1 E koaua, e koaua, I tuangkami bwa kam na ^aanga nakoia ake a kainnano; ma taraia bwa kam na aki anga imataia aomata bwa kam aonga n nooraki irouia; bwa mwiina ao a na akea kanuangami iroun Tamami are i karawa.

2 Mangaia are, ngkana kam karaoa ami angabwai tai katanga te bu I mwaaimi, n aroia taani mwaamwana te aba i nanon aia tinakaoke ao n te kawai, bwa e aonga n reke irouia aia ^akamoamoa aomata. E koaua ae I tuangkami, bwa e a tia n reke irouia kanuangaia.

3 Ma ngkana ko anga ao ke tai ataa a na mwakuri angamaingim angataim.

4 Bwa ko na anga n te aro ae raba; ao Tamam ae noora ae raba, e na anganiko kanuangam n aki karaba.

5 Ao ngkana kam ^atataro, ao tai riki n aroia bwaritaio, bwa a tangiria n tataro, i nanon aia auti n nebo ao n te kawai, bwa aonga n nooraki irouia aomata. E koaua ae I tuangkami, e a tia n reke irouia booia.

6 Ma ngkoe, ngkana ko tataro, riin i nanon am ruu, ao ngkana ko a tia ni kaina te mataroa, tataro nakon Tamam n ae raba; ao Tamam, are e noora ae raba, e na anganiko kanuangam n aki karaba.

7 Ao ngkana ko tataro, tai kaokioka mwanewen am tataro ae akea manenana, n aroia beekan, bwa a taku bwa ngkana e bati aia taeka ao e na ongo te aba irouia.

8 Mangaia are ko na tai katotongia, bwa Tamam e ^aatai bwaai aika ko na kainnanoi i i mwaain ae ko na tuangnga.

9 Ao aio ^aaron am ^btataro: ^cTamara are i karawa, e na tabuaki aram.

10 E na tauaki am taeka iaon te aba n aron tauana i karawa.

11 Ao kabwarai ara bure, ngkai ti kabwarai aia bure akana a bure nakoira.

12 Ao tai ^akairira nakon te kaririaki, ma kamaiuira man te buakaka.

13 Bwa am bwai te Uea, ao te mwaaka, ao te neboaki n aki toki. Amen.

14 Bwa ngkana kam ^akabwarai aia bure akana a bure nakoimi ao Tamami are i karawa e na kabwarai naba ami bure;

15 Ma ngkana kam aki kabwarai aia bure aomata ao Tamami e na bon aki kabwarai naba ami bure.

16 Ao riki ngkana kam ^aaki mamatam ao tai katotongia bwaritaio, are a kaota te mata ni kan nanoangaaki, bwa a kabuakakai mataia bwa aonga ni kaotia nakoia aomata bwa a aki mamatam. E koaua ae I tuangkami, e a tia n reke irouia kanuangaia.

17 Ma ngkami, ngkana kam aki mamatam, kabira atuumi, ao teboki matami;

18 Bwa kam aonga n aki ataaki bwa kam aki mamatam, ma Tamami are e ^araba, ao Tamami, are e noora ae raba, e na anganingkami kanuangami n aki karabai.

19 Tai kaikoi kaubwaimi iaon te aba, ike a kang iai te koa ma te raraa iai, ao a roko iai taan iraa ma ni kimoai.

20 Ma kam na kaikoi ^akaubwaimi i karawa, ike aki kang iai te koa ma te raraa, are aki kona taan iraa n roko ni kimoai.

21 Bwa ike e mena iai kaubwaim ao e mena naba iai nanomi.

22 ^aOtan te rabwata te mata; ngaia are ngkana e katiteuanaki ami taratara ao e na onrake rabwatami n te oota.

23 Ma ngkana e buakaka matami, ao e na onrake rabwatami n te roo. Mangaia are, ngkana te oota ane iroumi e roo, ai korakora ra te roo anne?

24 Akea te aomata ae kona n ^atoro irouia uoman tooka; bwa e na riba are temanna ao e na tangira are temanna, ke e na karinea are temanna ao e na kairiribai nakon are temanna. Kam aki kona n toro iroun te Atua ao Mammon.

25 Ao ngkai e a koro bukina bwa ngke e a tia Iesu n taekin taeka aikai e taraia naake tengaun ma uoman ake e a tia n rineia ao e taku nakoia: Kam na uring taeka ake I a tia n taekin. Bwa nooria, bon ngkami ake I a tia n rineia bwa a na ^abuokiia te botanaomata aio. Mangaia are I kangai nakoimi, tai ^btabeakina aron maiumi, bwa tera ae ko na kanna, ke ae ko na mooi iai; ao ibukin rabwatami naba, bwa tera karabami. Tiaki bwa e kakawaki riki te maiu nakon te amwarake, ao te rabwata nakon te kunnikai?

26 Nooria manin aan nang, bwa aki ununiki, ao aki tai naba ma ni kaikoi kanaia n te auti ni kaikobwai; ma Tamami are i Karawa e kamwarakeia. Tiaki bwa kam kakawaki riki nakoia?

27 Antai mai buakomi ae kona ni iangoia bwa e kona ni kananaua maiuna teuana riki te mwanoku ni bai?

28 Ao e aera ngkai kam raraomaeakin karabami? Noori kiebun tawaana bwa a bwebwerake ao aki mwammwakuri ma ni bibinoka;

29 Ma I kangai nakoimi, bwa Toromon, e bon aki kunnikaiaki n aron tamaroan tekaina ma i buakoia, ni bwaina aika a tamaroa.

30 Mangaia are ngkana arona bwa te Atua e kunnikaia uteuten te tawaana, are n te bong aei a maiu, ao ningabong a teweaki nako i nanon nnen te ai, tiaki bwa e na kunnikaingkami, ngkana aki karako ami onimaki.

31 Mangaia are tai katabei ami iango, ni kangai, Teraa ngkai kanara? ke, Teraa ngkai nimara? ke, Ti na karabanira n teraa?

32 Bwa Tamami are i Karawa e atai bwaai aika kam kainnanoi ni kabane.

33 Ma ko na ukoukora moa ^auean te Atua ao ana raoiroi, ao a na bane ni karaoaki bwaai aikai nakoimi.

34 Tai tabeakina te ingabong, bwa te ingabong e na bon tabeakinna i bon irouna. E a bati n tau kanoan te bongina ma buakakana ae ko na raraoma iai.