Wase 11

Na iVakatakila mai vua na Kalou kivei Ira na Luvena

Na Tamada Vakalomalagi e dusimaki keda yadudua ka vakakina na Lotu mai vua na Yalo Tabu.

Na Bula nei George Albert Smith

Me vakavulica na veika e baleta na bibi ni ivakatakila me dusimaki kina na Lotu, e talanoataka kina o George Albert Smith na ka a sotava ni vodo waqavuka tiko mai Los Angeles, California, ki Salt Lake City, e Utah:

“Ni sa voleka ni yaco ki Milford, e Utah, vakasauri ga keimami sa vuka curuma yani e dua vei ira na kabu vavaku duadua au se qai bau raica. Au a saga meu rai i tuba mai na katubaleka ia au a sega ni raica rawa e dua na ka ena kabu o ya. E sega sara ga ni dua na ka e laurai rawa ena taudaku ni waqavuka.

“Au sa kila sara ni keimami sa voleka sara yani ki na veiulunivanua ka tolu na maile ena dua na miniti na totolo ni vuka, ka keimami sa na vuka baleta na deladra me yaco rawa yani ki na Buca na Salt Lake. Au sa lomaleqa ka taroga lo, ‘Ena rawa vakacava vei pailate me kunea na sala ni sega ni rawa ni raica e dua na ka?’ Sa tiko vua na nona kabasi ia ena rawa ni mua cala na waqavuka. Sa tiko vua na misini me vakatakila na neimami yawa mai na dela ni waitui ia e sega ni kila na neimami yawa mai na qele e ra. Au nanuma de sa vuka yawa sara tiko i cake me galala mai na ulunivanua ka tiko ena keimami tadrua vata kei na Buca na Salt Lake ka saga me kunea rawa na iroro ni waqavuka ena kena waqa mai na cina ni bikeni ke keimami volekata yani, ia au rere niu vakasamataka na kena rerevaki me keimami yali vakatawa macala ka calata na bikeni ena iroro ni waqavuka.

“Ena noqu lomataqaya au a gole yani ki na nodrau rumu na pailate kei nona ivukevuke meu laki raica na sala cava rau sa kila kina na vanua keimami sa gole tiko kina. Au sega ni kila rawa se sa dua na drau na fute, dua na udolu na fute se tini na udolu na fute e dela ni qele e ra kau sega ni kila na sala rau kila tiko kina, vakavo ga ke viavia yacova toka yani. Au raica rawa ni tiko ena daligai pailate e dua na gacagaca lailai me vakataka era dau vakayagataka na opareita ni talevoni e valenivolavola. Au taroga sara vei ivukevuke ni pailate ni rau kila vakacava ni sa donu tiko na sala keimami vuka tiko kina se kila kevaka keimami sa lako cala tiko. A sauma mai, ‘Ena gauna keimami sega ni raica rawa kina e dua na ka, keimami sa na dusimaki ga ena bimi (beam) ni retio.’

“‘Na cava o ya?’ au a taroga. A vakamacalataka ni bimi o ya e vakatoka e dua na sala livaliva ena tadrua ni rua na ka, vei keda oqo na rua na ka oqori o ya o Milford kei na Salt Lake City. A kaya ni gacagaca e tiko e daligai pailate ena vakaraitaka ni gauna sa na tiko na waqavuka ena bimi, ena rogo tiko mai e dua na rorogo, ia kevaka me gole ki na imatau se ki na imawi na waqavuka ena veisau na irorogo ka na vakasalataki o pailate ena dua na kiliki me vaka na ki ni wa-ni-vosavosa (telegraph). Kevaka ena … vuka lesu ki na bimi se sala donu, ki na sala ni veitaqomaki, ena oti na kiliki ka yaco tale mai na imatai ni irorogo. Kevaka meda na vuka tikoga ena bimi eda na yaco bula rawa ki na noda iyacoyaco ena veitaqomaki.

