၂ နီဖိုင်း ၁၅

အခန်းကြီး ၁၅

ကိုယ်တော်ရှင်၏စပျစ်ဥယျာဉ် (ဣသရေလအမျိုး) သည် လူဆိတ်ညံရာ ဖြစ်လာ၍၊ သူ၏လူမျိုးတို့သည် ကွဲပြားပြန့်ကျဲကြလိမ့်မည်—သူတို့၏ ဖောက်ပြန်သင်းကွဲ၍၊ ကွဲပြားပြန့်ကျဲသည့်အခြေအနေတွင်၊ အမင်္ဂလာများ ကျရောက်လာလိမ့်မည်—ကိုယ်တော်ရှင်သည် အလံကိုထူ၍၊ ဣသရေလအမျိုးတို့ကို စုဝေးစေလိမ့်မည်—ဟေရှာယအခန်းကြီး ၅ နှင့် နှိုင်းယှဉ်ပါ။ ဘီစီ ၅၅၉–၅၄၅ ခန့်။

၁ ထို့နောက်တွင်၊ ငါ၏အလွန်ချစ်ရာသခင်၏စပျစ်ဥယျာဉ်တော်ကို အကြောင်းပြု၍၊ မေတ္တာသီချင်းကို သူ့အတွက် ဆိုပေအံ့။ မြေကောင်းသောတောင်ပေါ်မှာ ငါ၏အလွန်ချစ်ရာသခင်၏ စပျစ်ဥယျာဉ်တော်တစ်ခုရှိ၏။

၂ သူသည် ထိုဥယျာဉ်ကို ကာကွယ်၍၊ ထိုနေရာမှ ကျောက်ခဲတို့ကို ရှင်းလင်းပြီးမှ၊ အကောင်းဆုံးသောစပျစ်နွယ်ပင်တို့ကို စိုက်ပျိုးတော်မူ၏။ အလယ်၌ လင့်စင်ကိုလည်းဆောက်၍၊ ထိုအရပ်၌ စပျစ်သီးနယ်ရာကျင်းကိုလည်း တူးတော်မူ၏။ စပျစ်သီးကို သီးလိမ့်မည်ဟု သူမျှော်လင့်သည်ရှိသော်၊ ဗောရှသီးကို သီးလေ၏။

၃ ယခုမူကား၊ အို ယုဒပြည်သူ၊ ယေရုရှလင်မြို့သားတို့၊ ငါနှင့် ငါ့စပျစ်ဥယျာဉ်အမှုကို စီရင်ကြပါလော့။

၄ ငါ့စပျစ်ဥယျာဉ်၌ ငါပြုနိုင်ခဲ့လျက်၊ မပြုသေးသောအရာ တစ်စုံတစ်ခုရှိသလော။ သို့ဖြစ်၍၊ စပျစ်သီးကိုသီးမည်ဟု ငါမျှော်လင့်သည်ရှိသော်၊ ဗောရှသီးကို သီးလေ၏။

၅ ယခုမူကား၊ ငါ့စပျစ်ဥယျာဉ်၌ ငါပြုမည့်အမှုကို သင်တို့အား ငါဖော်ပြမည်—ထိုဥယျာဉ်၏ စောင်ရန်းကို ငါဖယ်ရှားသဖြင့်၊ သူတစ်ပါးတို့သည် ဥယျာဉ်ကို စားကြလိမ့်မည်။ ထိုဥယျာဉ်တံတိုင်းကို ငါဖြိုချသဖြင့်၊ နင်းချေခံရလိမ့်မည်။

၆ ထို့အတူ၊ ငါသည် ဥယျာဉ်ကို ဖျက်ဆီးမည်။ သုတ်သင်ခြင်းမခံရ။ တူးဆွခြင်းလည်းမခံရ။ သို့ရာတွင်၊ ဆူးပင်အမျိုးမျိုး ပေါက်ကြလိမ့်မည်။ ထိုဥယျာဉ်ပေါ်မှာ မိုးမရွာစေခြင်းငှာလည်း မိုးတိမ်ကို ငါပညတ်မည်။

