Mwakoro 7
E a tiringaki mataniwia taan moti, ao e a kamaunaki te tautaeka, ao aomata a maenako i nanon baronga aika a kakaokoro—Iakobwa, are te tia kakewea Kristo, e riki bwa uean te botaki ni karaba aika buakaka—E kabwarabwaraa taekan te rairannano ao te onimaki iroun Kristo Nibwaai—Anera a buokiia ni katoa bong, ao e kateirakea tarina man te mate—A mwaiti aika a rairinanoia ma ni bwabetitoaki. Uakaan ma 30–33 N.K.
1 Ngkai nooria, N na kaotia nakoimi bwa a bon aki kateirakea te uea ae e na kabuta aon te aba; man te ririki naba aei, are te katenibwi n ririki, a bon kamauna te kaintekateka ni motikitaeka, eng, a bon tiringa mataniwiia taan moti n te aba.
2 Ao aomata a maenako imarenaia; ao a maenako imarenaia n taian baronga, ni kabane te aomata n ana utu ao ana koraki ao raoraoia; mangaia are a boni kamaunaa te tautaeka n te aba.
3 Ao baronga ni kabane a rinea te mataniwi ke te tia kairiri i aoia; ao ngaia are a riki bwa baronga ao taan kairiri n taian baronga.
4 Ngkai nooria, bon akea te aomata mai i buakoia ae e aki mwaiti ana utu ao ana koraki ao raoraona; mangaia are a bon rianako korakoran aia baronga.
5 Ngkai a bane ni karaoaki aikai, ao bon akea te buaka moa i buakoia; ao bure aikai a bon roko nakoia aomata ibukina bwa a bon aanga ngaia nako nanoni mwaakan Tatan.
6 Ao a uruakaki tuan te tautaeka, ibukin botaki ni akaraba aika buakaka irouia raraoia ma aia koraki naake a tia n tiringiia burabeti.
7 Ao a bon karika te itabaraaraa ae korakora n te aba, n te aro are naake a raraoi riki a kuri ni bane ni buakaka; eng, bon ti tabeman aika a raoiroi i buakoia.
8 Mangaia are e bon tuai ni koro onoua te ririki ao angiia aomata a tannako man raoiroia, n ai aron te kamea are e okira amumutana, ke n aron te beeki aine are e oki n rabinobino i nanon te bokaboka.
9 Ngkai te botaki ni karaba ae buakaka aei, are e bon karokoa te bure ae korakora i aoia te botanaomata, e bon karika ikotakiia, ma ni karekea aia mataniwi te mwaane are a aranna bwa Iakobwa;
10 Ao a bon aranna bwa aia uea; mangaia are e a riki bwa te uea i aoia te koraki aika a bubuaka aikai; ao bon ngaia temanna te mataniwi are e anga bwanana ni kaaitaraia burabeti ake a kakoaua ibukin Iesu.
11 Ao e a koro bukina bwa e bon aki mwaiti riki mwaitia nakoia aia baronga aomata, ao a bon katiteuanaki, ma a kaokoroaki irouia aia mataniwi ake a karaoi aia tua, temanna ma temanna ni kaineti ma ana baronga; ma e ngae n anne a kairiribai koraki ake buakaka ma baronga, ma a bon katiteuanaki n aia kairiribai nakoia naake a tia ni karaoa te berita ae tabu bwa a na kamaunaa te tautaeka.
12 Ngaia are, Iakobwa e nooria bwa a mwaiti riki aia kairiribai nakoia, ngkai ngaia uean te koraki arei, mangaia are e tua nakoia ana aomata bwa a na birinako nakon mwakoron te aba are te kabanea mai i meang, ao a na katea aaban ueaia ikekei ni karokoa ae a raonaki irouia taan birinako, (bwa e mwaamwanaiia bwa e na iai taan birinako) ao e na bon tau korakoraia n itabaraaraa ma aia baronga aomata; ao a karaoa nanon aei.
13 Ao e bon rangi ni waekoa aron mwanangaia n te aro are aki kona n tutukaki ni karokoa ae aikoa kona ni manga rootaki irouia aomata. Ao ikai are e a toki naba iai te katenibwi n ririki; ao aikai aia waaki ana botanaomata Nibwaai.