“Au a lesu tale ki na noqu idabedabe ena yalovakacegu levu niu sa kila ni veitalia ga ke keimami sa solegi ena kabu kei na butobuto ka sega ni raica se vakila rawa na vanua keimami tiko kina, sa na ciqoma tikoga kina o pailate na itukutuku ni keimami sa tiko ena sala dodonu ka sa na kila o koya ni sa voleka na neimami iyacoyaco. Ni oti e vica na miniti au sa vakila ni sa vakaroro na waqavuka. Keimami sa vuka sivita mai na dela ni ulunivanua ka sa voleka yani ki na iroro. Ni keimami sa voleka ni ro keimami sa raica sara na kaukauwa ni cina ena rara ka tukuna tiko mai na vanua me na tau kina, ka sa ro sara vakavinaka na waqavuka kei ira na kena kako vakamareqeti me vaka ga ni ro e dua na ico e dela ni wai, ka kele yani vakamalua ka keimami kalawa mai na neimami ilelele oqo ka butu yani i ra, ka yalomarau ni keimami sa yaco tale i vale. …

“Au dau vakasamataka lesu ena vuqa na gauna na ivakavuvuli au vulica rawa mai na waqavuka o ya kau a vakayagataka ena veika au sotava ena Lotu i Jisu Karisito ni Yalododonu Edaidai. …

“E sega walega ni solia vei keda na Turaga na ivakasala era sa volai oti tu ena ivolanikalou me dusimaki keda ia sa vakatikora talega e dua na iliuliu ena Lotu oqo, e dua vei ira na luvena sa digitaki ka vakatikori ka tabaki me Peresitedi. Sai koya na noda pailate ka na dusimaki tiko o koya ena dua na domo me na rawa kina vua me liutaki keda ki na vanua meda lako kina. Kevaka eda sa tamata vuku eda na sega ni vakatara me veisaqasaqa kei koya na noda vakatulewa ia eda na marau meda rokovi koya ena nona itutu ena gauna e tokoni koya tiko kina na Turaga.”

A vakayagataka talega o Peresitedi Smith na ka a sotava ena waqavuka me vakavulica ni sa rawa vei keda yadua meda ciqoma na ivakatakila me dusimaka na noda dui bula kevaka eda sa bula kilikili:

“Kevaka eda sa bula tiko ena ituvaki e dodonu meda bula tiko kina sa qai voqa mai vei keda na vosa malua ni domo lailai e vinaka, ka tukuna mai ni oqo na salatu e veitaqomaki, dou mai lako tu ga kina. … Kevaka meda na qai cakacala tiko ena qai vosa malua mai na domo oqo kivei keda ‘saumaki ka lesu, ko sa cakava e dua na ka cala; ko sa sega ni via rogoca na ivakasala nei Tamamu Vakalomalagi.’ Gole tani mai na nomu cakacala ni se vo tiko na gauna, ni kevaka mo na gole tani sara vakabalavu mai na salatu dodonu ko na sega ni rogoca rawa na domo ko na qai rawa ni yali tawamacala. …

“Sa noqu ivakasala vei kemuni mo ni taukena na Yalo ni Kalou ka maroroya tiko ni sala duadua ga eda na maroroya tikoga kina o ya meda na bula volekati koya tikoga, ka muria tiko na nona ivunau. … vakarorogo ki na domo lailai e vinaka ni na dau dusimaki kemuni tikoga kevaka ko ni sa kilikili kaya ena salatu e tiko kina na bula tawamudu.”¹ [Raica na vakatutu 1 ena tabana e 129.]

iVakavuvuli nei George Albert Smith

Na Kalou sa dau vakatakilai Koya mai vei ira na Luvena ena noda gauna oqo me vaka ga ni a vakayacora tu mai o Koya mai liu sara.

Sa qai dua na madigi vinaka meda bula tiko ena dua na gauna ni vuravura oqo ni da sa kila tiko ni bula tiko na Kalou, ni da kila tiko ni o Jisu Karisito na iVakabula ka noda Dauveivueti, kei na noda kila tiko ni na dau vakatakilai Koya tikoga mai na Turaga kivei ira na luvena era sa vakarautaki ira tiko me ra ciqoma na nona veivakalougatataki! Au sa mai raica tu oqo ena mataka nikua na matadra e dua na ivavakoso levu [ena dua na soqoni ni koniferedi raraba ], ka vuqa vei ira era marautaka tiko na veivakauqeti nei Koya sa Kaukauwa Sara, ni gauna era masu kina, era sa masu tiko vei Tamadra mai lomalagi ni ra kila tiko ena saumi dina mai na nodra masu ena veivakalougatataki ki buradeladra. … Eda kila ni sa tiko e dua na Kalou mai lomalagi, ni sai Koya na Tamada, ka sa dau cakava na veika baleti keda, ka sa cakava tiko mai oqori mai na ivakatekivu kei vuravura, ena gauna rau a vakatikori kina e vuravura oi rau na imatai ni luvena.²