၇ ကောင်းကင်ဗိုလ်ခြေကိုယ်တော်ရှင်၏စပျစ်ဥယျာဉ်ကား၊ ဣသရေလအမျိုးသားဖြစ်၏။ သူ၏နှစ်သက်တော်မူသောပျိုးပင်ကား ယူဒလူတည်း။ သူသည် တရားစီရင်ခြင်းကို မျှော်လင့်သည်ရှိသော်၊ ညှဉ်းပန်းနှိပ်စက်ခြင်းကိုလည်းကောင်း၊ ဖြောင့်မတ်ခြင်းအရာ၌လည်း ငိုကြွေးခြင်းကိုလည်းကောင်း တွေ့မြင်တော်မူ၏။

၈ မိမိတို့သည် မြေ၏အလယ်၌ တစ်စုတည်းနေရာကျစေခြင်းငှာ၊ လပ်သောအရပ် မရှိနိုင်စေသည့်တိုင်အောင်၊ အိမ်တစ်ဆောင်နှင့် တစ်ဆောင်ကိုလည်းကောင်း၊ လယ်တစ်ကွက်နှင့် တစ်ကွက်ကိုလည်းကောင်း ဆက်တတ်သောသူတို့သည် အမင်္ဂလာရှိကြ၏။

၉ ငါ၏နားအပါး၌ ကောင်းကင်ဗိုလ်ခြေကိုယ်တော်ရှင်မိန့်တော်မူသည်ကား၊ အကယ်စင်စစ်၊ များစွာသော အိမ်တို့သည် လူဆိတ်ညံရာဖြစ်ကြ၍၊ ကြီးကျယ်တင့်တယ်သောမြို့အများတို့သည် နေသောသူမရှိဘဲဖြစ်ကြလိမ့်မည်။

၁၀ အကြောင်းမူကား၊ စပျစ်ဥယျာဉ်တစ်ပယ်သည် စပျစ်ရည် တစ်ဗတ်ကိုမျှသာဖြစ်စေမည်။ မျိုးစေ့ကိုလည်း ကြဲသောအခါ၊ ဆယ်ဖို့တွင် တစ်ဖို့ကိုမျှသာ ရကြလိမ့်မည်။

၁၁ သေရည်သေရက်ကို လိုက်၍ရှာအံ့သောငှာ၊ နံနက်စောစောထလျက်၊ ညဉ့်တိုင်အောင်ဆက်သောက်၍၊ စပျစ်ရည်နှင့် ယစ်မူးသောသူတို့သည် အမင်္ဂလာရှိကြ၏။

၁၂ သူတို့၏ပွဲ၌ စောင်း၊ တယော၊ ပတ်သာ၊ ပုလွေ၊ စပျစ်ရည် ပါတတ်၏။ သို့ရာတွင်၊ သူတို့သည် ကိုယ်တော်ရှင်၏အမှုတော်ကိုကား၊ ပမာဏမပြုကြ။ လက်တော်နှင့် ပြုပြင်တော်မူရာကိုလည်း မရိပ်မိကြ။

၁၃ ထို့ကြောင့်၊ ငါ၏လူတို့သည် အသိပညာမရှိသောကြောင့်၊ ဖမ်းဆီးချုပ်နှောင်ခြင်းကို ခံရကြ၏။ သူတို့၏ဂုဏ်သရေရှိသူတို့သည် မွတ်သိပ်၍သေကြ၏။ သူတို့၏ လူအစုအဝေးသည် ရေငတ်ခြင်းဝေဒနာကို ခံစားရလျက်ရှိကြ၏။