14 Ao e a koro bukina bwa n te katenibwi ma teuana n ririki ao a bon maenako i nanon taian baronga, te aomata n ana utu, ma ana koraki ao raoraona: ma e ngae n anne a karaoa te boraraoi bwa a na aki buaka imarenaia; ao a aki katiteuanaki i aan aia tua, ma aron aia tautaeka, bwa a bon kateaki n aron aia iango naake a rineaki bwa aia mataniwi ma aia tia kairiri. Ma a boni katei taian tua aika a matoatoa bwa e aonga n ae akea te baronga teuana ae e na karaoa te bure nakon are teuana, n te aro are iai teutana te rau n te aba; ma e ngae n anne, ao nanoia a bon tannako mai iroun te Uea ae Atuaia, ao a karebanaia burabeti n taian atibu ma n teweia nako ma i buakoia.
15 Ao e a koro bukina bwa aNibwaai—ngke e a tia ni kawaraki irouia anera ao ni bwanaan naba te Uea, ngaia are e a tia n nooria anera, ao ngkai e bon nooria ni matana, ao bon iai te mwaaka are e anganaki bwa e na ataa ana mwakuri Kristo, ao ngkai e bon noora naba ni matana waekoaia n rairaki man raoiroia nakon buakakaia ao aia mwakuri aika bati n ribaki.
16 Mangaia are, e bon karawawataki i nanona ibukin matoatoan nanoia ao matakiin aia iango—ao e nako buakoia n te ririki naba anne, n ninikoria ni kakoaua, ibukin te rairannano ao kamaunaan bure rinanon te onimaki iroun te Uea ae Iesu Kristo.
17 Ao e karaoi mwakuri n ibuobuoki aika bati nakoia, ao aikoa kona ni bane ni koreaki taekaia, ao e aki tau ti mwakorona, mangaia are a bon aki koreaki n te boki aei. Ao Nibwaai e mwakuri ma te amwaaka ao te kariaiakaki ae korakora.
18 Ao e a koro bukina bwa a bon un irouna, ibukina bwa e korakora riki mwaakana nakoia, bwa e bon aaki reke ae a na aki kakoauai ana taeka, bwa e bon rang korakora ana onimaki iroun te Uea are Iesu Kristo ao are a bubuokia anera ni katoa bong.
19 Ao n aran Iesu e kakioia nako riaboro ma atamnei aika a bareka; ao e boni kateirakea naba tarina man te mate, i mwin are e a tia ni karebanaaki n te atibu ao e mate irouia te botanaomata.
20 Ao aomata a nooria, ma ni kakoaua, ao a bon un irouna kioina ngke iai irouna te mwaaka; ao e bon karaoi kakai aika a amwaiti riki, imataia aomata, n aran Iesu.
21 Ao e a koro bukina bwa e bon bane te katenibwi ma teuana n ririki, ao bon iai tabeman ake a rairaki nakon te Uea; ao mwaitia ake a tia n rairaki a kaotia nakoia aomata bwa a bon tia ni kawaraki ni mwaakan ao Tamnein te Atua, are iroun Iesu Kristo, are a kakoaua.
22 Ao bon angiia ake a tia ni kakioaki nako riaboro mai irouia, ao a kamarurungaki man aorakiia ao mamaaraia, a bon kaotia nakoia aomata bwa a bon tia n rotaki n Tamnein te Atua, ao a bon marurung; ao a kaoti kanikina naba ma ni karaoi kakai i buakoia aomata.
23 Ao mangaia are e a toki te katenibwi ma uoua n ririki naba. Ao Nibwaai e takarua nakoia aomata ni moanakin te katenibwi ma teniua n ririki; ao e kabwarabwara nakoia te rairannano ao kamaunaan bure.
24 Ngkai I tangiria bwa kam na uringnga naba, bwa bon akea ae kairaki nakon te rairannano ae aki abwabetitoaki n te ran.
25 Mangaia are, a bon katabuaki mwaane iroun Nibwaai, nakon te mwakuri aei, bwa ni kabane ake a na roko nakoia a na bwabetitoaki n te ran, ao e na riki aio bwa te bwai ni kaotioti ao te kakoaua imatan te Atua, ao nakoia aomata, bwa a tia n rairinanoia ma ni karekea akamaunaan aia bure.
26 Ao a bon mwaiti ni moanakin te ririki aei ake a bwabetitoaki nakon te rairannano; ao mangaia are e a bane riki angiin te ririki.