Wase 8

Na Veivakalougatataki ni Valetabu me Baleti Keda Kei Ira na Noda Qase E Liu

Na inaki ni valetabu me vakarautaki kina e dua na vanua me vakaycori kina na veicakacaka vakalotu tabu me baleti ira na mate kei ira na bula.

Na Bula nei George Albert Smith

Ena 1905, ni qai kacivi vou me dua na iApositolo, a lakova kina o George Albert Smith e vica na vanua ni itukutuku makawa ni Lotu vata kei Peresitedi Joseph F. Smith kei ira tale eso na lewe ni Kuoramu ni Le Tinikarua. E dua na vanua era a veisiko kina o Kirtland e Ohio, na vanua era a tara kina na Yalododonu taumada na imatai ni valetabu ena itabagauna oqo. “Ni ra sa raica yani na tauni,” e nanuma lesu o Elder Smith, “na imatai ni ka e tao kina na matai keimami sai koya na valetabu totoka e Kirtland. … Oqori na vanua erau a raica kina na iVakabula na Parofita o Josefa Simici kei [Oliver Cowdery] ena itutunivunau. E keri a solia kina vei rau ko Mosese na idola ni kena vakasoqoni vata o Isireli; ka rau a lako mai kina o Ilaisa kei Ilaija ena kaukauwa kei na vakaturaga ni nodrau ilesilesi cecere, ka mai solia na idola ka a vakatautaki tu vei rau na kena taqomaki ena gauna ni nodrau veiqaravi ena vuravura oqo.”

Ni ra sarava tiko na valetabu, e vakasamataki ira tiko na Yalododonu yalodina era a tara o Elder Smith. “Ni keimami qai kila ni ra a tara na tamata ka dravudravua sara tu vakalevu na ituvaki ni nodra bula, na nodra cakacaka e veisiga na tamata yaloqaqa me ra tura na yavu ka tara cake na lalaga ni vale, ia ena bogi era qai yadrava ka taqomaka ena nodra iyaragi mai vei ira era sa yalataka tu me kakua ni vakacavari na tara ni vale oqo, eda sega ni rawa ni cakitaka ni sa dodonu ga me ciqoma na nodra vakacacabo na Turaga ka vakalougatataki ira ena veivakalougatataki e lewe vica wale na tamata e vuravura era se qai ciqoma.”¹

Ena vica na yabaki e muri, ni oti na nona vakatikori me Peresitedi ni Lotu, a vakatabuya o Peresitedi Smith na Valetabu na Idaho Falls Idaho. Ena masu ni vakatatabu, a vakavinavinakataka na cakacaka ni veivakabulai e vakayacori ena valetabu me baleti ira na bula kei ira na mate:

“Keimami vakavinavinaka vei kemuni, na Kalou, me baleti Ilaija o koya ko ni a tala mai, na parofita ni gauna makawa, o koya ko ni a solia vua na kaukauwa me vagolea na lomadra na qase vei ira na gone, kei na lomadra na gone vei ira na nodra qase, io me kakua ni cudruvi na vanua ena veivakarusai. [V&V 27:9] Keimami vakavinavinaka ni a talai mai vua na nomuni tamata, ko Josefa Simici, me mai solia kina na idola kei na veivakadonui ni cakacaka me baleti ira na mate, ka mai vakatakila ni yavu ni veivakabulai e kovuta na matavuvale ni kawatamata, na kosipeli e raraba na kena yaga, ka ni o ni sega ni dau doka na tamata, ko ni sa vakarautaka na kena vunautaki na kosipeli vei ira na bula kei ira na mate. Keimami sa vakavinavinaka vei kemuni ni sa vakarautaki tu ki na tamata kecega era gadreva me ra vakabulai ena nomuni matanitu.