Na duidui baleta na Lotu cecere oqo kei ira na veimatalotu tale eso vakatekivu sara mai liu o ya ni da vakabauta na ivakatakila vakalou; eda vakabauta ni vosa tiko mai na Tamada ki na tamata me vaka a vakayacora taumada tiko mai ena gauna nei Atama. Eda vakabauta ka kila—ka cecere cake mai na vakabauta walega—o ya ni sa vakadeitaka na ligana o Tamada ena vuravura oqo me ra vakabulai kina o ira na luve ni tamata.³

E sega walega ni baleta ni da sa vakabauta na ivola oqo [na iVola i Momani, na Vunau kei na Veiyalayalati, kei na Mataniciva Talei] ka da sa vakatokai meda sa mataqali tamata duatani ia sa vakakina ni da sa vakabauta nuidei tiko ni o Tamada mai lomalagi sa vosa tiko mai ena gauna oqo kei na veiitabayabaki oqo. E ka dina, ni da sa kila tiko ni da sa veivosaki tiko kei lomalagi. Eda vakabauta ni o Jiova sa vakananumi keda tiko vakakina, na nona veivakayarayarataki vata ga vei keda ka a vakayacora vei ira na luvena era a bula voli ena vuravura oqo ena veigauna sa oti yani.

Era kaya na tawa vakabauta, ni o ira na lewe ni Lotu i Jisu Karisito ni veiitabayabaki kei vuravura era sa tamata duatani. Ena gauna e dau vosa kina na Turaga mai vei ira na nona italai, era kaya kina e vuqa na lewe i vuravura ena duidui ni veigauna oqori, “Au sega ni vakabauta na ivakatakila.” Na gauna oqo ena sega talega ni vakuwai mai kina. O ira na udolu, io, o ira na milioni, luvei Tamada era bula, ena vuravura oqo era sa tokaruataka tiko na itukutuku ni veigauna makawa ena nodra cakitaka tiko ni sa vakatakila tale mai na Kalou na nona lewa vei ira na luve ni tamata, ka ra kaya ni ra sa sega ni gadreva e dua tale na ivakatakila.⁴

Eda sega kina ni vakabauta ni sa sogolati mai vei keda ko lomalagi, ia na Tamada tikoga o ya ka dau lomana ka vakamareqeti ira na luvei Isireli e lomana ka vakamareqeti keda. Eda vakabauta ni da sa gadreva vakakina talega vakalevu na veivuke nei Tamada Vakalomalagi me dusimaka na noda bula ena kena o ya. Eda kila kina ni gauna kei na itabayabaki eda bula tiko kina oqo sa mai voroki na kena dregati tu, ka sa vosa tale mai na Kalou mai lomalagi.⁵ [Raica na vakatutu 2 ena tabana e 129.]

E veidusimaki tiko na Turaga vei ira na Nona tamata ena ivakatakila kivei Peresitedi ni Lotu.

A tauyavutaki na Lotu i Jisu Karisito ni Yalododonu Edaidai mai na nona ivakaro sara ga na Tamada Vakalomalagi. Mai na vatu ni ivakatakila a tauyavutaki kina na Lotu oqo ka sa dusimaki kina ena ivakatakila.⁶

Sa ka talei ena gauna oqo meda lewena e dua na lotu, ka ra tiko kina o ira na lewenilotu era vakabauta ni Turaga sa vosa tiko mai vei ira na nodra iliuliu. Ena gauna eda sa vakasalataki kina mai vua na Peresitedi ni Lotu oqo, eda vakabauta ni sa tukuna tiko mai vei keda na veika e gadreva na Turaga meda vakayacora. Kivei keda sa ka cecere cake oqo mai na nona ivakasala ga e dua na tamata. Eda sa vakabauta oqori, ka sa vakadeuca na yaloda, ka da sa vakauqeti kina meda vakavouya na noda inaki dei meda tamata yaco ni sa vinakata vakakina na Kalou.⁷

Era tiko vakakina o ira na tamata vakilakila e loma ni Lotu, era saqata na ivakasala nei [Peresitedi ni Lotu], ka ra sega ni kila tiko ni ra sa saqata sara tikoga na Turaga ka ra sa lutu yani ki na butobuto kei na rarawa, ka vakavo ga ke ra veivutuni era na sega ni kunea e dua na tikina ena matanitu vakasilesitieli.

