၂ နီဖိုင်း ၃

အခန်းကြီး ၃

အဲဂုတ္တုပြည်ရှိယောသပ်သည် ရူပါရုံ၌ နီဖိုင်းအမျိုးသားတို့ကို မြင်၏—သူသည် နောက်ပိုင်းကာလ မြင်သောသူဖြစ်သည့် ဂျိုးဇက်စမစ်အကြောင်း၊ ဣသရေလအမျိုးတို့ကို ကယ်လွှတ်မည့် မောရှေအကြောင်းနှင့် မော်မုန်ကျမ်းဖြစ်ပေါ်လာခြင်းအကြောင်းတို့ကို ပရောဖက်ပြု၍ဟော၏။ ဘီစီ ၅၈၈–၅၇၀ ခန့်။

၁ ယခုမူကား၊ ငါ၏သားနှောင်းယောသပ်၊ ငါသည် သင့်ကိုဆို၏။ ငါဆင်းရဲဒုက္ခခံစားရာ တောရိုင်းထဲ၌ သင့်ကိုဖွားမြင်ခဲ့၏။ အမှန်စင်စစ်၊ ငါ၏ဝမ်းနည်းမှုအကြီးမားဆုံးသော ကာလ၌ သင်၏အမိသည် သင့်ကို ဖွားမြင်ခဲ့၏။

၂ သင်သည် ဣသရေလအမျိုး၏ သန့်ရှင်းတော်မူသောဘုရား၏ပညတ်တော်တို့ကို စောင့်ထိန်းမည်ဆိုလျှင်၊ သင်၏လုံခြုံမှုအတွက် သင်၏ညီအစ်ကိုတို့နှင့်အတူ သင်၏အမွေခံရာနှင့် သင့်အမျိုးအနွယ်တို့၏အမွေခံရာအဖြစ် အဖိုးအထိုက်ဆုံးပြည်ဖြစ်သည့် ဤပြည်ကိုလည်း သင့်အတွက် ကိုယ်တော်ရှင်ကာလအစဉ်အဆက် ရည်စူးတော်မူပါစေ။

၃ ယခုမူကား၊ ယောသပ်၊ ငါဆင်းရဲဒုက္ခခံစားရာတောရိုင်းထဲမှ ဆောင်ယူခဲ့လေသည့် ငါ၏သားနှောင်း ကိုယ်တော်ရှင်သည် သင့်ကို ကာလအစဉ်အဆက် ကောင်းချီးပေးတော်မူပါစေ။ အကြောင်းမူကား၊ သင်၏အမျိုးအနွယ်သည် ရှင်းရှင်း ဖျက်ဆီးမခံရ။

၄ အကြောင်းမူကား၊ ရှုလော့၊ သင်သည် ငါ့ရင်သွေးဖြစ်၏။ ငါသည်လည်း အဲဂုတ္တုပြည်သို့ ဖမ်းဆီးချုပ်နှောင်၍ ဆောင်ယူခံရသည့် ယောသပ်၏ အမျိုးအနွယ်ဖြစ်၏။ ယောသပ်ထံ ပြုတော်မူခဲ့သည့် ကိုယ်တော်ရှင်၏ ပဋိညာဉ်တို့သည်လည်း ကြီးမြတ်တော်မူလေ၏။

၅ သို့ဖြစ်၍၊ ယောသပ်သည် ငါတို့၏နေ့ရက်တို့ကို အမှန်ပင်မြင်၏။ ထို့အတူ သူသည် ကွဲကွာသည့် လူတစ်စုဖြစ်သော်လည်း ထိုသူတို့ကို မှောင်မိုက်မှ အလင်းသို့၊ တန်ခိုးကို ပေးသောဝိညာဉ်တော်အားဖြင့်၊ နောက်ပိုင်းကာလများ၌ ထိုသူတို့ထံ မေရှိယထင်ရှားစွာပြတော်မူလိမ့်မည်ဟူသည့် ကိုယ်တော်ရှင်၏ပဋိညာဉ်များအတိုင်း၊ အောက်မေ့နိုင်ကြစေခြင်းငှာ၊ သူ၏ရင်သွေးမှ ဣသရေလအမျိုးသားတို့အတွက် မေရှိယကိုမဟုတ်သော်လည်း၊ ဖြောင့်မတ်သောသူတစ်စုကို ကိုယ်တော်ရှင်ဘုရားသခင်ပေါ်ထွန်းစေလိမ့်မည်ဆိုသော ကိုယ်တော်ရှင်၏ကတိတော်ကို ရရှိ၏—အမှန်စင်စစ်၊ ဖုံးကွယ်ထားသော မှောင်မိုက်နှင့် ဖမ်းဆီးချုပ်နှောင်ခြင်းမှ လွတ်လပ်ခွင့်သို့ ဆောင်ယူနိုင်သည့်တိုင်အောင်ပေတည်း။

