1 Ngkai e a koro bukina bwa e a bane te karuabwi ma teuana n ririki ao bon ^aonobubua te ririki man te tai are e kitana iai Ierutarem Riaai; ao bon i nanon te ririki anne are Ratonati bon mataniwia taan moti ao te kowana ni kabuta te aba.

2 Ao Nibwaai, are natin Ereman te mwaane, e a tia ni kitana te aba are Taraemera, man angan natina te mwaane, are ^aNibwaai are bon ana karimoa, mwiokon taian ^bbwaatua aika buraati, ma rongorongo ni kabane ake a tia n tauaki mwiia, ao bwaai ni kabane ake a tia ni kawakinaki bwa a tabu man te tai are Riaai e kitana iai Ierutarem.

3 Ao ngkanne e a kitana te aba, ao e ^anakea, bon akea te aomata ae e ataia; ao natina te mwaane are Nibwaai e bon kaawakin taian rongorongo n onea mwiina, eng, rongorongoia te botanaomata aio.

4 Ao e a koro bukina bwa ni moanakin te karuabwi ma uoua n ririki, nooria, a moanna ni kakoroaki bukin aia taeka ni burabeti taian burabeti; bwa a moanna n roko riki kanikina ma mwakuri aika a kamimi i buakoia te botanaomata.

5 Ao iai tabemwaang ake a moanna n taekinna bwa e a bwakanako te tai are a riai ni kakoroaki iai bukin taeka aikai, ake e ^ataekin Tamuera, are te Reimwanaite.

6 Ao a kimwareirei i aoia tariia ni kangai: Nooria e a bwakanako te tai, ao ana taeka Tamuera a bon tuai naba ma ni koro bukiia; ngaia are ami kimwareirei ma ami onimaki ni kaineti ma te bwai aio a bon matebuaka.

7 Ao e a koro bukina bwa a bon karika te kiriwe ae korakora ni kabuta te aba; ao aomata ake aki kakewekewe a bon moanna n nanokawaki, bwa a rawa n aki koro bukin bwaai ake a bon tia n taekinaki.

8 Ma nooria, a bon teimatoa n taratara n te ngaina ma te bong ma tengaina are a na riki bwa ti tebongina n te aro are a na akea te bong, bwa aonga n ataia bwa e aki matebuaka aia onimaki.

9 Ngkai e a koro bukina bwa bon iai te bong ae katannakoaki irouia naake aki kakoaua, bwa ni kabane naake a kakoauai katei aikai a na ^atiringaki ngkana e aki koro bukin te kanikina, are e a bon tia n anga te burabeti ae Tamuera.

10 Ngkai e a koro bukina bwa ngke Nibwaai, are natin Nibwaai te mwaane e noora buakakaia ana botanaomata, e a bon korakora nanokawakin nanona.

11 Ao e a koro bukina bwa e otinako ma ni bobaraaki iaon tano man tang ni kakorakora nakon Atuana ibukiia ana botanaomata, eng, ibukiia ake bon iaon kawaia n tiringaki ibukin aia onimaki n aia katei aia bakatibu.

12 Ao e a koro bukina bwa e tang ni kakorakora nakon te Uea ni ^akabongnga; ao nooria, e roko bwanaan te Uea nakoina ni kangai:

13 Tabekarake atuum ao kukurei; bwa nooria, e a kaan roko te tai, ao n te tairiki aei ao kam na anganaki te kanikina, ao n te ^aingabong ao N na roko nakon te aonaba, bwa N na kaotia nakon te aonaba bwa N na kakoroi bukin bwaai ni kabane ake I a tia n tua bwa a na ^btaekinaki ni wiia au burabeti aika a tabu.

14 Nooria, N na ^aroko nakoia ake au bwai, bwa N na ^bkakoroi bukin bwaai ni kabane ake I a tia ni kaoti nakoia natia aomata ma ni ^cmoan katean aan te aonaba, ao N na kakoroi ^dnanoia, te Tama ao te Nati—nanon te Tama ibukiu, ao nanon te Nati ibukin ae I riki n rabwata. Ao nooria, e a kaan roko te tai, ao n te tairiki aei ao kam na anganaki te kanikina.

15 Ao e a koro bukina bwa taeka ake a roko nakon Nibwaai a kakoroaki bukiia, n aron are a bon tia n taekinaki; bwa nooria, n te tai are e bung iai taai ao bon ^aakea te roo; ao aomata a bon korakora miimiia bwa bon akea te roo ngke e a bong.

16 Ao a bon mwaiti, ake a bon tuai ma ni kakoauai aia taeka burabeti, ake a ^abwaka nako aontano man riki n aron ae a mate, bwa a ataia bwa te ^bbabaire ae korakora ibukin kamaunaakiia ake a kakoauai aia taeka burabeti are e a tia ni katauraoaki e a bon tia ni kamangaoaki; bwa te kanikina are a tia n anganaki e a tia n roko.