“Me ka marautaki vei ira na nomuni tamata me ra vakasaqara na kedra itukutuku na tubudra era sa mate yani me ra ivakabula kina ena Ulunivanua ko Saioni ena nodra laki vakaitavi ena nomuni valetabu ena vukudra na nodra mate. Keimami sa masuta talega me na dau tiko dei sara na yaloi Ilaija vei ira na tamata kecega e veivanua me ra vakauqeti kina me ra vakasokumuna ka vakarautaka na kedra itukutuku na tubudra; ka me ra dau vakayagataka na luvemuni yalodina na nomuni valetabu me ra qarava kina ena vukudra na mate na veicakacaka vakalotu e baleta na nodra bula vakacerecerei tawamudu.”

Ena nona masu a tukuna talega kina o Peresitedi Smith ni valetabu e vale dina sara ni Turaga ka vanua ena dau vakilai kina na nona iserau na Kalou:

“Nikua oi keimami eke ena gauna oqo keimami sa vakatabuya vei kemuni na Valetabu kei na veika kece sara e baleta ena savasava e matamuni, me vale kina ni masu, me vale ni veivakacaucautaki kei na sokalou, ka me dau tiko kina na nomuni lagilagi ka me dau tu ga kina na nomuni iserau tabu; ka me na dau nona itikotiko na Luvemuni Daulomani, ko Jisu Karisito, na neimami iVakabula; ka me na dau vakasavasavataki ka vakatabui kei na veitikina kece me vakatabui yani vei kemuni, ka keimami masuta me ra vakauqeti ena kena savasava o ira kece era na kosova na ilago ni nomuni Vale oqo. …

“Kemuni na Tamai keimami Vakalomalagi, me na dau vakilai tikoga eke na kemuni iserau, o ira kece era dau soqoni eke me ra na kila ni ra sa nomuni vulagi ka ni nomuni Vale oqo.”² [Raica na vakatutu 1 ena tabana e 96.]

iVakavuvuli nei George Albert Smith

Eda na ciqoma ena valetabu na veicakacaka vakalotu tabu, ka okati kina na cakacaka vakalotu ena vauca vata na veimatavuvale me baleta na gauna tawamudu.

Me rawa ni da vakarautaki ki na matanitu [vakasilesitieli], na Turaga ena nona loloma veivueti, sa vakalesuya mai na Kosipeli i Jisu Karisito ena veigauna e muri oqo, ka vakatikora kina na veivakadonui vakalou, oti e qai solia na kila ka vei ira na Luvena ni rawa ni ciqomi ka vakayacori na veicakacaka vakalotu eso. Ena inaki oqo era tara kina na valetabu ia ena loma ni veivaletabu oqori sa tu kina na madigi vei ira era gadreva me dua na nodra tikina ena Matanitu Vakasilesitieli me ra lako kina ka laki ciqoma na nodra veivakalougatataki, me vakavutuniyautaka na nodra bula ka vakarautaki ira ki na matanitu o ya.³

O keda duadua ga na matatamata ena vuravura oqo eda kila se cava na inaki ni valetabu.⁴

Na [valetabu] yadua sa tara me baleta e dua na inaki cecere ka tawamudu: me Vale ni Turaga, me vakarautaki kina e dua na vanua e tabu ka veiganiti me vakayacori kina na veicakacaka vakalotu tabu me vauca e vuravura me vaka mai lomalagi—na veicakacaka vakalotu me baleti ira na mate kei ira na bula ka dau vakadeitaki kina vei ira era ciqoma kei ira era yalodina ki na nodra veiyalayalati, na kena taukeni kei na veitokani ni nodra matavuvale, na veivuravura e sega ni yalani, kei na bula vakacerecerei vata kei ira ena matanitu vakasilesitieli nei Tamada.⁵

Sa dodonu meda vakavinavinaka ena noda kila na tawamudu ni veiyalayalati ni vakamau. Kevaka sa tu walega vei keda na vakanuinui me baleta ga na bula oqo, eda sa qai tamata vakaloloma sara vei ira na tamata kecega [raica na 1 Korinica 15:19]. Na veivakadeitaki ni noda veiwekani eke vakaitubutubu kei ira na luveda, vakaveiwatini ena tomani tiko mai lomalagi, ka ni sai koya oqo na itekivu walega ni dua na matanitu cecere ka lagilagi ka sa lewa na Tamada meda na laki taukena ena tai kadua, ena vakasinaiti keda ena inuinui kei na reki.⁶