၆ အကြောင်းမူကား၊ ယောသပ်အမှန်ပင်သက်သေခံ၍ ဆိုလေသည်ကား မြင်သောသူတစ်ဦးကို ငါ၏ဘုရားသခင်ကိုယ်တော်ရှင် ပေါ်ထွန်းစေတော်မူလိမ့်မည်၊ ထိုသူသည် ငါ၏ရင်သွေးအဖို့ ရွေးကောက်တော်မူထိုက်သည့် မြင်သောသူဖြစ်လိမ့်မည်။

၇ ထိုမှတစ်ပါး၊ ယောသပ်အမှန်ပင်ဆိုသည်မှာ၊ ငါ့ကို ကိုယ်တော်ရှင်မိန့်တော်မူလေသည်ကား၊ ရွေးကောက်တော်မူထိုက်သည့် မြင်သောသူတစ်ဦးကို ငါသည် သင်၏ရင်သွေးမှ ပေါ်ထွန်းစေတော်မူမည်။ သူသည် သင်၏ရင်သွေး၌ အလွန်အလေးအမြတ်ထား ခံရလိမ့်မည်။ သူ့အား ငါမိန့်မှာမည်၊ သူ၏ညီအစ်ကိုများဖြစ်သည့် သင်၏ရင်သွေးအတွက်၊ သင်၏ဘိုးဘေးတို့နှင့် ငါပြုထားတော်မူလေသည့် ပဋိညာဉ်အကြောင်း အသိပညာသို့ သူတို့ကို ဆောင်ယူသည်အထိပင်၊ သူတို့အတွက် ကြီးစွာအဖိုးထိုက်သည့် အမှုကို ပြုစေမည့်အကြောင်းပေတည်း။

၈ သူ့ကို ငါမိန့်တော်မူမည့် အမှုမှတစ်ပါး၊ အခြားအမှုကို မပြုစေမည့်အကြောင်း ငါသည် သူ့အား ပညတ်တော်ကို ပေးမည်။ ငါသည် သူ့ကို ငါ၏အမြင်၌ ကြီးမြတ်စေမည်။ အကြောင်းမူကား၊ သူသည် ငါ၏အမှုတော်ကို လုပ်ဆောင်လိမ့်မည်။

၉ ငါ၏လူမျိုးတို့ကို ကယ်လွှတ်ရန်၊ သင်တို့အတွက် ပေါ်ထွန်းစေလိမ့်မည်ဟု ငါမိန့်တော်မူလေသည့် မောရှေကဲ့သို့ သူသည် ကြီးမြတ်လိမ့်မည်၊ အို ဣသရေလအမျိုးသားတို့။

၁၀ သင်၏လူမျိုးတို့ကို အဲဂုတ္တုပြည်မှ ကယ်လွှတ်ရန် မောရှေကို ငါပေါ်ထွန်းစေမည်။

၁၁ သို့ရာတွင်၊ မြင်သောသူတစ်ဦးကို ငါသည် သင်၏ ရင်သွေးမှ ပေါ်ထွန်းစေမည်၊ သင့်ရင်သွေး၏ အမျိုးအနွယ်တို့ထံ ငါ၏နှုတ်ကပတ်တော်ကို ဖော်ပြရန် သူ့အား ငါသည် တန်ခိုးကို ပေးတော်မူမည်—ငါ၏နှုတ်ကပတ်တော်ကို ဖော်ပြစေခြင်းသို့သာလျှင်မဟုတ်၊ ကိုယ်တော်ရှင်မိန့်တော်မူသည်မှာ၊ သူတို့၌ ထွက်သွားနှင့်လေပြီဖြစ်သော ငါ၏နှုတ်ကပတ်တော်ကို နားသွင်းစေသည့်တိုင်အောင်ပင်တည်း။

၁၂ သို့ဖြစ်၍၊ သင်၏ရင်သွေး ရေးလိမ့်မည်။ ယုဒ၏ရင်သွေးလည်း ရေးလိမ့်မည်။ သင့်ရင်သွေးရေးမည့်အရာနှင့် ယုဒ၏ရင်သွေးရေးမည့်အရာတို့သည်လည်း မှားယွင်းသောဩဝါဒတို့ကို ချေပစေခြင်းငှာ၊ ရန်တွေ့ခြင်းများကို ရပ်တန့်စေခြင်းငှာ၊ သင်၏ရင်သွေး၌ ငြိမ်းချမ်းခြင်းကို တည်ဆောက်စေခြင်းငှာ၊ နောက်ပိုင်းကာလများ၌ သူတို့ဘိုးဘေးတို့အကြောင်း အသိပညာသို့၊ ထို့အတူ ငါ၏ပဋိညာဉ်များအကြောင်း အသိပညာသို့ သူတို့ကို ဆောင်ယူခြင်းငှာ အတူတကွပေါင်းစည်းလိမ့်မည်ဟု ကိုယ်တော်ရှင်မိန့်တော်မူ၏။