Meda sa qai nanuma tiko ni o Peresitedi ni Lotu oqo sa nona dina na ilesilesi me liutaka na Lotu ena bula vakayago oqo me matataka tiko kina na iVakavuvuli ni lomalagi kei vuravura.⁸

Me vaka ni so na gauna era cakava na tamata eso me ra qaqa kina ena so na sala, ni ra gole yani vua e dua se so na tamata ka ra kaya, “Au sa tadra na veika oqo ni sa vinakata mai na Turaga me vakayacori na ka oqo,” ia mo ni kila ni ra sega ni tiko ena yasa ni Turaga. Na tadra kei na raivotu kei na ivakatakila me baleti ira na luve ni tamata ena dau yaco ga vua na nona italai sa lesi. Ena rawa mo tadra ka vakatakilai mai eso na ka me baleta na nomu vinaka se me veiraurau kei iko, ia ena sega ni yaco mai baleta na Lotu. … Meda sa qai kakua ni lawakitaki.⁹

Sa vakasinaiti na yaloqu ena vakavinavinaka edaidai meu kila kina ni gauna eda tomana tikoga na noda lewena tiko na Lotu ni sa kila tiko na sala o kena iliuliu, kevaka meda qai muria na nona veidusimaki … eda na sega ni sotava kina na tavuki ni vanua vakayalo sa sotava tiko ena gauna oqo ko vuravura ia eda na lako ga ka caka vinaka yani, vakalougatataki ira na tamata, ka marautaka na veitokani kei ira eda lomana.¹⁰ [Raica na vakatutu 3 ena tabana e 130.]

Sa soli kina vei keda yadudua na madigi meda vakauqeti mai vua na Yalo Tabu kevaka eda muria na ivunau.

Au vakabauti kemuni, na taciqu kei na ganequ. … Sa soli kina vei kemuni na kila-ka vata ga o ya ni sai koya sa vakatulewa tiko ena Lotu. Sa soli kina vei kemuni na veivakauqeti vata ga o ya e drodrovi ira yani sa vakayacora na Kalou me ra tabaki me ra Nona iliuliu. Sa soli kina vei kemuni na veivakauqeti ni Yalotabu, kei na kila-ka ni sai Koya na Tamamuni, ni mai cavuta na “kemuni” au sa tukuni ira kece era sa muria tiko na vunau nei Tamada, ka ra sa vakaivotavota oti ena veivakayarayarataki kamica ni Yalo ni Turaga ena Lotu i Karisito. … Sa soli kina vei keda yadudua na veivakauqeti ni Turaga ena sala yadudua eda sa bulataka tiko kina e dua na bula sa vakalou.¹¹

Na vanua cava ga o ni na lako kina, ko ni na raica kina ni sega ni dua na ilawalawa me vaka oqo, o ira yadua na lewena era sa vakabauta na Kalou; kevaka mo ni qai tarogi yadudua e vica vei kemuni e tiko na nona ivakadinadina, sega ni vakabauta ni a tukuna mai e dua na tamata, ia e vica sara mada vei kemuni sa vakadeitaka ni oqo sa cakacaka ni Kalou, ni o Jisu na Karisito, ni da sa bula tawamudu tiko, ni o Josefa Simici a parofita dina ni Kalou sa Bula tiko, ko ni na qai sauma mai ni sa tiko vei kemuni na ivakadinadina oqo e laveti kemuni cake ka vaqaqacotaki kemuni ka solia vei kemuni na vakacegu ni yalo ni ko ni toso yani ki liu ena vuravura oqo. …

… Niu se gonetagane au sa vulica kina ni oqo na cakacaka ni Turaga. Au vulica kina ni ra a bula tiko na parofita ena vuravura oqo. Au vulica kina ni veivakauqeti nei Koya sa Kaukauwa ena vakayarayarataki ira era bula tiko me ra na marautaka, eda sa qai sega kina ni vakararavi tiko vua e dua se rua se ono na tamata. E udolu na lewe ni Lotu oqo era kila tiko—ni oqo e sega ni baleta na vakanananu cirivoli—ia era sa kila dina ni bula tiko na Kalou ni o Jisu na Karisito ka sa ikeda na luve ni Kalou.¹²