Kevaka meu nanuma, me vaka era nanuma tu e lewevuqa, ena gauna oqo ni ratou sa takali yani na watiqu lomani kei rau na noqu itubutubu lomani, ni ratou sa takali yani vakadua mai na noqu bula kau sa na sega tale ni raici iratou, au sa na vakuwai mai na dua na marau levu duadua ni noqu bula: na kena vakasamataki niu na sota tale kei iratou, ka rawata na nodratou veikidavaki kei na nodratou loloma, kei na nodratou vakavinavinakataki mai vu ni yaloqu na veika kece eratou sa vakayacora oti vei au.

Ia e vica vata na milioni vei ira na luvena na Tamada ka ra sega tu ni kila ni ena nodra cakava eso na cakacaka vakalotu sa vakarautaka tu na Tamada Vakalomalagi, era na vakaduavatataki kina na veiwatini me baleta na gauna oqo kei na veigauna tawamudu ka marautaka na nodra veitokani na luvedra me tawamudu. Sa dodonu meda vakavinavinakataka na kila ka o ya.⁷

E vica wale na vanua e vuravura e rawa ni da vakamau kina me baleta na tawamudu, oqori ena veivaletabu ni Kalou. … Era tu talega e vuqa na tacida kei na ganeda, era luvena kece na Tamada Vakalomalagi, ka ra vakuwai tu mai na galala oqo ena vuku ni veika … sega ni dau levei rawa. Ia kevaka era bula kilikili, kevaka era a soli ira ki na galala oqo, kevaka a rawa me vakakina, era na sega ni rawai mai na ituvaki ni bula vakatovotovo sega ni vinaka o ya. Ia qai vakasamataka mada na levu ni nodra itavi o ira era bula tu ena veivanua e rawa ni ra vauci kina me tawamudu na turaga kei na marama, kei ira e rawa ni ra cakava na cakacaka me baleti ira na nodra mate! E sega ni tu vei ira na tamata e vuravura na veivakalougatataki oqo. Au vakataroga se da dau marautaka beka. …

Meda dusimaki ira na noda itabagone ena veika oqo ena gauna era se gone sara kina, ni ra qai yacova yani na gauna ni vakamau, ena sega ni vakataroga voli na nodra vakasama na vanua na kena ivakarau se o cei ena cakava na veicakacaka vakalotu—ia na vanua ga ena vakayacori kina me baleta na gauna oqo kei na gauna tawamudu sai koya ena loma ni valetabu.⁸

Au vakavinavinakataka [na Turaga] me baleta na veicakacaka vakalotu kece sara ni Vale ni Turaga au sa ciqoma, ka sega ni nakiti e dua vei ira me baleti au duadua ga, ia sa vakatarai vei au meu ciqoma e dua na tikina ka nakiti me baleti ira kecega na luvena, se na vanua cava ga era tu kina, kevaka sa lomadra me ra ciqoma na veika e solia tu vei ira ko koya, sega ena ilavo ka sega ena isau.⁹

Na veivaletabu kece … era sa tara oti kei ira se bera era na vakatabui, era na ka ni veivakalougatataki sega ni wiliki rawa vei ira kece era soli ira ena kilikili me ra laki vakayagataka, me baleti ira ka baleti ira talega na nodra era sa mate yani.¹⁰ [Raica na vakatutu 2 ena tabana e 97.]

Ena vuku ni cakacaka ni valetabu eda sa vakarautaka kina na veivakalougatataki tawamudu vei ira na tubuda era sa mate yani.