၁၃ ငါ၏လူမျိုးခပ်သိမ်းတို့၌ ငါ၏အမှုတော်ကို အစပြုမည့် ထိုကာလ၌ သင်တို့ထံ ပြန်လည်ပေးအပ်သည့်တိုင်အောင်၊ အားနည်းချက်ရှိရာမှ ထိုသူကို အားကြီးစေလိမ့်မည်၊ အို ဣသရေလအမျိုးသားတို့၊ ကိုယ်တော်ရှင်မိန့်တော်မူ၏။

၁၄ ဤသို့အားဖြင့်၊ ယောသပ် ပရောဖက်ပြုဟော၍ဆိုလေသည်ကား၊ ရှုလော့၊ ထိုမြင်သောသူကို ကိုယ်တော်ရှင်ကောင်းချီးပေးတော်မူလိမ့်မည်။ သူ့ကို ဖျက်ဆီးရန်ကြိုးစားသောသူတို့သည် ရှုံးနိမ့်ကြလိမ့်မည်။ အကြောင်းမူကား၊ ငါ့ရင်သွေးနှင့်စပ်လျဉ်း၍၊ ကိုယ်တော်ရှင်ထံမှ ငါရရှိထားလေသည့် ဤကတိတော်ကို ပြီးပြည့်စုံစေလိမ့်မည်။ ရှုလော့၊ ငါသည် ဤကတိတော်၏ ပြီးပြည့်စုံစေခြင်းအကြောင်းကို စိတ်ချ၏။

၁၅ သူ့အမည်ကို ငါ့နည်းတူ ခေါ်ကြလိမ့်မည်။ ထိုအမည်သည် သူ့အဘ၏အမည်အတိုင်း ဖြစ်လိမ့်မည်။ ထို့အတူ၊ သူသည် ငါကဲ့သို့ပင်ဖြစ်လိမ့်မည်။ အကြောင်းမူကား၊ ထိုသူ၏လက်ဖြင့် ကိုယ်တော်ရှင်ဖော်ပြတော်မူမည့်အရာသည်ကား၊ ကိုယ်တော်ရှင်၏တန်ခိုးတော်အားဖြင့် ငါ၏လူမျိုးတို့ကို ကယ်တင်ခြင်းသို့ ဆောင်ယူမည့်အရာပေတည်း။

၁၆ ထိုမှတစ်ပါး၊ ယောသပ် ပရောဖက်ပြု၍ဟောလေသည်ကား၊ ငါသည် မောရှေ၏ကတိကို စိတ်ချသကဲ့သို့ပင် ဤအရာကို စိတ်ချ၏။ အကြောင်းမူကား၊ ငါသည် သင်၏အမျိုးအနွယ်တို့ကို ကာလအစဉ်အဆက် ကာကွယ်စောင့်မမည်ဟု ကိုယ်တော်ရှင်သည် ငါ့ကို မိန့်တော်မူလေပြီ။

၁၇ ကိုယ်တော်ရှင်မိန့်တော်မူလေသည်ကား၊ ငါသည် မောရှေကို ပေါ်ထွန်းစေမည်။ ငါသည် သူ့အား လှံတံအားဖြင့် တန်ခိုးကို ပေး၍၊ စီရင်ရေးခြင်းကိုလည်း ပေးမည်။ သို့ရာတွင်၊ ငါသည် သူ၏လျှာကို မလွတ်စေသဖြင့်၊ သူသည် စကားများစွာမပြောရ။ အကြောင်းမူကား၊ ငါသည် သူ့ကို စကားပြောခြင်း၌ အားကြီးစေမည်မဟုတ်။ သို့ရာတွင်၊ ငါ့ပညတ်ကို ငါ့လက်၏လက်ချောင်းဖြင့် သူ့အဖို့ရေးမည်။ ငါသည် သူ့အတွက် စကားပြောသူတစ်ယောက်ကိုလည်း ခန့်ထားတော်မူမည်။

၁၈ ကိုယ်တော်ရှင်မိန့်တော်မူပြန်လေသည်ကား၊ ငါသည် သင့်ရင်သွေးအတွက် ပေါ်ထွန်းစေတော်မူမည်။ စကားပြောသူတစ်ယောက်ကိုလည်း သူ့အတွက် ခန့်ထားတော်မူမည်။ ထို့အတူ၊ ငါသည် ရှုလော့၊ သင့်ရင်သွေး၏စာကို ရေးစေမည့်အကြောင်း၊ သူနှင့် သင့်ရင်သွေးကို အခွင့်ပေးတော်မူမည်။ သင့်ရင်သွေး၏ စကားပြောသူသည်လည်း ထိုအရာကို ဟောပြောလိမ့်မည်။

