1 Ao ngkanne e a koro bukina bwa n te katebwi ma onoua n ririki man rokon Kristo, Ratonati, are te kowana n te aba, e karekea te reta mai iroun te tia kairiri ao te kowana irouia te koraki ni kamwarua aikai; ao aikai taeka ake a koreaki, ni kangai:

2 Ratonati, are moan te kakannato ngkoe ao mataniwia kowana n te aba, nooria, I korea te reta aio nakoim, man anganiko te kamoamoa ae rianako ibukin ae ko nene ao a nene naba am botanaomata, ni kateimatoa are kam taku bwa inaomatami ao kainaomatakimi; eng, kam bon tei raoi, n te aro are titebo ma kam boutokaaki ni bain te atua, n tei ibukin inaomatami, ao ami bwai, ao abami, ke are kam arana bwa ami bwai.

3 Ao e bon kananokawaki iroou, Ratonati ae moan te kakannato, bwa ko bon rang burababa ma ni kainikatonga n te aro are ko kataua inanom bwa kam kona n tei ni kaaitaraia au koraki aika a mwaiti ao a ninikoria ake a mena i aan au kairiri, are n te tai aei a bon tei ma aia bwai ni buaka, man tataninga ma te ingainga nakon te taeka ae—Nako aoia Nibwaite ao tiringia.

4 Ao Ngai, I ataa ninikorian ma aki kantaonakin nanoia, bwa a tia ni kaotia i nanon te marae ni buaka, ao I ataa aron aia kairiribai ae aki totoki nakoimi ibukin kairua aika a mwaiti ake kam a tia ni karaoia nakoia, ngaia are ngkana a roko ni kaaitaraingkami a na bon kawaringkami ma te urubwai ae korakora.

5 Ngaia are I a tia ni korea te reta aio, ni kanikinaea n oin baiu, bwa iai au namakin ibukin mweraoimi, ibukin ae kam nene n te bwai are kam kakoaua bwa e eti, ao ninikorian aromi i nanon te marae ni buaka.

6 Ngaia are I koroboki nakoim, n tangiria bwa kam na anganiia au botanaomata aio, ami kaawa, abami, ao ami bwai nako, nakon ae a na kawaringkami ma te kabaang ao e na roko te mate i aomi.

7 Ke n taeka riki tabeua, anga ngkami nakoira, ma ni katiteuanaki ma ngaira ao reireingkami ara mwakuri ni ^akaraba, man riki bwa tarira bwa kam aonga n riki n aekakira—tiaki bwa ara toro, ma tarira ao raora ngkami n ara bwai nako.

8 Ao nooria, I ^aberita nakoimi, ngkana kam karaoa aei, ma te berita, ao kam na bon aki tiringaki; ma ngkana kam aki karaoa aio, I berita nakoimi bwa n te namwakaina ae e na roko ao N na tua bwa au taanga ni buaka ana roko ni kaaitaraingkami, ao a na bon aki taui baia mai iroumi man aki kamaiuingkami, ma a na kamateingkami, ao e na bwaka te kabaang i aomi ni karokoa ae kam bua.

9 Ao nooria, bon Ngai Kiteaenaai; ao Ngai te kowana n te ^abotaki ni karaba ae Kateanton; are te botaki ae aia mwakuri I atai bwa a ^braoiroi; ao a bon mwakuri ma ^cngkoa are ti a bon tia n anganaki.

10 Ao I korea te reta aio nakoim, Ratonati, ao I kantaningaia bwa kam na anganiira abami ma ami bwai, n akea kawawaean te raraa, ao aio bwa aonga au botanaomata ni manga karekei inaomataia ma aia tautaeka, are a tia ni birinako mai iroumi ibukin buakakami n taua mai irouia inaomataia n tautaeka, ao ngkana kam aki karaoa aio, N na kabooi mwiin ami kairua nakoia. Ngai bon Kiteaenaai.

11 Ao ngkanne e a koro bukina bwa ngke e a karekea te reta aio Ratonati, e bon korakora miimiina, ibukin ninikorian Kiteaenaai n tangira tauan abaia Nibwaite, ao riki kakamaakaia aomata ao kabooan mwiin taian kairua nakoia ake a bon tuai ni karaoaki ae kairua nakoia, ma ti ngaia ake a bon tia ni karaoa ae bon ^akairua bon nakoia ngke a birinako nakoia taan kamwarua aika a buakaka ma ni kammaira aikai.

12 Ao ngkanne nooria, Ratonati aio, are bon te kowana, bon te aomata ae raoiroi, ao e bon aki kona ni maaku n taian kairoro ao kakamaku mai iroun te ^akamwarua; ngaia are e bon aki ira nanon ana reta Kiteaenaai, are aia kowana taan kamwarua, ma e bon tua nakoia aomata bwa a na tang nakon te Uea ibukin korakoraia i i mwaain te tai are a na roko kamwarua ni kaaitaraia.

