ngke e a tia n taekin taeka aikai, e katorobubua iaon tano; ao nooria e tataro nakon te Tama ao bwaai ake e tataro i bukiia a bon aki kona ni koreaki, ao aomata ake a uanao ake a ongo a boni kakoaua ibukina.
16 Ao aio aron aia kakoaua ibukina: Akea te amata ae e a tia n nooria mai i mwaaina ao akea te taninga naba ae e a tia n ongo, mai i mwaain bwaai aika kakannato ma ni kamimi n aron are ti a tia n noori man ongo are e taekin Iesu nakon te Tama;
17 Ao akea te aneewe ae kona n taekinna, ao akea naba ae kona ni koreaki iroun te aomata, ao nanoia aomata aki naba kona n iangoi bwaai aika a korakora ma ni kamimi n aron are ti bon noori ma n ongo bwa e taekin Iesu; ao akea ae kona n iangoa te kimwareirei are e kaona tamneira n te tai are ti ongo iai bwa e tataro ibukira nakon te Tama.
18 Ao e a koro bukina bwa ngke e a tia Iesu ni katoka ana tataro nakon te Tama, e teirake; ma e a bon taonako akimwareireia aomata aika a uanao n te aro are a konaki.
19 Ao e a koro bukina bwa Iesu e taetae nakoia, ma n tuangiia bwa a na teirake.
20 Ao a teirake ma iaon tano, ao e taku nakoia; Kam na kakabwaiaki ibukin ami onimaki. Ao ngkai nooria, bwa e a bwanin kimwareireiu.
21 Ao ngke e a tia n taekin taeka aikai, e atang, ao aomata ake a uanao a bon kakoaua ibukina, ao e anai aia ataei ake a uarereke, temanna i mwin temanna, ao e bkakabwaiaia, ao e tataro nakon te Tama i bukiia.
22 Ao ngke e a tia ni karaoa aio e a manga tang riki;
23 Ao e taetae nakoia aomata ake a uanao, ma n taku nakoia: Nooria ami ataei.
24 Ao ngke a tararake bwa a na nooria a tabekarake mataia nako karawa, ao a noora karawa bwa e uki, ao a nooria anera bwa a ruo mai karawa ae aiaron ae otabwaniniaki n te ai; ao a ruo ma n aotabwaninia ataei ake a uarereke, ao a bon otabwaniniaki n te ai; ao anera a karaoai aia mwakuri n ibuobuoki nakoia.
25 Ao aomata ake a uanao a bon nooria ma n ongo ao a kakoaua ibukina; ao a bon ataia bwa kakoauakina irouia e bon koaua bwa a boni bane n nooria ma n ongo, ni kabane n tatabemania nako; ao mwaitia tao uangaa ao nimabubua te aomata; ao bon mwaane, aine ao ataei.