၁၉ သူရေးမည့် စကားတို့သည်ကား၊ ငါ၏ဉာဏ်ပညာတော်အတိုင်း ကောင်းမွန်၍ သင့်ရင်သွေးသို့ ရောက်မည့် စကားတို့ပေတည်း။ ထိုအရာသည်ကား၊ သင့်ရင်သွေးသည် သူတို့ထံ မြေမှုန့်ထဲမှနေ၍၊ တောင်းလျှောက်လေသကဲ့သို့ ဖြစ်လိမ့်မည်။ အကြောင်းမူကား၊ ငါသည် သူတို့၏ယုံကြည်ခြင်းကိုသိ၏။

၂၀ သူတို့သည်လည်း အထူးသဖြင့်၊ မိမိတို့နောက်၊ မျိုးဆက်ပေါင်းများစွာတို့ ကွယ်လွန်ကြလေပြီးသော်မှပင်၊ မြေမှုန့်ထဲမှဟစ်ကြွေး၍၊ နောင်တရခြင်းကိုပင် မိမိတို့ညီအစ်ကိုတို့ထံ၊ တောင်းဆိုကြလိမ့်မည်။ ဤသို့အားဖြင့်အချိန်တန်လာလတ္တံ့သောအခါ၊ အကယ်စင်စစ်၊ သူတို့စကားများ၏ ရိုးရှင်းခြင်းအတိုင်း သူတို့၏တောင်းဆိုသံများ ထွက်ပေါ်လာလိမ့်မည်။

၂၁ သူတို့၏ယုံကြည်ခြင်းကြောင့် သူတို့စကားများသည် သင့်ရင်သွေးများဖြစ်သော သူတို့၏ညီအစ်ကိုများသို့ ငါ၏နှုတ်မှ ထွက်တော်မူလိမ့်မည်။ သူတို့၏စကားအရာ၌အားနည်းချက်ကို ငါသည် သူတို့၏ယုံကြည်ခြင်းအားဖြင့် အားကြီးစေအောင် ပြုတော်မူမည်ကား၊ သင့်ဘိုးဘေးတို့ထံ ငါပြုလေသည့် ငါ၏ပဋိညာဉ်ကို အောက်မေ့ခြင်းသို့တိုင်အောင်ပေတည်း။

၂၂ ယခုမူကား၊ ရှုလော့ ငါ့သားယောသပ်၊ ဤကဲ့သို့အားဖြင့် ငါ၏ရှေးဘိုးဘေးတို့က ပရောဖက်ပြု၍ဟောခဲ့ပေ၏။

၂၃ သို့ဖြစ်၍၊ ဤပဋိညာဉ်ကြောင့် သင်သည် ကောင်းချီးခံစားရ၏။ အကြောင်းမူကား၊ သင်၏အမျိုးအနွယ်တို့သည် ထိုစာအုပ်မှစကားတို့ကို စေ့စေ့နားထောင်မည်ဖြစ်၍ ဖျက်ဆီးမခံကြရ။

၂၄ ဣသရေလအမျိုးသားတို့နှင့် သင့်ညီအစ်ကိုတို့၏အမျိုးအနွယ်များသို့ များစွာသော ပြန်လည်အပ်နှင်းခြင်းကို ဖြစ်ပေါ်စေခြင်းအထိ၊ အလွန်ကြီးသောယုံကြည်ခြင်းနှင့် ကြီးစွာသောအံ့မခန်းချီးမွမ်းဖွယ်အမှုတို့ကို ပြုခြင်းငှာ၊ ထို့အတူ ဘုရားသခင်၏အမြင်၌ ကြီးစွာသောအရာတို့ကိုပြုခြင်းငှာ၊ ထို့အတူ ဘုရားသခင်၏လက်တော်၌ တန်ဆာတစ်ခုဖြစ်၍၊ စကားအရာနှင့် အကျင့်အရာ နှစ်ခုစလုံး၌၊ များစွာသောကောင်းမြတ်ခြင်းကို ပြုမည့် ပေါ်ထွက်လာသော အားကြီးသူသည် ထိုသူတို့၌ ရှိလိမ့်မည်။

၂၅ ယခုမူကား၊ သင်သည် မင်္ဂလာရှိ၏၊ ယောသပ်။ ရှုလော့၊ သင်သည် အသက်ငယ်၏။ သို့ဖြစ်၍၊ သင်၏အစ်ကိုနီဖိုင်း၏စကားတို့ကို စေ့စေ့နားထောင်လော့။ ငါပြောလေသည့် စကားတို့အတိုင်းပင် သင့်အဖို့ ဖြစ်လိမ့်မည်။ သင်၏ သေအံ့ဆဲဆဲအဘ၏ စကားတို့ကို သတိရလော့။ အာမင်။