Na isoqosoqo ni volakawa sa dau vakasokumuna na (itukutuku ni matavuvale) ena vica vata na yabaki, kei ira tale eso era dau vakayagataka e vica vata na yabaki me ra lako ki na Vale ni Turaga me ra papitaiso kina ena vukudra na mate, me ra vauci vata na turaga kei na marama vakawati kei ira na luvedra, meda vakaduavatataka na matavuvale me vaka sa vakarota na Turaga meda kitaka vakakina. Ena vinaka sara kevaka eda na dui taroga vei keda na taro: Na cava au sa cakava tiko kina? Au sa cakava tiko beka na noqu itavi? E tukuna na Tamada Vakalomalagi vei ira na tamata mai vei Josefa Simici ni, vakavo ga kevaka eda cakava na nodra cakacaka na noda mate, eda na vakayalia na noda veivakalougatataki, ka da na tamusuki tani, ka dua vei ira na iotioti ni ka a tovolea na parofita me vakayacora o ya me vakaotia e dua na valetabu me rawa ni ra lako kina na tamata ka cakava na cakacaka me baleti ira na nodra mate. Oqori na kena bibi. Me dua e cakava.¹¹

Au nanuma kina e dua na italanoa ni rua na veitacini ka rau vakaitikotiko ena dua na koro ena vualiku kei Utah: O Henry, o koya e qase, e dua na daunibaqe ka dauveivoli, ka levu na nona iyau. O George, na tacina ka dua, e dauteitei, ka sega ni levu na ka e dau vo vua ni sa oti na veika e gadreva, ia e dau gadreva me cakava na cakacaka ni valetabu me baleti ira na nodrau era sa mate. A vakasaqara na ivola ni nodrau kawa ka lako ki na valetabu ka cakacakataki ira era sa yali yani.

Ena dua na siga e kaya o George vei Henry, “Au nanuma ni dodonu mo lako sobu ki na valetabu ka veivuke kina.”

Ia qai kaya o Henry, “E sega na gauna meu cakava kina na veika oqori. Au sa vakayagataka taucoko sara ga na noqu gauna meu qarava kina noqu bisinisi.” …

Rauta ni dua na yabaki mai na gauna ko ya, a basika yani ki na vale nei George o Henry ka kaya, “George, au a tadra, kau sa lomaleqa sara kina. E rawa beka ni o tukuna vei au na kena ibalebale?”

E taroga o George, “Na cava o tadra, Henry?”

Qai kaya o Henry, “Au tadra ni daru sa takali yani mai na bula oqo ka daru sa tiko ena yasa ni ilati kadua. Ni daru sa lako voli, e daru yacova sara e dua na koro totoka. Era kumukumuni vakailawalawa na tamata ena vuqa na vanua, ena veivanua kecega daru lako yani kina era lululu vata kei iko ka mokoti iko ka vakalougatataki iko ka cavuta na nodra vakavinavinaka ni ra raici iko, ia,” e kaya, “era sega sara ga ni bau kauwaitaki au vakalailai; era sega sara ga ni marautaki au. Na cava na kena ibalebale?”

Qai taroga o George, “O nanuma ni daru sa tiko ena yasa kadua ni ilati?”

“Io.”

“Io, oqo na ka au dau tukuna tiko vei iko. Au dau tovolea tiko meu uqeti iko mo cakava na cakacaka me baleti ira era sa tu mai kea. Au dau cakava tiko na cakacaka me baleta e vuqa vei ira, ia e levu vei ira se vo tu na nodra cakacaka me caka. … E vinaka mo sa tekivu cakacaka, baleta o sa vakila vakalailai na veika o na laki sotava ni o sa yaco yani kina kevaka o sega ni cakava na nomu itavi ena kena qaravi na cakacaka oqo me baleti ira.” [Raica na vakatutu 3 ena tabana e 97.]