၁၄ ထို့ကြောင့်၊ ငရဲသည် မိမိနေရာကို ကျယ်စေ၍၊ မိမိနှုတ်ကို အတိုင်းအဆမရှိဘဲ ဖွင့်ဟသဖြင့်၊ သူတို့၏ ဂုဏ်အသရေ၊ လူအစုအဝေး၊ အသံဗလံပြုခြင်းတို့နှင့်အတူ၊ ရွှင်လန်းဝမ်းမြောက်သောသူသည် ဆင်းမြုပ်ရ၏။

၁၅ သာမန်လူလည်း ဦးနှိမ့်ချခြင်း၊ အားကြီးသောသူလည်း နှိမ့်ချခြင်းခံရ၍၊ မာနကြီးသောသူတို့၏မျက်နှာလည်း နှိမ့်ချရ၏။

၁၆ ကောင်းကင်ဗိုလ်ခြေကိုယ်တော်ရှင်သည် တရားစီရင်ခြင်းအားဖြင့်၊ ချီးမြှောက်ခြင်းသို့ ရောက်တော်မူလိမ့်မည်။ သန့်ရှင်းတော်မူသော ဘုရားသခင်သည် ဖြောင့်မတ်ခြင်းအားဖြင့်၊ သန့်ရှင်းစင်ကြယ်စေခြင်းရှိတော်မူလိမ့်မည်။

၁၇ ထိုအခါ၊ သိုးသငယ်တို့သည် မိမိတို့ ထုံးစံအတိုင်း ကျက်စားရကြလိမ့်မည်။ ဆူအောင်ကျွေးသည့်အကောင်တို့ ကျက်စားဖူးသည့် ဆိတ်ညံရာအရပ်၌လည်း သူတစိမ်းတို့စားကြလိမ့်မည်။

၁၈ ဒုစရိုက်ကို အချည်းနှီးကြိုးဖြင့်ဆွဲသောသူ၊ လှည်းကြိုးဖြင့်ဆွဲသကဲ့သို့ အပြစ်ကို ဆွဲငင်သောသူတို့သည် အမင်္ဂလာရှိကြ၏။

၁၉ သူ၏အမှုကို ငါတို့မြင်ရမည်အကြောင်း၊ အလျင်အမြန်ပြု၍ နှိုးဆော်တော်မူပါစေ။ ငါတို့ သိမြင်ရမည့်အကြောင်း၊ ဣသရေလအမျိုး၏ သန့်ရှင်းတော်မူသောဘုရား၏အကြံတော်သည် အနီးသို့ချဉ်း၍၊ ပြည့်စုံပါစေဟု သူတို့ကလည်း ဆိုတတ်ကြ၏။

၂၀ အဆိုးကို အကောင်း၊ အကောင်းကို အဆိုးဟု ခေါ်တတ်သောသူ၊ အလင်းအရာ၌ အမိုက်၊ အမိုက်အရာ၌ အလင်းကိုလည်းကောင်း၊ အချိုအရာ၌ အခါး၊ အခါးအရာ၌အချိုကိုလည်းကောင်း မှတ်ယူတတ်သောသူတို့သည် အမင်္ဂလာရှိကြ၏။

၂၁ ဉာဏ်ပညာရှိသည်ဟု ကိုယ့်ကိုယ်ကိုထင်သောသူ၊ ပညာတတ်ဟု ကိုယ့်ကိုယ်ကိုထင်သောသူတို့သည် အမင်္ဂလာရှိကြ၏။

၂၂ စပျစ်ရည်ကို သောက်ခြင်းအမှု၌ အားကြီးသောသူ၊ သေရည်သေရက်ကို ရောစပ်ခြင်းအမှု၌၊ အားကြီးသောသူတို့သည် အမင်္ဂလာရှိကြ၏။

၂၃ ထိုသူတို့သည် တစိုးကိုစားခြင်းငှာ၊ ဆိုးညစ်သောသူကို အပြစ်ကင်းစေ၍၊ ဖြောင့်မတ်သောသူ၏ ဖြောင့်မတ်ခြင်းကို ဖယ်ရှား၏။