Ko ni sa sega walega ni vakararavi tiko ki na itukutuku makawa, se nona ivakavuvuli e dua na tamata, mo ni kila kina ni oqo sa cakacaka ni Turaga, ia sa baleta ga ni sa mai navuca kina e yalomuni ena isolisoli ni Yalo Tabu. Ko ni sa qai sega kina ni vakatitiqataka na kemuni itekitekivu, se na vanua cava ko ni sa gole tiko kina ni sa oti na bula oqo, kevaka ko ni na yalodina tiko ki na veika ko ni sa nuitaki tiko kina.¹³

Na ivakadinadina ena sega ni solia mai vei keda e duatani tale. Na ivakadei ena lako mai vua na Tamada Vakalomalagi.¹⁴

Au tucake tu nikua ena vakavinavinaka cecere ki na kila-ka sa yaco mai vei au. Au sa vakavinavinaka niu sega ni vakararavi vua e dua na tamata ena vuku ni ivakadinadina au taukena tu oqo. E dina, au vakavinavinaka vakalevu ki na nodra veivakayaloqaqataki eso era taukena tu na rarama kei na dina oqo, era veivaqaqacotaki ena nodra bula sa savasava, ia au sega ni vakararavi vua e dua vei ira me baleta na kila-ka ni sa bula tiko na Kalou, ni ko Jisu Karisito na Dauveivueti ni kawatamata ka sa parofita ni Turaga o Josefa Simici. Na veika kece oqo au sa kila ga vakai au.

… Au reki niu kila ni sa dina na kosipeli, kau sa vakavinavinakataka na Tamaqu Vakalomalagi ena yaloqu taucoko ni sa vakatakila mai vei au.¹⁵

Mai na veivakalougatataki kece e lako mai vei au ena bula oqo na kena e talei duadua o ya na noqu kila ni sa bula tiko na Kalou ka ni sai koya oqo na nona cakacaka, baleta ni oqo era oka kece kina na veivakalougatataki tale eso au nuitaka tiko meu na marautaka ena bula oqo se ena bula sa bera mai.¹⁶ [Raica na vakatutu 4 ena tabana e 130.]

Na Yalo Tabu sa idusidusi veitaqomaki ena salatu ni bula vakayago oqo.

Na veitokani kei na Yalo ni [Kalou] … sa idusidusi veitaqomaki ena salatu ni bula vakayago oqo ka sa dua na ivakavakarau veivakadeitaki ki na dua na tikina ena nona matanitu vakasilesitieli.¹⁷

Eda wilika ena Jope ni sa tiko vua na tamata e dua na yalo, ni veivakauqeti nei Koya sa Kaukauwa sa solia vua me kila vakavinaka [raica na Jope 32:8]. Kevaka meda muria tiko na vunau ni Kalou sa na soli vei keda na veivakauqeti o ya, kevaka meda qai bula me vaka era sa bula na luvena tagane na Kalou, ena yaco mai vei keda na veivakauqeti o ya, ka na sega ni dua ena tarova rawa, ka na vakatorocaketaki na yagoda kei na noda vakasama kei na noda bula savasava ena bula vakayago oqo, ka yaco tikoga na veivakatorocaketaki oqo ki na veiitabayabaki ni veigauna tawamudu.¹⁸

Na veitokani kei na yalo ni Turaga sa iwali vinaka ni lomaocaoca, … kei na rere kei na veika tale eso e dau solegi keda ena bula oqo.¹⁹

Ena gauna ratou a tiko vata kina na tisaipeli kei na iVakabula eratou qoroi koya ka ratou sega tiko ni kila ni sa cecere sara o koya, me yacova ni sa yaco mai vei iratou na kaukauwa ni Yalo Tabu, me yacova ni ratou sa papitaisotaki ena bukawaqa eratou sa qai taqeya rawa kina na leqa ka vosota rawa na veivakacacani e voleka sara me sega ni vosoti rawa kina na bula. Ena veivakauqeti nei Koya sa Kaukauwa sa solia kina vei ira na kila ni ra bulataka tiko e dua na bula e tawamudu, kevaka me ra qai yalodina tiko era na kila kina ni gauna sa vakatikori sobu kina na yagodra ena mate era na vakaturi cake tale mai na ibulubulu ki na lagilagi kei na sega tale ni mate rawa.