Au dau vakasamataka ena vuqa na gauna na italanoa oqo mai na nodrau bula na veitacini. E vuqa na tamata era sega sara ga ni kila na bibi kei na tabu ni bula; era sega ni kila na tabu ni vakamau tawamudu. Era tu eso na noda era sega sara ga ni bau kauwaitaka tu na itukutuku ni nodra kawa. Era sega ni bau kauwaitaka na veika e baleti ira na tubudra e liu; ena rawa ni o vakila mai na nodra itovo. Era sega ni dau lako ki na valetabu me ra cakava na cakacaka me baleti ira na nodra mate. …

… Ni da sa lako oti ki na Vale ni Turaga me baleta na noda veivakalougatataki, meda nanuma talega na noda itavi ena vukudra na tubuda. Ena vakaevei na nomu ciqomi ni o sa lako yani ki yasana kadua? O iko beka era na dolele mai kina ka vakalougatataki tiko ena veitabayabaki ni gauna tawamudu, se o na vakataki koya a leqataki koya voli ga ena bula oqo ka sega ni bau vukei ira era a sega ni rawa ni vukei ira vakataki ira?¹²

Eda kila ni da sa vauci vata ena cakacaka cecere e qaravi ena valetabu nei Tamada, ka ra kau vata mai kina na veimatavuvale era se bera ni vauci vata ena kaukauwa ni Matabete Tabu. Na nona inaki na Turaga me soli vei ira na luvena tagane kei na yalewa yadua na madigi me ra vakalougatataki, sega walega ena vuravura oqo, ia me ra marautaka na veivakalougatataki tawamudu.

Vakasamataka na nodra gugumatua kei na nodra yalodina o ira era dau lako yani ki na valetabu e veisiga ka laki vakaitavi ena vukudra era sa toki yani ki yasa kadua, mo ni kila ni o ira era sa tu ena yasana kadua era sa vakanuinui tu mai vei keda. Era masulaki keda meda qaqa. Era vakatakekere, ena nodra sala vakataki ira, ena vukudra na tubudra, ena vukudra na nodra kawa era se tu e vuravura.¹³

Ena vukei keda na Turaga ena noda vakasaqarai ira na noda era sa mate.

E Chicago ena vica na yabaki sa oti, ena Senijiuri ni Progress Exposition, au a curu ki na vakatuniloa ni Lotu ena dua na siga ka vakataroga vei iratou na daukaulotu se o cei e liutaka tiko na vakaraitaki ka levu oqo ni itovo vakavanua kei na vakadidike.

Eratou tukuna vei au ni yacana na turaga o Dawes, kau taroga, “O koya beka na taci Charles G. Dawes, o koya na ivukevuke ni peresitedi kei Amerika ka mata talega ki Peritania?”

Eratou qai sauma, “Io.”

“Io,” Au kaya, “Au marau niu kila. Niu kilai koya.”

Au kaya lo ga, “Au vakabauta au sa na laki raici koya mada. O Henry Dawes na yacana.” Au kilai Henry Dawes, au mani lako ki na talevoni ka qiri ki na nona valenivolavola. E tukuna vei … Mr. Dawes na nona sekeriteri ni tiko o ya o George Albert Smith mai Salt Lake City ka vinakata me rau sota, a tukuna vua me sureti au meu lako yani. A sega ni biuti au e dakudra e drau na tamata meu waraka na noqu gauna, ia a kauti au yani ki na dua na katuba, ka mai wavutu e mataqu e dua na tamata balavu au se bera ni bau raica vakadua ena noqu bula.

E kaya, “O au o Mr. Dawes.”

Sa taleitaki dina, ia e rawa ni o raica na levu ni noqu madua. O ya o Mr. Dawes, o koya e taci Dawes na Mata ni matanitu, o koya o Rufus Dawes. Au sega ni kila ni tiko e dua na Rufus Dawes e vuravura.

“Vinaka,” Au kaya, “Au lako mai meu mai tukuna ni oqo e dua na soqo ni marau vakasakiti, meu mai vakaraitaka na noqu taleitaka na veika o vakayacora ena nomu tuvalaka ka raica me yacova ni oti. E vakasakiti na veika sa rawa, ka sa dua na ka ni vuli levu vei ira e vuqa na tamata. Au kila ni o kemuni e dua na turaga osooso, oqori ga na veika au via mai tukuna.”