13 Eng, e kanakoa te katanoata i buakoia aomata ni kabane, bwa a na ikotaki ma aia aine, ao natia, ao aia nanai ma aia ikota ni man, ma aia bwai ni kabane, ni katuka abaia, man nakon te tabo ae ti teuana.

14 Ao e karekea te anga are a na kateaki taabo ni katantan are a na otabwaniniaki iai, ao e na rianako matoatoana. Ao e tua bwa aia taanga ni buaka Nibwaite ao Reimwanaite ke ngaia ni kabane ake a warekaki bwa Nibwaite, a na kateaki bwa taan tararua ake a na otabwaninia n tarataraia, ma ni kawakinia mai rouia taan kamwarua n te ngaina ao te bong.

15 Eng, e taku nakoia: Ngkai e maiu te Uea, ao ti ngkana kam aki rairinanomi man ami bure nako, man tang nakon te Uea, ao kam na bon aki kamaiuaki mai nanon baia ana taan iraa Kateanton.

16 Ao e bon rang korakora ma ni kamimi ana taetae ma ana taeka ni burabeti Ratonati n te aro are e karika te maaku bwa e na roko nakoia aomata ni kabane; ao a bon kakorakoraia ni kabanea korakoraia bwa a na karaoi nanon ana taeka Ratonati.

17 Ao e a koro bukina bwa Ratonati e rineia mataniwia mataniwi i aoia aia taanga ni buaka ni kabane Nibwaite, bwa a na kairia n te tai are a na roko taan kamwarua man te rereua ni kaaitaraia.

18 Ao ngkanne te tia kairiri ae rine i aoia aika kaaben ao mataniwi ni kabane bon te tia kairiri ae moan te korakora n aia taanga ni buaka ni kabane Nibwaite are e rineaki, arana bon ^aKikitonaai.

19 Ao ngkanne bon aio te katei i buakoia Nibwaite ni kabane bwa a na rinea mataniwia aia mataniwi, (ma ti aki i nanon aia tai ni buakaka) temanna ae iai irouna tamnein te kaotioti ao te ^ataeka ni burabeti; ngaia are, Kikitonaai aei bon te burabeti ae korakora mai buakoia, ao bon mataniwia naba taan moti.

20 Ao ngkanne a taku aomata nakon Kikitonaai: Tataro nakon te Uea, ao ti na nako aon te maunga ao i nanon te rereua, bwa ti aonga n roko irouia kamwarua ma n tiringiia n oin abaia.

21 Ma e taku Kikitonaai nakoia: E ^atabuia te Uea; bwa ngkana ti na waerake ni kaaitaraia ao te Uea e na ^banga ngaira nako nanon baia; ngaia are ti na katauraoira i nukan abara nako, ao ti na ikotiia ara taanga ni buaka, ao ti na aki nako ni kaaitaraia, ma ti na tataninga ni karokoa ae a roko ni kaaitaraira; ngaia are ngkai e maiu te Uea, ngkana ti karaoa aei ao e na anga ngaiia nako nanon baira.

22 Ao e a koro bukina bwa n te katebwi ma itiua n ririki, ni kabanean te ririki, ana katanoata Ratonati e a kabuta te aba, ao a uoti aia aoti, ma aia kaa ni buaka, ma aia kao, ma aia nanai ni kabane, ao aia ikota ni man, ao aia wiita, ma aia bwai ni kabane, ao a mwananga ni mwaitia ae ngaa ma ngaa ao tebwina te ngaa ma tebwina te ngaa, ni karokoa ae a bane n nakon te tabo are e a tia n rineaki bwa a na ikotaki iai, bwa a na tei ni kaitaraia aia kairiribai.

23 Ao te aba are e rineaki bon te aba are Taraemera, are te aba are imarenan Taraemera ao te Aba ni Mari, eng, nakon tian te aba are imarenan te Aba ni Mari ao te Aba are Kamaroa.

24 Ao e bon mwaiti bwa ngaa ma ngaa aomata ake a bon aranaki bwa Nibwaite, ake a bon ikotaki n te aba aio. Ao ngkanne Ratonati e bon tua bwa ana ikotiia n te aba nako maiaki, ibukin korakoran te maraia are e mena iaon te ^aaba are nako meang.

25 Ao a bon kamatoatoaia ni kaitaraia aia kairiribai; ao a bon maeka n teuana te aba, ao n teuana te rabwata, ao a bon maakui taeka ake a tia n taekinaki iroun Ratonati, n te aro are a bane n rairinanoia man aia bure; ao a bon tataro nakon te Uea ae Atuaia, bwa e na ^akainaomataia n te tai are a na ruo aia kairiribai ni kaitaraia n te buaka.

26 Ao a bon korakora nanokawakia ibukiia aia kairiribai. Ao Kikitonaai e bon tua bwa a na karaoa aia ^abwai ni buaka n aekaia nako, ao a na korakora n aia kunnikai ni buaka, ao taian otanga, ma otanga aika a uarereke, n aron ana kaetieti Kikitonaai.