Oqori na vua ni veivakauqeti ni Yalo ni Kalou e yaco vei ira, na veivakauqeti nei Koya sa Kaukauwa ka solia vei ira me ra kila vakavinaka. …

Sa noqu masu ni Yalotabu e dau tuberi keda tikoga ena salatu ni dina kei na ivalavala dodonu me sa na tiko vata ga kei keda, ka sa noqu masu ni gagadre e lako mai na veivakauqeti nei Tamada Vakalomalagi me na dusimaki keda tikoga ena salatu ni bula.²⁰

Ena gauna sa mai cava kina na cakacaka ni bula oqo meda sa kila vakakina ni da a vakarorogo ki na vosa malua, ni domo lailai e vinaka sa dau dusimaki keda tiko ena salatu ni ivalavala dodonu, ka kila ni sa baleta ga na kena dolavi vei keda na katuba ni matanitu Vakasilesitieli, me baleti keda kei ira eda dau lomana, meda lako yani ki liu ki na veiitabayabaki kecega, … ena marau tawamudu.²¹ [Raica na vakatutu 5 ena tabana e 130.]

Vakatutu ni Vuli kei na Veivakavulici

Taurivaka na veivakasama oqo ni ko vulica na iwase oqo se ni ko vakavakarau mo veivakavulici. Me ikuri ni veivuke, raica na tabana e viii–x.

Ni o wilika “Na Bula nei George Albert Smith” (tabana e 121–123), vakasamataka mada na sala ena vakayagataki kina na vosa vakatautauvata nei Peresitedi Smith ki na noda ilakolako ni bula vakayago oqo. Na cava beka eratou vakatakarakarataka tiko na kabu, na bimi ni retio, kei na rorogo kiliki? E sa vakaroti kemuni beka vakacava na Turaga mai na veika rerevaki ka vukei kemuni mo ni tikoga ena salatu ni bula tawamudu?
Ena tabana e 121–124, a vakaraitaka kina o Peresitedi Smith ni ivakatakila sa ka yaga sara nikua me vaka ga ena gauna makawa ni ivolatabu. Na cava beka o na kaya vua e dua ni ivakatakila era sa tiko ena ivolanikalou sa rauti keda vinaka me baleta na gauna oqo? Na veika cava o sa sotava sa vakavulica vei iko ni o Tamada Vakalomalagi “sa dau cakava na veika baleti keda”?
Taleva na iwase ka tekivu ena tabana e 124. O ni sa kila vakacava ni ivakasala o ya nei parofita sa lako mai vua na Turaga ka “sa ka cecere cake oqo mai na nona ivakasala ga e dua na tamata ”? (tabana e 125). Ena rawa me vukei kemuni vakacava na ivakatakila ki na tamata yadudua mo ni ciqoma kina ka bulataka na ivakatakila e soli mai vua na parofita?
Ni ko vulica tiko na iwase ka tekivu ena tabana e 125, vakasamataka mada na sala o a rawata kina na nomu ivakadinadina ni kosipeli. A vukei iko vakacava na nodra ivakadinadina eso tale? Na cava beka o a cakava mo kila kina vakai iko na ka dina?
Ena iotioti ni iwasewase ni ivakavuvuli (tabana e 127–128), vakasaqara na vosa kei na malanivosa eso e vakamacalataka na sala e rawa ni vukei keda kina na Yalo Tabu. Vakasamataka mada na veika o ni rawa ni cakava mo ni bula kililiki tikoga kina ena veitokani ni Yalo Tabu ena nomuni bula.

iVolanikalou Veisemati: Joni 15:26; 1 Nifai 10:17–19; 2 Nifai 32:5; Moronai 10:3–5; Vunau kei na Veiyalayalati 1:38; 42:61; 76:5–10; Yavu ni Vakabauta 1:9

Veivuke ni Veivakavulici: “Mo kua soti ni lomaleqa ke balavu na gauna era na taura na nomu lewenikalasi, ena gauna era tarogi kina. Tovolea mo kua ni dau sauma ga vakataki iko na nomu taro; solia vei ira na lewenikalasi na gauna me ra sauma mai kina na nomu taro. Io ena gauna era dau vagagalu kina, eso na gauna e rawa ni kena ivakaraitaki ni ra sega ni taura vinaka na taro ka na gadrevi mo vukica na kena itautau me matata” (Veituberi, Me iLutua Ni Noda Bula, 79).

O George Albert Smith kei Lucy, na marama watina. A vakayagataka o Peresitedi Smith na ka a sotava ena waqavuka me vakatavulica kina na bibi ni ivakatakila.

“Sa soli kina vei keda yadudua na veivakauqeti ni Turaga ena sala yadudua eda sa bulataka tiko kina e dua na bula sa vakalou.”