“Vinaka vakalevu na veikauwaitaki,” e kaya. “Curu mai.”

“Sega, oqori ga na ka au via mai tukuna,” au sauma yani.

“Curu sara mai.” E kaya o koya.

“Sega, e duanadrau na tamata era tu oqo me ra raici kemuni.” Au kaya yani.

“E sega ni dua vei ira ena kaya e dua na ka vinaka me vaka o cavuta.”

Au sa mani curu i loma, buwawa noqu vakasama ka sa na rawa ni cavuka noqu icegu, voleka sara. E cikevaka meu dabe, kau tukuna sara yani: “Wawa mada, Mr. Dawes, era lako mai vei o ira na nomudou?”

“E Amerika?” e taroga mai.

“E dua ga na vanua e rawa.”

Qai kaya mai o koya, “O via kila na ivola ni kawa?”

“Io vakalevu sara ga.” Au sauma yani. “E dua vei ira na vale ni itukutuku ni kawa uasivi duadua e tiko e Salt Lake City.”

Qai kaya o koya, “Vosoti au mada vakalailai,” ka curu yani ki tuba mai nona valenivolavola ka lesu tale mai kei na dua na kateni me vaka na levu ni dua na iVolatabu ni matavuvale. E taura na nona isele, dolava na kateni, ka taura mai e dua na ioloolo ka ologi voli ena pepa malumu vulavula. E kauta tani na pepa malumu ka biuta e dela ni teveli e dua na ivola totoka duadua na kena dregati vata au se qai bau raica. E totoka na kena volai ka matata na kena ivakamacala, ka mai ceuti yani vakamatai na waqana ena koula.

Niu raica yani, au kaya, “Misita Dawes, oqori e dua na cakacaka totoka.”

“E dodonu me vakakina. E ruasagavulu kalima na udolu na dola na kena isau.”

“Io,” Au kaya, “e veiganiti kei na kena isau.”

Qai kaya o koya, “E dua beka na kena yaga vei kemuni?”

Au kaya, “Ena vakakina ke noqu.”

Qai kaya o koya, “Vinaka, taura me nomu!”—e biuta e ligaqu e ruasagavulu kalima na udolu na dola ni itukutuku ni kawa ni dua na tamata keirau se qai sota ga ena lima na miniti sa oti! Au sa qoroqoro dina. Sa mani dede vakalailai na neirau veitalanoa. Au tukuna vua na levu ni noqu marautaka, au na laki biuta ena vale ni volanikawa e Salt Lake City.

Ni bera niu biuta na rumu, e qai kaya, “Misita Smith, oqo na nona ivola ni kawa na tinaqu, na ivola ni kawa ni Gates. Keitou sa vakarautaka tale tikoga na ivolanikawa nei tamaqu—na matavuvale na Dawes. Ena vaka sara ga oqo. Ni sa oti, au na vinakata meu vakauta talega yani vei kemuni e dua na kena ilavelave.”

E limasagavulu na udolu ni itukutuku ni kawa!—e baleta walega na noqu via caka vinaka vua e dua. Au sega ni vakabauta ni vakacala ka o ya. …

Sa vukei keda tiko na Turaga; e vakasakiti na ivakarau ni kena dolavi na sala kei na nodra dau vakauqeti eso tale na tamata me ra vakarautaka na nodra itukutuku ni kawa. Ia ena so na gauna eda sega ni dau vakayagataka vakavinaka na noda madigi meda vakarautaka na noda itukutuku ni kawa, ni sa tukuna tiko vakadodonu na Turaga kevaka eda sega ni cakava na noda cakacaka ni valetabu eda na sega ni ciqomi vata kei ira na noda mate [raica na V&V124:32]. Oqo e dua na ka bibi. Oqo e dua na ka eda na sega ni rawa ni veisautaka, kevaka eda vakamaumautaka na noda madigi me yacova ni sa takali yani na bula. … Eda na sega ni rawa ni namaka me mai cakava ena vukuda na cakacaka oqo e dua tale.