၂၄ ထို့ကြောင့်၊ မီးလျှံသည် ရိုးပြတ်ကို လောင်ကျွမ်းလျက်၊ မီးတောက်သည် ဖွဲကိုကျွမ်းစေသည်နည်းတူ၊ သူတို့၏အမြစ်သည် ဆွေးမြေ့လျက်၊ သူတို့၏အပွင့်များသည်လည်း မြေမှုန့်ကဲ့သို့ လွန့်တက်လိမ့်မည်။ အကြောင်းမူကား၊ သူတို့သည် ကောင်းကင်ဗိုလ်ခြေကိုယ်တော်ရှင်၏ တရားတော်ကို စွန့်ပယ်ကြပြီ။ ဣသရေလအမျိုး၏သန့်ရှင်းတော်မူသောဘုရား၏ နှုတ်ကပတ်တော်ကို မထီမဲ့မြင်ပြုကြပြီ။

၂၅ ထို့ကြောင့်၊ ကိုယ်တော်ရှင်သည် မိမိလူမျိုးတို့ကို အမျက်ထွက်လျက်၊ သူတို့၌ မိမိလက်တော်ကိုဆန့်၍ ဒဏ်ခတ်တော်မူသဖြင့်၊ တောင်များ တုန်၍၊ သူတို့၏အသေကောင်တို့သည် လမ်းများ၌ စုတ်ကွဲလျက်ရှိကြ၏။ ဤအရာခပ်သိမ်းတို့ကြောင့်၊ သူ၏ အမျက်တော်သည် မငြိမ်းသော်လည်း၊ လက်တော်သည် ဆန့်လျက်ရှိသေး၏။

၂၆ သူသည် ဝေးသောအရပ်မှာနေသောပြည်သားတို့အဖို့ အလံကိုလည်းထူ၍၊ မြေကြီးစွန်းသားတို့ကို နှိုးဆော်တော်မူသဖြင့်၊ ရှုဦးလော့၊ သူတို့သည် အလျင်အမြန်လာကြလိမ့်မည်။ သူတို့၌ မောပန်းသူမရှိ။ ထိမိ၍လဲသောသူလည်းမရှိ။

၂၇ အဘယ်သူမျှ မငိုက်မြည်းရ၊ အိပ်လည်းမအိပ်ရ။ သူတို့ခါးစည်းလည်း မပြေ။ သူတို့ခြေနင်းကြိုးလည်းမကျွတ်။

၂၈ သူတို့၏မြားတို့သည် ထက်ကြလိမ့်မည်။ သူတို့၏လေးတို့သည်လည်း တင်လျက်ရှိကြ၏။ သူတို့၏မြင်းခွာတို့သည် မီးကျောက်ကဲ့သို့လည်းကောင်း၊ ရထားဘီးတို့သည်လည်း လေပွေကဲ့သို့လည်းကောင်း ထင်မှတ်ရ၏။ သူတို့အသံဗလံသည် ခြင်္သေ့ဟောက်သံနှင့်တူ၏။

၂၉ သူတို့သည် ခြင်္သေ့ပျိုကဲ့သို့ ဟောက်ကြလိမ့်မည်။ ထိုမှတစ်ပါး၊ သူတို့သည် ဟောက်လျက် သားကောင်ကို ဖမ်း၍၊ အနှောင့်အယှက်ကင်းစွာ သယ်ဆောင်သွားကြလိမ့်မည်။ အဘယ်သူမျှ မကယ်မလွှတ်ရ။

၃၀ ထိုကာလ၌၊ သူတို့တစ်ဖက်တွင် သမုဒ္ဒရာအသံဗလံကဲ့သို့ ဟုန်းဟုန်းမြည်ကြလိမ့်မည်။ ထိုပြည်ကို သူတို့ ကြည့်ရှုလျှင်လည်း၊ ရှုလော့၊ မှောင်မိုက်နှင့် ဝမ်းနည်းခြင်းကို မြင်ရ၍၊ ကောင်းကင်အလင်းသည်လည်း မှောင်မိုက်လိမ့်သတည်း။