17 Ao a moanna n ataia bwa e a kaan kaoti Natin te Atua; eng, ni kakimototoa, ni kabane kaain te aonaba ae bwanin mai maeao nako mainiku, ake n te aba are i meang ao n te aba are i maiaki, a bon korakora miimiia n te aro are a bwaka nako aontano.

18 Bwa a ataia bwa burabeti a tia n taekina koauan bwaai aikai i nanon ririki aika a mwaiti, ao bwa te kanikina are a tia n anganaki e a bon roko; ao a bon moanna ni maaku ibukin aia bure ao aia kakewekewe.

19 Ao e a koro bukina bwa bon akea te roo n te tairiki arei, ma e bon oota n aron ae tawanou. Ao e a koro bukina bwa taai e bon manga oti ngke e a ingabong, n aron are bon arona; ao a bon ataia bwa bon te bong are e a ^abungiaki iai te Uea, ibukin te kanikina are a tia n anganaki.

20 Ao e a koro bukina, eng, bwaai ni kabane, mwakorokorona ni kabane, n aron aia taeka burabeti.

21 Ao e a koro bukina naba bwa e kaoti te ^aitoi ae boou, n aron te taeka.

22 Ao e a koro bukina bwa man te tai arei ao a kanakoaki taeka ni kewe i buakoia aomata, iroun Tatan, bwa aonga ni matoatoa nanoia, ma te kantaninga bwa ana aki kakoauai kanikina ma kamimi ake a tia n noori; ma e ngae ngke iai taian kewe ma mwaamwanakin te aba n aekan aikai, a bon mwaiti riki aomata ake a kakoauai ao ma n rairaki nakon te Uea.

23 Ao e a koro bukina bwa e mwananga Nibwaai i buakoia aomata, ao tabeman naba a mwananga, ni bwabetito ibukin te rairannano, n te aro are e a bon korakora ^akamaunaan bure. Ao ngaia are aomata a manga karekea te rau n te aba.

24 Ao bon akea te kakauntaeka, ma ti iai tabeman ake a waaki ni kakabwarabwara, ni kataia n taekinna bwa e oti n koroboki aika tabu bwa e a aki ^ariai kawakinan ana tua Mote. Ao ngkanne a bon kairua n te aro aei, bwa a tia n aki oota n koroboki aika tabu.

25 Ma e a koro bukina bwa e aki maan ao a manga rairaki, ma ni kakoaua te kairua are e mena i nanona, bwa e kaotaki nakoia bwa e bon tuai ni ^akakoroaki bukin te tua, ao e na bon kakoroaki bukina te tamruru ao te taurouro ni kabane; eng, e roko te taeka nakoia bwa e na bon riai ni kakoroaki bukiia; eng, bwa bon akea te taurouro ke te tamruru teuana ae e na aki kakoroaki bukina ni karokoa ae e na bon bane ni kakoroaki bukiia; ngaia are n te ririki naba aio ao a bon ataa aia kairua ma ni ^bkaoti aia kairua.

26 Ao ngaia are e a toki te karuabwi ma uoua n ririki, ae uota te rongorongo ae kakukurei nakoia aomata ibukin taian kanikina ake a bon koro bukiia, n aron aia taeka n taetae ni burabeti taian burabeti aika a tabu ni kabane.

27 Ao e a koro bukina bwa e bon bane naba te karuabwi ma teniua n ririki i nanon te rau, ma bon ti iai ana ^ataan iraa Kateanton, ake a maeka n te maunga, ake a bon kaona te aba ma ni kakamaku; bwa e bon kaitaraa aron matoatoan aia tabo ni katantan ma aia tabo ni karaba n te aro are aomata aki kona n tokanikai i aoia; ngaia are a bon karaoi tiritiri aika a mwaiti, ma n tiriaomata n aki akaaka.

28 Ao e a koro bukina bwa n te karuabwi ma aua n ririki ao e moanna ni kerake mwaitia n te aro ae korakora, ibukina bwa a bon mwaiti taan birinako aika Nibwaite ake a biri nakoia, ao aio are e karika te nanokawaki ae korakora nakoia Nibwaite ake a tiku n te aba.

29 Ao bon iai naba bukin te nanokawaki ae korakora i buakoia Reimwanaite; bwa nooria, bon iai natia aika a mwaiti ake a rikirake ma ni matoatoa n aia ririki ni maiu, ao a bon tei iaon waeia, ao a kairaki nako irouia tabemwaang aika ^aTioramwaite, ibukin aia kewe ma aia taeka ni kamwamwane, ao a ikotaki ma ana taan iraa Kateanton.

30 Ao ngaia are a bon karawawataki naba Reimwanaite, ao a moanna ni kekerikaki n aia onimaki ma raoiroia, ibukin korakoran buakakaia te roro ae tabe n rikirake.