Na Turaga, ena veisala eso, sa vakayaloqaqataki keda tiko, vakasalataki keda, ka dusimaki keda meda cakava na noda cakacaka. Eso na matavuvale era sega ni rawa ni cakava vakataki ira, ena cakava tiko e dua na nodra itukutuku ni kawa ni valetabu, kei na nodra ivolatukutuku.

Kevaka eda cakava na noda itavi, ena cereki vei keda na noda itukutuku ni kawa—ena so na gauna ena dua na sala, ka so na gauna ena dua tale. O koya au vinakata kina meu vakatura vei kemuni, na taciqu kei na ganequ: meda cakava na noda itavi.¹⁴ [Raica na vakatutu 4 ena tabana e 97.]

Vakatutu ni Vuli kei na Veivakavulici

Taurivaka na veivakasama oqo ni ko vulica na iwase oqo se ni ko vakavakarau mo veivakavulici. Me ikuri ni veivuke, raica na tabana e viii–x.

Wilika na veitikina digitaki eso mai na masu ni vakatatabu ena Valetabu na Idaho Falls Idaho ena tabana e 87–88, ka wilika naV&V 109:1–5, 10–13 (mai na vakatatabu ena Valetabu e Kirtland). Vakananuma mada na lomamu ena nomu curuma na valetabu, ka vakasamataka na veika o sotava e vaqaqacotaka na nomu ivakadinadina ni valetabu e vale ni Turaga.
Na cava na vuna e tukuna o Peresitedi Smith e tara kina na valetabu? (raica na tabana e 88–89). Na cava meda cakava me ra vakauqeti kina na itabagone me ra kakavaki yani ki na vakamau ena valetabu?
Wilika na italanoa ena tabana e 90–91. Na cava eso na sala rawarawa vua e dua e osooso vakalevu me vakaitavi ena cakacaka ni tuva kawa? Na cava e rawa ni ra cakava na veikuoramu ni matabete kei na iSoqosoqo ni Veivukei me ra vakaitavi kina?
Taleva na iwase ka tekivu ena tabana e 94. Sa vukei iko vakacava na Turaga ena nomu tovolea mo kunea na itukutuku me baleti ira na tubumu? Na cava tale eso na veivakalougatataki o sa ciqoma ena nomu vakaitavi ena cakacaka ni vola kawa?

iVolanikalou Veisemati: Malakai 4:5–6; Vunau kei na Veiyalayalati 97:15–16; 110; 124:39–41; 128:9, 15–24.

Veivuke ni Veivakavulici: Ni dua na tamata e wilika mai cake na ivakavuvuli nei Peresitedi Smith, sureti ira na vo ni lewe ni kalasi me ra “vakarorogo ka vakasaqara na ivakavuvuli bibi se vakasama. Kevaka e dua na malanivosa eso na vosa se malanivosa matalia, vakamacalataka taumada ni bera ni wiliki na malanivosa. Kevaka e dua e dredre vua na wiliwili ena ilawalawa, kerea me so era bole ka me kakua na veivukevuke” (Na Veituberi, Me iLutua ni Noda Bula, 56).

Loma ni Valetabu na Kirtland, na vanua a rairai mai kina vei Josefa Simici na parofita ni gauna makawa o Ilaija ka solia vua na kaukauwa ni veivauci kei na idola ni cakacaka ena vukudra na mate.

“E vica wale na vanua e vuravura e rawa ni da vakamau kina me baleta na tawamudu, oqori ena veivaletabu ni Kalou.”

“Vakasamataka na nodra gugumatua kei na nodra yalodina o ira era dau lako yani ki na valetabu e veisiga ka laki vakaitavi ena vukudra era sa toki yani ki yasa kadua.”